Esekiel 6 - Nobonob Baibel

Yawe Nug heeb, Israel ag padal mekkulag

¹ Amu Yawe Nug nuhig nai laa da meɗom. Nai amuam inam.

² “Danab bekka, na danab ah amelagppa nai madittem bia, na Israel dilag qauko neekkadna, ag danab ah daaloblob bia na uug naunab ahilagppa beeb anidkkulagnu propet nai appe doyeg!

³ Na nai mattinna, na inam a! ‘O Israelnu qauko, ag Naɗi Yawe, ag nuhig nai doyeg!’ Naɗi Yawe Nug qauko okkai, qauko nakok, oolnu noak nakok, oolnu noak okkai ele, Nug ahilagnu inam atte. ‘Da ahilagppa ban hein, da heppi, kayak hambuppuak dilag mettid lag nakok ahilagppa daatteb amu, lag amu oh nauhna autna aoglag.

⁴ Da heppi, kekeɗ ag uɗin heppeg, kayak hambuppuak dilag qaɗab oh ahilagppa daatteb, danab ah ag amuppa doɗ main, kayak hambuppuak madatteb ele, qaɗab amuam nauhna autna aon, nauhak anam daaglag. Ao, da heppi, kekeɗ ag uɗin heppeg, kalu muttuɗig ena ele manaknu qaɗab ahilag ag nauhna autna aon, aoɗak daaglag. Da heppi, kekeɗ ag Israel danab ah, ahilkad kayak hambuppuak dottolkad noolagppa aqappeg mauhkkulag.

⁵ Amu da heppi, kekeɗ ag aqanna, ag gaɗalkad kayak hambuppuak dottolkad noolagppa maadppeg daaglag. Ao, da heppi, ag ag ebehilag kayak hambuppuak dilag qaɗab guguittak, laih laih ohppa maadkkulag.

⁶ Israel wan ooppa danab ah ag adeppa adeppa daatteb amu, kekeɗ ag heppeg, ahilag aab nauhakib daappeg, kayak hambuppuak dilag mettid lag nakok ele kekeɗ ag heppeg, lag amu nauhna autna aoglag. Nauhppeg, kekeɗ ag heppeg, ag Israel, ahilag qaɗab am nauhna autna aoppeg, kayak hambuppuak dottolkad amu aoɗak daan, nauhak daappeg, kekeɗ ag qaɗab, amuppa danab nug muttuɗig enanu ofa hette amu, kekeɗ ag qaɗab amu loppaɗppeg, nena qena nauhak daaglag. Kekeɗ ag anam henana, ag keeke laa oh ag Israel ag eppelagppa heppig amu, ag amu ele heppeg nauhna autna aoglag.

⁷ Juda wan ooppa kekeɗ ag Juda danab ah ag lailkad oolagppa aqappeg mauhkkulag. Ag mauhppeg, laa ii mauhppig ele amu, ag dooglag, da am Yawe,’ ” awa aum.

⁸ Yawe Nug anam ana, Nug nai tuɗitta aum. “Da heppi, kekeɗ ag anam hekkulag, amge da ele heppi, ag Israel, ag oolagppa laa, ag oɗo yaak danab ah daaglag. Haen amuppa kekeɗ ag heppeg, danab ah amu ag wanppan wan laalappa tamtam gona daaglag, amge ag qep elabppa ii mauhmana.

⁹ Ag ii mauhppig dilagnu amu, kekeɗ ag aɗualadna diippeg, ag matatun gona, wan laalappa daanna, ag dahilnu dabmekkulag. Ag da ahilag hak nau antten, da ag dimeɗaeg doyen, ag kayak hambuppuak anidna, ag binag mekkulagnu oolag huana heum anttena, da oolppa uug naunab nau doomi dooglag. Ag anam doon, ag eheɗ heppignu, ag kobol laala, da kobol amunu oolppa uuaknab doottem ele, ag amu ele heppignu, ag akka ag ahilagnu eheɗ nau dooglag.

¹⁰ Ag anam doonna, ag dooglag, da am Yawe. Ag amu doon, ag da uug nau ahilagppa bekkunu ami amu, da hamu ii ami ele dooglag,” awa aum.

¹¹ Naɗi Yawe Nug anam anana, Nug nai tuɗitta atte. “Esekiel, na danab nug dabmak huanak awa, uug nau ele doya hette bia na eppen laihppa, am eppen laih ona, na baenppa ele wan huan tappan, na, ‘O gadonnab gadon,’ a! Aɗinu na anam hekkut? Israel danab ah ag kobol nau, kobol da amunu oolppa uuaknab doottem ele kuɗum hetteb amunu, ag qep elabppa, enugppa am oɗe nau danab kuɗum aqe mauhttebppa ele mauhkkulag.

¹² Laa ag uma daatteb amu, ag oɗe nau danab kuɗum aqe mauhtteb eleppa mauhkkulag, laa ag miag daatteb amu, ag qep elabppa mauhkkulag. Laa nug keeke aɗit amuppa ii mauhkku amu, nug enugppa mauhkku. Da ib ewam amuppa heppi, dahil oppoɗi bak am oug mekku.

¹³ Keeke amu ahilagppa beeb, Israel danab ah kuɗum ag mauhadna, ag gaɗalag kayak hambuppuak dottolkad daattebppa, amu dilag qaɗab talilittakppa niippeg, ag gaɗalag qauko nakok oh ikkilkadppa niippeg, ag gaɗalag qauko okkai oh ikkilkadppa ele niippeg, ag gaɗalag ad ok enanag, amu ad okkai eppelkad bahia ukkak ele oh waalkadppa ele niippeg, aben amu ohppa ag kalu danab ile muttuɗig enanag bette ele manan, kayak hambuppuak madappig amu, ag gaɗalag aben amuppa niippeg, laa ii mauhppig ele, ag da am Yawe dooglag.

¹⁴ Da heppi, uug naunab ahilagppa beeb, wan ahilagppa tom adeppa adeppa daatte, am nauhakib daakku; amuam yau uɗitteppanu tomppa, appa am atu taɗak nau, tom amuppan ukka, yawalti uɗitteppanu tomppa aab onig Dibla daatteppa, tom amu batak am atu anamib daakku. Da amu heppi, ag dooglag, da am Yawe.” Yawe Nug anam awa atte.