Esekiel 40 - Nobonob Baibel

Kayak Nug he, Esekiel nug butti aɗi Kayaknu lag bau Jerusalem appa daakku anttom

¹ ⌊Nebukatnesar nug King Jehoiakin, amu ig laa ele awikka, Babilon wanppa diia ukka laih me dayak danab ah daagnignu uɗie daautut,⌋ maɗ 24 ukke, maɗ 25 digmakppa, kalamnu deɗ eblaih laih eleppa, deɗ amuam Nebukatnesar nug Jerusalem he nauhom ukke, maɗ 14 uuom, deɗ amunab amu, Yawe Nug da nuhig uɗat hekkulnu aɗaila he, da tuleglegppa Jerusalem gomi.

² Kayak he, da tuleglegppa Israel wanppa ukkai, Kayak Nug da qauko attannab, appa meiɗom. Qauko amu laih, laih amuam yau uɗitteppanu daatte amu, appa lag laala, aab okkai bia daaegeg anidmi.

³ Amu tuleglegppa Kayak omaiɗe, appa ukken, danab laa anidmi; nug beɗu anttaknu am bras bia. Danab amu nug aben amunu aɗ odppa dayaya, nug eppegppa melemel laa linen muɗippa hak, amu melemel laa adppa hak ele aɗalatom.

⁴ Da danab anam dayeye anitti, nug da amelppa aum. “Danab bekka, da na aɗi ippunidkkul amu, na amenppa pehettan neegna, dautppa ele pehettan doon, keeke amu oh pehettak dabmette! Aɗinu? Na anam hekkutnu Kayak Nug he, na ippa uɗime. Amu na aɗi keeke digdig anidkkut amu, na amu oh Israel danab ah amelagppa appe doyeg!” awa aum.

Aɗnu od oɗe kaɗag uɗitteppanu daattenu nai

⁵ Nug anam ana he, da aɗ anidmi. Aɗ amuam Kayaknu mettid lag nuhig tomppan keeke oh ele talilitta dayom. Amu melemel adppa hak danab amu eppegppa dayom amu, melemel amunu elab am 3 mita. Amu danab amu nug melemel amuppa he, aɗnu teppu 3 mita daye, attan tak nuhig ele anamib anidmi.

⁶ Nug amu hewowa, nug aɗnu od oɗe kaɗag uɗitteppanu daatte, nug od oɗe amuppa ukkom. Nug ukka, adqaɗ od oɗe amuppa tette eleppa te, nug melemel me, adqaɗ igippanu ukka, od oɗenab wanaknu am 3 mita anidmi.

⁷ Amu aɗnu od oɗe amuam hamu, oɗeib ii daatte. Iitta. Aɗnu od oɗe digmakppa amu, amuppa od laug laa aakku digma ukka, aɗ ooppan haɗap-ppa watte. Od laug amu ooppa heqo laih am oo nakok ewam daatteb, heqo laih ele anamib. Oo amu oh am daup danab dilag, ag aguppa daanna, danab ah anadkkulag. Oo amu oh ahilag elab am 3 mita, emaitak ahilag ele anamib. Amu oo amu oh, ahilag gilil oo amu oh gamag gamag daatteb amu, ag am menppa hak daatteb. Ahilag teppu am 2 mita maha ele. Amu aben amuppanu lag elab amu batakppa ukkak, oo laa onig Entrans Oo, appa ukkaknu oo, oo aɗit amu aakku daapiɗ. Amu Entrans Oo ukkaknu oo, nuhig elab am 3 mita. Aria Entrans Oo, amuppan od haɗap-ppa noa ukkaknu, od oɗe amuppanu ukka, adqaɗ digppa batak am 3 mita. Entrans Oo am Kayaknu mettid lag ukkakppa dayom.

^8-9 Amu danab nug melemel meum ele nug Entrans Oo amuppa ele melemel me, nuhig emaitak am 4 mita anidmi. Oo amuam lag elabnu batakppa dayom, am danab nug Kayaknu mettid lag, amuppa ukkaknu nug oo imu oppata wana, dimittim ukka, Kayaknu mettid lag, amuppa gokku. Amu nuhig men gilil Kayaknu mettid lag guguittak, od oɗe laih laih oh amu, ahilag teppu am 1 mita.

¹⁰ ⌊Anak amubia,⌋ od laug amu ooppa daup dilag dayaknu aben ewam laih daaeg, ewam laa laih daappig. Oo amu oh am okkai laippuib, amu men gilil oh oo naunau amu gamalagppa daappig amu, ahilag teppu am melemel laippu, piɗe piɗe iitta.

¹¹ Amu danab amu nug melemel amu oh ma mala, nug od laugnu od oɗenab emaitakppa melemel me, am 6 mita maha ele anidmi, amge od laih laih matulak ele amu, oɗe amuam emaitak 5 mita aakkuib.

¹² Daup danab dilag dayaknu oo oh heqo laih laih daappig amu, oo amunu men gilil danab oitteb guguittak am tutuib dayom. Men gilil amunu attan tak am 50 sentimita, teppu ele am 50 sentimita. Daup dilag dayaknu oo anen anen ahilag elab am 3 mita, emaitak ele anamib.

¹³ Amu danab nug melemel amu oh ma malowa, nug lag amu, nuhig emaitaknu melemel dookkunu nug men gilil laih dimittim appa digma, melemel me ukke, men gilil laih dimittim appa batom. Nug anam he, emaitak amuam 12 mita maha ele anidmi.

¹⁴ Oo laa onig Entrans Oo amu, oo amuppa haɗap ukkaknu aakku daatte. Amu danab nug melemel meum ele amu, nug amuppa melemel me, da oo amunu emaitak am 10 mita anidmi.

¹⁵ Od laug elab amu, am nuhig elab oh am 25 mita.

¹⁶ Amu daup dilag dayaknu oo oh ag dimittimnu men gililppa ulah ippu nakok ele daatteb; gililppa ulah ippu oo nakok oo aɗit aɗit gamalagppa ele daatteb. Aria, lag elab ooppa men gilil danab oitteb guguittak daatteb amu, ag men gilil amu qaɗeppa ad pam dottog bala daakkunu hoippig.

Israel danab dilag haɗapnu nai

¹⁷ Amu danab nug melemel meum ele nug da omaiɗe, da od laug amuppa oiye ukken, Israel danab dilag haɗap-ppa wami. Da wain, neekki ukke, aɗ Kayaknu mettid lag nuhig tomppan keeke oh ele talilitta daatte amu, aɗ amuppa ag oo 30 ele bappaidppig anidmi. Lag amunu men gilil laih am aɗ aakku. Aria, lag amu noobppa ag aben amuppa men duqaeg daatte.

¹⁸ Ag aben men duqak aguppa heeg, men duqak amu ukka ukka, haɗap amu oh talilidtte. Israel danab dilag haɗap am nakok honap daatte, mana mettak danab dilag haɗap, amuam nakok attan daatte.

¹⁹ Amu mana mettak danab dilag haɗap, amuam nakok attan daatte amu, amuppa wanaknu am od oɗeppa lag elab daatte. Aria, danab nug melemel meum ele nug kaɗag uɗitteppanu od laug batakppanu digma, mana mettak danab dilag haɗapnu aɗnu od oɗe digmakppa melemel me, melemel amuam 50 mita anidmi.

Aɗnu od oɗe yawalti uɗitteppanu daattenu nai

²⁰ Amu danab amu nug od oɗe, od laug amuppa melemel ma malowa, nug ukka, od laug yawalti uɗitteppanu, amuppa daatte amu, nug lag amunu keeke melemel meum. Appa ele Israel danab nug odppa ta, od lag elab amu ooppa noa, nug ukka Israel danab dilag haɗap-ppa wakku.

²¹ Lag elab amu, am laa daatte bianab daatte. Daup dilag dayaknu aben ewam laih daatteb, ewam laa am laih daatteb. Men gilil teppu ele oo amu gamalagppa daatte, oo laa onig Entrans Oo ele amu, keeke amu oh am od oɗe laappan ele melemel laippu. Od oɗe kaɗag uɗitteppanu daatte, amubianab imuppa ele daatte. Lag imunu elab am 25 mita, amu emaitak nuhig am 12 mita maha ele.

²² Od laug imu yawalti uɗitteppanu amu, oo laa onig Entrans Oo, aria gililppa ulah ippu, ad pam dottog hoippig ele amu, keeke amu oh am lag laappa kaɗag uɗitteppanu daatte amu, ag lag amuppa daatteb bia, laippuib daatteb. Od imuppa taknu amu, adqaɗppa tappa ukkak eblaih aɗit daatteb, amu oo onig Entrans Oo, oo amuam od laug amu batakppa, Israel danab dilag haɗap daatteppa daatte.

²³ Amu danab amu nug od laug batakppanu digma, mana mettak danab dilag haɗapnu aɗnu od oɗe digmakppa melemel me, melemel amuam 50 mita anidmi. Imuam od laug kaɗag uɗitteppanu daatte bianab daatte.

Aɗnu od oɗe yau uɗitteppanu daattenu nai

²⁴ Aria, danab amu nug da omaiɗe, da od oɗe laa yau uɗitteppanu, appa daatte amu, da appa ukken, od oɗe, od laug amu ele anidmi. Nug od oɗe amunu men gilil ooppanu, oo onig Entrans Oo, oo amu ele melemel dookkunu melemel me, od oɗe aɗit laappa keeke daatte bia, imuppa ele melemel laippuib daatte.

²⁵ Od oɗe imu, nuhig lag elabppa gililppa ulah ippu daatteb am laa bia daatteb. Lag imunu elab am 25 mita, amu emaitak nuhig am 12 mita maha ele.

²⁶ Od oɗe imuppa taknu ele am adqaɗ tappa ukkak eblaih aɗit dayom. Aria, oo laa onig Entrans Oo, oo amuam od laug amu batakppa, Israel danab dilag haɗap daatteppa daatte. Lag ooppa men gilil danab oitteb guguittak daatteb amu, men gilil amu qaɗeppa am ad pam dottog hoyak daatteb.

²⁷ Od oɗe imuppanu ukkakppa amu od oɗe laa mana mettak danab dilag haɗap-ppa ukkaknu dayom. Amu danab amu nug od laug imu batakppanu digma, mana mettak danab dilag haɗapnu aɗnu od oɗe digmakppa melemel me, melemel amuam 50 mita anidmi.

Mana mettak danab dilag haɗap aɗnu od oɗe yau uɗitteppanu daatte

²⁸ Amu dimppa danab nug melemel aɗom ele nug omaiɗa, od oɗe, od laug ele mana mettak danab dilag haɗap aɗppa yau uɗitteppanu daatte, od oɗe, od laug ele amuppa uɗia, mana mettak danab dilag haɗap ooppa noum. Nug appa ta, nug od oɗe, od laug elenu melemel me, od oɗe, od laug ele, amunu okkai am od oɗe laa, ahilag okkai am laippu anidmi.

^29-30 Amunu od, lag elab ele amu, nuhig oo onig Entrans Oo, daup danab dilag dayaknu oo, ooppan men gilil ele amu, keeke amu oh dilag okkai am od oɗe laa oh dilag bianab. Lag elab amuppa oo laala oh, oo onig Entrans Oo ele, amu ohppa gililppa ulah ippu daatteb. Nuhig elab am 25.2 mita amu nuhig emaitak am 12.6 mita.

³¹ Nuhig oo onig Entrans Oo, od oɗe imuppa am Israel danab dilag haɗap daatteppa daatte, amu lag amu ooppan men gilil danab oitteb guguittak daatteb amu, men gilil amu qaɗeppa ad pam dottog hoiyak daatteb. Od oɗe amu takppa am adqaɗ tappa ukkak eblaih ewam ele daatte.

Mana mettak danab dilag haɗap aɗnu od oɗe kaɗag uɗitteppanu daatte

³² Amu dimppa danab nug melemel aɗom ele amu, nug omaiɗa, od oɗe, od laug ele mana mettak danab dilag haɗap aɗppa kaɗag uɗitteppanu daatte, od oɗe, od laug ele amuppa uɗia, mana mettak danab dilag haɗap ooppa noum. Nug appa ta, nug od oɗe, od laug elenu melemel me, od oɗe, od laug ele, amunu okkai am od oɗe od laug ele laa oh, ahilag okkai am laippu anidmi.

³³ Amunu od, lag elab ele amu, nuhig oo onig Entrans Oo, daup danab dilag dayaknu oo, ooppan men gilil ele amu, keeke amu oh dilag okkai am od oɗe laa oh dilag bianab. Lag elab amuppa oo laala oh, oo onig Entrans Oo ele, amu ohppa gililppa ulah ippu daatteb. Nuhig elab am 25.2 mita amu nuhig emaitak am 12.6 mita.

³⁴ Nuhig oo onig Entrans Oo ⌊ele⌋ Israel danab dilag haɗap daatteppa daatte, amu lag elab amu ooppan men gilil danab oitteb guguittak daatteb amu, men gilil amu qaɗeppa ad pam dottog hoiyak daatteb. Od oɗe amu taknu am adqaɗ tappa ukkak eblaih ewam ele daatte.

Mana mettak dilag haɗap aɗnu od oɗe yawalti uɗitteppanu daatte

³⁵ Amu dimppa danab nug melemel aɗom ele amu, nug omaiɗe, od oɗe, od laug ele mana mettak danab dilag haɗap aɗppa yawalti uɗitteppanu daatte, od oɗe, od laug ele amuppa uɗiom. Nug appa ukka, nug od oɗe, od laug elenu melemel me, od oɗe, od laug ele, amunu okkai am od oɗe od laug ele laa oh, ahilag okkai am laippu anidmi.

³⁶ Od oɗe laa bia, od oɗe imu, nuhig lag elab ele am daup dilag dayaknu oo ele, men gilil lag ooppa bala ele, amu oo laa onig Entrans Oo ele, aria oo laala oh, oo onig Entrans Oo ele gililppa ulah ippu ele; od oɗe, od laug laappa daatteb bia daatteb. Lag amunu elab am 25.2 mita, amu emaitak nuhig am 12.6 mita.

³⁷ Nuhig oo onig Entrans Oo ⌊ele⌋ Israel danab dilag haɗap daatteppa daatte, amu lag elab amu ooppan gilil danab oitteb guguittak daatteb amu, men gilil amu qaɗeppa ad pam dottog hoiyak daatteb. Od oɗe amu taknu am adqaɗ tappa ukkak eblaih ewam ele daatte.

Haɗap bappaidppignu nai

³⁸ Amu Israel danab dilag haɗap-ppa, mana mettak danab dilag haɗap-ppa ukkakppan yawalti uɗitteppanu od oɗe, od laug ele, lag elab amu daugppa oo laa ele daatte. Oo amuam oo laa onig Entrans Oo, oo amu ele tuɗittak daatte. Entrans Oo am Israel danab dilag haɗap daatteppa daatte. Amu oo laa amu, amuppa ag manaknu ofa Kayak mettaglagnu heppig amu, ag doɗ amunu gaɗalag oo amuppa le ihappig.

³⁹ Oo amuppa amu balal waɗele daatteb; aɗit am oo laihppa daattep, aɗit laa am laih daattep. Amu ag balal amuppa manaknu ofanu doɗ teppu, ib etta hipunin haknu ofanu doɗ teppu, amu eheɗ haknu ofanu doɗ teppu ele meppig.

⁴⁰ Oo amu dimittim amu, amuppa balal waɗele oo ooppa bia ele daatteb. Balal amuam od oɗe yawalti uɗitteppanu appa daatteb, amu ag od oɗe amu dimittim laih laih aɗit aɗit daatteb.

⁴¹ Aakku, balal eblaih ewam ele ag doɗ manadna, Kayak mettaglagnu teppulag mekkulagnu daappig. Balal waɗele laa am oo laa, oo onig Entrans oo, oo amu tuɗittak daatte, amuppa daappig. Waɗele laa am lag dimittim, Israel danab dilag haɗap amuppa daappig.

⁴² Aria, balal waɗele amu oo laa, oo onig Entrans oo, oo amu tuɗittak daatte, oo amuppa ag manaknu ofanu doɗ gaɗalag ihappig ele amu, balal amuam men otaɗa babaittakppa hak. Balal amu anen anen, ahilag attan tak am 50 sentimita, amu balalnu okkai laih laih oh am 75 sentimita. Mana mettak danab ag aɗi tuls doɗ baalag otaɗadkkulagnu uɗat medappig amu, tuls amu oh am balal amuppaib daappig.

⁴³ Amu balal amu anen anen daug daug ohppa ukku emaitak 8 sentimita balalppanu dimittim doa uɗiak ele daatte. Amu teppu oh ag main, Kayak mettaglagnu daatte amu, ag mana mettaknu teppu amu balal amuppa meeg dayom.

Mana mettak danab dilag oo

⁴⁴ Amu danab nug keeke amu oh melemel meum ele amu, nug amu ha malowa, nug omaiɗe, mana mettak danab dilag haɗap-ppa temuɗ. Aben amuppa lag aɗit, oh oo laippuib, lag aɗit amuppa daattep. Lag amu laa am aben amunu od oɗe yau uɗitteppanu daatte, od oɗe amu heqo laih daatte. Lag amunu noob am yawalti uɗitteppanu, appa daatte. Aria, lag laa am aben amunu od oɗe yawalti uɗitteppanu daatte, od oɗe amu heqo laih daatte. Lag amunu noob am yau uɗitteppanu, appa daatte. Lag aɗit amunu od am mana mettak danab dilag haɗap daatteppa daattep.

⁴⁵ Nug da omaiɗa, appa ukka, nug da amelppa aum. “Lag laa, noob am yau uɗitteppanu, appa daatte amu, lag amuam mana mettak danab ag Kayaknu mettid lag atognotteb, ahilagnu daatte.

⁴⁶ Amu lag laa, noob am yawalti uɗitteppanu, appa daatte amu, lag amuam mana mettak danab ag qaɗabppa daanna, uɗat hetteb ele, amu dilag. Danab ag uɗat amu hetteb ele, ag am Sadok buɗub. Lewi buɗub ooppa, agib Yawe noobppanab dona, nuhig uɗat hekkulagnu elele. Laa oh am iitta,” awa aum.

⁴⁷ Amu danab amu nug da amelppa anam awowa, nug mana mettak danab dilag haɗapnu okkai dookkunu melemel meum. Nug melemel me, aben amunu okkai laih laih oh am 50 mita anidmi. Kayaknu mettid lag am aben amu ooppa, qaban uɗitteppanu, appa dayeye, qaɗab am Kayaknu mettid lag noobppa daatte.

Kayaknu mettid lagnu nai

⁴⁸ Amu danab nug melemel meum ele nug da omaiɗa ukka, Kayaknu mettid lag od oɗeppa oo laa onig Entrans Oo, nug amunu melemel meum. Amu oo amunu od oɗenu emaitak am 7 mita, teppu am 2 mita maha ele. Aria, gilil laih laih oh amu, ahilah teppu am 1 mita maha ele.

⁴⁹ Amu adqaɗ menppa hak oo amu noobppa daatte. Adqaɗ amunu emaitak am 10 mita, amu elab ukkak nuhig am 5 mita. Aria, oo amunu od oɗe daug daugppa amu biidod menppa hak daattep.