Esekiel 7 - Nobonob Baibel

Padal mak haen bekkunu am miag

¹ Amu Yawe Nug nuhig nai laa da meɗom. Nai amuam inam.

² “Danab bekka, ⌊na inam a⌋! Naɗi Yawe, Nug Israel danab ah amelagppa inam atte. ‘Haen malom! Israel wan ohppa uug naunab bekkunu haen aakku oqia malom.

³ Ag eheɗ heeg uɗie uɗie, bu awak haen aakku miag doum amunu, da oo nauhak dahil ii aɗapa; ag bu aoglag. Da epeɗiatte, ahilag hak naunu nob elele madakkul. Ao, da ahilag hak laala, da hak amunu oolppa uuaknab doottem, hak amunu da ag bu elele madakkul.

⁴ Da ag anatte, oo doyak ii doopa! Ge, da ag anatte, bu madakkulnu ii uupa. Iitta! Da genab ahilag hak nau anitten, bu elele madakkul. Ao, da ahilag hak, da hak amunu oolppa uuaknab doottem amu, da hak amu ele anitten, da nob elele madakkul. Da anam heppi, ag dooglag, da am Yawe,’ ” awa aum.

⁵ Amu Naɗi Yawe Nug inam ele atte. “Padal mak naɗi uɗitte! Wanppan danab laa nug deɗ laa padal mak uɗitte amu, nug padal mak amubia laa ii anttom. Iitta.

⁶ Ahilag haen gog tak aakku uɗiom! Ge, ahilag haen gog tak aakku uɗiom! Haen nau amu aakku ahom, ahilagppa bekkun daatte. Genab, ahilagnu gog tak haen aakku uɗiom!

⁷ Ag Israel buɗub Juda wanppa daatteb, ag padal mekkulagnu miagnab; odppa daatte. Bu awak haen ahilag aakku gogppa teum. Deɗ am miag uɗiom daatte. Gemu ag qaukoppa gona, kayak hambuppuak dilag mettid lag nakokppa daan henan, gamag ahak dootteb bia, ag deɗ amuppa qaukoppa anam ii doomna. Iitta. Ag baɗak nau dooppeg, muttub qak daakku.

⁸ Da oppoɗil be, bu madakkulnu hettem. Ao, da ool nauhe, da ahilag hak naunu nob madakkulnu hettem. Da epeɗiatten, ahilag hak naunu nob elele madakkul. Ao, da ahilag hak laala, da hak amunu oolppa uuaknab doottem, hak amunu da ag bu elele madakkul.

⁹ Da ag anatte, oo doyak ii doopa! Ge, da ag anatte, bu madakkulnu ii uupa. Da genab ahilag hak nau anitten, bu elele madakkul. Ao, da ahilag hak, da hak amunu oolppa uuaknab doottem amu, da hak amu ele anitten, da nob elele madakkul. Da amu heppi, ag dooglag, da Yawe, da nob nau amu mattami.

¹⁰ Ag bu aoglagnu deɗ am oqiom daatte; uma iitta. Ui na, keeke le ibuppa daatte ye gotte, amubia ahilag padal mak am naɗi uɗitte. Wan laa ag bu madakku amu, bu amu nug eppegppanab daatte; am bala mapatom daatte, amubia.

¹¹ Wan laa bu madakku amu, amuppan danab ag am laa guittak nau hamu mettak danab daatteb. Ad okkai me, danab uɗat medakkunu elele, amubia laa bu mattaglag am okkai meppig daatteb. Ag Israel ag hak nau hetteb amunu, laa amu ag bu mattaglag. Bu madappeg, ag oh nauhna malappeg, ahilag en, ahilag keeke oh hamu iitta ele, amu oh ele iitta mekku.

¹² Ag Israel, ag bu aoglagnu haen aakku gogppa teum. Deɗ amu aakku uɗiom daatte. Laa nug keeke daden mette ele, nug aib gamag ahak doyom. Laa nug keeke me, laa daden mette ele amu, nug mahiak aib doyom. Aɗinu? Danab ah imu ag ohnab bu aoglagnu haen aakku oqiom daatte.

¹³ Anam amunu, ag Israel oh ag bu aoglag. Amu tuleglegppa anttak am ii eɗuma amunu, danab nug wan laa meeb, laa nug maɗ gane wan amu uɗat medakkunu men doɗo metteb, wan mameg nug eɗua, wan amu baula uɗat ii mettama. Iitta. Aa oh mauhya malapeɗ, amu dimppa wan amunu nai gog tekku. Amu Israel danab ah oolagppa laippu laa nug nuhig hipuninppanu bau dayak nuhig ehanitta, ena ii daama.

¹⁴ Da dahil oppoɗil Israel danab ah dilagnu beum daatte amunu, ag ban hekkulagnu keeke oh bappaidkkulagtai, ag ban hekkulagnu trampet iwalkkulagtai, amge da heppi, laa nug banppa ii goma,” awa atte.

Israel danab ah ag hipunin heppig amunu, ag bu aoglag

¹⁵ Yawe Nug anam ana, Nug nai tuɗitta aum. “O gadon, aab okkai dimittim ban daup ag, ag Israel danab aqaglagnu daatteb. Aab okkai ooppa amu, oɗe nau danab kuɗum aqe mauhtteb ele, enug nau ele daattep. Danab ah aab dimittim daatteb ele, kekeɗ ag aqappeg mauhkkulag. Aab ooppa amu, danab ah ag oɗe nau danab kuɗum aqe mauhtteb ele, enugnu ele mauhkkulag.

¹⁶ Danab ah aun aɗi ag ii mauhkkulag amu, ag oolna, qaukoppa gona, appa ag oh anen anen ahilag hipuninnu dabmenana, uppuɗil beɗulag nakok ele oolnu noakppa daatteb, uppuɗil amu ag oo doyak ele gaatteb, danab ah ii mauhkkulag amu, ag amubia gaaglag.

¹⁷ ⌊Ag ahilag hipuninnu dabmenana, diig amunu ag bu okkai aon daatteb doon,⌋ ag eppelkad hamu gai-iitta daappeg, ag gatelkad am le bia daakku.

¹⁸ Ag lamen heɗiag ele takkaglag. Ag baɗak eheɗ nau doon, ag hahaɗkkulag. Ag uɗa nak nau doon, ag ⌊mahiak okkai henan,⌋ ikkilag uɗug hoyadkkulag.

¹⁹ Bu qak ii nak haenppa ag ahilag silwanu, ahilag golnu ele, ‘Am keeke anuqak’ dooppig amunu, ag amu aɗan oiglagnu wagai mena oinna, ag hipunin heppig. Ag anam heppig amunu, gemu ag ahilag silwanu hamu bia doon, ag ib manppa agappeg gokkulag. Ag ahilag golnu am keeke dubuttid ele dooglag. Deɗ Yawe Nug bu madakku amu, deɗ amuppa ahilag silwa, ahilag gol ele, ag ehanadppeg ena daaglagnu elele iitta. Ag enug aqakku, amge ag silwa, gol ele lappeg, oolag didikkunu elele iitta.

²⁰ Israel danab ah ag ahilag bala enanag dabmena, dada henana, ag heeg, laa ag kayak hambuppuak dottolkad, da dottolkad amunu oolppa uuaknab doottem, keeke amuam uɗig wak ele, laa ag dottolkad amu bala amuppa hadappig. Ag amu heppig amunu, da heppi, bala ⌊gemu ahilagppa daatte,⌋ bala amuam keeke hamu, dubuttid ele daakku.

²¹ Amu da uuadppi, wan laihnu danab ag uɗin, keeke amu ahilag daakkunu akkan gokkulag. Ao, da uuadppi, wanppan nau hak danab ag uɗin, ahilag keeke akkan gokkulag. Ag akkan gona heppeg, dubuttid tak ele daakku.

²² Da Israel dimadappi, wan laappan danab amu ag uɗin, ag lag dahil, mana mettak danab aakkuib ag appa wakkulagnu elele amu, ag amu ooppa gona, ag dubuttid mettaglag. Ao, yab danab nau amu ag da laul ooppa nona heppeg, dahil lag am dahil neekkakppa dubuttid tak ele daakku.

²³ Juda wan ohppa layag duug wak kobol am ambak daatte. Aab okkaippa amu, danab laa nug danab laa guittak nau mauhnoak medatte. Anam amunu, Israel danab ah eppelkad qakkaglagnu, ag sen bappalatteg!

²⁴ Da heppi, wan laa, wan amuppan danab ag nau hak danab, laa oh eɗattak ele amu, da heppi, wan amuppan daup ag uɗin, Juda danab eɗadna, ag laulkad am ahilag daakku. Da heppi, Juda dilag okkai ag dada danab baula ii daamna. Da heppi, kekeɗ amu ag uɗin, aben laala, Israel ag aben amuppa ahilag kayak hambuppuak binalag metteb amu, ag aben amu oh heppeg, nauhna autna aona, dubuttid tak ele daaglag.

²⁵ Haen amuppa Israel ag baɗak eheɗ nau doon, ag maɗoɗ mattiglag, amge ag maɗoɗ nakok laa ii anidmana.

²⁶ Uug nau uɗitteb oh am nug dim lamittak uɗippeg ⌊Israel ag⌋ anidkkulag. Ulah nai am ulah nai laa nug dim lamittak uɗippeg dooglag. Israel danab ah ag propet danab ag tulegleg laa Kayaknu anidna, amunu nai ag mattaglagnu akkulag, amge propet ag elele iitta daaglag. Mana mettak danab ag dahil ɗo nai mehuqkkulagnu elele iitta daaglag, amu ikki danab ag Israel danab ah ulum mettak nai laa mattaglagnu ele, elele iitta daaglag.

²⁷ Israel dilag king ele, nug oo uug naunab doya, mahikku. Anuqak danab ag ele uug nau doon, ‘Dimppa haen laappa ig eɗut ena daagnig,’ iinab dabmemana. Israel wanppan danab laa oh ag baɗan, hahaɗkkulag. Ag eheɗ heppig amu, da amunu nob eleleppa madakkul. Ag heppig, melemel amuppa da bu madakkul. Da anam heppi, ag da am Yawe dooglag.” Yawe Nug anam awa aum.