Esekiel 24 - Nobonob Baibel

Ee hak waa aenppa hak, amunu kaya piksa nai ele

¹ ⌊Nebukatnesar nug King Jehoiakin, amu ig laa ele awikka, Babilon wanppa diia ukka laih me dayak danab ah daagnignu uɗie daautut,⌋ maɗ eblaih ewam uue, maɗ eblaih waɗeleppa, kalam eblaih tanig elenu deɗ eblaih tanig eleppa Yawe Nug nuhig nai laa da meɗom. Nai amuam inam.

² “Danab bekka, na gemu deɗ imunabnu namba am ye! Aɗinu? Gemu deɗ imuppanab Babilon dilag king nug he, nuhig daup ag digmena, Jerusalem oo mattan aqaknu maadna daatteb.

³ Na gemu deɗ imunu namba yona, na Israel danab ah, ag am nai tappe nak danab ah amu, na ag amelagppa nai laa, nai amuam keeke danab ag dootteb ii dootteb ele ouaqata ippunittak nai amu, na nai laa amu mattinna, Naɗi Yawe Nug inam atte, appe doyeg! ‘Ag waa laa aenppa hak amu aona, qaɗab aab eotte eleppa mena, le waappa gokkaɗppeg nob,

⁴ ag doɗ teppu laa, teppu amuam enanag, baegppan am gugappan ele, ag teppu amu aona, waappa inan, doɗ ebehi teppu huanak ele, ag amu ele aon ineeg!

⁵ Ag sipsip enanag, laa oh eɗattak amu, ag doɗ amunu teppu, amu ebehi ele aon, waappa ineg! Ag uhiglagnu aab ele aon, waa waappa aab bau elelenab meppeg, aab ewa, le hipaɗ qeebeb, doɗ teppu, ebehi ele am battieg!’ ” awa aum.

⁶ Anam amunu, Naɗi Yawe Nug inam atte. “O aab okkai Jerusalemnu danab ah, ag am qe mauhak danab daatteb, amu ahilagnu am gadonnab gadon. Ag oolagppa dubuttid nau ele, waa aenppa hak, ah haen elabnab ii ihom, dubuttid huanak daatte, ag amubia daatteb. Laa nug waa amu leppaib iheb, oppiaawak daakkunu elele iitta. Ag Jerusalem danab ah ag waa aenppa hak amu, ag amubia daatteb, amge ag teppu waa ooppa inak bia ele daatteb. Ag anam aakku daatteb, amge danab ag teppu aon paniadtteb amu, ag Israel, ahilagppa anam ii bema. Iitta. Kekeɗ ag ahilag dabmak aakkuib dim lamidna heppeg, ag Israel ag amuib dim lamidkkulagnunab daaglag.

⁷ Diig aɗinu ag Jerusalem danab ah ag nob nau amubia aoglag? Amunu diig am inam. Ag Jerusalem danab ag baɗak iitta danab aqaeg mauhppig; ag amu heppig, amu miag atiak daakkunu uug ii doyeg, mauhppig ele tiilag am miag atiak, menppa noum daatte. Ag uug doon, tiig wanppa nob, gappud tonakkunu ii heppig.

⁸ Da nau hak ahilagnu oppoɗi bak dookkulnu, da nob madakkulnu, da hei, tiilag amu tonak ii daamanu, miagib menppa daakkunu noum,” awa atte.

⁹ Anam daatte amunu, Naɗi Yawe Nug inam atte. “O aab okkai Jerusalemnu danab ah, ag am qe mauhak danab daatteb, amu ahilagnu am gadonnab gadon. Da ele, da aab bau huana awe uɗikkul.

¹⁰ Anam amunu, ag laa aab huanaknab waa waappa mena, ilappeg ewawa, teppu battiak ewa auta autanab awebeb, sol keeke ele kabolina, heppeg ukkeb ukkeb, lewa iitta meeb, ebehi ele hin qaɗ!

¹¹ Ag amu hewona, ag waa ooppan keeke gokkaɗppeg ukkeb, ag waa eɗun, aab aɗuppa meppeg dayaya, huana gakkaɗa, ewa kokoɗ eppaɗ! Aɗinu? Ag anam heppeg, gakkaɗak huanakppa dubuttid oh tolakku. Ao, dubuttid oh am aab gakkaɗakppa iitta mekku.

¹² Da Yawe, da ag Jerusalem danab ag eɗun, kobol tutukkuib dim lamidkkulagnu toliatten, uɗat huanaknab hemi, amge ag uuppig amunu, da bu nau imu ag madakkulnuib doottem. Dubuttid ag oolagppa daatte amu, da heppi, iitta mekkunabnu aakkuib doottem. Danab nug waa aenppa hak aab aɗuppa dubuttid iitta mekkunu hette, amubia.

¹³ Jerusalem danab ah, ag kobol nau heppig; ag gappai heeb baknu kobol dim lamidppig. Anam amu, da heppi, ag oppiaawak daaglagnu hemi, amge ag uun, dubuttid ele daaglagnu heppig. Anam amunu, ag bu awak iitta eleppa oppiaawak baula ii daamna. Iitta. Da ahilagnu oppoɗi bak doottem, amu da bu eheɗ madappi ukkeb, gogppa teeb, dahil oppoɗi bak oug meeb, ag oppiaawak daaglag.

¹⁴ Da Yawe, da iikku ain malami. Da ag bu madakkulnu haen aakku gogppa teum daatte. Da ag oolag eɗukkunu haen nakok laa ii madapa. Da oppoɗil beebe, aɗi hekkulnu ippuniɗtte amu, da anamib hekkul. Da ahilagnu oo gai-iitta doya oo metta ehanittak kobol doyen ii hepa. Da bu madappi ukkeb, gogppa teeb batakkul. Bu mattak am gamagppa ii uupa. Ag ahilag hak naunu, ahilag oiyak eheɗnu bu aoglagnu daatteb amu, da amuppa epeɗiatten, bu amununab aakku madakkul.” Naɗi Yawe Nug anam awa atte.

Esekiel wau nug mauhom

¹⁵ Amu Yawe Nug nuhig nai laa da meɗom. Nai amuam inam.

¹⁶ “Danab bekka, da heppi, laa na nuhignu oot huanaknab mauhtte amu, nug mauhkku. Nug oɗe ma, haen elab dayaya ii mauhma. Iitta. Nug danab oɗe awa, pahanab mauhtte bia mauhkku. Nug mauhkku, amge na mahittak, gayak, ele nuhignu aib heme. Amen leb ele aib neum.

¹⁷ Nug mauheb amu, na nuhignu qinonob baatppaib aiqakkak he! Nuhignu aib mahime. Na igippan lamen aib uɗame, baeg gaɗa ele aib uɗame. Na laa ag laa mauhomnu mahiak hekkulagnu iɗulag laih akkabɗulag ukka amelag batak haut-tteb amu, na amubia aib heme. Danab ag laa mauhomnu ee latteb amu, na ee amu aib lame,” awa aum.

¹⁸ Yawe Nug da Esekiel, da amelppa anam aum amunu, da buttua Israel danab ah ⌊da ele Babilon wan imuppa daattem amu,⌋ da ag amelagppa nai mattiyi, tueb amu, ah dahil nug mauhom. Nug mauhe, wagɗe buttua, deɗ amuppa da Yawe haknunab aum bia aakku hemi.

¹⁹ Da anam heiyi amu, danab ah amu ag da oɗ meɗappig. “Na kobol laa iikku hettem amu, na hak amunu diig appe, kobol amuam ihinig oiyak ulum attem medatte doognignu oɗ medattem,” aon appig.

²⁰ Ag anam oɗ meɗappig amunu, da ag amelagppa ami. “Amu Yawe Nug nuhig nai laa da meɗom. Nai amuam inam.

²¹ ⌊Esekiel⌋ na Israel danab ah ⌊na ele Babilon ippa diia ukka laih me dayak danab ah daatteb amu⌋ na ag amelagppa inam appe doyeg! Naɗi Yawe Nug inam atte. ‘Da heppi, hipunin hak danab, Israel buɗubppan iitta, ag dahil mettid lag heppeg nauhkku. Ag Israel, ag dahil lag ag oolagppa daattenu enanag doon, “Lag amu ig oonigppa daatte amunu, aɗitai laa heeb, ig ii nauhmata,” aon atteb. Ag lag amunu enanagnab doon, lag amunu ag oo mauhak bia dootteb. Ag anam dootteb, amge gadon, ag bekkalkad aɗelkad Jerusalem appa daatteb, bekkalkad aɗelkad amu ag banppa mauhkkulag.

²² Ag mauhkkulag amu, ag ippa daatteb, ag da hettem imubia hekkulag. Ag laala ag mauhomnu mahiak hekkulagnu ag iɗulag heqo laih akkabɗulag ukka amelag batak haut-tteb amu, ag anam ii hemana. Laa ele am, ag danab ag laa mauhomnu ee latteb amu, ag ee amu ii lamana.

²³ Ag igippan lamen ii uɗamna, baeg gaɗa ele ii uɗamna. Ag mahiak, gayak ele ii hemana. Ag amu oh ii hemana, amge ag hipunin heppig amunu, ag ebehilag teeb, ag baalagppaib qinonob aiqakkak hekkulag.’ ” Yawe Nug anam aum.

²⁴ ⌊Yawe Nug da amelppa anam ana, Nug nai laa Israel dilag, Babilon appa daatteb ele, ahilagnu imu ele ag amelagppa aum.⌋ “Esekiel nug am ag dabmak aoglagnu at daakku. Nug kobol laa iikku hette amu, ag ele anamib hekkulag. Am keeke amu oh beeb amu, ag dooglag, da am Naɗi Yawe,” awa aum.

²⁵ Yawe Nug anam ana, Nug nai tuɗitta, da amelppa aum. “Danab bekka, da heppi, kekeɗ ag uɗin, da laul heppeg nauhkku. Israel ag lag amu ag oolagppa daattenu maɗoɗppan gamag ahak madatte doon, lag amu ag binalag amahlak oppiaawak ele madatte dabmenan, ag lag amunu enanagnab doon, lag amunu ag oo mauhak bia dootteb, amge kekeɗ ag heppeg nauhkku. Da heppi, kekeɗ ag anam hena, ag bekkalkad aɗelkad ele diin gokkulag.

²⁶ Haen amu oh beebeb, oola ukka, laih dayaknu danab laa nug Jerusalem aabppanu oola uɗia, gumitta ba, nug amunu oh na amenppa akku.

²⁷ Danab amu nug gumitta beeb, haen amuppanab na digmena, hanhan nai madittem bia madikkut. Na oɗe qamuttak ele baula ii daamna. Na anam daakkut amunu, na Israel danab ah dilag at daakkut. Amu ag da am Yawe dooglag,” awa aum.