Esra 1 - Nobonob Baibel

Sairus nug he, Juda ag wanelagppa goppig

¹ Anukka Persia dilag king Sairus nug Babilon dilag king daye, nuhig king dayaknu maɗ tatamnu Yawe Nug nai Jeremaia oɗeppa mattiom ele meu okkunu, Nug Sairus nuhig dabmak maɗette, nug wan oh nug gumaama, nai laa pepappa ya me, ag oh, ahilagppa ukkom.

² Amu Sairus, Persia dilag king, nuhig nai am iikku. “Yawe, Nug Kayak hab attan daatte amu, nug wanppan wan atu oh da meɗom. Nug da meɗa, da nug laug laa Juda wanppa Jerusalem appa bapaidkkulnu da otiɗa, amu hekkulnu da amelppa aum.

³ Nug anam aum amunu, ag Juda buɗub amu, ag oolagppa aun ag Jerusalem gona, amu hekkulagnu dabmetteb ele amu, Yawe, ahilag Kayak, Nug ag ele daanna, ag Juda wanppa, Jerusalem appa gona, ag Yawe, Nug Israel dilag Kayak, nuhig dayak aben am Jerusalem appa daatte amu, ag appa tena, lag nuhig buuglag.

⁴ Ag Israel ag gemu ippa diia ukka laih me dayak danab ah daatteb amu, ag oolagppanu laa gokkulagnu dabmekkulag dayeb amu, ag gokkulag. Laa ii gokkulagnu dabmekkulag, ag laa gokkulag ele, ag gona, appa keeke hekkulagnu amu, ag ehanadnana, silwa, gol, lamen keeke, doɗ, amu ɗo hamu mettaknu ofanu doɗ keeke ele aon gokkulagnu mattaglagoitte. Ag gokkulag ele amu, ag keeke amuppa Kayaknu mettid lag Jerusalem appa buun, ag ele ɗo hamu mettaknu ofa hekkulag.” Sairus nug anam mattie, pepappa yaappig.

⁵ Sairus nug anam mattie, Juda baekkudppan ikki danab, Benyamin baekkudppan ikki danab, Lewi buɗubppan mana mettak danab, amu Lewi buɗubppan mana mettak danab iitta, ag ele, aria danab ah aun laa ele Kayak Nug ag eɗun gokkulagnu ahilag dabmak maɗettom ele, ag ahan gona, Yawe laug Jerusalem appa buuglagnu dabmenan, gokkulagnu bappaidppig.

⁶ Ag gokkulagnu dabmenan babaittegeg, ahilkad mudippan lailkad ag ehanadna, ag keeke silwa, gol eleppa hak, lamen keeke, doɗ, keeke daden maknu men doɗo okkai ele ahilag daakkunu, amu ɗo hamu mettaknu ofa hekkulagnu doɗ keeke ele ag madappig.

⁷ Ag mudippan lailkad ag keeke anam madappig, amge ag amu aakkuib ii aoppig. Iitta! King Sairus nug tappiɗ keeke, ahilag nob okkai ele, Nebukatnesar nug anukka Yawenu mettid lag Jerusalemnu akka ukka, Babilon appa nuhikkud kayak hambuppuak laulagppa meum amu, Sairus nug amu ele he, danab laa keeke amu akka ukka, ag mattom.

⁸ Persia dilag king Sairus nug danab amu hekkunu otiom am men doɗo gumak danab onig Mitredat. Mitredat nug keeke amu oh awa ukka, Juda dilag okkai onig Sesbasar mettom. Nug hamu ii mettom. Iitta! Keeke oh elele daakkunu nug ebqaaqa mettom.

⁹ Nug keeke amu oh ebqaaqa, nug inam mettom. Tappiɗ otala golppa hak, 30. Tappiɗ otala silwappa hak, 1,000. Tappiɗ silwappa hak, 29.

¹⁰ Tappiɗ golppa hak, 30. Tappiɗ laa iɗu laippu silwappa hak, 410, amu keeke laala gol, o silwappa hak, 1,000.

¹¹ Keeke oh Mitredat nug Sesbasar mettom am ebqak 5,400. Keeke amuam gol, o silwappa hak. Mitredat nug Sesbasar keeke amu oh mette, Juda danab ah ag diia ukka laih me dayak danab ah daappig ele, ag Babilonnu ahan, Jerusalem goppig amu, Sesbasar nug haen amuppa keeke amu oh ele awa, Jerusalem ukkom.