Esekiel 26 - Nobonob Baibel

Yawe Nug danab ah aab okkai Tairnu bu madakku

¹ ⌊Nebukatnesar nug King Jehoiakin, amu ig laa ele awikka, Babilon wanppa diia ukka laih me dayak danab ah daagnignu uɗie daautut,⌋ maɗ eblaih tanig ele uue, maɗ 11ppa, kalamnu deɗ digmakppa Yawe Nug nuhig nai laa da meɗom. Nai amuam inam.

² “Danab bekka, Tair danab ah ag Jerusalem na qeumnu oolag gamag ahak eheɗ doon, ag inam appig. ‘Am enanag! Kekeɗ ag gona, aab okkai Jerusalem heeg nauha autanab awom. Gemu aab amuam loppaɗakib daatte. Jerusalem danab ah baula keeke meppeg, laa daden meppeg, men doɗo ii aomna. Ag ig ib amuppa men doɗo okkai aognignu ib baula oo ii nemata; ig anam aognig,’ aon appig.

³ Tair danab ah ag anam appig, diig amunu Naɗi Yawe Nug inam atte. ‘O Tair danab ah, ahilag hak amunu da eheɗ doyeye ool ii madattem. Amu da heppi, wanppan wan kuɗum dilag huu ag uɗippeg, ag ele ban hekkulag. Yuppa duban tuɗid ele uɗitte, amubia kekeɗ ahilagppa uɗiglag.

⁴ Kekeɗ ag uɗin, Tair aabnu aɗ loppaɗppeg, wanppa nena qeppeg, lag attan ta ukkak menppa hak daatteb ele loppaɗadppeg nekkulag. Ag anam heppeg, dimppa da Yawe, da heppi, Tairnu kinipan oh dayomppa ii dayebeb, Tair dayomppa hamu menib daakku.

⁵ Amu ahilag aab okkai dayom, amuppa aab baula ii daama. Iitta. Aben amuam yu ihippa daatte amu, aben amuppa kakai eeɗak danab ag uhui qaɗaiedappeg bappaidkkulagnu otaladppeg daaglag. Aɗinu? Da Naɗi Yawe, da anam attem. Amu wanppan wan laala dilag daup ag uɗin, Tairnu en okkainab aon gona,

⁶ ag aab naunau Tair guguittak, yu ihippa daatteb amu, ag aab amuppan danab ah qep elabppa aqappeg mauhkkulag. Ag anam heppeg, ag dooglag, da am Yawe,’ ” awa atte.

⁷ Anam amunu, Naɗi Yawe Nug inam atte. “Da heppi, danab laa, nug appag diig am Jerusalemnu yawalti uɗitteppanu daatte, danab amuam Babilon dilag king onig Nebukatnesar, nug nuhikkud daup ele ag Tair ele ban hekkulagnu uɗiglag. Nebukatnesar nug king laa oh eɗattak daatte. Da heppi, nug daup baelagppa oitteb kuɗum huanaknab, daup laa hos attan daan ban hetteb, laa bannu karisppa ele oinna ban hetteb ele oh uɗiglag.

⁸ Nug nuhikkud daup ele ag uɗin, ag tatam aab naunau Tair guguittak yu ihippa daatteb eɗadna, amuppan danab ah qep elabppa aqappeg mauhppeg, ag uɗin, Tair aabppanab ban hekkulag. Nebukatnesar nug heeb, nuhikkud daup ag aab talilidna daanna, ban hekkulagnu keeke bappaidnana, ag wan buun, aon gona gokkaɗppeg taata, aɗnu laih ag gokkaɗtteb, appa aɗ eleleppa teeb, nuhikkud daup eheɗ kuɗumnab ag guppiɗ aɗan, ag ag Tair ele ban hekkulag.

⁹ Ag amu henana, Nebukatnesar nug ab, nuhikkud daup ag ad imuag okkai naɗi laala akkan, ad amuppa ag aabnu aɗ loppaɗkkulagnu aɗ yaaglag. Ag lag attan ta ukkak menppa hak amu, ag lag amu ele keeke aenppa hak, ag amuppa loppaɗadppeg nauhkkulag.

¹⁰ Nebukatnesar nug hos huanaknab ele uɗikku amunu, hos ag oippeg, gappud huanak eheɗnab aha, ag Tair danab ah tonadkku. Anam dayebeb, daup ag aɗ loppaɗna, aab ooppa gona, aɗnu od matulatteg, Nebukatnesarnu daup laa ag danab huanak aab okkainu aɗ loppaɗak daatteppa aab ooppa gotteb bia, ag aɗnu odppa aab ooppa nokkulag. Haen amuppa amu hos kuɗum, bannu karis kuɗum, uɗatnu karis kuɗum nona, ag aɗ od oɗeppa gobeppeg, oqotti huanaknab oobob, aɗ ⌊ii loppaɗak⌋ am uɗalkku.

¹¹ Nuhikkud hos ag huan oina, baelagppa aabnu ib oh tappaladppeppeg, daup ag danab ah qep elabppa aqappeg mauhkkulag. Ag anam aqanna, ag heppeg, biidod ɠagattag ele wanppa nena qekkulag.

¹² Anam amu, daup amu ag Tair danab ah, ag ahilag en, ahilag keeke ele aonna, laulag ena ena amu loppaɗadna heppeg, nauhna autna aoppeg, daup ag aabnu men aɗ heppeg, kinipan neeb, akkan agappeg yuppa nokku.

¹³ Amu da Yawe, da heppi, ag Tair danab ah ag baula muttub qenan, ahi ii ettamna. Ag baula harp-ppa ahi ii qemana.

¹⁴ Da heppi, aben aab Tair gemu daatte amu, aben amuam menib daakku. Aben amuppa kakai awak danab ag uhui qaɗaiedappeg bappaidkkulagnu otaladppeg daaglag. Laa ag uɗin, Tair aab ii bappaidmana, nauhak anamib daakku. Aɗinu? Da Naɗi Yawe, da aakku attem.” Naɗi Yawe Nug anam atte.

¹⁵ Amu Naɗi Yawe nug Tair danab ah amelagppa atte. “Kekeɗ ag uɗin eɗadppeg, ag oolagppa kuɗum laa guittak aon gaappeg, kuɗum laa mauhkkulag amu, wanppan wan laala yu ihippa daatteb, appan danab ah ag Tair, nahip na qak doon, ag huan hahaɗkkulag.

¹⁶ Amu wan amuppan danab okkai ag Tairnu nai doon, haen amuppa ag sia king ahilagppanu ahan, honap nena, ag lamen enanag uɗona, ag lamen elab kobol kobol koitak ele tagatteb ele uɗaglag. Ag baɗak eheɗ nau doon, ag wanppa daanna, ag Tairnu danab ah dilag aab na qeumnu dabmak huanaknab aonna, ottaikkulag.

¹⁷ Ag anam daanna, ag Tair danab ah, ag ahilag aabnu inam nai oo doyak ele akkulag. ‘O aab okkai, onin ele, daup ag uɗin, heeg nauhna autna aome. Danab nahip-ppa daappig ele ag amu, ag yuppa oiyak danab. Danab nahip-ppa daappig ele ag amu, ag yuppa oinna, ban ɠagattag heppig. O Tair aab, danab nahip-ppa daappig amu, ag heeg, yu ihippa wan laappan danab ag nahipnu baɗak eheɗ nau dooppig.

¹⁸ Gemu amu, na nena qee, wan atu ohppan danab ag eheɗ ottaitteb. Ge, danab wan miagnu, wan umanu ele ag nahip na qaknu eheɗ nau dootteb,’ aon akkulag,” awa atte.

¹⁹ Amu bekkunu diignu amu, Naɗi Yawe Nug inam atte. “Da heppi, Tair am hele-ettak, aab okkai laala gemu danab ah appa ii daatteb ele, amubia daakku. Amu da heppi, Tair anam dayeb, yu ele uɗia, tona maleb amu,

²⁰ haen amuppa da heppi, ag Tair danab ah ag danab ah mauhak abenppa goppig daatteb ele daaglag. Danab ah amu laala ag anukkanab mauhna, goppig appa daatteb. Da heppi, ag Hadesppa, danab ag aab he nauhakppa daatteb bia, ag appa laa appa goppig daatteb ele daaglag. Ag Tairnu danab ah ag baula wanppa danab ah bau daanna oitteb oolagppa ii daamna.

²¹ Da heppi, ahilag mauhak am ag naunab nau dayeb, ag padal mekkulag. Laa ag ag mattialadkkulag, amge ag ag ii anadmana.” Naɗi Yawe Nug anam atte.