Esekiel 3 - Nobonob Baibel

¹ Da amu anitti, Yawe Nug da amelppa aum. “Danab bekka, buk itoɗiak ele imu na la! Na lawona, na gona, Israel danab ah amelagppa dahil nai mattie!” awa aum.

^2-3 Yawe Nug anam a, da oɗel aahei, nug buk itoɗiak ele amu oɗelppa me laiyi, Nug aum. “Danab bekka, na buk itoɗiak ele imu da na medattem lappe, oot dittiaɗ!” awa aum. Nug anam a, da buk amu lami. Da lainne amu, da ubuhi ena uppuh leppu bia, da anam da oɗelppa doomi.

⁴ Da lain malai, Nug da amelppa aum. “Danab bekka, na ahan gona, Israel danab ah amelagppa dahil nai mattie!

⁵ Amu da danab ah na ahilag nai ii doottem, na ahilag nai dookkutnu am uug ele, da na amu dilagppa meitti ii gottem. Iitta. Da na laipad dilagppa, Israel danab ah, da na dahil nai ag madakkutnu meitti gottem.

⁶ Ge, da wanppan wan laala kuɗum dilag danab ah, na ahilag nai ii doottem, na ahilag nai dookkutnu am uug ele, ag nai madippeppeg, na ii dookkut ele, da danab ah amu dilagppa ii meitti gottem. Iitta. Da na laipad, Israel dilagppa meitti gottem. Ag nahip nai dooglagnu elele.

⁷ Da Israel danab ah, da na ahilagppa meitti gottem, amge ag dahil nai dooglagnu uutteb amunu, ag nahip nai ii doomna. Aɗinu? Israel danab ah oh ⌊bia⌋ ag dabmak ahilag am ɠagattag eppom daatte. Ag hib guitta qak danab ah.

⁸ Israel danab ah ag anam daatteb, ag na eheɗ heidkkulagnu hekkulag, amge ag eheɗ hekkulagnu ɠagattag aoppig daatteb amu, da heppi, dahil nai dim lamittaknu ɠagattag, am ahilag ɠagattag bia nahip-ppa daakku. Ag ahilag dabmak eheɗ hekkulagnu ɠagattag eppom daatte amu, da heppi, na nahip dabmak dahil nai dim lamidna, ena hekkutnu am anambia ɠagattag eppeb daakku.

⁹ Da heppi, na dahil nai Israel danab ah amelagppa akkutnu anuqaknab doonna, dabmak amuppaib daan, ehanittak dahilppa na nai amu madikkut; na iinab uumna. Na nahip dabmak dahil nai madikkutnu amu, dabmak nahip amuam men ɠagattagnab laa, danab heeb aoɗkkunu elele iitta, amubia daakku amunu, laa heeb, na dabmak amu uukkutnu am iitta. Amu Israel danab ah ag nai tappe nak danab ah daatteb, amge diig amunu na amu dilag aib baɗame; baɗak eheɗ nau aib doome.” Yawe Nug da, Esekiel, da amelppa anam aum.

¹⁰ Amu Yawe Nug tuɗitta, inam ele da amelppa aum. “Danab bekka, keeke oh da na amenppa attem amu, na nai amu ohnab na dautppa daakkunu, na dahil nai doon autna aon, dabmette! Na dahil nainu, ‘Am keeke nakok hamu bia,’ aib doome.

¹¹ Na gona, na laipad, Israel danab ah ag Babilon wan imuppa diia ukka laih me dayak danab ah daatteb amu, na ag amelagppa dahil nai appe doyeg! Na, ‘Naɗi Yawe Nug inam atte,’ awona, na dahil nai da ippunidkkul ag amelagppa appe dooglag. Ag dooglagtai, o iittatai am nahip keeke iitta, ahilagppa daatte, amge na gona, dahil nai ag amelagppa a!” awa aum.

¹² Yawe Nug anam a, Ouɗi da humiɗe, da dimulppa baag oqotti okkai ele laa nai inam mattie doomi. “Yawe Nug hab attan daatte, Nug binag amahlak oppiaawak ele. Ig Nug binag metu!” awa aum.

¹³ Amu da oqotti aɗit doomi: laa am engel okkai-kerubim waɗele ag hagagaɗna gonana, haulkad attan tenana, eɗun honap nenana, laa haukuɗ am laa haukuɗ nakok nakok oowo, oqotti oum. Laa am wil waɗele gottebnu oqotti. Oqotti amuam oqotti naɗi, ad imuag eɗeɗppa buɗibɗib notte, oqotti nakok amubia.

¹⁴ Da amu dooi, Ouɗi da humiɗa, omaiɗa ukkom. Da ugekke, ⌊Yawe Nug uɗat da meɗom, da amunu⌋ uug naunab nau doye, ⌊da lailad, Israel danab ah dilag haknu da⌋ ool nauhom. Anam, amge Yawe Nug da ⌊nuhig uɗat hekkulnu⌋ ɠagattag aɗaile, ⌊da ukken hekkulnuib daye,⌋ da gomi.

¹⁵ Ouɗi da omaiɗa ukke, da Israel danab ah kekeɗ heeg, ag Babilon wanppa diia ukka laih me dayak danab ah daappigppa meiɗe daami. Ag aab onig Telabip, am le Kebar guguittak, ag appa daappig. Da ag daappigppa uɗien, da dahil dabmak eɗila ukke, da ag oolagppa deɗ eblaih aɗit ele anamib daami.

Yawe Nug Esekiel nug neekkeb ukkeb, aɗi uɗitte anittak danab daakkunu meum

¹⁶ Amu deɗ eblaih aɗit amu male, Yawe Nug nuhig nai laa da meɗom. Nai amuam inam.

¹⁷ “Danab bekka, da na Israel dilag aɗi uɗitte anittak danab daakkutnu tituanidmi amunu, da na amenppa ag nau aomnanu nai appi, na dahil nai amu ag matte!

¹⁸ Da ⌊na amenppa, na⌋ nau hak danab amegppa, ‘Na genab mauhkkut,’ ⌊akkutnu⌋ appi, na danab amu amegppa nug nau aomanu nai ii mattinna, na nug ii mauhmanu, nug bau daakkunu na nug eheɗ hak nuhig uua ii hemanu ii akkut amu, nau hak danab amu nug hipunin nuhignu mauhkku, amge da anidttem amu, nug mauhkku am na beɗunppa amunu, da na nob medakkul.

¹⁹ Na nug amegppa nau aomanu nai amu ii akkut dayeb am anam, amge na nau hak danab nug nau aomanu nai nug amegppa appe, nug nahip nai ii dookku dayeb, nug nau hak nuhig, eheɗ hak nuhig ele ii uua, tuɗitta hekku dayeb amu, nug hipunin nuhignu mauhkku, amge na am hipunin laa iitta. Na ii mauhmana.

²⁰ Aria, keeke laa amu, genab tutukku hak danab nug genab tutukku hak kobol uua, eheɗ hak digma haaha, ⌊oo ii eɗueb,⌋ da heppi mauhkku. Na nug amegppa nau aomanu nai ii ⌊madikkut dayeb, na ii⌋ mattime, diig amunu nug hipunin nuhignu mauhkku. Nug aɗi genab tutukku hak keeke digdig laa tatam heum amu, da amunu ii dabmepa. Anam, amge da anidttem amu, nug mauhkku amu, ⌊na nug amegppa nau aomanu nai ii mattie mauhe, mauhak nuhig am⌋ na beɗunppa amunu, da na nob medakkul.

²¹ Amge na danab amu nug nau aomanu nai mettanna, nug hipunin hemanu akkut dayeb, nug hipunin hak uua, ii hekku dayeb amu, nug nai amu dabmetta, dim lamittom amunu, nug ii mauhma, nug bau daakku; amu nahipnu amu, ⌊na ame,⌋ diig amunu keeke laa na beɗunppa iitta, na ii mauhmana,” awa aum.

Yawe heeb, Esekiel nug nai madikkunu elele iitta daakku

²² Am da daamippa, appa Yawe Nug da nuhig uɗat hekkulnu aɗaila, Nug da amelppa aum. “Na ahan, aab dimittim uɗem naɗippa gona daappe, appa da na amenppa nai madikkul,” awa aum.

²³ Nug da amelppa anam aum amunu, da, Esekiel, da ahen, aab dimittim uɗem naɗippa gomi. Da ukken, da appa Yawenu binag amahlak oppiaawak ele daye anidmi; binag amahlak oppiaawak ele tatam da le Kebar guguittak dayeye anidmi, da amu antten, da laippun gatel qaun oin, gomelen, iɗul wanppa memi.

²⁴ Da anam daaiyi, Ouɗi dahilppa uɗia, oolppa noa he, da ahami. Da ahai, Nug da amelppa aum. “Na ahan gona, na laut ooppa nona, na od manona aguppa daye!

²⁵ Amu danab bekka, nahipnu amu, danab ag muɗippa qakkidppeg, na dimittim danab ah oolagppa gokkutnu elele iitta daakkut.

²⁶ Israel danab ah ag nai tappe nak danab ah amunu, ⌊da ag bu okkainab madakkul. Amuam⌋ da heppi, na oɗen qamuttak daan, na nai mattinna, Israel danab ah daulag batakkutnu elele iitta daakkut.

²⁷ Na anam daakkut, amge haen laa da na nai madikkutnu dabmekkul amu, da heppi, na oɗen am qamutak ii daamna. Na oɗen qamutak ii daamna, na ag amelagppa, ‘Naɗi Yawe, Nug inam atte,’ awona, nai laa da na ippunidkkul oh ele appe dooglag, amge Israel danab ah ag am nai tappe nak danab ah daatteb amunu, na madippeppe, aun laa nug dookku amu, nug dookku. Aun laa nug ii dookku amu, nug ii dooma. Amuam nahip keeke iitta, ahilagppa daatte.” Yawe Nug da amelppa anam aum.