Esekiel 8 - Nobonob Baibel

Yawe Nug he, Esekiel nug danab ah Jerusalem daappig, ag hipunin eheɗ nau heegeg anttom

¹ ⌊Nebukatnesar nug King Jehoiakin, amu ig laa ele awikka, Babilon wanppa diia ukka laih me dayak danab ah daagnignu uɗie daautut,⌋ maɗ tanig ele uue, maɗ eblaih laippu eleppa, kalam ebqak eblaih laippu ele, kalam amunu deɗ tanig eleppa, da laulppa daaiyi, Juda dilag ikki danab laa ag appa da noolppa heɗep nena daaegeg, Naɗi Yawe Nug appa da nuhig uɗat hekkulnu aɗailom.

² Nug aɗaele, da neekki ukke, da laa, nug beɗu am danab bia amu, da laa amu anidmi. Laa amu nug imuagppanu ukka baeg batak am aab aɗu ewawa dayom bia anidmi. Amu nug imuagppanu ukka, ikki batak am aen gakkaɗaknab, nukka amahaltte, am amubia dayom anidmi.

³ Laa amu nug eppeg dottog bia bahia, da ikkil uɗug aɗom. Aɗe amu Ouɗi Nug da humiɗe, da wan, hab ele gamalahppa daaiyi, tuleglegppa, tulegleg amuam Kayak he anidmi, tulegleg amuppa Ouɗi Nug omaiɗa Jerusalem ukka, Nug da omaiɗa, Kayaknu mettid lag, amuppan mana mettak danab dilag haɗapnu aɗnu od yawalti uɗitteppanu daatte, Nug da appa meiɗom. Appa kayak hambuppuak dottog laa qappak dayom. Israel ag dottog amu noobppa dup nona binag metteb ele amunu, dottog amu he, Yawe Nug Israel dilagnu dahil doya laa aomanu doyak aɗa daatte.

⁴ Ouɗi Nug da appa meiɗe, da Israel dilag Kayaknu binag amahlak oppiaawak ele anidmi. Amu da anukka aab Tel Abib guguittak, aab amu dimittim uɗem naɗippa anidmi amu, gemu baula da ippa anidmi.

⁵ Da anam daaiyi, Kayak Nug da amelppa aum. “Danab bekka, na neegppe, yawalti uɗitteppanu ukkaɗ!” awa aum. Nug anam aum amunu, da neekki, yawalti uɗitteppanu ukke, appa od heqoppa kayak hambuppuak dottog, dottog amuam daye anidmi. Israel ag dottog amu noobppa dup nona binag metteb ele amunu, dottog amu he, Yawe Nug Israel dilagnu dahil doya laa aomanu doyak aɗa daatte. Od amuppa am mana mettak danab ag wana, qaɗabppa gona, qaɗab amuppa ag doɗ main, Kayak medatteb.

⁶ Da neekki ukke, amu anitti, Kayak Nug da amelppa aum. “Danab bekka, na Israel ag hetteb anidttemte? Ag hetteb amu, da amunu uuaknab doye aute aottem. Ag amu hetteb, amuppa ag hebeppeg, da mettid lag dahil uue, uma gokkul. Da ippa ii daapa. Na imu anidme, da kobol amunu oolppa uuaknab doottem, amge na kobol nau laa Israel ag hetteb, kobol amunu nau hak am imu eɗittak, na amu ele anidkkut,” awa aum.

⁷ Kayak Nug anam ana, Nug da omaiɗa, danab nug aɗ ooppa, haɗap-ppa nokkunu aben, aben amuppa ukke, da neekke, men aɗ teppu eleppa giɗo laa anidmi.

⁸ Da amu anitti, Kayak Nug da amelppa aum. “Danab bekka, na giɗo aɗppa daatte amu, na amu buuppe, giɗo okkai maɗ!” awa aum. Nug anam aum amunu, da aɗ buue, da neekki ukke, od laa anidmi.

⁹ Da od laa dayom am anitti, Kayak Nug da amelppa aum. “Na oo amu ooppa gona, Israel ag kobol nau, kobol da kobol amunu oolppa uuaknab doottem ele hetteb amu, na amu antte!” awa aum.

¹⁰ Nug anam aum amunu, da ooppa ukken, appa gililppa ag doɗ laa ag oolag wan qeeqe oitteb, amu doɗ digdig laa, Kayak Nug doɗ amunu ooppa uuaknab dootte ele amu, ag amu dottolkad heeg daaegeg anadmi. Amu da Israel dilag kayak hambuppuak dilag dottolkad nigul oh ele hadappig anidmi.

¹¹ Keeke nau dottolkad anam daaeg, Israel dilag ikki danab 70 ag appa hippaidna, keeke nau dottolkad noolagppa daappig. Sapan bekka Jasania nug ag oolagppa ele dayom. Am danab 70 amu ag anam daanna, ag anen anen kalu danab ile muttuɗig enanag bette ele manaknu tappiɗ eppelagppa aɗan, kayak hambuppuak digdig binag mekkulagnu kalu danab ile muttuɗig enanag bette ele amoteg ewewe, muttuɗig enanag aakku teum.

¹² Ag anam heegeg, Kayak Nug da amelppa aum. “Danab bekka, na Israel dilag ikki danab ag lokkumakppa attem hetteb, ag anen anen ag ahilag kayak hambuppuak noolagppa dup nona binalag metteb amu, na aakku anidme. Ag amu hettebnu diig am, ag atteb. ‘Yawe Nug wan imu uua ukkom. Nug ig ii anigtte,’ aon atteb,” awa aum.

¹³ Kayak Nug anam ana, Nug nai tuɗitta, da amelppa aum. “Ag kobol hetteb, da kobol amunu oolppa uuaknab doottem amu, ag hetteb imu na anidme, amge na kobol nau laa Israel ag hetteb, kobol amunu nau hak am imu eɗittak, na amu ele anidkkut,” awa aum.

¹⁴ Kayak Nug anam awowa, Nug eɗua omaiɗe, Yawe laugppan aɗnu od, laih yawalti uɗitteppanu daatte, Nug eɗua omaiɗa, appa meiɗe, da neekki ukke, Israel dilag ah laa ag appa daanna, kayak hambuppuak onig Tamus mahidppig.

¹⁵ Da amu anitti, Kayak Nug da amelppa aum. “Danab bekka, ag kobol hetteb, da kobol amunu oolppa uuaknab doottem amu, ag hetteb imu na anidme, amge na kobol nau laa Israel ag hetteb, kobol amunu nau hak am imu eɗittak, na amu ele anidkkut,” awa aum.

¹⁶ Kayak Nug anam awowa, Nug omaiɗa, Yawe laugnu mana mettak danab dilag haɗap ooppa meiɗe, da neekki ukke, appa Yawenu mettid lag odppa, Oo Gun Eleppa ukkaknu oo veranda bia, qaɗab ele gamalahppa da danab 25 anam daaegeg anadmi. Ag Yawenu mettid lag dimettan, ag aam bedeppa neegnana, aam noobppa dup nona binag meppig.

¹⁷ Da amu anitti, Kayak Nug da amelppa aum. “Danab bekka, na kobol nau ag hetteb amu, na aakku anidme. Juda buɗub ag ippa kobol laala, da kobol amunu oolppa uuaknab doottem ele, ag amu oh hetteb. Ag hetteb amu, amuam keeke hamu iitta. Ag amu hetteb, amge amuib iitta. Ag heeg, Juda wan ohppa layag guittak nau mauhnoak mettak kobol ambak daatte. Ag heegeg, da oppoɗil bette. Ag eheɗ naunab nau hena, aon aon niɗan, amu tuɗittak okkainab hetteb.

¹⁸ Ag amu hetteb amunu, da oo nauhak doyeye, da nob madakkul. Da ag anatte, oo doyak ii doopa! Ge, da ag anatte, bu madakkulnu ii uupa! Israel ag da daulppanab da ehanadkkulnu ekkulagtai, amge da ii doopa; ii ehanadpa,” awa aum.