Esekiel 18 - Nobonob Baibel

Aun laa nug hipunin hekku amu, nug mauhkku, laa iitta

¹ Amu Yawe Nug nuhig nai laa da Esekiel, Nug da meɗom. Nai amuam inam.

² “Israel danab laa ag oiyak ehanittaknu nai tutu imu mattiegeg doottem. ‘Nid mamelkad ag grep meu ninig ele laegeg, ahilkad nid aelkad nette,’ aon atteb, amge ag amu aib appig.”

³ Amu Naɗi Yawe Nug inam atte. “Da genab bau daattem, genab amubia ag Israel danab ah, ag baula oiyak ehanittaknu nai tutu amu ii mattimna.

⁴ Danab ohnab am dahiladib. Laa mameg am dahil, danab amu bekka am ele dahil. Aɗit oh am dahilib, amu auntai laa nug hipunin heeb, nug mauhkku, am laa iitta.

⁵ Am inam. Danab laa nug genab tutukku hak danab daattetai. Nug nai doya mala hettoɗia epeɗia elele mettak kobol dim lamittatta, kobol genab tutukku ele hette.

⁶ Nug kayak hambuppuak mettid lag nakok, nug appa ee ii lanana, nug Israel dilag kayak hambuppuak laa binag nakok laa ii mette. Nug layag wau ele ii niiyya, nug wau nug kalam qette haenppa ele ii niittep.

⁷ Nug laa eheɗ ii hatta, nug keeke lonnu onig awak daatte amu eɗua, mameg medatte. Genab tutukku hak danab amu nug yab ii hette. Nug danab enug qeeqe, ee medatte. Ao, nug laa lamen iitta ele lamen medatte.

⁸ Genab tutukku hak danab amu, nug danab laanu lonnu intres ii aotte. Ge, nug gane mettom, amu eɗittak laa ii aotte. Nug eheɗ hekkunu ib anidtte ele amu, nug ib amu uua, eheɗ ii hette. Danab aɗit laa aa nug qeeheh, bappaidkkunu nug nai doya mala hettoɗia epeɗia elele mettak kobolnu oo metta ii uuak doyaya, kobol amu dim lamitta bappaidtte.

⁹ Nug dahil ɗo nai iɗu iɗunu oo metta ii uuak doyaya, pehettak dabmetta dim lamidtte. Danab anam amu, nug am genab tutukku hak danab; nug bau daakku.” Naɗi Yawe Nug anam atte.

¹⁰ Amu Naɗi Yawe Nug tuɗitta atte. “Anam, amge genab tutukku hak danab amu nug bekka eletai, amu bekka nug mameg bia iitta, nug am danab nug laa guittak nau mauhnoak mettaknu tiigppa dayak ele. Nug am danab anam amu, nug laa duulag otte,

¹¹ amu nug hipunin digdig nug mameg ii heum ele, nug amu hette. Nug kayak hambuppuak mettid lag nakok, nug appa ee lanana, nug layag wau ele niittep.

¹² Nug daɗek danab amu laa ag keekenu tutu mak daatteb ele eheɗ hadatte. Nug yab hette. Nug keeke lonnu onig awak daatte amu eɗua, mameg ii medatte. Nug kayak hambuppuak binag maama, nug kobol digdig, da kobol amunu oolppa uuaknab doottem amu, nug kobol amu ele hette.

¹³ Bekka amu nug danab laa lon metta, eɗua awaknu haenppa nug lonnu intres aotte. Ge, nug gane mettom, amu eɗittak laa aotte. Danab anam nug bau daakkute? Iitta! Nug kobol digdig, da kobol amunu oolppa uuaknab doottem amu, nug kobol amu oh heum amunu, nug mauhkkuoitte. Nuhig mauhak am nug beɗuppa. Laa beɗuppa iitta.

¹⁴ Amge danab nau amu, nug ele bekka eletai. Bekka amu nug mameg hipunin digdig haaha oitte anidtte, amge nug andatta, amubia ii hette.

¹⁵ Nug kayak hambuppuak mettid lag nakok, nug appa ee ii lanana, nug Israel dilag kayak hambuppuak laa binag nakok laa ii mette. Nug layag wau ele ii niittep.

¹⁶ Nug laa eheɗ ii hatta, nug laa lon metta, nug keeke lonnu onig awak daakkunu ii atte. Genab tutukku hak danab amu nug yab ii hette. Nug danab enug qeeqe ee medatte. Ao, nug laa lamen iitta ele lamen medatte.

¹⁷ Danab nau bekka amu, nug hipunin aɗi hekkunu ib anidtte ele amu, nug ib amu uua, eheɗ ii hette. Genab tutukku hak danab amu nug danab laa lon metta, eɗua awaknu haenppa nug lonnu intres ii aotte. Ge, nug gane mettom, amu eɗittak laa ii aotte. Nug dahil ɗo nai iɗu iɗu pehettak dabmetta dim lamidtte. Danab anam amu nug bau daakku. Nug mameg hipunin heum, amge danab ena amu nug mameg hipunin heum, nug diig amunu ii mauhma. Iitta. Nug genab bau daakku.

¹⁸ Danab nau, bekka kobol ena tutukkuib heum ele, bekka nug ii mauhma, amge nug mameg am mauhkku. Mameg nug hipunin heum amunu, nug mauhkku. Mamegnu hak am, nug keeke lokkumakppa awaknu duttuna hak kobol dim lamittom. Nug layagnu keeke yab awom, amu nug laikkud oolagppa kobol eheɗ kuɗum laa ele heum amunu, nug mauhkku.

¹⁹ Anam, amge ag oɗmak hetteb. ‘Aɗinu danab amu bekka nug mameg hipunin heum, beɗuppa aab ele amu, aɗinu bekka nug beɗuppa aab ele iitta?’ aon atteb. Ag anam oɗmak hetteb, amge bekka nug nai doya mala hettoɗia epeɗia elele mettak kobol dim lamitta heum. Nug kobol genab tutukku ele dim lamittom. Nug dahil ɗo nai dim lamidkkunu dabmak awawa oiyom amunu, nug genab bau daakku; nug ii mauhma.

²⁰ Danab aun nug hipunin hette ele, nug mauhkku. Laa nuhig abenab ii awa mauhma. Laa beɗuppa aab laa daatte ele amu, aab amuam nug bekka beɗuppa ii daama. O aab laa bekka beɗuppa daatte amu, aab amu nug mameg beɗuppa ii daama. Genab tutukku hak danabnu kobol genab tutukku ele, am nug beɗuppaib daakku. Danab nau, nau hette ele amu, nau hak amunu aab am nug beɗuppaib daakku. Laa beɗuppa ii daama.

²¹ Amge nau hak danab nug oo eɗueb, hipunin digdig heumnu baula hekkunu uua, nug dahil ɗo oh dim lamittatta, nai doya mala hettoɗia epeɗia elele mettak kobol dim lamitta, nug kobol genab tutukku hekku dayeb amu, nug genab bau daakku. Nug ii mauhma.

²² Eheɗ hak nuhig tatam heum ele amu, da amu baula dab-ii-mepa. Nug oo eɗue, kobol genab tutukku ele heum daatte amunu, nug bau daakku.

²³ Da nau hak danab laa nug mauha, padal mekkunu amu, da amunu ool iinab daatte. Da nau hak danab ag oolag eɗueb, kobol tutukku dim lamidna, bau daaglag, da amunu ool daatte.” Naɗi Yawe Nug anam awa atte.

²⁴ Amu Naɗi Yawe Nug tuɗitta atte. “Anam, amge genab tutukku hak danab nug tuɗitta, kobol genab tutukku ele hekkunu uua, nug hipunin hekku daya, nug nau hak danab kobol digdig, da kobol amunu oolppa uuaknab doottem amu, nug kobol amu nau hak danab hette bia ha, nug bau daakkute? Iitta. Nug mauhkku. Kobol genab tutukku ele laa oh nug heum amu, nug amu uua, kobol eheɗ hekku dayeb, kobol genab tutukku ele tatam heum amu, da amu dab-ii-mepa. Iitta. Da daul atikku. Nug da ippunidminu oo metta ii uuak kobol ii dim lamitta ha, hipunin he, beɗuppa aab dayom, diig amunu nug mauhkku.

²⁵ Amge ag atteb. ‘Naɗi hette amu, nuhig kobol amuam nai doya mala hettoɗia epeɗia elele mettak kobol iitta,’ aon atteb. Israel danab ah, ag dahil nai doyeg! Dahil hak am tutukkuib. Ahilag hak digdig am tutukku iitta.

²⁶ Genab tutukku hak danab nug genab tutukku hak uua, hipunin hekku dayeb, nug hipunin heum, diig amunu nug mauhkku.

²⁷ Amge danab laa nug oo eɗueb, nug nau hak tuɗitta hekkunu uua, nug eɗua nai doya mala hettoɗia epeɗia elele mettak kobol, kobol genab tutukku ele haaha oikku amu, nug ii mauhma, nug bau daakku.

²⁸ Nug hipunin heum, nug amu oh dabmetta, uua dimedatte, diig amunu nug bau daakku. Nug ii mauhma.

²⁹ Anam aakku, amge Israel ag atteb, ‘Naɗi hette amu, Nug nai doya mala hettoɗia epeɗia elele mettak kobol ii hette,’ atteb. Israel danab ah, ag dahil nai doyeg! Dahil hak oh amu tutukkuib. Ahilag hak digdig am tutukku iitta,” awa atte.

³⁰ Amu Naɗi Yawe Nug atte. “Da ag Israel danab ah, da ag oh anen anen ahilag hak amuppa epeɗiadkkul amunu, ag oolag eɗueg! Ag eheɗ hetteb am oh dimatteg! Ag tuɗidna hipunin heppeg, da heppi, ag padal mekkulag am aib heppig.

³¹ Ag eheɗ hak heppig amu, ag tuɗidna aib heppig. Ag dabmak bau aona, oolag bau ele aon dayeg! Israel danab ah, ag aɗinu mauhkulag hetteb?

³² Da aɗinu anam oɗ madattem? Da laa mauhkkunu gamag ahak laa ii doottem. Ag oolag eɗun, bau ena dayeg!” Naɗi Yawe Nug anam awa atte.