Esra 6 - Nobonob Baibel

King Sairus nug genab Juda danab ag Yawenu mettid lag eɗun buuglagnu ɗo meum

¹ Tatenai, Setar Bosenai amu ahilti ehanittak ele ag pas amu meeg ukke, King Darius nug antta, nug haknunab nai laa ha, nuhikkud nai yaak danab ag buk itoɗiak alag, anukkan kaya buk itoɗiak amuppa yaak daatte, buk amuam Babilon appa en maknu oo, oo amuppa daappig amu, ag buk amu ebqenana, Yawenu mettid lagnu nai amu buk amuppa daattetai, o iitta ii daatte anidkkulagnu aum.

² Darius nug anam he, danab ag amu anidkkulagnu heeg ukke ukke, ag prowins laa onig Midia, aab Ekbatana ooppa aben aɗ ɠagattagnab ele, appa ag buk itoɗiak laa anidppig. Buk itoɗiak amuppa yaak inam dayom. “Imuam King Sairusnu nai iikku.

³ King Sairus nug king dayaya, nuhig king dayaknu maɗ digmakppa nug Kayaknu mettid lag Jerusalem appa daakkunu ɗo laa meum. Nai amuam inam. ‘Jerusalem appa danab ag doɗ main, Kayak mettaglagnu amu, Juda danab ag eɗun, Kayaknu mettid lag eɗua daakkunu, ag lag amu buueg! Ag lag amunu men ukku mewona, ag lag buuglag; lag amunu emaitak am 27 mita, attan tak nuhig ele 27 mita daakku.

⁴ Ag lag amu buuglagnu amu, ag men okkai okkai akkan, ukku duqona, amu qaɗeppa men okkai maattona, amu qaɗeppa baula maadna, amu qaɗeppa baula maattona, aria men amu qaɗeppa ag ad okkai mekkulag. Lag amu haknu men doɗo amu da, king, dahil enppa men doɗo aon mattan hekkulag.

⁵ Laa amu, haen Nebukatnesar nug Juda danab eɗatta, nug lag amunu tappiɗ keeke, golppa hak, silwappa hak ele Kayaknu mettid lag, Jerusalem dayom, nug appanu awa uɗia, Babilon ippa meum amu, ag keeke amu oh aon, Juda danab laa eppegppa meppeg, nug awa, Jerusalem ukka, abenppa maɗ! Nug Kayak laugppa maɗ!’ Sairus nug ɗo nai anam meum.

⁶ Sairus nug ɗo nai anam meum amunu, da Darius, da ɗo inam mettem. Tatenai, na Persianu prowins Yupretis lenu qaban uɗitteppanu gawana daattem, Setar Bosenai ele, aa ahilti ehanittak anuqak ele, da nai imu ahilagnu yaattem. Ag Jerusalem appa baula aib goppig.

⁷ Ag Juda dilag gawana, Juda dilag ikki danab ele ag Kayak laug amu buutteb, ag amu ii buumnanu baula uug aib madappig; uuadppeg, lag amu dayomppa eɗua daakkunu buuglag!

⁸ Laa amu, da geha iikku ɗo laa imu ele mettem. Ag danab okkai le Yupretis heqo laih appa dahil ehanittak daatteb, ag appan danab ah dilagppa takis aotteb amu, ag men doɗo aotteb amuppanu, ag men doɗo elele aon, Juda dilag ikki danab ag Kayak laug amu buuglagnu matteg! Uɗat amu uuppeg daamanu, ag anam heig!

^9-10 Laa amu, mana mettak danab Jerusalem appa daatteb, ag Kayak hab attan daatte, ag Nug oo hette bia mana mettak hena, ag da, king, amu da bekkalad ele, ihinignu ag Kayak unuqidppeg, Nug ehanikkeb, ig ena daagnignu, mana mettak danab amu, ag manaknu ofa henana, Kayak hab attan daatte, Nug mettaglagnu appeg, amu ag aon matteg! Ag makau gaiɗ, sipsip dawai, sipsip gaiɗ, wit, sol, wain, am goɗennu ele appeg amu, ag mattaglag. Ag deɗ deɗppa matteg! Aib tippalppig!

¹¹ Laa amu, da ɗo imu mettem amu, da aakku memi daatte. Nai amu, am ag aɗi aɗi hekkulagnu ippunadtte. Am anam ippunadtte amunu, aun laa nug amu ii ha, nug nai amu baolikku dayeb amu, eheɗ hak nuhig, amunu nob maknu am inam: laa ag danab amu, nug laugnu ad okkai laa hiɗan aon, aeg hoin, galan, nug ad amuppa yaappeg noa dayaɗ! Ag amu hewona, ag nug laug loppaɗna heppeg, kinipan ameg okkai hume tak anamib dayaɗ!

¹² Amu king laa nug, o huu laa ag dahil ɗo nakok laa eɗukkunu heppeg, o ag Kayaknu mettid lag Jerusalem daatte, Kayak Nug he, Nug onig appa daatte amu, ag lag amu heppeg nauhkunu heppeg, Kayak Nug heeb, ag nauhkkulagnu ool daatte. Da Darius, da ɗo imu iikku memi daatte. Danab oh ag yagbak doon, dim lamidna heppeg, meu oaɗ!” King Darius nug nai amu me, Tatenai, Setar Bosenai amu ahilti ehanittak ele, ahilagppa ukkom.

Juda Kayaknu mettid lag buueg be, ag lag amu qeapippig

¹³ King Darius nug ɗo meum amunu, Tatenai, nug Persianu prowins Yupretis lenu qaban uɗitteppanu gawana, Setar Bosenai ele, am ahilti ehanittak ele ag nai amunu yagbak doon, dim lamidppig.

¹⁴ Ag anam heppig amunu, Juda dilag ikki danab ag Kayaknu mettid lag heegeg, propet danab Hagai, propet laa Ido buɗub Sekaraia ele, aa naippa ɠagattag aqaeheh, ag lag amu heppig. Ag Kayak, Israel dilag Kayak, ag nuhig haknunab anak, amu Persia dilag king Sairus, Darius, Artekserksis ele, ahilag ɗo maknu anak, ag ele appig bia, ag Kayaknu mettid lag buun malappig.

¹⁵ Ag lag amu heegeg ukke ukke, King Darius nug Persia dilag king dayaya, nuhig king dayaknu maɗ eblaih laippuppa, maɗ amuppa kalam Adar, kalam amunu deɗ ewamppa, ag mettid lag amu, ag hena malappig.

¹⁶ Ag deɗ amuppa lag malan, deɗ amu dimppa Lewi buɗubppan mana mettak danab, Lewi buɗubppan mana mettak danab iitta, aria Israel danab ah laa ele, amu oh ag Babilon wanppa diia ukka laih me dayak danab ah daan, eɗun uɗippig, ag oh gamag ahak doon, lag amu qeapinna, Kayaknu tituana medappig.

¹⁷ Ag Kayak laug qeapinna Kayaknu tituanna mettaglagnu amu, ag makau dawai 100, sipsip dawai 200, sipsip gaiɗ 400 manadna, Kayak mettan, ag meeme dawai 12 ele, ag anen anen am Israel dilag huu okkai anen anen dilagnu, ag Israel oh dilag ib etta hipunin haknu ofa daaglagnu ele manadna Kayak medappig.

¹⁸ Ag amu hena, ag mana mettak danab, ahilkad obatak anen anenppa, ahilag haenppa uɗat hekkulagnu otin maadppig. Ag Lewi buɗubppan mana mettak danab iitta, ag ag ele Jerusalem appa Kayaknu mettid lag, amuppa ahilag uɗat hekkulagnu huu anen anenppa daan, uɗat amu hekkulagnu otin maadppig. Ag Moses bukppa yom bia, amu oh heppig.

Juda buɗub eɗun uɗippig ele, ag Pasowanu Hobul heppig

¹⁹ Aria, ag Kayaknu mettid lag hena malaeg, maɗ amu iitta me, maɗ bauppa, maɗ amunu kalam anuqaknu deɗ 14ppa Juda danab ah ag diia ukka laih me dayaknu eɗun uɗippig ele, ag Pasowanu Hobul heppig.

²⁰ Lewi buɗubppan mana mettak danab, Lewi buɗubppan mana mettak danab iitta ele ag oh Kayak ele ouqa dayaknu elele daaglagnu beɗulag, oolag ele bappaidppig amunu, ag Yawe ele ouqak daaglagnu elele daappig. Ag anam daanna, Lewi buɗubppan mana mettak danab iitta, ag Pasowanu sipsip nag dawai baalag otaɗadppig. Ag ahilkadnu, mana mettak danab dilagnu, aria Juda danab dilagnu ele, amu oh ag diia ukka laih me dayaknu eɗun uɗippig amu, ag amu oh dilagnu aqadppig.

²¹ Ag amu heppig amunu, Israel danab ah ag Babilon appa diia ukka laih me dayak danab ah daan, eɗun uɗippig ag, amu laa ag Juda wanppa daanna, ag laihnu danab ah laa appa daan, kobol dubuttid ele heppig ele dilagppanu awaidna daan, ag Yawe, Israel dilag Kayak, ag Nug anidna, Nug dim lamidkkulagnu Nug madippig ele amu, ag ag ele oh qagmena, Pasowanu sipsip lappig.

²² Yawe Nug gamag ahak naɗi mattom amunu, ag deɗ eblaih aɗit ele Bret Yis Iitta Lanaknu Hobul Nakok lanan, gamag ahak dooppig. Yawe Nug he, Asiria dilag king nug ahilagnu ena doya ehanatte, ag Kayak, Israel dilag Kayak, ag Nug laug buuglagnu elele daan heppig amunu, ag gamag ahak dooppig.