Esekiel 34 - Nobonob Baibel

Israel gumak danab ag sipsip gumattak danab nau

¹ Amu Yawe Nug nuhig nai laa da meɗom. Nai amuam inam.

² “Danab bekka, na dimppa aɗi bekkunu nai dahil Israel dilag gumak danab, ag sipsip gumak danab bia daatteb, Israel danab ah ag am sipsip dahilad bia daatteb amu, na ag amelagppa uug ahilagppa beeb anidkkulagnu propet nai anan, ‘Naɗi Yawe Nug inam atte,’ awona, na imu ele appe doyeg! ‘Ag Israel dilag gumak danab, ag sipsip gumak danab bia daatteb amu, ahilagnu gadonnab gadon. Ag akka ag ena daaglagnu dabmak okkai aotteb, amge ag ahilkad sipsip dilagnu ii dabmetteb. Sipsip gumak danab nug nuhikkud sipsip atognoadkkunu iite daatte?

³ Ag Israel dilag gumak danab ag sipsip huh aon latteb, ag sipsip uɗilag aon, ahilag lamen hadatteb, ag doɗ ena ena ele baalag otaɗadna latteb, amge ag sipsip ii atognoadtteb.

⁴ Ag sipsip gai-iitta oitteb, o oɗe ele oitteb, o laa guittak aoppig oitteb amu, ag sipsip amu eɗun ena daaglagnu ii ehanadppig. Sipsip laa ag oolna, matatun gona oippig amu, ag amu eɗun ii diippig, amu sipsip laa ag aben adekkuppa qettoɗppig amu, ag gona anadna, eɗun diiglagnu ii mattialadppig. Laa amu, ag sipsip eheɗ nau hattana, guittak madappig. Eheɗ amu oh ag heegeg uɗie, gemu ele anamib hetteb.

⁵ Ag sipsip gumak danab ag anam heeg, sipsip ag gumak danab ⌊genab laa⌋ iitta daanna, ag matatun, laih laih gona daappig. Ag matatun gona daaegeg, doɗ dakkuɗ ag aqan ladappig.

⁶ Anam daye, dahilad sipsip ag qauko okkaippa, qauko nakok okkaippa ele mauhnoak oippig. Ag matatun wan ohppa gona daaegeg, laa nug anatta, eɗua diiadkkunu ii mattialattom.’ ” Yawe Nug anam awa atte.

⁷ Anam amunu, ag sipsip gumak danab ag anam henan daatteb, ag Yawenu nai doyeg!

⁸ “Da Naɗi Yawe, da inam attem. Da genab bau daattem, genab amubia da ag sipsip gumak danab dahilad sipsip atognoadkkulagnu daatteb, da ahilagnu iikku attem. Dahilad sipsip ag ahilag gumak danab iitta amunu, laa ag eheɗ hatteg, doɗ dakkuɗ ag uɗin, aqadna ladappig. Amu sipsip dahilad ag matatun gona daappig, amge ag gumak danab ag eɗun diiglagnu ii mattialadppig. Iitta. Ag akka ag ena daaglagnu henana, dahilad sipsip dilag ii dabmeppig,” awa atte.

⁹ Anamde amunu, ag sipsip gumak danab, ag Yawenu nai doyeg!

¹⁰ Naɗi Yawe Nug inam atte. “Da dahilad sipsip gumak danab dilagnu, da ahilag hak amunu da eheɗ doyeye ool ii madattem. Ag eheɗ hetteb, eheɗ hak amu ag beɗulagppa daatte amunu, da ag bu madakkul. Da heppi, ag sipsip gumak danab ag sipsip dilagppa keeke aon, beɗulag ehanidtteb amu, ag amu tuɗidna hemananu ag baula dahilad sipsip gumak danab ii daamna. Da sipsip dahilad ehanatten heppi, sipsip ag danab nau amu eppelagppa ii daamna. Gumak danab nau amu ag baula dahilad sipsip dilag ag, ‘Ihinig ee,’ dabmenana, ii aqan lattamna,” awa atte.

¹¹ Anam amu, Naɗi Yawe Nug inam atte. “Gumak danab nau ag amu baula ii hemana. Aɗinu? Da dakka da wain, sipsip dahilad ag matatun gona, piɗe piɗe daatteb amu, da ag mattialatte anatten, da diie atognoadkkul.

¹² Sipsip gumak danab ena nug nuhikkud sipsip matatun goppig ele eɗua diia atognoadtte, amubia da dahilad sipsip atognoadkkul. Da ehanadppi, ag atu laih laih matatun goppig daatteb, ag appanu eɗun uɗin, ippa daappeg, da ag atognoadkkul. Deɗ da amu hekkulppa, deɗ amuam lombig hab oh tona dayeb, gatatu manak daakku.

¹³ Da geha ag wanppan wan anen anen oolagppanu omaladppi uɗiglag. Ao, da ag wan digdigppanu qagmatten, diie uɗikkul. Da ag omalatten, ag ahilag wanppanab, Israel qaukoppa, oolnu noakppa, amu aben ohppa ele maadppi daappeg, dabmatten atognoadkkul.

¹⁴ Da geha ag Israel wanppa sipsip gumak danab nug nuhikkud sipsip qaukoppa gikkiɗah ena daatteppa, amu gikkiɗah aben laa enanagppa ele omalatte gona, appa daanna ee latteb bia ag atognoadkkul. Sipsip ag wanppan aben laala gikkiɗah enanagppa hik aon daanna, ag qaukoppa gikkiɗah enanag latteb, amubia da dabmatte atognoadkkul.

¹⁵ Da Yawe, da dakka, da ag, dahilad sipsip, da ag dabmatten atognoadppi, ahilagppa keeke eheɗ ii bema.” Naɗi Yawe Nug anam atte.

¹⁶ Amu Yawe Nug atte. “Da geha laa ag padal meppig mattialadkkul; ele amu, laa ag dabmak iitta eleppa tamtam goppig daatteb amu, da eɗue omaladppi uɗiglag. Da geha laa ag guittak aoppig daatteb bappaladkkul; laa ag oɗe meppig daatteb amu, da ehanadkkul. Da anam hekkul, amge da geha sipsip laa ag eheɗ henan titiɗppig, amu laa eheɗ hakppa ebehilag ɠagattag daatteb ele heppi nauhadkkulag. Da geha dahil sipsip nai doya mala hettoɗia epeɗia elele mettak kobolppa dabmatten atognoadkkul,” awa atte.

¹⁷ Naɗi Yawe Nug anam ana, Nug nai tuɗitta atte. “Amge ag Israel danab ah, ag dahilad sipsip, da ahilagnu inam attem. Da ag oolagppa sipsip gumak danab nug sipsip anen anen epeɗiadtte, da amubia ahilagppa hekkul. Ge, da nug sipsip dawai, meeme dawai ele epeɗiatta, piɗe piɗe maadtte bia hekkul.

¹⁸ ⌊Da anam hewoya, da sipsip ɠagattag, meeme ɠagattag nau hetteb ele amelagppa akkul.⌋ Ag gikkiɗah ena latteb amu, amuam ahilagnu elele iittate? Ag gikkiɗah amu lawona, gikkiɗah ii lanak ele baelagppa tappaeg nauhe, laa ag gikkiɗah nauhak amuib lakkulagnu daatteb; ag anam hetteb am enate? Ag le ena latteb amu, amuam ahilagnu elele iittate? Ag le amu lawona, le amu tappan oinna heegeg, le dubuttid ele daatte, laa ag le nauhak amuib lakkulagnu daatteb amu; ag kobol amu hetteb am enate?

¹⁹ Ag laa ag kobol eheɗ amu hetteb amunu, dahilad sipsip laa ag ib iitta. Ag laa ag baelagppa gikkiɗah tappaeg nauhtte, le ele heeg nauhtte, kobol amuppa ag heeg, laa ag ee, le ele nauib lakkulagnu daatteb.” Yawe Nug anam awa atte.

²⁰ Anam amunu, Naɗi Yawe Nug laa eheɗ hetteb ele amelagppa inam atte. “Antteg! Da dakka, da sipsip atten nug titiɗak, sipsip atten am ebehitak ele daatteb epeɗiadkkul.

²¹ Ag sipsip ɠagattag ele ag laa ɠagattag elele iitta duttunadna ehalattegeg laih watteb, qeqeɗilagppa ele laa gai-iitta yaalattegeg, uma gona daatteb.

²² Ag sipsip ɠagattag ag anam hetteb, amge da dahilad laa ehanadppi, laa ag baula eheɗ ii hattamana. Da sipsip anen anen anam epeɗiadkkul,

²³ amu da geha king laippu laa, dahil maɗi nid Dawit, ag madappi, nug ag atognoadkku. Nug geha sipsip gumak danab laa, nug nuhikkud sipsip gumadtte, amubia ag gumadkku.

²⁴ Da, da Yawe, da ahilag Kayak daappi, king laa, nug dahil maɗi nid Dawit, nug ahilag gumak danab daakku. Da, da Yawe, da nai imu iikku madittem,” awa atte.

²⁵ Amu Yawe Nug anam awowa, Nug nai tuɗitta atte. “Israel danab ah ag am dahilad sipsip, amu da haen amuppa heppi, ag da ele ig maɗoɗ dayaknu nug tituanta nai qakkagnig. Ig amu heta, da heppi, ahilag wanppa doɗ dakkuɗ nau laa ii daama amunu, ag atu taɗakppatai daaglag, o iitta atuppa niiglagtai amu, ag baɗak iittappa daaglag.

²⁶ Da ag, amu aben oh dahil qauko Sion talilittak daatteb ele itadppi, ena daaglag. Da heppi, gu nuhig haenppa elele neeb, itittak ena ele aakkuib daaglag.

²⁷ Ahilkad ad dad okkaippa daatteb meu elele okkulag; ee wanppa betteb ele meu elele okkulag. Danab ah ag baɗak iittappa ahilag wanppa daaglag. Da amu heine, da ag laa eppelagppanu, ahilag begbeg maɗi nid baula daamnanu diiadkkul amu, ag dooglag, da am Yawe.

²⁸ Wanppan wan laalappan danab ag baula uɗin, eheɗ hattana, ahilag keeke akkan ii gomana. Doɗ dakkuɗ nau ele baula aqan ii lattamna. Dahilad danab ah ag baɗak iittappa daappeg, laa heeb baɗaglagnu laa ii daama.

²⁹ Da heppi, wan laappan danab ah ag Israel wan ittag huanaknab ele, ee meu huanak ottenu ele nai dooglag. Amu Israel ag ahilag wanppa daappeg, da heppi, ag enug haen baula ii anidmana; wan laihnu danab ele baula ag aon aon ii aqamna.

³⁰ Da amu oh heppi, ag dooglag, da Yawe, ahilag Kayak, da ag ele daattem, amu ag, ag Israel danab ah, ag dahilad danab ah daatteb.” Naɗi Yawe Nug anam akku atte.

³¹ Amu Yawe Nug atte. “Ag Israel, ag am dahilad sipsip. Ag dahil gikkiɗah dadppa daatteb. Ag dahilad danab ah daatteb, da ahilag Kayak daattem.” Naɗi Yawe Nug anam aakku atte.