Esra 10 - Nobonob Baibel

Israel danab ah ag laihnu ele ewau matulak awak, ag amu heppeg, iitta mekkun dabmak aoppig

¹ Amu Esra nug Kayak laug odppa dup noa, gateg qaun o, gomela, iɗu wanppa ma, gayaya dayeye, nug unuqittatta, nug Kayak amegppa Israel dilag hipunin miagib mattia doyeye, Israel danab, ah, nid, nid ahin ele kuɗumnab uɗin qagmena, nug talilidna daappig amunu, ag ele huana gaappig.

² Esra anam he, Jehiel bekka Sekania, nug Elam buɗub laa, amu nug aha, Esra amegppa aum. “Danab ah ag ig miag taliligna daatteb, ig ahilagppan ah diimut, amuppa ig ihinig Kayak ippunikkomnu oo metta ii uuak kobol ii dim lamidta hemut. Ig anam hemut, amge dahil ooppa genab doyakppa, da ig oonig eɗueb, ig eɗut, ib tutukkuppa oignig dayeb amu, Kayaknu ehanittakppa ig Israel, ig ena bekkunu dabmak aɗa dayaknu dabmekkunignu elele.

³ Anam amunu, dahil naɗi, na laa ele ag na hettem bia, ag Kayaknu ɗonu ebehilag oh bodoetta le mette ele amu, na, ag ele oh, ag ulum nai aɗi laa ig megappeg, ig amu dim lamidta, ig ah laihnu diimut ele, ig ag, ahilkad nid ele apput, ag gokkulagnu, ig, na, nahipad ehanittak amu ele, ig ihinig Kayak noobppa nug tituanta nai qagatu! Ɗo ippunigtte bia ig hetu!

⁴ Keeke imu na eppenppa daatte amunu, ahan, ib attenppa gokkunignu daatte ippunigppe, ig amuppaib gotu! Ig nahip nai dim lamidkkunignu nahip nai ɠagattag qettagnig amunu, na ootppa ɠagattag doon, ahan he!” awa aum.

⁵ Sekania nug anam Esra amegppa aum amunu, Esra nug aha, mana mettak danab anuqak, Lewi buɗubppan mana mettak danab iitta, amu Israel danab oh ele ag ah amunu nai amu dim lamidnana, ag laihnu ah, ahilkad nid ele appeg gokkulagnu anana, ahilag nai amu Kayak onigppa ɠagattag qettana akkulagnu aum. Nug anam aum amu, danab amu ag aakku Kayak onigppa ahilag nai amu ɠagattag qettan, nai amu appig.

⁶ Ag anam heeg, aakku Esra nug Kayak laug odppanu aha, Eliasip bekka Jehohanan, oo nug daatteppa, nug appa ukkom. Nug appa ukka dayaya, nug Israel danab ah ag diia ukka laih me dayak danab ah daan, eɗun uɗippig ele, ag Kayak ippuanattomnu oo metta ii uuak kobol ii dim lamidppig, nug amu dabmaama, ahilagnu mahiak uɗat haaha dayom amunu, nug danab amunu oo nug dayomppa dayaya, nug ee, le ele laa ii laum.

⁷ Amu dimppa amu, ag ɗo meeg, Juda danab oh, laa Jerusalemnu, laa Juda wanppa laih laihnu amu, ag oh, ahilagppa ukkom. Nai amuppa ag Israel danab ah oh ag diia ukka laih me dayak danab ah daan, appan eɗun uɗippig ele amu, ag uɗin, Jerusalem qagmekkulagnu appig.

⁸ Ag nai amu meeg ukke, nai amuppa ag nai inam ele yaappig. Aun laa nug haen amuppa digmeeb ukkeb ukkeb, deɗ ewam uueb, haen gamag amuppa nug ii uɗikku dayeb amu, Israel dilag ehanittak anuqak danab, ahilag ikki danab ele dabmena appig bia amu, nuhig lag, nuhig wan, nuhig keeke laa oh ele baula nug eppegppa ii daama. Iitta! Danab laa aoglag. Nuhig keeke nug eppegppa ii daama, amge keeke laa ele amu, ag heppeg, nug Israel danab ah ag diia ukka laih me dayak danab ah daan, eɗun uɗippig ele amu, nug ag oolagppa baula ii daama.

⁹ Danab okkai ag nai amu meeg ukke, deɗ ewam amu ooppa Juda, Benyamin ele danab ag oh uɗin, Jerusalem appa qagmeppig. Ag uɗin qagmena, ag oh kalam eblaih waɗeleppa, deɗ 20ppa ag Kayak laug noobppa, haɗap-ppa daan, ag kobol eheɗ heppig, amu gu ele naana dayom, diig aɗit amunu ag oolagppa uug nau dooppig

¹⁰ Amu mana mettak danab Esra nug aha, ag amelagppa aum. “Ag Kayak ippuanattomnu oo metta ii uuak kobol ii dim lamidna, ag atu laihnu ah diippig. Kobol amuppa ag ig Israel, ag aab ig beɗunigppa daatte aakku tuɗitteg, okkainab meum daatte.

¹¹ Ag amu heppig amunu, ag hipunin ahilag Yawe, ag mamelkad aɗi dilag Kayak, ag Nug amegppa miagib madippeg doyeb, ag Nug oɗe aon, dim lamitteg! Danab ah ag Kayak ii dim lamidtteb, ag miag taliliadna daatteb, ag akka ag awaidna, danab ah amu ele ouqak ii daaglagoitte. Laa amu, ag ahilagppan ah diippig ele amu, ag ah amu appeg gokkulagoitte,” awa aum.

¹² Esra nug nai amu mattie, danab ah daappig ag baalag okkaippa, “Na tutukku attem. Ig na attem bia hekkunigoitte,” appig.

¹³ Ag amu anana, ag tuɗidna appig. “Amge ig kuɗumnab uɗimut daattem, gemu ele am gu haen amunu, ig dimittim hippaidta daagnignu elele iitta, Anam aakku, ge keeke laa ele, keeke imu ig bappaidkkunignu am keeke okkai. Ig gemu deɗ imuppa, o gemu, butti ele nai imu oh bappaidkkunignu elele iitta. Aɗinu? Ig hemut amu, kobol amuppa ig hipunin okkai hemut.

¹⁴ ⌊Amu ig inam hekkunignu dabmettem.⌋ Ihinig ehanittak anuqak danab ag ippa Jerusalem daan, ig danab ah oh, ag ihinignu uɗat imu gumaglag. Ig laa oh eɗut, appanig diigppa gokkunig, amge danab okkai amu ag ig laa anen anen ig eheɗ laa imu heta, laihnu ah diimut ele amu, ig haen mekkeb, ig, amu ig daattemppanu ikki danab, appanu epeɗiak danab ele ag ig haen megappeg, ig haen amuppa eɗut uɗit, keeke amu bappaidkkunig. Ig anamib hepput ukkeb ukkeb, ig elele hepput, Kayaknu oo nauhak huanaknab ig hipunin hemutnu daatte iitta meeb, ig aakku eɗut elele daagnig,” aon appig.

¹⁵ Danab ag anam appig, am danab oh ag amunu ena dooppig; Asahel bekka Jonatan, Tikwa bekka Jasea ele, aa aya nai amunu ena ii doyeheh, Lewi buɗub laa Sabetai, danab laa onig Mesulam ele, aa danab aɗit amu ehanatpiɗ.

¹⁶ Laa oh ena dooppig amunu, Israel danab ah, ag diia ukka laih me dayak danab ah Babilon appanu eɗun uɗippig ele amu, ag nai amu dim lamidppig. Mana mettak danab Esra nug danab oolagppan baelkadppa anen anen dilag ikki danab tituanattom. Nug ag onilag diia, ag tituanattom. Nug ag tituanatte, kalam eblaih laih tanig eleppa, deɗ digmakppa ag qagmena, danab aun aɗi ag laihnu ah diippig ele, ag amu dilag nai digmen doon hettoɗippig.

¹⁷ Ag amu kalam amunu deɗ digmakppa anam heegeg ukke, maɗ amu iitta me, maɗ laanu kalam digmaknu, deɗ digmakppa ag danab aun aɗi ag laihnu ah diippig ele amu, ag ahilag hettoɗiak amu oh hena malappig.

Danab ag laihnu ah diippig onilkad

^18-19 Amu mana mettak danab ag laihnu ah diippig ele, ag appeg, ah amu gokkulagnu, “Yo,” ana, ag eheɗ heppig, ag beɗulagppa aab ele amunu, ag eheɗ haknu ofa hekkulagnu ag anen anen sipsip dawai ele aon uɗin main, Kayak medappig ele, ag onilag am iikku. Josadak bekka Jesua, nug awakkud, amakkud ele buɗulkadppanu am Masea, Elieser, Jarib, Gedalaia ele.

²⁰ Imer buɗubppanu am Hanani, Sebadaia ele.

²¹ Harim buɗubppanu am Masea, Elaiya, Semaia, Jehiel, Usia ele.

²² Pasur buɗubppanu am Elioenai, Masea, Ismael, Netanel, Josabat, Eleasa ele.

²³ Amuam mana mettak danab onilkad aakku. Lewi buɗubppan mana mettak danab iitta, ag ele laihnu ah diippig amu, ag onilag am inam; Josabat, Simei, Kelaia, onig laa am Kelita, amu Petahia, Juda, Elieser ele.

²⁴ Danab ahi edappig ele oolagppanu am Eliasip. Danab Kayaknu mettid lagnu od gumappig ele oolagppanu am Salum, Telem, Uri ele.

²⁵ Amuam amu dilag onilkad aakku, amu Israel laa oh laihnu ah diippig amu, ag onilag am inam. Paros buɗubppanu am Ramia, Isia, Malkiya, Miyamin, Eleasar, Malkiya, Benaia ele.

²⁶ Elam buɗubppan am Matania, Sekaraia, Jehiel, Abdi, Jeremot, Elaiya ele.

²⁷ Satu buɗubppanu am Elioenai, Eliasip, Matania, Jeremot, Sabat, Asisa ele.

²⁸ Bebai buɗubppanu am Jehohanan, Hanania, Sabai, Atlai ele.

²⁹ Bani buɗubppanu am Mesulam, Maluk, Adaia, Jasup, Seal, Jeremot ele.

³⁰ Pahatmoap buɗubppanu am Atna, Kelal, Benaia, Masea, Matania, Besalel, Binui, Manase ele.

³¹ Harim buɗubppanu am Elieser, Isiya, Malkiya, Semaia, Simeon,

³² Benyamin, Maluk, Semaria ele.

³³ Hasum buɗubppanu am Matenai, Matata, Sabat, Elipelet, Jeremai, Manase, Simei ele.

³⁴ Bani buɗubppanu am Madai, Amram, Uel,

³⁵ Benaia, Bedea, Keluhi,

³⁶ Wania, Meremot, Eliasip,

³⁷ Matania, Matenai, Jasu ele.

³⁸ Binui buɗubppanu am Simei,

³⁹ Selemia, Natan, Adaia,

⁴⁰ Maknadebai, Sasai, Sarai,

⁴¹ Asarel, Selemia, Semaria,

⁴² Salum, Amaraia, Josep ele.

⁴³ Nebo buɗubppanu am Jeiel, Matitia, Sabat, Sebina, Jadai, Joel, Benaia ele.

⁴⁴ Danab amu oh ag laihnu ah diin daappig, amu ag oolagppa laala ag ahilkad ah amu ele nid menuadppig.