Esekiel 4 - Nobonob Baibel

Esekiel nug kekeɗ ag Jerusalem uɗin, oo mattan aqaknu maadna daaglagnu ippu hak heum

¹ Amu Yawe Nug Esekiel amegppa aum. “Danab bekka, na yaaknu uɗug, wanppa babaittak aon, na noomppa mena, aab okkai Jerusalem dottog amuppa hoiye!

² Na dottog amu hewona, na kekeɗ ag aab amu eɗadkkulagnu henana, ag oo mattan aqaknu maadna daaglag, na amubia hena, aab ooppan danab ag dimittim dokkulagnu ib oo nena, na wan buuak ele aon, nakok uma wanppa digmena, na wan buuak amu meppe taata, ab dottog amu aabnu aɗ ikki elele mena, na kekeɗ dilag haen tutu dayaknu aab kalaknu dottog aab amu talilidna mewona, danab ag aabnu aɗ ad imuag okkaippa yaaeg nauhtte ippu hak haknu, na ad amubia aab dottog talilittak ele me!

³ Na amu hewona, na tappiɗ aenppa hak aon, aab dottog amu daugppa mena, na heqo laih daakkut; amuam aennu aɗ bia aab okkai, na ele gamalahppa daakku. Na amu oh heppe, aen tappiɗ amu na noomppa dayebeb, na anam daanna, na kekeɗ ag aab amu eɗidkkulagnu oo mattan aqaglagnu maadna daaglag, ag daaglag bia na daakkut. Na daanna, anam hebeppe, Israel buɗub ag amu anidna, ahilagppa aɗi kobol bekkun daatte anidkkulag. Na hettem, amuam kobol bekkun daatte, amunu at daakku.

⁴ Na amu hena malona, na Israel dilag hipuninnu nob aon, na beɗunppa mena, heqon nanehppa niikkut. Na ahilag hipuninnu nob maon anam niippe, deɗ gane na anam niikkutnu daatte am malak dayeb, na batakkut.

⁵ Da na deɗ 390, na anam niikkutnu tituanmi. Deɗ ebqak anam am, Israel danab ah ag maɗ gane hipuninnu nob maon oiglag, am amu ele ebqak laippu; am 390 amunu, na deɗ 390 Israel dilag hipuninnu nob maon, anam niikkut.

⁶ Na heqon nanehppa deɗ 390 niin malona amu, na eɗun, heqon naɗiap-ppa niikkut. Na Juda dilag hipuninnu nob aon, na beɗunppa mena, anam niikkut. Da na deɗ 40, na anam niikkutnu tituanmi. Deɗ ebqak anam am, Juda danab ah ag maɗ gane hipuninnu nob maon oiglag, am amu ele ebqak laippu; am 40 amunu, na deɗ 40 Juda dilag hipuninnu nob maon, anam niikkut

⁷ Na anam niin, na Jerusalem, kekeɗ ag uɗin oo mattan aqaglagnu meidna daaglag amu, na amunu dottog bappaidme, na amu neekkidna, na eppen, gukkan ukka, eppen doɗo batak, na eppen amu oh hautak iitta daanna, na uug naunab Jerusalem aabppa beeb daakkunu propet nai appe doyeg!

⁸ Na eɗun heqon laih laih niimnanu, da muɗippa qakkidppi, na da ami bia anam daappe ukkeb, kekeɗ ag Jerusalem eɗadkkulagnu ippu hak hena malana batakkut.

⁹ Amu na deɗ 390 niinna, haen amu oh ee lakkutnu amu, na wit, bali, bin, lentil, milit, spelt ele oh aelkad aon, waa ameg ena eleppa me! Na amuppa mewona, na deɗ 390 anam niinna, na ee aeg amuppa nahip ee bappaidna lakkut.

¹⁰ Na deɗ anen anen oh ee aeg nakok, am 200 gram, na ee aeg amu aakkuib aon, nahip bret hena, deɗ amuppa, haenppa lakkut; haen mauhnoakppa aib lame.

¹¹ Le ele amu, na deɗ anen anen lita mahaib lakkutnu gokkaɗna, haenppa lakkut.

¹² Na daɗek daan, balinu bret batappatak aakkuib lalom, amubia na bret nahip imu lakkut. Na bret nahip maikkutnu amu, na danab biiak qaɗaiettak aon, danab ah dilag neekkakppa amotna mane!” awa aum.

¹³ Yawe Nug anam ana, Nug tuɗitta aum. “Na anam hekkut, amubia Israel danab ah ag qinob da ahilag hipunin haknu nob madakkulnu heppi, kekeɗ ag uɗin eɗadna, diin gona heppeg, wanppan wan laalappa uug nauppa daan, ee dahil neekkakppa dubuttid tak ele lakkulag.” Yawe Nug anam awa aum.

¹⁴ Yawe Nug anam a, da ami. “O Naɗi Yawe, da amu hekkulnu ool ii daatte. Ee lanak dahilppa da deɗ laa eheɗ heinne, ee nahip neekkakppa dubuttid tak ele ii lami. Da amu helom amu, nahip neekkakppa da dubuttid tak ele daalom. Da nid bauppan digmak uɗie, gemu batak amu, da doɗ laa nukka mauhom, o doɗ laa layag dakkuɗ qe mauhom amu, da teppu amu nakok laa ii lami. Da doɗ ii lanaknu epeɗiak daattenu teppu laa ii lami. ⌊Da amu ii lami amunu, da ee danab dilag biiak qaɗaiettakppa manak ele lakkulnu amu, da uug nau doottem. Da uug doottem amunu, na da anam hekkulnu ii amananu oɗ medattem,⌋” awe ami.

¹⁵ Da anam ai, Yawe Nug aum. “Am ena. Da ɗo mettami ele amu, da iikku aɗai ne, da ɗo laa iikku medattem. Na danab dilag biiak qaɗaiettak amuppa nahip bret ii manamna. Iitta. Na makau biiak qaɗaiettak ele amotna, amuppa manakkut,” awa aum

^16-17 Yawe Nug anam awowa, Nug tuɗitta aum. “Danab bekka, da heppi, Jerusalem appa ee, le ele ii daama; nakokib daakku. Anam daakku amunu, Juda danab ah ag appa daaglag amu, ag deɗ anen anennu ee, le ele melemelppa lakkulag, amge ag elele lakkulagnu elele iitta; nakoknabib lakkulag. Anam daakku amunu, ag oolagppa baɗak doon, ee nakokib amu lakkulag. Ao, ag, ‘Ig eɗut, ena daagnig,’ dabmak amuam ag oolagppa nakok laa ii dayebeb, ag le nakokib amu lakkulag. Ag anam daanna, ag akka akka nug italnana, ag beɗulag ebehilag tattak anidna, ag oolagppa uug naunab nau dooglag. Ag ebehilag anam tekkunu diig am, ag hipunin heegeg uɗie, gemu ele hetteb, am amunu nob.” Yawe Nug anam aum.