Esekiel 25 - Nobonob Baibel

Yawe Nug Amon danab ah bu madakku

¹ Amu Yawe Nug nuhig nai laa da meɗom. Nai amuam inam.

² “Danab bekka, na Amon danab ah neekkadna, uug naunab ahilagppa beeb anidkkulagnu propet nai anana,

³ na, ‘Ag Amon danab ah, ag Naɗi Yawenu nai doyeg!’ awona, na Naɗi Yawe Nug inam atte appe doyeg! ‘Haen kekeɗ ag uɗin heeg, dahil mettid lag nauhom, haen ag heeg, Israel wan oh nauhaknab dayom, haen ag heeg, Juda danab ah ag Babilon wanppa diia ukka laih me dayak danab ah daaglagnu goppig, haen amuppa diig amu ohnu ag Amon, ag oolag gamag ahe, “Enanag, ig oonig anamib hette,” appig.

⁴ Ag amu heppig amunu, gemu da heppi, kaɗag uɗitteppanu danab ag uɗin eɗadppeg, ag Amon danab ag ag eppelagppa daan, ahilag daaglag. Danab amu ag kaɗag uɗitteppanu uɗin, ag haen tutu dayaknu aab ag Amon danab oolagppa kalan daaglag. Ag peh lag ahilkad ag oolagppa qappan taiettan daaglag. Wan laappan danab amu ag ag Amon danab, ag ahilag ee, ahilag huh ele aon lakkulag.

⁵ Da heppi, ag Amon, ahilag aab okkai Raba, aab amuam kamel ag appa gona, gikkiɗah lakkulagnu dad daakku. Ahilag wan ohnab amu da heppi, wan amuam sipsip ag appa daan niiglagnu aben daakku. Da amu heppi, ag dooglag, da am Yawe,’ ” awa atte.

⁶ Aɗinu? Naɗi Yawe Nug inam atte. “Ag Israel dilagnu oolag aeg be, Israel ag nauheg anidna, ag oolag gamag eheɗ ahe, eppelag tap qenana, baelagppa wan tabatabeɗappig

⁷ amunu, da eppel bahien, eheɗ hadappi, wanppan wan laalappan danab, ag am ahilag kekeɗ, ag uɗin, ag ahilag keeke diin goppeg, ag ele ahilag kekeɗ eppeglappa nau daaglag. Da heppi, laa nug ag Amon, ahilag wannu, ‘Amuam Amon dilag wan uukku,’ iinab ama. Iittanab iitta. Da heppi, Amonnu huu am baula ii daama. Da heppi, ag Amon ag padal mena autna aona, ag dooglag, da am Yawe.” Yawe Nug anam atte.

Yawe Nug Moap danab ah bu madakku

⁸ Amu Naɗi Yawe Nug inam atte. “Moap danab ah, Seir danab ah ele ag Juda danab ah dilagnu, ‘⌊Ag ahilag Kayak ehanatteb, ena daaglagnu appig, amge iitta,⌋ Juda danab ah ag danab ah laa oh Babilon eɗatteg, Babilon wanppa daatteb, ag ele anamib daatteb, ⌊amunu ig doottem, ahilag Kayak Nug ag ehanadkkunu elele iitta,⌋’ appig.

⁹ Ag anam appig amunu, da Moap, ahilagnu, da inam attem. Da heppi, kekeɗ ag uɗin, ag Moap dilag aab tomppa daattebppa ban hekkulag. Aab amu onilag Bet Jesimot, Balmeon amu Kiriataim ele. Amuam Moap wanppanu aab okkai, binalag ele aakku. ⌊Kekeɗ ag aab amu eɗadna malona, ag Moap wan oh aoglag.⌋

¹⁰ Kaɗag uɗiakppan daup ag uɗin, Amon heppeg nauhkku amu, da heppi, daup amu agib Moap eɗadppeg, Moap ag ag eppelagppa daaglag. Kekeɗ ag amu heppeg, wan onig Amon baula ii daama.

¹¹ Da heppi, Moap bu anam aona, ag dooglag, da am Yawe,” awa atte.

Yawe Nug Edom danab ah bu madakku

¹² Amu Naɗi Yawe Nug inam atte. “Edom danab ag Juda danab ah uug naunab dooppig haenppa gona, nob mena, eheɗ hadappig, amu amuppa ag beɗulagppa aab okkai aakku teum daatte,” awa atte.

¹³ Anam amunu, Naɗi Yawe Nug inam atte. “Da eppel bahien heppi, Edom danab, doɗ ahilkad ele mauhkkulag. Da heppi, ahilag wan am nauhakib daakku. Ahilag aab onig Teman, appanu ukka, Dedan batak Edom danab ag qep elabppa mauhkkulag.

¹⁴ Da amu hein, Edom danab ah nob matten, bu madakkulnu amu da heppi, dahilad danab, Israel, ag gona hekkulag. Israel ag dahil oppoɗi bak, dahil oo nauhak ele da attem hekkulnu ippuniɗttep amu, ag amubia Edom dilagppa hekkulag. Edom ag da eppelppa nob nau amu aoglag.” Naɗi Yawe nug anam atte.

Yawe Nug Pilistia danab ah bu madakku

¹⁵ Amu Naɗi Yawe Nug atte. “Pilistia danab ah ag anukkanu uɗie, gemu ele Israel dilagnu oolag aeg bak doon, ag nob nau mattaglagnu dabmenana, Juda ele ban henan, heppeg iitta mekkulagnu heppig,” awa atte.

¹⁶ Anam amunu, Naɗi Yawe Nug inam atte. “Da eppel bahien heppi, Pilistia danab ah ag eheɗ aoglag. Da heppi, Pilistia huu laa Keret danab, aria Pilistia laa ag yu ihippa tuɗidna daatteb ele amu, ag oh padal mekkulag.

¹⁷ Da heppi, ag nob naunab nau aoglag. Da ahilagnu oppoɗi bak doyeye, da bu okkainab madakkul. Da amu heppi amu, Pilistia danab ah ag dooglag, da am Yawe.” Yawe Nug anam awa atte.