Esra 3 - Nobonob Baibel

Danab ag Juda wanppa eɗun goppig ele dilag kaya tutu laa

¹ Haen danab amu ag eɗun uɗin, ahilkad aab anen anenppa daan amu, maɗ amuppa kalam eblaih aɗitppa Israel danab oh ag Jerusalem appa laippu aɗamen qagmeppig.

² Ag qagmena, haen amuppa Josadak bekka Jesua, mana mettak danab laala ele, amu Sealtiel bekka Serubabel, nug laikkud laala ele, ag qaɗabppa manaknu ofa, Kayaknu uɗat danab Moses ɗo naippa yom bia hekkulagnu, ag digmena, Israel dilag Kayaknu qaɗab qeppig.

³ Danab Israel wan talilidna daappig amu, Israel danab ah Babilonnu eɗun uɗippig ele ag amu dilagnu baɗappig amunu, ag qaɗabnu men ukku bappaidna, qaɗab qeppig. Ag amu hewona, ag qaɗabppa buttua, tueb elenu manaknu ofa henan, Yawe medappig.

⁴ Ag amu hewona, ɗo naippa yaak niitte bia ag gamag ahak ele Pehppa Dayaknu Hobul heppig. Ag amu henana, ag ɗoppa yaak niitte bia, ag manaknu ofa ebqak eleleppa, deɗ deɗppa hena, Yawe medappig.

⁵ Ag amu hewona, dimppa ag deɗ ohnu manaknu ofa hattana, ag kalam bau bettenu deɗppan mana mettak ele hattana, aria, hobul dayaknu haen epeɗiak, hobul amuam Kayaknu tituanak daatteb amu, ag hobul amunu deɗ anen anenppan mana mettak ele, ag doɗ manadna, Yawe mettanna, ag ɗo hamu mettaknu ofa ele hattana, Yawe medappig.

⁶ Ag kalam eblaih aɗit elenu deɗ digmakppa digmena, Yawenu qaɗabppa manaknu ofa hena, Yawe medappig. Ag Yawenu mettid lagnu men ukku digmena ii meppig, amge ag mana mettak haen amuppa digmen heppig.

Israel buɗub ag eɗun goppig ele digmena, Yawenu mettid lag eɗua daakkunu buuppig

⁷ Persia dilag king Sairus nug Israel buɗub ag Lebanon wanppa ad sida aon, Yawenu mettid lagnu uɗat mettaglagnu aum amunu, Israel ag Taia danab, Saidon danab ele ag ad oadna, ad amu aon, yuppa mena, aon Jopa uɗiglagnu, Israel buɗub ag ee aeg, wain, olip goɗen ele Lebanon danab Tair aabppa, Saidon aabppa ele daappig amu, ag ag madappig. Ag mattan, ag danab menppa uɗat haknu dooppig, lag hak danab ele ag uɗat amu hekkulagnu men doɗo madappig.

⁸ Ag anam hena, heeg ukke ukke, maɗ ag eɗun, Kayak laug, Jerusalem appa dayomppa, ag appa uɗippig, maɗ amu male, maɗ amu dimugppa, maɗ amunu kalam aɗitppa, Sealtiel bekka Serubabel, Josadak bekka Jesua, aa lailti ele, amuam Lewi buɗubppan mana mettak danab, Lewi buɗubppan mana mettak danab iitta, amu danab oh ag Babilon appa diia ukka laih me dayak danab ah daappig, ag appanu eɗun, Jerusalem uɗippig amu, ag oh ahan, Yawe laug digmena buuppig. Ag amu henana, ag Lewi buɗub, ag maɗ 20 ele, o maɗ 20 eɗittak, ag uɗat amu guman daaglagnu tituanadppig.

⁹ Laa tituanadppig am, Jesua, nug bekkod, nug eamakkud ele, aria Katmiel, nug bekkod ele, ag memetalag anukkanu laa am Hodawia, amu Henadad bekkod, ag bekkalkad, awalkad, amalkad ele. Ag danab amu ag Kayak laug hekkulagnu uɗat gumaglagnu tituanadppig. Ag oh Lewi buɗub.

¹⁰ Amu uɗat nid ag Yawenu mettid lagnu men ukku mena malaeg, mana mettak danab ag maɗi ahilag haknu lamen ahilkad takkan, ag trampet aɗan, Lewi buɗubppan mana mettak danab iitta, ag Asap buɗubppanu, ag ahilkad simbal aɗaeg, ag oh Israel dilag king anukkanu Dawit ag hekkulagnu ippuanattom bia, ag ahilag abenppa Yawe binag mekkulagnu teppig.

¹¹ Ag tena daan, ag Yawenu binag maknu ahi laa ettanna, ahi amunu eɗua ettaknu nai-kores imu baubau edappig. “Yawe Nug enaib dayaya, enaib hette. Israelnu amu, nuhig oo mauhaknab kobol hanhan alet daatte.” Lewi buɗubppan mana mettak danab, Lewi buɗubppan mana mettak danab iitta ele, ag anam heeg, Israel danab ah laa oh ag Yawe laug ukkunu men meeg ukke, mena malappig anidppig amunu, ag Yawe binag mekkulagnu ewak baag okkai, huanak laippu heppig.

¹² Ag anam heppig, amge haen Lewi buɗubppan mana mettak danab kaino kuɗum, Lewi buɗubppan mana mettak danab iitta, amunu kaino kuɗum, aria Israelnu baekkudppan danab okkai kaino kuɗum ele ag Yawenu mettid lag tatam dayom anidppig ele, ag gemu Yawenu mettid lagnu men ukku meppig anidna, ag huana gaappig. Ag gaaegeg, laa kuɗum ag oolag gamag ahe, baalag okkaippa eppig.

¹³ Laa amu ag anam gaappig, laa ag baalag okkai huana eppig amunu, aun aɗi laa ag gaappig, aun aɗi laa ag gamag ahak doon eppig amu, laa nug, “Danab ah gaatteb,” o, “Danab ah ag gamag ahak doon etteb,” akkun elele iitta. Aɗinu? Oqotti amuam okkainab dayom. Daye, laa umanab daappig ele, ag oqotti amu dooppig.