Esekiel 48 - Nobonob Baibel

Wan obatak atten atten daaglagnu nai

^1-7 Amu Yawe Nug tuɗitta atte. “Israel dilag huu okkai anen anen, ag oh ahilag wan aoglag. Ag ahilag anen anen oh dilag tom laih am kaɗag uɗitteppanu dayeb, tom laih, qaban uɗitteppanu am Mediterenia yu. Aria, ag oh, ahilag yawalti uɗitteppanu tom, ahilag yau uɗitteppanu tom ele, anen anen dilag tom aɗit, amuam wan ohnu yawalti uɗitteppanu tom, yau uɗitteppanu tom ele gottep bia aa gamalahppa, tom gamag gamag ele daaglag. Israel oh dilag wannu tom yawalti uɗitteppanu daatte, tom amuam aab Hetlon, Lebo Hamat eleppa ugakka, Hasarenan appa batatte. Hasarenan am Damaskus, Hamat ele dilah tomppa daatte. Hamat am tom amunu yawalti uɗitteppanu daatte. Damaskus am tom amunu yau uɗitteppanu daatte. Aria, wan paniaknu ele am obatak piɗe piɗe, yawalti uɗitteppanu tomppa digma, yau uɗitteppanu ugakka, ⌊Lewi buɗubppan mana mettak danab, Lewi buɗubppan mana mettak danab iitta, da laul ele daaglagnu wan okkai gamagppa daatte, amu tomppa⌋ batak am inam: Dan, Aser, Naptali, Manase, Epraim, Ruben amu Juda ele. Huu amu oh aben amuppa ahilag wan anen anen anam anam aoglag.

⁸ Huu amu dilag wannu obatak anen anen am anam aakku daakku. Amu Judanu obatak heqo laih am Rubennu obatak daakku, amge laih am obatak laa daakku. Obatak amuam Judanu obatakppanu yau uɗitteppanu daakku. Wan amuam Lewi buɗubppan mana mettak danab, Lewi buɗubppan mana mettak danab iitta, amu dahil mettid lag ele aguppa daaglagnu, da meɗaglag. Mediterenia yuppanu ukka, wannu kaɗag uɗitteppanu tomppa batak amu, elab amuam huu anen anen dilag obatak ele am elab laippu, anamib daakku. Emaitak nuhig am 12 kilomita maha ele daakku. Da laul am wan amu gamagppa aakku daakku.

⁹ Obatak amu gamagppa ag aben laa da, Yawe, ag da meɗaglag amu, nuhig okkai am inam. Elab nuhig am 12 kilomita maha ele emaitak nuhig am 5 kilomita.

¹⁰ Aben amuam mana mettak danab dilag aben daakku. Aben amuam dahilnu tituanak daakku. Nuhig okkai am inam. Elab nuhig am 12 kilomita maha ele, emaitak nuhig am 5 kilomita. Da, Yawe, dahil mettid lag am wan obatak amu gamagppa aakku daakku.

¹¹ Aben amuam Sadok buɗub dilag. Agib ag dahilnu tituana meɗak daan, doɗ main, da meɗaglagnu ehah aoppig daatteb. Agib ag dahil uɗat pehettak hekkulagnu ii uuppig. Agib Lewi buɗub laa oh ag Israel laa oh heppig bia da uuiɗna, piɗe ii goppig.

¹² Wan obatak amuam mana mettak danab dilag daakku. Da wan amu, ahilag daakkunu hamu madattem. Wan amuam wan dahilnu tituanak daatte, wan amunu maha laa, am dahilnu tituanaknab daakku. Lewi buɗubppan mana mettak danab iitta dilag wan, am wan amunu yau uɗitteppanu, appa daatte.

¹³ Aria, Lewi buɗubppan mana mettak danab iitta dilag wan, heqo laih daatte amu, wan amunu okkai am inam: elab nuhig am 12 kilomita maha ele, emaitak nuhig am 5 kilomita. Amuam nuhig elab oh, nuhig emaitak oh aakku.

¹⁴ Wan ag da meɗaglag amu, Lewi buɗub ag meppeg, laa nug uɗia aib daden meum. Lewi buɗub, ahilagib dayaɗ! Wan amuam wan enanagnab, laa oh eɗattak. Wan amuam da, Yawe, dahilnu tituanak daatte amunu, danab laa wan amu aib awom.

¹⁵ Aria, dahil wan amu laih laa daatte amu, nuhig okkai am inam: elab nuhig am 12 kilomita maha ele, emaitak nuhig am 2 kilomita maha ele. Wan amuppa aab okkai am gamagppa daakku. Aria, wan amu laa oh am, danab ah ag aab amuppa daatteb ele, ag wan laa amu uɗat mettaglag. Ag amuppa lag hekkulag, o amuppa doɗ maadppeg, gikkiɗah lakkulag; am anam daakku.

¹⁶ Aab amunu okkai am inam; laih laih oh elab ahilag am laippu, amu elab amuam 2,250 mita.

¹⁷ Aab okkai amu dimittim laih laih waɗele ohppa am wan, lag keeke iitta ele daakku. Aab giginppa ukka, wan amu daug batakppa am 125 mita.

¹⁸ Aben aab daakkuppa, aben amuam aben dahilnu tituanak daatte, aben amu heqo laih daatte. Aben aab daatte, aben da laul daatte, aben aɗit amu oh am elab ahilah laippu, amge aab daakku amuppa aben aɗit laa aab daug laih laih daattep, laa aab daug laih kaɗag uɗitteppanu daatte, laa aab daug laih qaban uɗitteppanu daatte. Wan maha aɗit amu oh am okkai ahilah laippu. Ahilah okkai am inam: elab ahilah am 5 kilomita, emaitak ahilah am ele 5 kilomita. Amu danab aab okkaippa uɗat hetteb ele, ahilag ee am amuppanu aoglag.

¹⁹ Amu danab Israel dilag huu okkai anen anen ohnu amu, ag aab okkai amuppa daaglag, amu ag huu attenppanu uɗin daatteb, ag oh wan amuppa dad hekkulag.

²⁰ Amu wan maha laa amu, am wan dahil, wan amunu okkai am laih laih oh 12 kilomita maha ele. Wan maha amuam dahilnu tituanak daakku, amu Lewi buɗubppan mana mettak danab, Lewi buɗubppan mana mettak danab iitta, da laul amu aab okkai ele aguppa daaglagnu dahil daakkunu hamu da meɗaglag.

²¹ Aria, wan maha amu anam gamagppa daatte; wan amuam dahilnu tituanak daatte, aab okkainu wan ele. Wan maha amu daug laih, qaban uɗitteppanu daatte, tom amuppan ukka, Mediterenia yuppa batak, wan amuam Israel dilag okkainu daakku. Aria, wan maha laih, kaɗag uɗitteppanu daatte, tom amuppanu ukka, Jodan le batak, wan amu ele Israel dilag okkainu daakku. Wan maha aɗit amu oh dilah elab am 12 kilomita maha ele. Wan dahilnu tituanak daatte ele, dahil mettid lag aguppa daakku amu, wan amuam wan okkai aɗit laa amu gamalahppanab aakku daakku.

²² Anam daatte amunu, Lewi buɗubppan mana mettak danab iitta dilag wan, wan aab okkainu ele amuppa daakku. Wan amuam Israel dilag okkai danab dilag wan gamagppa daakku. Amu Israel dilag okkainu wan, wan amu heqo laih am Juda wan daakku. Heqo laih am Benyamin wan daakku.

^23-27 Aria, Israel dilag huu okkai anen anen laa oh ag ahilag wan aoglag. Ag huu laih daatteb, anamib ahilag wan anen anen oh dilag tom laih am kaɗag uɗitteppanu daakku. Tom laa, qaban uɗitteppanu am Mediterenia yu. Da Yawe, wan dahil am gamagppa anam daatte amu, wan amunu tom yau uɗitteppanu daatte, tom amuppanu ukka, Israel oh dilag yau uɗitteppanu tomppa batakku, imu oh ag wan amuppa wan aoglag. Amu ahilag yawalti uɗitteppanu tom, ahilag yau uɗitteppanu tom ele, anen anen dilag tom aɗit, amuam wan ohnu yawalti uɗitteppanu tom, yau uɗitteppanu tom ele gottep bia aa gamalahppa, tom gamag gamag ele daaglag. Aria, wan paniaknu obatak piɗe piɗe dahil wannu tom yau uɗitteppanu digma, yau uɗitteppanu ugakka, Israel oh dilag tom, yau uɗitteppanu batak daatte am inam: Benyamin, Simeon, Isakar, Seblon amu Gad ele. Huu amu oh aben amuppa ahilag wan anen anen, anam anam aoglag.

²⁸ Amu Gad dilag tom, yau uɗitteppanu daatte, ⌊tom amuam Israel oh dilag tom yau uɗitteppanu daatte ele amu,⌋ tom amu inam daatte. Tom amuam Tamar aabppa appa digma ugakka, le onig Kades Meriba appa ukka, appanu am oolnu noak onig Isip digma dim lamitta ukka, Mediterenia yuppa batatte.

²⁹ Laa ag uɗat amu hekkulag ele amu, ag wan anam anam otippeg, Israel dilag huu okkai ag anam wan amu, ag aulag daakkunu, ag aguppa daaglagnu amu, ag anam aweg!” Naɗi Yawe Nug anam atte.

Aab okkai wan gamagppa daattenu odnu nai

³⁰ Aria, Yawe Nug anam awowa, nug nai tuɗitta aum. “Amu aab okkai wan gamagppa daatte amu, nuhig okkai laih laih oh am 2,250 mita. Amu aɗ laih waɗele ohppa od daaglag; laih ewam daappeg, laih ele ewam daaglag, oh anamib.

³¹ Amu od amu onilag am Israel dilag huu okkai onilag aakkuib. Aria, aɗ laa yawalti uɗitteppanu daatte amu, od aɗ amuppa daatteb onilkad am Ruben, Juda amu Lewi.

³² Aria, aɗ laa kaɗag uɗitteppanu daatte amu, od aɗ amuppa daatteb onilkad am Josep, Benyamin amu Dan ele.

³³ Aria, aɗ laa yau uɗitteppanu daatte amu, od amuppa daatteb onilkad am Simeon, Isakar, Seblon ele.

³⁴ Aria, aɗ laa qaban uɗitteppanu daatte amu, od aɗ amuppa daatteb onilkad am Gad, Aser amu Naptali ele.

³⁵ Anam amunu, aab okkai amunu talilittaknu melemel oh am 9,000 mita. Haen amuppa digmeeb, ii tuqa awakppa aab amunu onig am, Yawe Nug Ana Daatte, daakku.”