Esekiel 5 - Nobonob Baibel

Esekiel nug ikki uɗugppa Kayak heeb, Juda wan nauhkkunu ippu hak heum

¹ Amu Yawe Nug nai tuɗitta aum. “Danab bekka, na qep elab, aegnab ele aon, danab ikki uɗug qep nagppa otaɗtte bia qep elab amuppa na ikkin uɗug hoin, id ele awe! Na amu hena malona amu, na amu oh aon, skelppa mena, ameg ewam me, anen anen ahilag uug am laippu anamib, na amubia ameg ewam piɗe piɗe mekkut.

² Na uɗug amu anam piɗe piɗe mewona, na kekeɗ ag aab laa eɗadkkulagnu oo mattan aqaglagnu meidna daanna hetteb, na amu ippu hak hena malona, na uɗug qagmak laippu aon, aab okkai dottog amu ooppa mena, manappe ewaɗ! Ameg mak laa na aon, aab dottog amu daug ohppa maadna, qep-ppa okkuladppe, naunaunab naɗ! Amu ameg mak laa na aon buɗiadppe attan teeb, ulah awa ukkaɗ! Amge appa ele da heppi, kekeɗ ag aqappeg mauhkkulag.

³ Amge na uɗug buɗiadppe attan tekku amu, na tatam laippu laippu aon, lamen nahip nob piiakppa meppe daaglag,

⁴ amge amu laippu laippu ele aon, aab aɗuppa buɗippe tena eweg! Aab amuam ewebeb ukkeb, Israel danab ah oh dilagppa gokku,” awa aum.

⁵ Amu Naɗi Yawe, Nug inam atte. “Imuam Jerusalem. Da hei, aab imuam wan oh oolagppa gamagppanab daye, wan laala Jerusalem talilidna daatteb.

⁶ Amge Jerusalem danab ah ag nau henana, ag dahil ɗo iɗu iɗunu nai tappaeg neum. Wan laappan danab ah ag ele dahil ɗo iɗu iɗu tappaeg nette, amge Jerusalem danab ah ag amu huana, laa oh eɗattak hetteb. Aɗinu? Jerusalem danab ah ag dahil ɗo iɗu iɗu uun, dim ii lamittegeg uɗie, gemu ele anamib hetteb,” awa atte.

⁷ Anam amunu, Naɗi Yawe Nug inam atte. “Ag Jerusalem danab ah ag anam hetteb amunu, da Naɗi Yawe, da inam attem. Wan laappan danab ah ag taliliadna daatteb, ag eheɗ hetteb, amge ag Jerusalem danab ah, ag eheɗ hak huan hena, ag dahil ɗo iɗu iɗu dabmettan, ii dim lamittegeg uɗie, gemu ele dim ii lamidtteb. Ag dahil ɗo ii dim lamidtteb, amge ag wan laala, Jerusalem talilidna daatteb, ag ahilag ɗo dim lamittegeg uɗie, gemu ele dim lamidtteb,” awa atte.

⁸ Anam amunu, Naɗi Yawe, Nug inam ele atte. “Ag anam heegeg, da, da ahilag hak amunu eheɗ doyeye ool ii madattem amunu, da wan laihnu danab ag, ag neekkadna daappeg, da bu madakkul.

⁹ Ag Jerusalem danab ah ag kobol laa, da kobol amunu oolppa uuaknab doottem, kobol amuam ag kayak hambuppuak dottolkad noolagppa dup nona binalag metteb, ag kobol amu hetteb amunu, ag Jerusalem danab ah, ag bu awak ahilag am okkainab daakku. Da deɗ laa bu anam laa ii mattami, butti aɗi ele baula anam ii hepa.

¹⁰ Da amu hekkul amunu, Jerusalem ooppa mamelkad anilkad ag nid ahilkad ladappeppeg, nid ag ele anilkad mamelkad lattaglag. Da ag bu madappi, ag kuɗum mauhkkulag. Amu laa ag ii mauhkkulag amu, da heppi, kekeɗ ag diin, wan laih laih miag, am uma ele gokkulag. Ulah keeke huma awa gotte, amubia kekeɗ ag heppeg, ag Juda ag matatun laih laih gona daaglag,” awa atte.

¹¹ Amu Naɗi Yawe, Nug atte. “Anam amunu, da Naɗi Yawe, da attem. Ag Jerusalem danab ah, ag kayak hambuppuak dottolkad, keeke amuam uɗig wak ele, ag amu dahil mettid lakka maadppig; ag ele appa kobol laala, da kobol amunu oolppa uuaknab doottem, ag kobol amu amuppa ele heppig. Ag amu hena, ag amuppa heeg dahil neekkakppa lag dahil dubuttid teum daatte. Anam amunu, da genab bau daattem, genab amubia da ahilagnu baula ena ii doopa. Da ag anatte, oo doyak ii doopa! Ge, da ag anatte, bu madakkulnu ii uupa!

¹² Ag Jerusalem daatteb amu, ag obatak ewam daatteb bia. Amu aab ooppa danab ah oh obatak laippu laa ooppa daatteb, ag oɗe nau danab kuɗum aqe mauhtteb elenu, o enugnu aab okkai ooppa mauhkkulag. Danab ah obatak laappa daatteb amu, kekeɗ ag aab dimittim ag ag aqappeg mauhkkulag. Amu obatak laa da heppi, kekeɗ ag diin heppeg, ag wan laalappa matatun gona daaglag, amge appa ele da heppi, ag qep elabppa mauhkkulag.

¹³ Ag bu anamib aakku aoppeg ukkeb, ag ahilag hipuninnu nob elele aoglag. Ag aoppeg, dahil oo nauhak am aakku iitta mekku. Ao, dahil oppoɗi bak am oug mekku. Ge, da baula nob madakkulnu uukkul. Da bu anam madappi, oppoɗi bak dahil oug meeb, ag da Yawe, da yag-nab-bak doyen, bu anam madakkulnu ami amu, ag amu dooglag.

¹⁴ Da heppi, Jerusalem aab nauha auta aweb, wan laala Jerusalem talilidna daatteb, wan amuppan danab ah ag laih gonana, Jerusalem aab anidna, ag aon aon aqaglag.

¹⁵ Haen da ool nauheb, oppoɗil beeb, daug batak uug, eheɗ ele hein, bu eheɗ madappi, wan laala Jerusalem talilidna daatteb, amuppan danab ag ahilagnu hamu bia doon, aon aon aqan, ag da ahilagppa hemi anidna, ag ele padal memananu dabmak aona, da ag bu attem mattami anidna, ameg iɗuak dooglag. Da Yawe, da aakku attem.

¹⁶ Am laa amu, da dahil lat doɗo keeke qe mauhtte ele, am lat doɗo aeg naunab nau ele, haen da amu ekkul amu, da amuppa aqappi nauhkkulagnu ekkul. Lat doɗo dahil amuam onig Enug. Da enug haen nau heppi nauhkkulagnu hekkul. Ge, da heppi, enug haen tuɗittak dayebeb, ag ee iitta daaglag.

¹⁷ Da heppi, enug haen beeb, doɗ dakkuɗ ele ag aqadppeppeg, diig aɗit amuppa nid naunau ahilkad mauhppeg, ag nid iitta ele daaglag. Oɗe nau danab kuɗum aqe mauhtteb ele, aria layag qe mauhak kobol ele ahilagppa beeb, kekeɗ ele ag uɗin aqadkkulag. Keeke nau amu oh da heppi, ahilagppa beeb, ag nauhkkulag. Da Yawe, da aakku attem.” Yawe Nug anam aum.