Esekiel 23 - Nobonob Baibel

Ee makkeg dilah hipunin hak

¹ Amu Yawe Nug nuhig nai laa da meɗom. Nai amuam inam.

² “Danab bekka, ah aɗit laa aa oh anilah laippu amu, ah aɗit amu aa aakku daapiɗ.

³ Ah aɗit amu aa Isip wanppa aa ah makkun appa daayya, aa ib baag ah beya, kobol amu tuɗidya heeheh ukke, ah okkai meya, anamib hepiɗ. Aa heeh, danab ag ahilag kobolppa heegeg, ib baag ah daapiɗ.

⁴ Ee makkeg apag amu onig Oholah; makkeg onig am Oholibah. Ah aɗit aa am da Yawe, dahilaɗ daapiɗ. Aa anam daayya, aa nid danab, nid ah ele menuatpiɗ. ⌊Amge ah aɗit am piksa ippunittak daattep.⌋ Oholah nug Samaria ⌊Israel danab ahnu piksa⌋ daatte, amu Oholibah am Jerusalem ⌊Juda danab ahnu piksa⌋ daatte.

⁵ Amu Oholah nug dahil dayaya, nug ib baag ah kobol ii uua haaha, nug laikkud, amuam Asiria dilag daup, nug ag ele niiglagnu oo hak nau doyom.

⁶ Asiria dilag ban daup amu nug ag ele niiglagnu oo hak nau doyom ele amu, ahilag lamen am kala ed, lamen enanag. Ag oh am daup hamu iitta. Iitta! Ag am nid bau, beɗulag anttak enanag ele. Ag am ban daup ikkilkad. Laa ele ag hos attan tena, ban heppig.

⁷ Oholah nug Asiria dilag okkai oh dim dim lamatta heehe, ag ele niippig. Nug anam haaha, nug danab oh, nug ag ele niiglagnu oo hak nau doyom ele, nug ahilag kayak hambuppuak dottolkad ele binalag me, amuppa nug ooppa dubuttid te dayom.

⁸ Nug Isip appa ah makkun dayaya, nug digma ib baag ah dayaya he, danab digdig ele niippig. Haen amuppa nug Isip appa kobol amu digmeum amu, nug kobol amu ii uuom. Iitta. Nug haahaib dayom. Nug Isip appa ah makkun daya, anam heehe, danab ag ahilag kobol nug beɗuppa henana, ag nug ele niiglagnu oo hak nau doyegeg, ag amu dim lamidna, nug ele aakku niippig.

⁹ Oholah nug Isip appa digma anam heehe ukke, dimppa nug Asiria danab ele niiglagnu oo hak nau doyom amunu, ag ⌊nug eheɗ hettaglagnu⌋ da nug Asiria danab eppelagppa memi.

¹⁰ Da ag eppelagppa memi amunu, ag lamen nuhig huana pattiɗnana aoeg, nug beɗu miag dayeye, ag nuhig nid danab, nid ah nuhig ele diin gona, ag nug qep elabppa qeeg mauhom. Nuhigppa bu mettak anam be, ah laih laihnu ag nug am nau bekkunu at daatte dabmeppig.

¹¹ Amu Oholah nug anam he, nuhigppa anam be, nug makkeg Oholibah nug anttom, amge nug danab laala ele niiglagnu oo hak nau doya, ib baag ah kobol haaha, nug danab kuɗum ele niippig. Oholah nug eheɗ heum am huana heum, amge nug makkeg Oholibah, nug eheɗ naunab nau huana heum.

¹² Nug apag heum bia haaha, nug Asiria dilag ban daup ikkilkad, daup amu ag lamen enanag takkadppig, daup amu ag hos attan tena, ban heppig, ag oh am nid bau, beɗulag anttaknu enanag ele amu, nug amu oh ele niiglagnu oo hak nau doyom.

¹³ Da Yawe da nug apag heum bia nug ele he, ooppa dubuttid te dayom anidmi. Nug apag ele oh aa kobol laippu heyaya oipiɗ.

¹⁴ Aa oh anamib hepiɗ, amge Oholibah nug ib baag ah kobol nuhig tuɗitta, huana heum. Nug Babilon danab dottolkad, lamen kokoɗ ele gililppa hatte antta, nuhig dabmak ahilagppa ukkom.

¹⁵ Dottolag amuppa ag imuagppa matagiɗ takkidna, ikkilagppa lamen enanag qakkak ele daappig. Ag oh, ahilag neekkak am ban danab ban haknu karisppa oinna ban hetteb dilag okkai daappig. Ag am Babilon wanppanu danab.

¹⁶ Oholibah nug ag dottolkad gililppa hak antta, paha nug ag ele niiglagnu oo hak nau doya, nug ag uɗippeg, amu hekkulagnu nai me, Babilon ukkom.

¹⁷ Nug anam he, Babilon danab ag uɗin, ag nug ele niiglagnu oo hak nau doon hena, oo hak nau ahilagppa ag heeg, Oholibah ooppa dubuttid te dayom. Ag anam heeg, Oholibah nug ooppa dubuttid teum daye ukke, nug ahilagnu gahag bak bia doya, dimattom.

¹⁸ Nug ag dimattom, amge nug ib baag ah kobol ii uuom. Iitta. Nug amu tuɗitta miagib haaha, nug beɗu miagib danab ippuanattom. Nug anam he, da gahag bak bia doomi amunu, da nug dimettami; da apag dimettami, amubia da nug dimettami.

¹⁹ Da dimettami, amge nug eheɗ hak amu aakkuib ii heum. Iitta. Nug ah makkun dayaya, Isip appa ib baag ah dayaya, kobol aɗi aɗi heum dabmaama, nug danab ele niiglagnu wagai ma ha,

²⁰ nug laikkud danab, ag doɗ dawai doɗ anig papaltte bia hetteb, nug amu dilagnu oo hak nau doyom.

²¹ Anam amu, O Oholibah, na ah makkun Isip appa na gappai heeb baknu kobol dim lamidna, ib baag ah daanna, kobol amu dim lamittette, danab ag ahilag kobol nahip-ppa heppig amu, na eɗun anam daakkutnu oot dayom.” Yawe Nug anam aum.

²² Amu Naɗi Yawe Nug inam atte. “⌊Oholibah, na eheɗ nau, kobol dubuttid ele hettem⌋ amunu, da heppi, danab ag na ele niippig, amge na eɗun, ahilagnu gahag bak bia doon, ag dimattame ele amu, da heppi, ag nahipnu eheɗ dooglag. Da anam heppi, ag eheɗ heidkkulagnu talilidna daaglag.

²³ Ag uɗin, talilidna daaglag amu, ag am Babilon dilag daup Babilon wan ohppanu, aria Babilon dilag ehanittak Pekot, Soa amu Koanu ele. Amu Asiria ele ag uɗin, Babilon ehanidkkulag. Ag oh am nid bau, beɗulag ena ele. Ag am ban danab ikkilkad. Ag am ban danab ban haknu karisppa oinna ban hetteb dilag ikkilkad. Ag danab onilag ele, hos attan daan ban hetteb ele.

²⁴ Ag daup huanak ele na ele ban hekkulagnu yawalti uɗitteppanu uɗiglag. Ag bannu karisppa, uɗatnu karisppa ele uɗiglag. Ag uɗin, ag talilidna daanna, ag guppiɗ okkai, guppiɗ nakok ele aɗan, ag ikkilagppa aen hat mekkulag. Na bu nau aokkutnu amu, da heppi, na ag eppelagppa daappe, ahilag ɗoppa na bu nittaglag.

²⁵ Oholibah, nahipnu amu da oo nauhak laa, oo nauhak amuam dahil dooi laa aomanuppa bette, oo nauhak amu be doottem. Da na laa ele niiglagnu ool nauhtte, amge na anam heme amunu, da oo nauhak amu doye, da heppi, laa uɗiglag amu, ag oppoɗi bak huanak doon, na noom, daut ele otaɗna aona, nahipnu laa ag daaglag amu, ag qep-ppa aqappeg mauhkkulag. Ag na begapad, aɗenad ele diiadna, diin gokkulag. Ag anam heppeg, nahipnu laa ag daaglag amu, aab ewatteb, iitta mekkulag.

²⁶ Ag nahip lamen huana pattiɗna awona, ag nahip bala enanag ele aɗidna aoglag.

²⁷ Anam amunu, da heppi, na Isip appa digmena, gappai heeb baknu kobol dim lamidna, ib baag ah daanna, kobol nau, dubuttid ele heme amu, na kobol amu oh uuna, baula ii hemana. Na baula, ‘O gadon, da Isip appa kobol digdig danab ele hemut amu, da baula helomnu ool naɗi daatte,’ ii dabmemana. Na eɗun, Isip appa daakkutnu dabmak amu, dabmak amuam na dautppa baula ii doma, bau laa ii daama,” awa atte.

²⁸ Amu bekkunu diignu amu, Naɗi Yawe Nug inam atte. “Da heppi, na laa, na ahilagnu nau ninig ele doottem, na ag eppelagppa daakkut. Ao, da na laa, na ahilagnu gahag bak bia doon dimattame amu, da na ag eppelagppa meidkkul.

²⁹ Ag nahipnu nau ninig ele doon, ag keeke oh na nahip daakkunu uɗat henan aome amu, ag aoglag. Ag heppeg, na beɗun miag hamu dayebeb, na ib baag ah kobol nau dubuttid ele henan daame amu, danab ah oh ag amu anidkkulagnu elele daaglag. Na gappai heeb baknu kobol dim lamidna, danab kuɗum ele niippig

³⁰ amunu, bu na aokkut amu, bu amu awaknu am na beɗunppa. Na wan laappan danab ele niiglagnu oo hak nau doon, na aakku heme, amu na ahilag kayak hambuppuak dottolkad ele binalag me, amuppa na ootppa dubuttid teum daatte. Anam amunu na bu aokkut amu, am na beɗunppa.

³¹ Na, na apan dim lamidna, nug heum bia heme amunu, da bu nug mettami amu, da na ele bu amu medakkul. Bu amuam le ninig nau ele kap-ppa daatte bia, amu laa lakkunu daatte, amge uuebeb, laa heeb am lakku. Amubia da hei, na apan nug laum, amubia da heppi, na ele lakkut,” awa atte.

³² Naɗi Yawe Nug inam atte. “Na apan bu nau awom, bu amuam le nau kap-ppa laum bia amu, amubia na lakkut, amge kap nahip am okkai, elab ele. Na lakkut amunu, danab ah ag nahipnu, keeke hamu bia doon, ag eheɗ imidkkulag.

³³ Danab nug le ɠagattag la, kaaka qe nauhtte, amubia nahip-ppa bekku. Na bu nau aoppeppe, uug naunab, mahiak uɗat ele nahip-ppa daakku. Kap amuppa amu nauhak, padal mak ele daattep. Kap amuam na apan Samaria, nuhig kap aakku.

³⁴ Da heppi, na bu eheɗ, nahip eheɗ haknu elele, danab nug kap-ppan le ohnab latte, nakok laa iinab uutte, amubia bu anam aokkut. Bu aona, danab le ɠagattag la, kaaka qe, kap mauhnoak buɗie ukka qa aoɗtte, amubia na mauhnoak henana, oo doyak naunab nau doon, na nahip huh heppe nauhkku. Amu bekkunu diig am, da, Yawe, da aakku ain malami.” Naɗi Yawe Nug anam aakku atte.

³⁵ Anam amunu, Naɗi Yawe Nug inam atte. “Na dahilnu daut atie, da dimeɗan autnanab aonna, na gappai heeb baknu kobol henan, ib baag ah kobol ele heme amunu, na amunu bu aokkutoitte.” Yawe Nug anam atte.

³⁶ Yawe Nug anam awowa, Nug da amelppa aum. “Danab bekka, na Oholah am Oholibah ele aa bu aoglahnu nai appe dooglahnu babaittak daattemte? Na anam bappaidna daattem dayeb amu, na aa kobol digdig, da kobol amunu oolppa uuaknab doottem heeheh uɗie, gemu ele hettep, na aa amu ippunate!

³⁷ Na amu hekkutnu diig am, aa ewau pakkua gappai hak kobol heyaya, aa ele heeh, danab ah kuɗum mauheg, ag tiilag aa eppelahppa daatte. Aa kayak hambuppuak dottolkad noolagppa dup noya binalag meya, aa nid ahilti, nid amuam dahil nid, aa nid amu ele manadya, kayak hambuppuak dottolkad ahilahnu ee daaglagnu madapiɗ.

³⁸ Aa amu heyaya, aa inam ele dahilppa hepiɗ. Aa heeh dahil neekkakppa dahil mettid lag dubuttid teum daatte, amu aa ɗo da aa Sabat deɗppa dim lamidkkulahnu ami amu, aa amu ii dim lamidpiɗ.

³⁹ Deɗ aa nid ahilah manai, kayak hambuppuak dottolkad madattapiɗ, deɗ amuppanab aa mettid lag dahilppa teya, da binal mekkulahnu heyaya, amuppa aa heeh, da laul am dahil neekkakppa dubuttid teum daatte. Aa da laulppa anam hepiɗ.

⁴⁰ Ah aɗit aa amu heyaya, aa nai awa ukkak danab matteh gona, appan danab ag uɗiaknu appig amunu, danab umanabnu uɗippig. Anam amu, ⌊O Oholibah⌋ na hee, danab umanu ag uɗieg, na le layona, amen haugppa gau laidna, bala ele meme.

⁴¹ Na anam hena, na sia enanag amuppa appa daan he, laa ag balal laa na noomppa babaitteg, na appa kalu danab ile muttuɗig enanag bette dahil, dahil goɗen ele meme.

⁴² Aakku ⌊Oholibah, na⌋ daattemppa amu, danab kuɗum, dabmak hamu hamu aon mauhnoak hetteb ele, ag appa daaegeg, oqottilag oum. Ag am danab iɗu iɗu, ag oolagppan laa ag am Sabea danab, atu taɗakppanu; ag nai me ukkakppa uɗippig. ⌊Amu Oholibah nug, amu apag ele aa oh appa daapiɗ. Ah aɗit amu aa daaeheh,⌋ danab uɗin daappig ele ag eɗi ah aɗit amu eppelahppa aɗalateg teeh, haɗ neekkak enanag ele aa ikkilahppa meppig.

⁴³ Anam amu, da Yawe, da dakka da oolppa ⌊Oholibahnu,⌋ nug haen elabnab ib baag ah kobol dim lamitta haaha, beɗu nauhom daatte amu, da nuhignu ami. ‘Ah amu nug am ib baag ah kobolib dim lamidtte amunu, ag nug ele niieg!’ ami.

⁴⁴ Anam amu, ag ah amu ele niippig. Danab ag ib baag ah ele niitteb, amubia danab amu ag ah aɗit, Oholah, Oholibah ele, aa gappai heeb baknu kobol dim lamidpiɗ ele amu, danab amu ag ah aɗit amu oh ele niippig.

⁴⁵ Ah aɗit aa anam heeheh, danab kuɗum aa ele niippig, amge qinob genab tutukku hak danab ag ah aɗit amu epeɗiatna, ag hettoɗiak danab ag ah nug ewau pakkua gappai hette, ah ag heeg, laa mauhtteb ele epeɗiadna aeg, bu aotteb, amubia genab tutukku hak danab ag ah aɗit amu epeɗiatna, bu aoglahnu akkulag. Aɗinu? Aa ewau pakkua gappai kobol heya, danab ah laa ele aqaeh mauheg, tiilag aa eppelahppa daatte,” awa aum.

⁴⁶ Amunu Naɗi Yawe Nug inam atte. “Ag laa ag heppeg, danab kuɗum ag oppoɗi bak doon, ah aɗit amu gumatna gona hatappeg, aa baɗak eheɗ nau doopeɗ, ahilah keeke ele aweg!

⁴⁷ Danab kuɗum ag amu henana, ag menppa makkuɗatna, qep-ppa ele yaalatkkulag. Ag uɗin, nid danab, nid ah ahilti ele aqappeg mauhppeg, ag aa laulti ele manatkkulag.

⁴⁸ Amu ah laala ag nau aomnanu dabmak aoglagnu, ag Oholah, Oholibah ele, ag aa bia hemananu da heppi, gappai heeb baknu kobol dim lamittak am wan imuppa ii daama.

⁴⁹ Aa gappai heeb baknu kobol dim lamidpiɗ amunu, aa amunu bu aoglah. Ao, aa kayak hambuppuak dottolkad binalag mepiɗ amunu, aa hipunin amunu bu elele aakku aoglah. Kobol anam ahilahppa beeb, aa dooglah, da am Naɗi Yawe.” Yawe Nug anam aum.