Esekiel 9 - Nobonob Baibel

Esekiel nug ag danab kayak hambuppuak dottolkad binalag meppig ele aqaeg mauhppig tuleglegppa anttom

¹ Amu dimppa ⌊da tuleglegppa⌋ Kayak Nug baag okkaippa ewa aum am da doomi. Nug aum. “Ag heppeg, aab okkai imunu uug bemanu neekkak danab, ag ahilag qep keeke eppelagppa aɗan, ippa uɗieg!” ewa aum.

² Nug anam awa e, da neekki ukke, danab eblaih laippu ele ag Kayaknu mettid lag nuhig tomppan keeke oh elenu aɗnu od yawalti uɗitteppanu daatte, ag od amuppanu uɗiegeg anadmi. Ag anen anen oh daɗib eppelagppa aɗualadna uɗippig. Ag uɗiegeg, danab laippu laa ag ele oh uɗippig. Danab amu linen lamen takka uɗiaya, nai yaaknu keeke ele awa uɗiom. Ag oh anam uɗin, ag qaɗab brasppa hak gukkuidna uɗin, amu daugppa appa daappig.

³ Ag anam daaegeg, haen amuppaib Israel dilag Kayaknu binag amahlak oppiaawak ele engel okkai-kerubim attan dayomppanu aha ukka, Kayaknu mettid lag, amuppa od uguppa dayom. Appa dayeye amu, Yawe Nug danab linen lamen takka, nai yaaknu keeke awa uɗiom ele, nug amegppa ewa inam aum.

⁴ “Na ahan, Jerusalem ooppa oinna, danab ah aun aɗi ag kobol, da kobol amunu oolppa uuaknab doottem, ag kobol amu laa ag heegeg anadna, ag kobol amu oh haknu oolagppa guittak doon mahiak ele hetteb amu, na ag uɗalagppa at laa me!” awa aum.

⁵ ⌊Tuleglegppa⌋ Yawe Nug anam anana, Nug eɗua, danab eblaih laippu ele amelagppa a, da ele aakku doomi. “Ag aab okkai ooppa nug dim lamidna gona, aun aɗi laa ag nug uɗalagppa at ii mak ele amu, ag aqappeg mauheg! Ag oo doyak aib dooppig. Ag oolag bodoetta, le aib meum. Ag aqappeg mauheg!

⁶ Ag danab kaino, danab bau, ah bau, ah okkai, nid naunau ele aqappeg mauhkkulag, amge ag aun aɗi laa ag uɗalagppa at ele amu, ag amu aibnab aib makkuɗadppig. Ag mettid lag dahilppa inam digmeig!” awa aum. Nug anam aum amunu, ag Israel dilag ikki danab, Yawenu lag odppa daappig amu, ag digmena amu tatam aqappig.

⁷ Ag amu heeg, Yawe Nug ag amelagppa aum. “Lag imuam lag dahil, amu ag lag imu dubuttid ta, da noolppa ena iitta daakkunu, ag lag imunu aɗ ooppa danab kuɗum aqappeg mauheg! Ag amu hena malona, ag dimittim aab ooppa gona, appa ele anam heig!” awa aum. Nug anam a, ⌊ag lag ooppan danab aqaeg mauhatteg,⌋ ag lag dimittim gona, digmena, danab ah appa daappig ele aqaeg mauhppig.

⁸ Danab eblaih laippu ele amu ag amu doon, ag gona amu heegeg, da dakka appa dayeye, da laippun gatel qaun oin, gomelen, iɗul wanppa mein, da Yawe unuqitten inam ami. “O Naɗi Yawe! Na Jerusalem danab ah dilag eheɗ hak anidna, na oppoɗin huan be, bu madattem, amge na heppe, Israel danab oɗo yaak daatteb amu, na heppe, ag ohnab mauhkkulagte?” awe ami.

⁹ Da anam ai, Nug nob ma, da amelppa aum. “Israel wanppan danab ah, Juda wanppan danab ah ele ag hipunin okkainab heppig daatteb. Juda wan ohppa layag duug wak kobol am ambak daatte. Ge, aab okkai imuppa nai doya mala hettoɗia epeɗia elele mettak ii dim lamittak kobol am ambak aakku daatte. Amunu diig am, Israel ag atteb. ‘Yawe Nug wan imu uua, ippa ii daatte. Ig hettem amu, Nug ii anidtte,’ aon atteb.

¹⁰ Ag amu hetteb amunu, da ag anatten, oo doyak ii doopa! Ge, da ag anatten, bu madakkulnu ii uupa. Iitta. Ag eheɗ nau heppig amunu, da ag amunu nob elele madakkul. Da ii uupa,” awa aum.

¹¹ Yawe Nug anam a, haen amuppa danab linen lamen takka, nai yaaknu keeke awa uɗiom ele amu, nug eɗua uɗiom. Nug eɗua uɗia, nug Kayak amegppa aum. “Na haknunab nai ame amu, da na amebia hemi,” awa aum.