Esra 4 - Nobonob Baibel

Kekeɗ ag Juda, Kayaknu mettid lag eɗun bappaidkkulagnu uuppig

¹ Amu haen Juda danab, Benyamin danab ele dilag kekeɗ ag Juda danab, Benyamin danab ag Babilon wanppa diia ukka laih me dayak danab ah daan, eɗun uɗin, Yawe, Israel dilag Kayak, ag Nug laug buuglagnu digmeppig doon,

² ag ahan, Serubabel, amu Israelnu baelkadppan danab okkai ele gumadna wana, ag appig. “Ig ag hetteb bia, ig ahilag Kayak noobppa dup nota, Nug binag mettem. Ig Asiria dilag king Esarhadon he, ig uɗit daamut, haen amuppa ig doɗ mait, Nug mettagnignu digmeta heut uɗie, gemu ele hettem amunu, ag appeg, ig ag ehanadpput, ig oh Yawe laug imu buugnig,” aon appig.

³ Ag anam appig, amge Serubabel, Jesua, amu Israel baelkadppan dilag okkai laa oh ele ag eɗun, nob mena, inam appig. “Ag ehanigppeg, ig Juda, ig ihinig Kayaknu mettid lag ii buumta. Iitta. Ig Persia dilag king Sairus nug ig Yawe, ihinig Kayak, ig Nug laug buugnignu haknunab aum bia, ig ikka buugnig,” aon appig.

⁴ Juda danab ag anam aeg, danab ah Juda talilidna daappig, ag Juda danab ag lag amu tuɗidna hemananu ag ahilag dabmak qeppeg nekkunu, ag heppeg, Juda ag baɗan uuglagnu heppig.

⁵ Ag amu hena, ag ulum danab laala ag nai nau digdig king amegppa appeg, Juda danab ag uɗat amu hekkulagnu elele iitta daaglagnu men doɗo madappig. Ag Persia dilag king Sairusnu haenppa amu heeg, uɗie uɗie, Persia dilag King Dariusnu haen batakppa ele heppig.

Juda danab ag Jerusalem eɗun buuglagnu heegeg uug beum

⁶ Amu Ekserksis nug digma, Persia dilag king dayom, haen amuppa Juda dilag kekeɗ ag nai uug ele, Juda danab ah oh, laa Jerusalemnu, laa Juda wanppa laih laihnu amu, ag amu oh dilagnu meeg, Ekserksis toppa ukkom.

⁷ Dimppa, Artekserksis nug Persia dilag king daye, Bislam nug Mitredat, Tabel ele, amu nuhikkud ehanittak laa ele dilag ehanittakppa pas laa ya me, Artekserksis anidkkunu ukkom. Ag pas amu yaappig amu, ag Aram dilag nainu yaakppa, Aram dilag naippa ele yaappig.

^8-10 Ag amu heppig, amu gabmannu okkai danab Rehum, nai yaak danab Simsai ele, aa ele pas laa Artekserksisnu Jerusalem danab ag eheɗ aoglagnu yaapiɗ. Aa amu, ahilti uɗat laippu ele ag nai amu bappaidppig. Ahilti uɗat laippu danab, ag am epeɗiak danab, ehanittak anuqak danab, gumak danab okkai, aria Erek danab, Babilon danab, Susa danab ele. Susa onig laa am Elam. Aria laa ag am danab laihnu, Asiria dilag king naɗi, onig okkai ele Asurbanipal nug diia, aab Samaria appa, wan laala Yupretis le heqo laih imuppa daatteb ele, amuppa ele maatte daappig amu, ag ele aakku.

¹¹ Pas amuppa ag inam yaappig. “Pas imuam King Artekserksisnu. Ig am nahipad maɗi nid, le Yupretis heqo laih ippa daattem amu, ig iikku yaattem.

¹² Na king amu, na imu dookkutnu daattem. Juda danab ag na daattemppanu uɗin, wan atu ig daattem ele, ippa ig oonigppa, ag Jerusalem appa beppig ele amu, ag Jerusalem aab eɗun bappaidtteb. Ag aab amunu aɗ ukku, aɗ ele bappaidtteb, amge anukka aab amunu amu, nau hak danab, nai tappe nak danab ele, ag hanhan aguppa daadppig.

¹³ Ig doottem, ag aab imu bappaidna, aabnu aɗ ele bappaidkkulag dayeb, danab amu ag hib guitta hena, ag nahip takis, en takis bia mettak ele ii mettamna amunu, na men doɗo gemu aottem bia tuɗidna ii aomna. Nahip men doɗo awak am honap nekku. Ig amu doottem amunu, na king, na ele imu dookkutnu daattem.

¹⁴ Ig na waatppa daat, aɗi uug nahip-ppa bekkun daatte anidta, na amenppa akkunignu nai waappa daattem; ig hamu daapput, laa ag na, king, ag na onin heppeg nauhkunu am ena ii doottem amunu, ig nai imu na dookkutnu pas imu meut gotte.

¹⁵ Ig na heppe, danab ag buk itoɗiak yaak anukkanu daatteb, laa na king ii beme haenppa king daaegeg, ahilag kaya laa buk itoɗiak amuppa yaappig amu, laa ag buk amuppa ebqenana, Jerusalem danab ag anukka haen amuppa aɗi aɗi heppig am anidna appeg dookkutnu nai imu yaattem. Na heppe, ag amu hekkulag dayeb amu, na inam anidna dookkut. Jerusalem danab ag nai tappe nak danab. Anukkanunab uɗie, uɗie, tumai iikku batak ag king, aria wan laala ele uug madappig. Jerusalem danab ag kingnu nai tappaeg neum, diig amunu king laa nug aab okkai amu he nauhom.

¹⁶ Amu Juda ag aab okkai amu eɗun bappaidna, ag aabnu aɗ ele bappaidkkulag dayeb, na king, na le Yupretis heqo laih ippa aab okkai baula laa ii gumamna. Ag keeke oh gumaglag.” Danab amu ag pasppa anam yaappig.

¹⁷ Daup dilag okkai danab Rehum, nug laikkud ele ag pas amu meeg ukke, King Artekserksis nug antta, nug nai imu pasppa eɗua me, ahilag ukkom. “Nai imuam daup dilag okkai Rehum, nai yaak danab Simsai ele, aria ahilti ehanittak laala Samarianu, am le Yupretis heqo laihnu wanppa aben laalappa daatteb ele amu, nai imuam ahilagnu. Da ag humadttem.

¹⁸ Laa nug pas ag meeg uɗiom amu, nug pas amu ig nainigppa eɗuowa, nug da amelppa ebqa malom.

¹⁹ Nug eɗua, ebqa male, da hei, danab ag buk itoɗiak anukkan kaya yaak appa niitte ele amu ebaqadnana, ag buk itoɗiak amuppa Jerusalemnu kayappa am genab Jerusalem danab ag haen ohbia ag king gumattette, ag king atten dayom amu, ag nug waappa daaglagnu uun, nuhig nai tappeg neene, ag king amu heppeg iitta mekkunu dabmak ele aɗan oidppig amu, ag kaya amu anidppig.

²⁰ Haen laala king ɠagattag, okkai ele ag Jerusalem appa king daanna, ag le Yupretis heqo laihnu wan oh guman, ag takis, amu en takis bia mettak ele danab eppelagppanu aakku aodppig

²¹ Amunu ag aab okkai amu eɗua baula daakkunu babaittak uɗat tuɗidna hemananu, ag haknunab nai laa madappeg, ag uɗat amu uueg! Qinob da appi, ag hekkulag, amge haen da ii amippa ag tuɗidna, uɗat amu ii hemana.

²² Na da attem imu hamu bia doon, butti aɗi, haen laa haknu aib dabmeppig. Iitta. Paha heig! Juda ag aab okkai amu bappaidna, akka wan atu amu oh guman daaglagnu dabmak okkai aon henana, da eheɗ heiɗna uug da meɗamnanu, ag anam heig!” King Artekserksis nug anam yom.

²³ King Artekserksis nug pas amu me ukke, Rehum, nai yaak danab Simsai ele, ahilti ehanittak ele ag pas amu aoeg, laa nug ag amelagppa ebqe doon, ag pahanab ahan, Jerusalem gona, wagai mena heeg, Juda ag ahilag uɗat amu uuppig.

²⁴ Amu Juda danab ag Jerusalem appa Kayak laug eɗua daakkunu uɗat hak uueg daye ukke, Persia dilag king laa Darius, nug king dayaya, nuhig king dayaknu, maɗ aɗitppa Juda ag uɗat amu eɗun heppig.