Esekiel 44 - Nobonob Baibel

Kayaknu mettid lag daatteppa aben wanaknu od kaɗag uɗitteppanu daatte amu, od amuam anam manakib daakkuoitte

¹ Amu danab nug melemel meum ele amu, nug eɗua omaiɗa, Israel danab dilag haɗap-ppa, aɗ Kayaknu mettid lag nuhig tomppan keeke oh ele talilitta daatte laih laa kaɗag uɗitteppanu od oɗe guguittak appa ukke, da neekki ukke, od appa daatte amu, od amuam manak dayeye anidmi.

² Nug omaiɗe, da aguppa daaiyi, Yawe Nug da amelppa aum. “Od imuam hanhan manakib daakku. Laa nug aib matulom. Laa nug od imuppa Kayaknu mettid lag, amuppa aib teum. Da Yawe, da Israel dilag Kayak amu, da od imuppa ukken, da laulppa temi amunu, od imuam manakib daakku.

³ Israel dilag okkai, king, nugib aben imuppa uɗia, od lag ooppa Yawe noobppa dayaya, ee lakkunu elele, amge nug oo laa, oo amu onig am Entrans Oo, nug oo amuppaib daakku. Nug appa ukka, ib uɗiomppaib eɗua gokku,” awa aum.

⁴ Yawe Nug da amelppa anam a, danab melemel meum amu, nug omaiɗa, aɗ Kayaknu mettid lag talilitta daatte laih yawalti uɗitteppanu, appan odppa wana omaiɗa, Kayaknu mettid lag noobppa ukkom. Nug omaiɗa ukke, da neekki ukke, Yawenu binag amahlak oppiaawak ele Nug laugppa ambe antten, da laippun gatel qaun oin, gomelen, iɗul wanppa memi.

⁵ Da anam hei, Yawe Nug da amelppa aum. “Danab bekka, na keeke oh pehettak anidna, da dahil lagnu ɗonu aɗi aɗi madikkul amu, na amu pehettaknab dookkutnu daut human, tutukku doye! Na danab aun aɗi ag da laulppa gokkulagnu elele, aun aɗi ag elele iitta amu, na amu ele anidna doye!

⁶ Na amu hewona, na Israel danab ah, ag am nai tappe nak danab ah, na ag amelagppa, ‘Naɗi Yawe Nug inam atte,’ awona, na inam appe doyeg! ‘O Israel danab ah, ag kobol nau, da kobol amunu oolppa uuaknab doottem amu, ag kobol amu huana heppig, amge baula aib heppig.

⁷ Ag kobol eheɗ kuɗum, da kobol amunu uuaknab doottem, ag amu henana, ag wan laihnu danab, ag oolag babaittak iitta, beɗulag gaɗa otaɗak iitta ele, ag danab amu omaladna, mettid lag dahilppa goppig. Ag omaladna wana, haen amuppa ag ele doɗ main, da meɗappig amunu, kobol amuppa ag heeg, da laul dubuttid tak ele dayom. Ag amu henan, ag dahil nug tituana nai qakkak ig hemut ele amu, ag nai amu tippalppig.

⁸ Da ag keeke dahilnu tituanak daattebnu aɗi aɗi hekkulagnu ɗo memi amu, nai amu ag uun ii henana, ag heeg, danab mettid lag dahilppa daanna, appa uɗat hekkulagnu elele iitta ele amu daanna, uɗat amu gumappig,’ ” awa atte.

⁹ Amu Naɗi Yawe Nug inam atte. “Wan laihnu danab, ag oolag babaittak iitta, beɗulag gaɗa otaɗak iitta ele amu, amunu laa nug dahil mettid lag ooppa iinab tema. Ge, wan laihnu danab, ag ag Israel oolagppa daatteb ele, ag oolag babaittak iitta, beɗulag gaɗa otaɗak iitta ele amu, ag ele, ag iinab temana.

¹⁰ Haen Israel danab ag ib apiɗidna, uuiɗna matatun oiyegeg, Lewi buɗub laa ag ele uuiɗna, umanab gona, kayak hambuppuak noolagppa dup nona binalag meppig ele, Lewi buɗub amu ag hipunin heppignu bu aoglagnu daatteb amunu, ag bu amu aoglag. Ii qe-eɗidmana.

¹¹ Lewi buɗub amu ag mettid lag dahilppa dahil ɗo maɗoɗnu uɗat laala hekkulag; am ag lagnu odppa daanna, appa uɗat hekkulag, ag doɗ laala danab ah ag manaknu ofa aon uɗiglag, o doɗ adekku laa danab ah ag main meɗaglagnu aon uɗiglag amu, Lewi buɗub ag doɗ amu baalag otaɗadkkulag, ag danab ah noolagppa daanna, ehanittak aɗi aɗi hekkulagnu daakku am hekkulag,

¹² amge ag kayak hambuppuak noolagppa dup nona binalag menana, danab ah amu anam ele hekkulagnu ehanadppig, diig amunu Israel ag nena qena, hipunin heppig amunu, da Naɗi Yawe, da eppel hume, dahil nai ɠagattag qetten, ag hipunin heppig amunu, ag amunu bu aoglagnu ain malami.” Naɗi Yawe Nug anam atte.

¹³ Amu Naɗi Yawe Nug atte. “Amu nob nau amuam inam. Ag keeke digdig amu hekkulag, amge ag baula mana mettak danab daanna, keeke dahilnu tituanak daatteb ele, o mana mettak dahilnu tituanaknab daatteb, danab ah ag da meɗaglagnu hetteb ele, ag amu laa gumadna iinab wamana. Ag kobol nau, da kobol amunu oolppa uuaknab doottem amu, ag kobol amu heppig amunu, ag kobol amunu uɗa nak ag aɗan oiglag.

¹⁴ Anam, amge da ii geɗadppa. Iitta. Da heppi, ag da laulppa uɗat digdig laa daatte, ag amu hekkulag.

¹⁵ Lewi buɗub amu, ag amu hekkulag, amge Lewi buɗub laa, ag Sadok buɗub amu, ag am mana mettak danab daaglag. Haen Israel laa ag da uuiɗna, uma ukkaeg amu, Sadok buɗub ag ahilag uɗat da noolppa mettid lag dahilppa hekkulagnu dayom amu aakku heppig. Ag amu heppig amunu, ag da gumiɗna uɗin, da noolppa dahil ɗo maɗoɗnu uɗat hekkulag; ag doɗ ittag manan meɗan, ag tiig ele gokkaɗkkulagnu aakku daatteb.” Naɗi Yawe Nug anam atte.

¹⁶ Amu Naɗi Yawe Nug inam atte. “Ag akka dahil mettid lag ooppa nokkulag. Ag akka dahil qaɗab gumidna wana, da noolppa daanna, dahil ɗo maɗoɗnu uɗat hekkulag. Ag da aɗi aɗi hekkulagnu ami amu, ag amu hekkulag.

¹⁷ Ag amu hekkulag, amge haen ag mana mettak danab dilag haɗap-ppa gokkulag amu, ag tatam lamen linenppa hak takkan wakkulag. Ag mana mettak danab dilag haɗap-ppa, o da laul ooppa dahil ɗo maɗoɗnu uɗat henana amu, ag lamen sipsip uɗigppa hak takkan aib goppig.

¹⁸ Ag lamen amu takkanna, ag ikkilagppan lamen, dimittimnu lamen waappa lamen laa metteb ele amu, lamen amu oh am linenppa hak amuib dayaɗ! Mana mettak danab ag lamen aɗi laa, lamen amuam keeke aɗippatai hak, amge mana mettak danab ag tagappeg, heɗi aqakku amu, ag lamen laa amubia aib tagappig.

¹⁹ Aria, mana mettak danab dilag haɗap-ppa, appa dahil ɗo maɗoɗnu uɗat malona, ag eɗun Israel danab dilag haɗap-ppa, danab ah daatteppa gokkulagnu daanna amu, ag tatam linen lamen tagappig uɗadna, lamen laa takkaglag. Takkona, ag linen lamen lag oo Yawenu tituanak daatte ele amuppa meppeg dayebeb, ag dimittim gokkulag. Aɗinu ag anam hekkulag? Ag amu ii hekkulag dayeb, linen lamen tagatteb ele, amuam dahilnu tituanak daatteb, lamen amu ahilagppa dayebeb, ag danab ah gumadna goppeg, danab laa nug lamen aɗeb, ⌊am heeb, nug dahilnu tituana meɗak daakku, amunu⌋ anam daamnanu, mana mettak danab ag anam hekkulag.

²⁰ Mana mettak danab ag ikkilag uɗug oh hoippeg, tutunab aib meum. Ag ele ikkilag uɗug uuppeg, elab aib dayom. Ag ikkilag uɗug hanhan elele otaɗppeg, eleleib dayaɗ!

²¹ Mana mettak danab laa nug mana mettak danab dilag haɗap-ppa gokkunu dayaya, nug wain aib laum.

²² Mana mettak danab ag ah laa, gamu lamittom, o mana mettak danab iitta laa mauhe, wau hamu daatte ele amu, ag ah amu ii aomna. Iitta. Mana mettak danab ag Israel buɗubppan ah danab laa ele ii niipiɗ, o mana mettak danab laa mauhe, wau hamu daatte, ag ah amu aakkuib diiglag.

²³ Mana mettak danab ag danab ah keeke dahilnu tituanak daatte, keeke hamu daatte ele, ag keeke aɗit amu danab ah ippunadna, ag danab ah ag aɗi keeke am dubuttid iitta, aɗi keeke am dubuttid ele ippunadppeppeg doyeg!

²⁴ Danab aɗit laa aa naippa a ona, a doak hekkulah dayeb amu, mana mettak danab ag epeɗiak danab daan, aa oolahppa aun nug ena hette, aun eheɗ hette amu, ag dahil ɗo dabmenana, ag nai amu babaitteg! Mana mettak danab ag hobul dayaknu haen epeɗiak, ag Israel ag hobul amuppa ag aɗi hekkulagnu ɗo mattami amu, ag ɗo iɗu iɗu amu oh dim lamidna, ag dahil Sabat, dahilnu tituanak daakkunu ɗo mattami amu, ag amu ele dim lamidkkulagoitte.

²⁵ Danab nug mauhak gaɗa aɗatte amu, nug aakku Kayak ele ouqa dayaknu elele iitta amunu, mana mettak danab ag mauhak gaɗa gukkuidna aib wappig. Aib anam daatte, amge mauhom amu mana mettak danab amu mamegte, o anigte, o bekkate, o awagte, amagte, o appinag danab ii awom elete dayeb amu, nug gukkuidna wana, Kayak ele ouqa dayaknu elele iitta daakkunu elele.

²⁶ Amge mana mettak danab nug mauhak gaɗa anam gumitta gokku dayeb amu, nug Kayak ele ouqa dayaknu elele iitta amunu, nug eɗua, Kayak ele ouqa dayaknu elele daakkunu kobol hekku. Nug ha mala, nug eɗua, Kayak ele ouqa dayaknu elele daakku, amge nug deɗ eblaih aɗit baula hamu dayaya,

²⁷ deɗ nug eɗua, mana mettak danab dilag haɗap-ppa, mettid lag dahilppa dahil ɗo maɗoɗnu uɗat hekkunu gokku amu, nug nukka nuhignu nug ib etta hipunin haknu ofa mana, da meɗaɗ!” Naɗi Yawe Nug anam atte.

²⁸ Amu Naɗi Yawe Nug atte. “Da Yawe, da dakka am mana mettak danab ehanittak amunu, na ag Israel wan ooppa wan aulag daakkunu aib mattame. Da ag aulag daakkul.

²⁹ Mana mettak danab ag Israel danab ah dilag ee aegnu ofanu aeg, amu ib etta hipunin haknu ofanu teppu laa, amu eheɗ haknu ofanu teppu laa ele aon lakkulag. Ag amu lakkulag, amu aɗi keeke Israel ooppa Yawenuib nuhig pelemppa daatte ele amu, amuam ele mana mettak danab dilag aakku.

³⁰ Ag Israel ag ahilag ee tatam oɗutte amu, amuppanu enanag daatte, ee amuam mana mettak danab dilag daakku, amu ag aɗi keeke ag aon, da Kayak, dahil daakkunu hamu meɗatteb amu, keeke amu oh ele mana mettak danab dilag daakku. Aria, ag ee aeg ganuɗaknu menppa metteb ele, ag meppeg ganuɗebeb, plaua neebeb, ag plaua tatam nette aon, mana mettak danab matteg! Ag amu hekkulagnu diig am, ag aun aɗi ag amu hekkulag amu, da anttena, da itittak ena ag, am ag baelkadppa ele madakkul.

³¹ Amu aite o doɗtai, nukka mauhom, o doɗ laa qe mauhom niitte amu, mana mettak danab ag teppu amu ii lamana.” Yawe Nug anam atte.