Esekiel 42 - Nobonob Baibel

Lag aɗit laa Kayaknu mettid lag guguittak daapiɗ

¹ Amu dimppa amu danab nug melemel meum ele nug da omaiɗa, Israel danab dilag haɗap-ppa ukkom. Nug ukka, nug omaiɗa, lag laa, lag amuam Kayaknu mettid lagnu yawalti uɗitteppanu daatte amu, nug appa ukkom. Lag amuam lag laa Kayaknu mettid lagnu qaban uɗitteppanu daatte, lag amuppanu uma ii daatte.

² Lag amunu elab am 50 mita, amu emaitak nuhig am 25 mita. Od oɗe am yawalti uɗitteppanu daatte.

³ Lag amunu gilil laih am Kayaknu mettid lag nakok guguittak daatte. Laa nug lag amu uua, Kayaknu mettid lag, amuppa ta, amu nug 10 mita gokku. Aria, lag amunu gilil laih am Israel danab dilag haɗap, men duqak ele daatte, aben amu guguittak daatte. Lag amuam oo attan tak ewam ele; laa wanppa daatte, laa amu attan daatte, amu laa am amu attan daatte. Lag elab wanppanab daatte amu, nug nuhig emaitak am nakok okkai. Lag laa, lag amu attan hak amu, amu nuhig emaitak am ele okkai, amge laan emaitak bianab iitta. Aria, lag laa, lag gamagppa attan hak amu, nug nuhig emaitak am gamagppa bia iitta. Nakok hogogdoak ele.

⁴ Amu lag amunu yawalti uɗitteppanu, appa haug waappa oiyaknu ib bappaidppig daatte. Oiyaknu ib amunu elab am 50 mita, amu emaitak am 5 mita. Lag amu ooppa noaknu od am amuppa daatteb.

⁵ Amu lag oo wanppa daatteb, ahilag emaitak am okkai. Oo amu qaɗelagppa daatteb, ahilag emaitak am okkai amubia iitta; nakok hogogdoak. Aria, oo laa, oo gamagppa daatteb qaɗelagppa daatteb amu, ahilag emaitak am okkai laa bia iitta; am ele nakok hogogdoak daatte. Aɗinu? Adqaɗppa ta, od od ukkaknu ib oo amu noolkadppa dayom, ukkaknu ib amu, am oonu aben nakok awa daatte.

⁶ Lag oo wanppa daatteb, oo amunu gilil am lag aɗit laa attan daattep, am aa uulah mawa daatte. Anam babaittak amunu, oo amuam uug mawaknu men biidod, lag laala haɗap-ppa daatteb, am men biidod amubia laa iitta.

^7-8 Oo o lag honap wanppa hak, lag amu heqo mana mettak danab dilag haɗapnu aɗ daatteppa, appa lagnu laih am oo laippuib, gilil amuam gililppa ulah ippu, od ele iitta; aria, gilil amu laih am oo kuɗum ele. Laih oo laippuib daatte, elab nuhig am 25 mita, laih oo kuɗum ele, nuhig elab am anamib. Aria, lag wanppa hak attan, amuppa oo anen anen lag digma ukka batakppa aakkuib daatteb.

^9-10 Aria, lag amunu laih kaɗag uɗitteppanu daatte, aben amuppa aɗ laa, aɗ amuam mana mettak danab dilag haɗap talilidtte, aben amuppa aɗ digmedeppa, od laa daatte. Danab nug mana mettak danab dilag haɗap ooppanu dimittim gokkunu hekku amu, nug od amuppa gokku. Aria, Kayaknu mettid lagnu yau uɗitteppanu lag laa amubianab aakku daatte. Lag amu ele lag laa Kayaknu mettid lagnu qaban uɗitteppanu daatte, lag amu guguittak daatte.

¹¹ Lag amu heqo laihppa oiyaknu ib, lag laa, yawalti uɗitteppanu daatte, lag amu haugppan ib amubianab aakku daatte. Ib amunu emaitak, kobol, od oh ele oh am lag yawalti uɗitteppanu daatte, nug amunu keeke oh ele laippuib.

¹² Aria, lag amunu heqo laih yau uɗitteppanu, laih kaɗag uɗitteppanu, aben amuppa aɗ laa, aɗ amuam mana mettak danab dilag haɗap talilidtte, aben amuppa aɗ digmedeppa, od laa daatte. ⌊Danab nug mana mettak danab dilag haɗap ooppanu dimittim gokkunu hekku amu, nug od amuppa gokku.⌋

¹³ Lag aɗit amu aakku anam daattep, amu danab nug melemel meum ele nug da amelppa aum. “Lag aɗit amu oh aa Kayaknu tituanak daattep. Lag aɗit amuppa mana mettak danab ag Yawe toppa gotteb ele, ag amuppa ofa Kayaknu tituanaknab daatteb lakkulag. Lag amunu oo oh am Kayaknu tituanak daatteb amunu, mana mettak danab ag mana mettaknu ee aeg, le, doɗ teppu ⌊ag lakkulagnu⌋ Kayaknu tituanaknab daatte amu, ag amu aguppa mekkulag. Mana mettak amuam ee aegnu ofa, ib etta hipunin haknu ofa, amu eheɗ haknu ofa ele.

¹⁴ Amu mana mettak danab ag Kayaknu mettid lag nuhignu tituanak daatte ele uun, Israel danab dilag haɗap, danab ah daattebppa gokkulagnu hekkulag amu, ag tatam lag aɗit amuppa lamen ahilag Kayaknu tituanak daatteb ele, ag lamen amuppa Yawenu uɗat heppig ele, ag lag aguppa lamen amu uɗana, meppeg dayebeb, lamen laa takkona gokkulagoitte. Lamen amuam Kayaknu tituanak daatteb amunu, ag anam hekkulag. Ag lamen ahilag Kayaknu tituanak daatte takkak ele danab ah ele daattebppa iinab gomana,” awa aum.

Kayaknu mettid lag nuhig tomppan keeke oh elenu melemel

¹⁵ Aria, danab nug Kayaknu mettid lag nuhig tomppan keeke oh ele ooppan keeke melemel elele ma malowa, nug omaiɗa, Kayaknu mettid lag nuhig tomppan keeke oh ele dimittim ukkom. Nug od oɗe kaɗag uɗitteppanu daatte, nug amuppa da omaiɗa, dimittim ukkom. Nug appa ukka, nug Kayaknu mettid lag nuhig tomppan keeke oh elenu okkai dookkunu melemel meum.

¹⁶ Nug melemel adppa hak amu aɗa, laih kaɗag uɗitteppanu appa me, da laih amunu elab am 250 mita anidmi.

^17-19 Nug amu hewowa, nug laih yawalti uɗitteppanu, laih qaban uɗitteppanu, laih yau uɗitteppanu ele, nug amu ohppa melemel ma, amu oh meum am ag anen anen 250 mita daatteb anidmi.

²⁰ Melemel anam dayom amunu, aɗ dayom, aɗ amuam wan laih laih oh am 250 mita talilitta dayom. Aɗ amunu uɗat am aɗi keeke Kayaknu tituanak daatte, aɗi keeke Kayaknu tituanak ii daatte, keeke amu oh oppateb, anttak piɗe piɗe daaglagnu daatte.