Esra 5 - Nobonob Baibel

Tatenai nug pas laa Darius anidkkunu me ukkom

¹ Anam amu ⌊haen ukke⌋, propet danab Hagai, propet laa Ido buɗub Sekaraia amu, aa Kayak, Israel dilag Kayak, Nug Juda danab ah oh, laa Jerusalemnu, laa Juda wanppa laih laihnu amu, Nug ag oh ahilag gumattak daatte amu, aa Nug oɗeppa nai aoya, Nug onigppa Juda danab ah oh amelagppa propet nai mattiya, ⌊ag Kayaknu mettid lag buuglagnu⌋ apiɗ.

² Aa danab ah amelagppa anam aeh, Sealtiel bekka Serubabel, Josadak bekka Jesua ele aa Kayak laug, Jerusalem appa eɗua daakkunu uɗat am ⌊baula⌋ digmepiɗ. Aa uɗat amu heeheh, Kayaknu propet aa ehanatkulahnu daapiɗ.

³ Amu haen amuppa Tatenai, nug Persianu prowins Yupretis lenu qaban uɗitteppanu gawana dayom. Nug anam daye, nug, Setar Bosenai ele, ahilti ehanittak laala ele ag Juda heppig doon, ag ahan gona, Juda danab Kayaknu mettid lagnu uɗat heppig ele oɗ mattan appig. “Aun aum amunu ag Kayaknu mettid lag imu eɗun bappaidna henan daatteb?” aon oɗ madappig.

⁴ Ag anam oɗmak hewona, ag aun aɗi uɗat amuppa uɗat henana daappig onilagnu ele oɗmak heppig.

⁵ ⌊Uug Juda dilagppa bekkunu elele dayom,⌋ amge Kayak, Juda dilag Kayak, Nug Juda dilag ikki danab amu ehanatte, Tatenai aɗi ag paha Juda ag uɗat amu uuglagnu ii heppig. Iitta. Ag Juda hettebnu nai amu meppeg ukkeb, Darius antta mala, nai eɗua meeb uɗieb, aɗi ab doon, ag nai amu dim lamidkkulagnu heppig. Darius nug ag heppeg, Juda ag uɗat amu uuglagnu nai meeb uɗikku dayeb amu, haen amuppa ag amu hekkulagnu dabmeppig.

⁶ Tatenai, Persianu prowins Yupretis lenu qaban uɗitteppanu gawana, aria Setar Bosenai ele, ahilti ehanittak ele, amu oh ag Yupretis heqo laih, ag appan ehanittak anuqak danab daappig, ag oh, ag pasppa nai imu bappaidna meeg, King Darius anidkkunu ukkom.

⁷ Nai ag nuhigppa meeg ukkom am inam. “Nai imuam ig King Dariusnu yaattem. Ig na humidttem.

⁸ Amu ig ihinig dabmak imu na king, na imu dookkutnu am ena, anam dabmettem. Ig ahat, Juda atuppa gota, ig Kayak Attannab, nuhig mettid lag hettebppa temut. Juda danab ag gemu lag amu men okkai okkaippa henana, ag ad okkai ele gililppa metteb. Ag uɗat amunu yagbak doon hetteb; bodoettak iitta hetteb. Ag uɗat amu heegeg, elelenab gotte.

⁹ Ig gota, appa teta, ig lag hetteb amu anidta, ig ahilag ikki oɗ mattamut. ‘Aun aum amunu ag Kayaknu mettid lag imu eɗun bappaidna henan daatteb?’ oɗ mattamut.

¹⁰ Ig oɗ mattota, ikki danab aun aɗi uɗat amu gumanna aegeg hetteb ele amu, ig ag onilag mekkaglagnu amut. Am ig na, ag onilag anidkkutnu yaagnignu anam hemut.

¹¹ Ig ag anam oɗ mattaut, ag aakku nob imu mekkan appig. ‘Kayak, Nug hab, wan ele gumat-tte amu, ig nuhig maɗi nid daattem. King naɗi laa, ig memetanig anukkanu, nug mettid lag imu anukka ha malom, amu lag amu baula eɗua daakkunu iikku ig buuttem.

¹² Anukka ig mamenkad aɗi lag imu heppig, amge ig mamenkad aɗi ag kobol nau digdig heppig amunu, Kayak hab attan daatte, Nug oo nauhe, Nug he, ig mamenkad aɗi ag Kaldia ted Nebukatnesar, Babilon dilag king, ag nug eppegppa daaegeg, Nebukatnesar nug mettid lag imu he nauhe, nug ig mamenkad aɗi diia ukka he, ag Babilon appa diia ukka laih me dayak danab ah daappig

¹³ Anam aakku, amge Sairus nug Babilon dilag king abenab awa, nuhig king dayaknu maɗ digmakppa nug ɗo nai laa, ig Juda danab ig Kayak laug imu eɗut buugnignu ana meum.

¹⁴ King Sairus nug anam ha, nug keeke golppa hak, silwappa hak ele, Nebukatnesar nug Kayak laug Jerusalem dayomppanu awa ukka, Babilon appa kayak nuhig laugppa meum ele, nug amu awa, dimittim doa, nug danab onig Sesbasar eppegppa meum. Sesbasarnu amu, Sairus nug nug Juda dilag gawana daakkunu tituanom.

¹⁵ Amu King Sairus nug keeke amu Sesbasar eppegppa ma, amegppa aum. “Na keeke imu oh aon gona, Kayak laugppa nuhig abenppanab eɗun buuna, keeke imu aguppa me!” awa aum.’

¹⁶ Amu King Sairus nug Sesbasar amegppa anam aum amunu, Sesbasar nug aha uɗia, Kayak laug Jerusalem appa daakkunu nuhig men ukku babaittom. Nug anam babaitte, ag lag heegeg uɗie uɗie, gemu ele ag lag amu hetteb, amge ag ii malappig.

¹⁷ Anam amunu, na king, na imu ena dookkut dayeb, na heppe, danab ag Babilonnu kaya alag buk itoɗiakppa yaak niitte amu, ag amu ebqenana, King Sairus nug genab Juda ag uɗin, Jerusalem ippa Kayak laug imu eɗun buuglagnu ɗo meumte, o iitta anidna, appeg dookkut. Ag amu hena malappeg, na king, na aɗi doon, dabmak aɗi aon, na nai amu meppe nekkunu oonig daatte.” Ag pas amu anam yaappig.