Esekiel 43 - Nobonob Baibel

Yawenu binag amahlak oppiaawak ele eɗua, Nug laugppa uɗiom

¹ Amu dimppa danab melemel meum ele nug omaiɗa, Kayaknu mettid lagnu od, kaɗag uɗitteppanu daatte amu, nug omaiɗa appa ukkom.

² Nug omaiɗa uɗie, da kaɗag uɗitteppanu neekki ukke, da Israel dilag Kayaknu binag amahlak oppiaawak ele appanu uɗieye anidmi. Amu da Kayak baag ele doomi, amu le okkai ui huana otte, amubia. Amu nuhig binag amahlak oppiaawak ele huana amahale, wan oh amahla auta autanab awom.

³ Da tuleglegppa keeke amu anidmi am anukka, haen Yawe Nug aab okkai heeb nauhkkunu uɗieye anidmi, amu anukka da le Kebar appa dayeye tuleglegppa anidmi, amubia gemu ele anidmi. Da amu anidmi amu, da laippun gatel qaun o, gomelen, iɗul wanppa memi.

⁴ Da dup noin daaiyi, Yawenu binag amahlak oppiaawak ele uɗia, Kayaknu mettid lagnu aɗnu od kaɗag uɗitteppanu daatte ele amu, od amuppa wana, Kayaknu mettid lag ooppa ukkom.

⁵ Anam ukke, Kayak Ouɗi Nug da humiɗa omaiɗa ukka, aben Kayaknu mettid lag noobppa daatte, amuppa ukkom, amu Yawenu binag amahlak oppiaawak ele nuhig mettid lag oh amba dayom.

⁶ Anam daye, danab nug melemel meum ele da heqol laih appa dayeye, laa Kayaknu mettid lag ooppanu dahilnu inam a doomi.

⁷ Nug aum. “Danab bekka, aben imuam dahil sia kingnu aben, da daakkulnu aben iikku. Aben imuppa da Israel oolagppa hanhan daakkul. Israel ag, ahilag king ele ag baula kayak hambuppuak noolagppa dup nona binalag ii memana; ag ele ahilag king dottog aon qappan, amuppa ag da onil oppiaawak ele heeg, danab ah laa dilag neekkakppa nau dayom amu, ag amu baula ii hemana.

⁸ Israel dilag king ag lag enanagnab ahilag da laul guguittaknab heppig. Aɗ aakkuib da ag ele gamagppa dayom. Ag beɗulagppaib anam da ag ele guguittaknab daappig, amge ag kobol digdig, da kobol amunu oolppa uuaknab doottem amu, ag kobol amu heegeg, danab ah laa dilag neekkakppa da onil oppiaawak ele aakku nau dayom amunu, da oo nauhak okkai doyen, da hei, ag aakku padal mena nauhppig.

⁹ Anam, amge gemu Israel danab ah ag kayak hambuppuak noolagppa dup nona binalag mak uuna, ag ahilag king laala dottolkad ele binalag mekkulagnu uuppeg amu, da ag oolagppa hanhan daakkul.

¹⁰ Amu danab bekka, Israel danab ah ag hipunin heppignu uɗa nak dooglagnu amu, na da laulnu ag amelagppa madippe doyeg! Ag lag amu dottog dabmena,

¹¹ ag nau heppignu uɗa nak dooglag dayeb, na lag dottogppa keeke anidtteb elenu diig amu ag amelagppa mehuqe! Na mehuqnana, na aɗ, lag, keeke laa ele digdig, od lag ooppa ukkaknu, od dimittim uɗiaknu ele, nuhig keeke oh ele, na keeke amu ohnu diig ippunadkkut. Na amu ippunadna, na lag amunu ɗo oh ippuanatte! Na amu hena malona, danab ah ag keeke amu oh hekkulagnu, ɗo amu oh dim lamidkkulagnu, ag na neekkidppeppeg, na ɗo oh pepappa ye!

¹² Amu Kayaknu mettid lagnu ɗo am inam daatte. Kayaknu mettid lagnu aben am qauko igippa daatte, amu qauko ikki amu oh am dahilnu, tituanaknab dayad! Amuam Kayaknu mettid lag abennu ɗo aakku.” Yawe Nug anam aum.

Kayaknu qaɗab

¹³ Aria, Kayaknu mettid lagppa melemel laippunu elab am gane daakkunu anak biappa, qaɗabnu okkai am inam. Qaɗab diigppa uug mawaknu ukku daatte amu, attan tak nuhig am 50 sentimita, teppu laih laih oh ele am ele 50 sentimita. Qaɗab diigppa batten laa amu talilittak daatte amu, otala nuhig am 25 sentimita. Aria, imuam qaɗabnu attan taknu nai.

¹⁴ Ukku anam daye, qaɗab hak am inam. Qaɗab ukku qaɗeppa, am qaɗab diig daatte. Qaɗab diig qaɗeppa qaɗab gamag daatte. Aria, qaɗab gamag qaɗeppa am qaɗab ikki daatte. Amu qaɗab diignu attan tak am 1 mita. Aria, qaɗab gamagnu attan tak am 2 mita. Amu ohnu teppu laih laih oh am 50 sentimita.

^15-16 Qaɗab gamag anam aakku daye, amu qaɗeppa qaɗab ikki daatte. Nuhig attan tak am 2 mita. Amu qaɗab ikkinu melemel laih laih oh am 6 mita. Aria, qaɗab ikki qaɗeppa, daug daug ohppa, keeke laa doɗ qeqeɗi bia daatteb; amu keeke waɗele amu oh qaɗab ikki qaɗeppanu tena, nakok attan daatteb. Qaɗab qaɗeppa amu, ag appa doɗ main, Kayak medatteb.

¹⁷ Qaɗab gamag laih laih oh am ele melemel laippuib; amuam 7 mita. Qaɗab gamagppa ele batten laa amu talilittak daatte, otala nuhig am 25 sentimita. Diigppa laih laih oh uug mawaknu ukku daatte, teppu nuhig am 50 sentimita. Aria, qaɗabnu kaɗag uɗitteppanu, laih appa qaɗab igippa taknu adqaɗ daatte.

¹⁸ Qaɗab anam daatte amu, Yawe Nug da amelppa aum. “Danab bekka, da Naɗi Yawe, da inam attem. Ag qinob qaɗab amu hena malappeg amu, mana mettak danab ag amuppa manaknu ofa hekkulagnu, ag doɗ tiig aon, qaɗabppa tauɗkkulagnu ɗo am inam.

¹⁹ Lewi buɗub Sadok, nug buɗub, ag mana mettak danab, ag Lewi buɗub, ag dahil ɗo maɗoɗnu uɗat hekkulagnu da noolppa uɗitteb amunu, na ag ib etta hipunin haknu ofa hekkulagnu, na ag makau gaiɗ laippu matte!” Naɗi Yawe Nug anam aakku aum.

²⁰ Am Naɗi Yawe Nug aum. “Na ag makau amu madappe, ag qeppeg mauheb, na tiig laa aon, keeke waɗele doɗ qeqeɗi biappa mena, qaɗab ikki daug daugppa mewona, qaɗabnu batten ukkak ele laidkkut. Na tiigppa anam heppe, qaɗab am oppiak daya, qaɗab am Naɗi Yawenu neekkakppa oppiaawak daakku.

²¹ Na amu hewona, na ib etta hipunin haknu ofanu makau dawai amu aon, dahil mettid lag nuhig tomppan keeke oh ele dimittim, aben da ippunadmippa manakkut, amge na mettid lag aben ooppa ii manamna.

²² Na amu hewona, deɗ amu uueb, wagɗeb buttua, deɗ amuppa amu, na meeme dawai laippu, beɗuppa eheɗ laa ii daatte, na amu aon, ib etta hipunin haknu ofa hekkut. Aria, qaɗab oppiak daakkunu amu, na doɗ amu tiig laa aon, makau dawai tiigppa heme bia hekkut.

²³ Na qaɗab oppiak ele daakkunu uɗat amu oh hena malona, na makau gaiɗ, amu sipsip dawai laa ele, aa oh beɗulahppa eheɗ laa iitta, na amu oh manatna meɗakkut.

²⁴ Na manatna, da Yawe, da meɗakkut. Mana mettak danab ag yu kalu doɗ beɗulahppa tauɗppeg ukkeb, manaknu ofa daakkunu main, da meɗaglag.

²⁵ Aria, na amu hewona, na digmena, deɗ eblaih aɗit ele, deɗ amu anen anenppa na meeme dawai laippu ib etta hipunin haknu ofa daakkunu mana mettak hekkut. Amu deɗ amu oh ele na makau gaiɗ laippu, sipsip dawai laippu ele, aa oh beɗulahppa eheɗ laa ii daatte ele manatna meɗakkut.

²⁶ Deɗ eblaih aɗit ele amuppa mana mettak danab ag doɗ tiigppa heppeg, qaɗab am Yawenu neekkakppa oppiaawak daya, oppiak ele daakku. Ag anam heppeg, amuppa mana mettak danab ag qaɗab amu dahil daakkunu tituanna meɗaglag.

²⁷ Aria, deɗ eblaih aɗit ele amu iitta meeb, deɗ eblaih ewamppa mana mettak danab ag digmena, qaɗab amuppa Israel dilag mana mettak digdig, laa am manaknu ofa, laa am laippu dayaknu ofa, ag amuppa manan, da meɗaglag. Ag anam heppeg, da ag Israel, da ag diiadkkul.” Naɗi Yawe Nug anam atte.