Esekiel 41 - Nobonob Baibel1 Amuppanu amu danab melemel meum ele nug da omaiɗa, Oo Gun Eleppa ukka, nug amuppa ukkaknu od oɗenu ukku honap melemel meum. Nug melemel me, od oɗe amunu ukku amuam 3 mita. 2 Od oɗenu emaitak am 5 mita, amu men gilil laih laih, amunu teppunu melemel am 2 mita maha ele. Oo amunu elab am 20 mita, nuhig emaitak am 10 mita. 3 Nug melemel amu ma malowa, nug Oo Gunnab ele ooppa ukka, nug amunu od melemel meum. Nug amu melemel me, od oɗe amunu ukku honap am 1 mita. Od oɗe amunu emaitak am 3 mita. Amu men gilil od oɗe amu laih laih daattep amu, ahilah teppu am 3 mita maha ele. 4 Nug melemel amu mewowa, nug lag oo amunu okkai dookkunu melemel me, da oo amunu okkai laih laih oh am 10 mita anidmi. Oo imuam oo tatamnu dimugppa daatte, amu danab amu nug amelppa aum. “Oo imunu onig am, ‘Oo Gunnab Ele,’ ” awa aum. Kayaknu mettid lag men gililppa oo laa hattaknu nai 5 Aria, danab amu nug ele Kayaknu mettid lagnu men gilil ooppanu melemel me, da gilil amunu teppu am 3 mita anidmi. Amu men gilil amu laih laih, bitobppa ele oo naunau hattak daappig, amu ahilag emaitak anen anen am 2 mita. 6 Oo amuam wanppa hak am 30, oo 30 amu attan am 30 laa ele, amu oo 30 amu attan am 30 laa ele aakku daatteb. Amu Kayaknu mettid lagnu men gilil dimittimnu am nakok adqaɗ bia daatte. Oo 30 wanppa heppig amu, ag ikkilkadppa batak Kayaknu mettid lagnu men gilil dimittimnu am teppu okkai ele, amge amu attan, oo 30 laa heppigppa amu, appa Kayaknu mettid lagnu men gilil dimittimnu am teppu okkai ele, amge nakok hogogdoak. Aria, oo 30 amu attan am ele anamib. Anam amunu, oo 30 wan qaɗeppa hak attan oo 30 laa heppig amu, ahilkad oonu maknu aben Kayaknu mettid lagnu men gilil dimittimnu, appa dayom. Aria, oo 30 amu qaɗeppa oo 30 laa heppig amu, ahilkad ele am anam. Oo ag anam daappig, amge ag oonu aɗa dayaknu keeke am gililppa ii buuidppig. Oonu am gililnu adqaɗ biappa daappig. 7 Kayaknu mettid lagnu men gilil dimittimnu am oh teppu laippu iitta. Wan qaɗeppa amu teppu laa; am okkai. Gamagppa am teppu laa; nakok hogogdoak. Aria gogppa tak ele am teppu laa; nakok hogogdoaknab bia amunu, oo wanppa hak, ahilkad emaitak am nakok hogogdoak. Oo gamagppanu, ahilag emaitak am nakok okkai. Aria oo gogppa takppanu amu, emaitak ahilag am okkai bia. Amu danab nug wanppa dayaya, adqaɗppa ta, nug oo laa gamagppa tewowa, ta lag oo attan ele tekkunu elele. 8 Amu Kayaknu mettid lag am men teppu ele attan daatte. Men amunu teppu am 2 mita maha ele, amu men duqak amuam oo 90 dilag men ukku ele daatte. 9-10 Oo 90 amu noobppan men gililnu teppu am 2 mita maha ele. Oo 90 amu, amuppanu ukka, lag laa daatteb, lag amuam mana mettak danab dilag amu, aben amunu emaitak am 10 mita, amu aben amuam Kayaknu mettid lag talilidtte. 11 Amu laa oo 90 amuppa wanaknu am od aɗit ele. Laa am yau uɗitteppanu daatte, laa am yawalti uɗitteppanu daatte. Men duqak, Kayaknu mettid lag amuppa daatte ele amu, men amuam oo 90 amu eɗitteg, 2 mita maha ele ukkak daatte. Kayaknu mettid lag, amuppanu qaban uɗitteppanu, lag laa dayomnu nai 12 Aria, Kayaknu mettid lagnu qaban uɗitteppanu, appa lag laa daatte, amge lag amuam Kayaknu mettid lag guguittaknab ii daatte, aben nakok okkai hamu daatte. Amu lag amunu elab am 45 mita, emaitak nuhig am 35 mita. Men gilil nuhignu teppu am 2 mita maha ele. Kayaknu mettid lag, lag laala ele dilag okkainu melemel 13 Danab melemel meum ele nug Kayaknu mettid lagnu elab melemel meum, amu melemel amuam 50 mita anidmi. Aria, nug Kayaknu mettid lag bitobppa digma, melemel me ukke, haɗap-ppa ukka, lag laa Kayaknu mettid lag, amuppanu qaban uɗitteppanu daatte, lag amu bitobppa batak am ele 50 mita. 14 Amu Kayaknu mettid lagnu emaitak, haɗap laih laih daattep ele amu, amu ohnu melemel am 50 mita. 15 Amu lag Kayaknu mettid lagnu qaban uɗitteppanu daatte amu, lag amu, amu lag amunu oo laih laih daattep ele, amunu oh elab am 50 mita. Amu Kayaknu mettid lagnu oo onig Entrans Oo, Kayaknu mettid lag oo tatam daatte, amuam Oo Gun Ele, amu aben amu eɗitta wanak daatte, amuam Oo Gunnab Ele, Kayaknu mettid lag hattaknu nai 16 oo amu oh am gumun duqakppa ukka, gililppa ulah ibuppa batak am, ag men amu adppa tonappig. Aria, gililppa ulah ippu daug daug ohppa, ag ad hogogdoakppa bala medappig. 17-18 Aria, Kayaknu mettid lag ooppa gumun duqakppa ta, od ikki nakok eɗittakppa amu, danab ag engel okkai-kerubim dottog, amu ad pam dottog ele hadappig. Engel okkai-kerubim laa dayeye, nug heqoppa ad pam daatte. Anamib heeg ukke ukke, lag amu ooppan gilil ohppa anam daatte. Amu engel okkai-kerubim anen anen oh ag iɗulag aɗit ele. 19 Iɗu laa am danab iɗu bia, amu iɗu amuam ad pam dottog laih neegtte. Aria, iɗu laih am laion bau iɗu bia, amu iɗu amuam ad pam dottog laih neegtte. Kayaknu mettid lag ooppan gilil ohppa ag anamib daatteb. 20 Dottolti amu ag gumun duqakppanu ukka, od nakokib eɗitta tak, aben amu ohppa daappig. 21-22 Amu Oo Gun Eleppa ukkaknu odnu ukku oh laih laih waɗele oh am melemel laippu, amu od laa, Oo Gunnab Ele ukkakppa amu, od ukku amu ele am laa bia daatte. Amu keeke laa qaɗab adppa hak bia, aguppa daatte. Nuhig attan tak am 1 mita maha ele, amu nuhig elab, nuhig emaitak ele am 1 mita. Nuhig biidod daug daug ohppa daatteb, dayaknu ukku nuhig, amu daug daug oh ele am adppa hak. Danab melemel meum ele amu, nug da amelppa aum. “Balal imuam Yawe toppa iikku daatte,” awa aum. 23 Od oɗe Oo Gun Eleppa taknu amu, od oɗe laa Oo Gunnab Eleppa taknu ele, od oɗe aɗit amu ohppa od aɗit daattep. 24 Od laa laih daye, laa laih daatte. Danab nug wana gokkunu haaha, nug od oɗe gamagppa wanana ha, od maha laih, maha laih ele duttunateb matulya laih laih wapeɗ gokku. 25 Oo Gun Elenu od qaɗeppa am ad pam dottog, amu engel okkai-kerubim dottog ele, lag ooppan gililppa daatteb, amubia hoiyak daatteb. Oo laa onig Entrans Oo, Oo Gun Ele noobppa daatte amu, oo amunu od dimittim am od qehakkaknu keeke adppa hak aakku daatte. 26 Oo laa onig Entrans Oo, oo amu daug daugppa, gililppa ulah ippu daatteb, amu oo amu ooppan gilil, amuppa ad pam dottog hoiyak daatteb. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.