Esekiel 22 - Nobonob Baibel

Kayak Nug Jerusalem danab ah bu eheɗ madakkunu aum

¹ Amu Yawe Nug nuhig nai laa da meɗom. Nai amu inam.

² “Danab bekka, na danab ah Jerusalem daatteb, na ag bu aoglagnu nai appe dooglagnu babaittak daattemte? Ge na danab ah amu ag danab aqaeg mauhtteb amu, na ag bu aoglagnu nai appe dooglagnu babaittak daattemte? Anam dayeb amu, na kobol digdig ag hetteb, da kobol amunu oolppa uuaknab doottem amu, na kobol amu ippunatte!

³ Na ag amu ippunadnana, na Naɗi Yawe Nug inam atte ele appe doyeg! ‘Ag danab ah Jerusalem daatteb, ag danab aqaeg mauhtteb amunu, amuppa ag akka amu henan, ag bu eheɗ nau aoglag. Ag akka kayak hambuppuak dottolkad bappaidna, binalag metteb. Ag amu heeg, dubuttid ag oolagppa daatte.

⁴ Ag danab aqaeg mauhtteb amunu, ag beɗulagppa aab ele. Ag kayak hambuppuak dottolkad bappaidna, binalag metteb amunu, ag dahil neekkakppa ag oolagppa dubuttid teum daatte. Ag akka heeg, ahilag bu awak deɗ aakku miag uɗiom daatte. Ao, ahilag padal mak haen miagnab doa, haen amu aakku gogppa teum. ⌊Ag bu aoglagnu daatteb⌋ amunu, da heppi, danab ah laihppanu ag ahilagnu, “Keeke hamunab,” dooglag. Ao, ⌊ag bu aoglagnu daatteb⌋ amunu, da heppi, wan laappan danab ah, ag eheɗ imadkkulag.

⁵ Ge, ag Jerusalem danab ah, ag hipunin tuɗidna heeg, ag oolagppa manin laa ii daatte amu, danab ah miag daatteb, laa uma daatteb ele, ag oh aon aon aqaglag.

⁶ O Jerusalem danab ah, ag antteg! Ahilkad anuqak danab ag ag oolagppa daatteb amu, ag danab okkai, ɠagattag ele. Ag anam daatteb, amge ag ahilag ɠagattagppa heeg, danab laa hamu mauhtteb.

⁷ Jerusalem danab ah, ag oolagppan laa ag mamelkad anilkad dilagnu, “Keeke hamunab,” dootteb. Ag oolagppan laa ag wan laihnu danab eheɗ hadatteb, amu laa ag ag nid mamelkad iitta ele eheɗ hattana, ag ah qab ele eheɗ hadatteb.

⁸ Dahil keeke, dahilnu tituanak daatteb amu, ag Jerusalem danab ah ag keeke amunu ena iinab doyegeg uɗie, gemu ele anam hetteb. Ag ɗo da ag Sabat deɗppa dim lamidkkulagnu ami amu, ag amunu hamu bia doon, ii dim lamidna, gemu ele hetteb.

⁹ Jerusalem danab ah, ag oolagppan laa ag doonna hambuppun, laa eheɗ ii heppignu, “Ag eheɗ anam heppig,” anana, ag danab eheɗ ii heppig amu aqaeg mauhtteb. Ag oolagppan laa ag qaukoppan kayak hambuppuak dilag mettid lag nakokppa ee lanan, ag gappai heeb baknu kobol ele hetteb.

¹⁰ Jerusalem danab ah, ag oolagppan danab laa ag mamelkad dilag ah ele niitteb, amu laa ag ah ag Kayak ele ouqa dayaknu elele iitta, ag kalam qak anidtteb ele, danab amu ag ah amu ele niitteb.

¹¹ Ag Jerusalem danab ah, ag oolagppan danab laa nug nuhig mudippan laa wau ele niittep. Kobol amunu amu, da oolppa uuaknab doottem. Amu laa nug uɗa nak iitta ele bekka wau, nug ahippa, nug nug ele niittep. Kobol amunu amu dahil neekkakppa am dubuttid ele. Amu laa nug appinag, aa mamelah laippu, nug ele niittep. Kobol amuppa nug nug appinag eheɗ hedatte.

¹² Ag Jerusalem danab ah, ag oolagppan laa ag laa men doɗo mattaeg, ag laa aqaeg mauhtteb. Ag Jerusalem danab ah, ag lailkad lon mattan, ag lonnu intres digdig aotteb. Ge, ag gane medappig, amu eɗittak laa eɗun aotteb. Ag Jerusalem danab ah, ag mudippan laippu ele keeke lokkumakppa awaknu duttuna hak kobolppa ag eppelagppanu men doɗo keeke aotteb; amuppa ag keeke ii aolob aotteb. Ge, ag Jerusalem danab ah, ag dahilnu daulag atiom oitteb.’ ” Naɗi Yawe Nug anam atte.

¹³ Amu Naɗi Yawe Nug atte. “Ag men doɗo keeke ag ii aolob kobol eheɗppa aotteb, ag oolagppa danab aqaeg mauhtteb ele amu, da amunu danab nug dabmak huanak awa, uug nau ele doya hette bia da eppel laihppa am eppel laih okkul.

¹⁴ Da Yawe, da ag bu madakkul, amu deɗ laa da amu hekkul amu, ag oolagppa ɠagattag qettak daaglagte? Ag ɠagattag daaglagte? Iitta! Amu da Yawe, da aakku amu hekkulnu ain malami amunu, da anamnab aakku hekkul.

¹⁵ Ag eheɗ anam heegeg uɗie, gemu ele hetteb amunu, da bu anam matten heppi, kekeɗ ag uɗin eɗadna hekkulag. Ag heppeg, ag gona wanppan wan laalappa daaglag. Ao, kekeɗ ag heppeg, ag matatun gona, wan laalappa daaglag. Ag anam daappeg amu da heppi, ag hipunin hak gemu hetteb amu, ag anam baula iinab hemana.

¹⁶ Amu wanppan wan laalappan danab ah ag ahilagnu, ‘Ag Yawenu neekkakppa ag oolagppa dubuttid teum daatte dooppeg, ag Israel, ag dooglag, da am Yawe!’ ” Yawe Nug anam aum.

Jerusalem danab ah ag hipunin eheɗ nau heppig amunu, Kayak Nug bappaladkkuoitte

¹⁷ Amu Yawe Nug nuhig nai laa da meɗom. Nai amu inam

¹⁸ “Danab bekka, Israel danab ah ag silwa laa, silwa amuam kapa, o tin, o aen, o led ele kaboliak daattep, ag dahil neekkakppa kapa, o tin, o aen, o led amubia daatteb. Danab nug silwanab aokkunu nug silwa aab aɗu gakkaɗak nauppa me, le me, kapa, o tin, o aen, o led dubuttid bia silwa le meum qaɗeppa ba daatte amu, da amubia Israel danab ah neekkadttem. Ag am silwanu kinipan aakkuib,” awa aum.

¹⁹ Anam amunu, Naɗi Yawe Nug inam atte. “Ag Israel, ag anam, silwanu dubuttid bia daatteb amunu, da heppi, ag Jerusalem appa daaglag.

²⁰ Danab silwa laa, silwa amuam kapa, aen, led amu tin ele kaboliak, nug amu le mekkulagnu aab aɗu gakkaɗak nauppa mette, amubia da ag Israel, ahilag hak naunu oppoɗi bak nau doye, ool ele nauhtte amunu, da heppi, ag Jerusalem ooppa daappeg, da aab ewak keeke he le mette, amubia da bu eheɗ madakkul.

²¹ Ge, da Jerusalem appa qagmaadppi daappeg, ahilag eheɗ haknu da oppoɗi bak huanak doottem amunu, da danab nug aab huan eokkunu iwale, silwa keeke le mette, amubia da heppi, appa ag bu eheɗ nau aoglag.

²² Silwa aab ewak gakkaɗaknabppa dayaya, le mette, amubia ag Israel danab ah ag Jerusalem appa daanna, bu eheɗ aoglag. Ag bu aona, ag dooglag, da Yawe, da ahilag eheɗ haknu oppoɗi bak naɗi doyen hei, bu awak ahilagppa beum.” Yawe Nug anam aum.

Israel dilag okkai ag hipunin digdig heppig

²³ Amu Yawe Nug nuhig nai laa da meɗom. Nai amuam inam.

²⁴ “Danab bekka, na Israel danab ah oh amelagppa ag oppoɗi bak deɗppa, ag gu okkai, o gu nakok laa ii aomna appe doyeg!

²⁵ Amu laion laa nug gaya, doɗ laa qa latte, amubia Israel dilag anuqak danab ag dabmak laippu mena, ag danab ah heeg nauheg, ag danab ah dilag en keeke, keeke awaknu men doɗo okkai ele, ag keeke amu oh yab aona, ag danab kuɗum ele aqaeg, waalkad ag ah qab daatteb.

²⁶ Okkai danab ag anam heeg, mana mettak danab ag ɗo dabmena, ii dim lamidtteb. Ag amu hena, ag keeke dahilnu tituanak daatteb heeg, dahil neekkakppa dahil keeke amu ag dubuttid tak daatteb. Ag keeke dahilnu tituanak daatteb, ag keeke amu, keeke dahilnu tituanak ii daatteb ele amu, ag keeke aɗit amunu keeke laippu bia dootteb. Keeke laala, amuam keeke dahil neekkakppa dubuttid ele daatteb, amu keeke laala dahil neekkakppa dubuttid iitta ele daatteb amu, ag keeke amunu laippu bia doon, ag amunu danab ah ippunadtteb. Ag dahil Sabat, da Sabat dahilnu ag ɗo mattami amu, ag doonna, ɗo amu ii dim lamidna, dahil Sabatnu am hamu dootteb amunu, aabppan danab ah ag dahilnu hamu dootteb, ag da ii dim lamiɗtteb.

²⁷ Doɗ wulp ag doɗ laa qena latteb, amubia Israel dilag okkai ag danab ah eheɗ hatteg nauhtteb. Ag men doɗo, wan keeke, ahilag iitta, amge ag aoglagnu danab aqaeg mauheg, ahilag keeke aotteb.

²⁸ Propet, Israel dilag ag amu, ag danab okkai ag eheɗ amu heegeg anadna, ag ii toliadtteb. Iitta. Ag, ‘Naɗi Yawe Nug da tuleglegppa ag eheɗ hettebnu bu ii aomnanu ippuniɗom,’ atteb, amge amuam hambuppuak. Ag eman kobol ahilag henana, ag, ‘Naɗi Yawe Nug ag kobol amu hetteb ele, ag amunu nob nau ii aomnanu a doomi,’ atteb, amge amuam hambuppuak. Ag, ‘Naɗi Yawe Nug inam ippuniɗom,’ atteb, amge da Yawe, da ag amelagppa nai laa ii mattimi; keeke laa ele ii ippunadmi.

²⁹ Danab okkai, mana mettak danab, propet ele ag anam hetteb, amge hamu aabppan danab ag ele eheɗ hetteb. Hamu aabppan danab ag keeke lokkumakppa awaknu duttuna hak kobol dim lamidnana, ag danab hamu, ɠagattag iitta, ag, ag eppelagppanu men doɗo aotteb. Ag keeke yab aotteb. Ag daɗek danab amu laa ag keekenu tutu mak daatteb ele, ag amu dilag eheɗ hadatteb. Israel danab ah ag amu hena, ag wan laihnu danab ah ele eheɗ hattana, ag gona, hettoɗiakppa danab ah amu dilag uug bappaidkkulagnu nai doya mala hettoɗia epeɗia elele mettak kobol ii dim lamidtteb.

³⁰ Israel dilag okkai ag nau anam hetteb, hamu aabppan danab ele ag anam hetteb amunu ag bu aoglagnu daatteb. Ag bu aoglagnu anam daatteb, amunu da danab laa nug aabnu aɗ babaitteb, kekeɗ ag wana heppeg, danab ah ii nauhmananu dootte, nug aabnu aɗ giɗo daatteppa dayaya, kekeɗ lamadkkunu dootte amu, da laa amubia heeb, da wain, Israel danab ah hadappi nauhmananu ii hepanu neegmi, amge da laa anam laa ii anidmi.

³¹ Da laa ii anidmi, da ahilag eheɗ haknu oppoɗi bak huanak doottem amunu, da eheɗ nau madakkul. Ao, da ahilag hipunin hak amunu ool eheɗ nauhtte amunu, da eheɗ hadappi, ag padal mekkulag. Da amu heppi, ahilagppa bekku, amge amunu diig am ag beɗulagppa.” Naɗi Yawe Nug anam atte.