Esekiel 19 - Nobonob Baibel

Israel danab ah dilagnu ahi oo doyak ele

^1-2 Amu Yawe Nug da, Esekiel, da amelppa aum. “Na nai oo doyak ele imu Israel dilag anuqak danab dilagnu ahiettak imu ette! ‘Ag anilag nug am laion laa oh oolagppa laion anilagnab bia dayom. Nug laion bau oolagppa dayaya, nug nakkud atognoattette, ag okkai meppig.

³ Nug nag laa ehanitte, nug ena ma, nug laion bau dayom. Nug anam dayaya, nug doɗ keeke aɗa, heeb nauhkkunu doyak awa, nug danab ele aqa lakkunu doya, anam heum.

⁴ Nug anam he, wanppan wan laalappan danab ag nuhig hak amu doon, ag moɗ buun tonaeg, nug amuppa no, ag aɗan, aen huk muɗi eleppa ag nug eeɗna, Isip wanppa goppig.

⁵ Ag anam heeg, anig nug nag amu attem ba daya hekkunu dabmak aɗa oiyom ele am elele iitta antta, nug nag laa awa he, nug ele ena ma, laion bau dayom.

⁶ Nug laion bau ba dayom amunu, nug laion laa ag oiyegeg, nug laion amu oolagppa oiyaya, nug doɗ aɗa, heeb nauhkkunu doya, nug danab ele aqa lakkunu doya, nug anam heum.

⁷ Nug danab dilag ban haknu aben ɠagattag ele he nauhatte, aab ahilag ele he nauhadppig. Nug anam he, wan amu, danab ah appa daappig ele, ag oh nauhakib daappig. Anam daye, danab ah ag laion amu nuhig gayaknu baɗak eheɗ nau dooppig.

⁸ Laion nug anam he, wanppan wan laalappan danab ag ahan, nug aɗaglagnu uɗippig. Ao, wan laa, ag Juda wan talilidppig ele amu, ag nug aɗaglagnu uɗippig. Ag uɗin, danab ag kakai uhuippa aotteb bia ag uhui meppig. Ao, ag wan buun tonaeg, nug amuppa no, ag aɗappig.

⁹ Ag muɗi aen huk eleppa eeɗna, aɗ nakokppa maniguidna, ag aon, Babilon wanppa gona, ag Babilon dilag king noobppa meppig. Ag meeg, king a, ag nug Babilon wanppa maniguittakppa meeg, amuppa dayom. Nug daye, Israel danab ah ag baula nuhig gayak qaukoppa ii dooppig.’ ” Yawe Nug nai amu Esekiel amegppa aum.

¹⁰ Yawe Nug amu mattia mala, nug nai laa ⌊Israel dilag anuqak danab dilagnu⌋ ele Esekiel amegppa aum. Nai amuam inam. “Ag anilag nug am muɗi grep laa, wain datta dayom, amubia. Muɗi grep amu mameg nug le daugppa eppom amunu, muɗi amu ena me, eppeg kuɗum daaegeg, meu ele kuɗum oum.

¹¹ Muɗi amu ebekkud am okkai, teppu ele, kingnu qakun daaglagnu elele bena daappig. Muɗi amu okkainab ma, ad gog eɗitta te, ebekkud ele kuɗumnab daaegeg, diig aɗit amunu muɗi am miag atiak daye, danab ah ag anidppig.

¹² Muɗi amu enanag anam dayom, amge laa ag oppoɗilag be amelag kokoɗ eppe, ag hiɗan, wanppa buɗieg ukkom. Ag buɗieg ukka dayeye, kaɗag gakkaɗaknab uɗia he, bunaɗom. Ge, danab ag meu oh aoeg, ulah he, eppeg bunaɗeg, aab ewom.

¹³ Anam, amge laa antta awa, atu taɗakppa eppom. Wan amuam le iitta, qaɗaiettak.

¹⁴ Gadon, anam daye, muɗi amu eppeg okkai laappanu aab aha, muɗi amu meu aakku he, iitta meum. Gadon, muɗi amuppa eppeg laippu laa, kingnu qakun daakkunu laa ii daatte, eppeg oh am gai-iitta.” Yawe Nug Esekiel nai amu mettom. Amu nai amuam nai oo doyak ele, amu laa nug Israelnu oo doyak dookku dayeb, nug nai imu edakkun daatte.