Esekiel 16 - Nobonob Baibel

Jerusalem danab ah ag Kayak dimedappignu dottognu nai laa

¹ Amu Yawe Nug nuhig nai laa da meɗom. Nai am inam.

² “Danab bekka, na Jerusalem nug kobol digdig, da kobol amunu oolppa uuaknab doottem amu, nug kobol amu hette nug ippunitte!

³ Na nug amu ippunidna, na inam a! ‘Naɗi Yawe Nug Jerusalemnu inam atte. Jerusalem na am Kanan wanppan ah. Na mamen am Amo danab, na anin am Hit ah.

⁴ Na anin menuittom, haen amuppa laa nug na hiuɗin otaɗa, beɗun bappaidkkunu le ii laitta, goɗen yu ele kabolia, beɗun amuppa ii laitta, lamenppa ele ii itom.

⁵ Laa nug nahipnu na anitta, oo bodoetta le meeb, ehanidkkunu kobol ii dim lamittom amunu, laa nug nid bau menuak haennu kobol laippu laa, nug anam laa iinab heum. Iitta. Na anin mamen, laa oh ele ag na geɗidna amunu, laa nug awitta ukka, dad okkaippa buɗitte ukke, na aguppa daame.

⁶ Laa oh ag nahipnu anam heppig, amge da, Yawe, da laih gokkulnu uɗien, neekki ukke, na aguppa na tiinppa daan, buɗibɗib oinna heehe anidmi. Da uɗien, na anam anitten, na tiin qaɗeppa niieye amu, da, “Na bau daye!” ami.

⁷ Da anam awoya, da hei, na datta keeke eppak ena bette, amubia na ena menana daame. Da anam hei, na ena mena, na ah makkun enanagnab beme, neekkak enanag. Nahip huh am uunela mala, na ikkin uɗug elab neum. Da hei, na beɗun enanag anam beum, amge na bam iitta, beɗun miag ele daame.

⁸ Na anam ena mena dayeye, dimppa da baula laih gokkulnu na daameppa uɗie, da neekki ukke, na anitten, na elele ena mena, na danab aokkutnu elele daame anidmi. Da anam anitte, da na dahil ah daakkutnu tituanitten, bam iitta daamnanu lamen mette, da nahip danab daakkulnu dahil nai ɠagattagnab qetten mattii, na da ele ewau daagnihnu i nug tituanɗa nai qakkaɗa, na dahil aakku daame.’ ” Naɗi Yawe, Nug anam awa atte.

⁹ Amu Naɗi Yawe Nug tuɗitta atte. “Amu tatam da na le laitte, tiin ihai ukke, goɗen digdig ele beɗun laidmi.

¹⁰ Da lamen kobol kobol koitak ele awe metten, da baeg gaɗa ena ele na baenppa memi. Ge, da linen lamen hakkab awe metten, men doɗo okkai mein, laala ele awen mettami.

¹¹ Da na beɗunnu bala enanag mettami. Amuam da eɗi eppenppa mein, da kalele ele baatppa memi.

¹² Da amu heine, da gagah na noomppa mein, bid na dautppa ele mein, haɗ neekkak enanag ele na ikkinppa memi.

¹³ Anam amunu, nahip bala am gol, silwa eleppa hak dayom. Nahip lamen oh am enaib. Laa linen hakkabppa heppig. Laa am lamen laa, awaknu daden nob okkai ele. Amu laa am lamen kobol kobol koitak ele. Nahip ee am enanagib; plaua enanag, uppuh leppu, am olip goɗen ele. Da nahipnu anam hei, na ah iɗun tuqaknab bena daanna, na aakku ah okkai, kuin daame.

¹⁴ Na am ah iɗun tuqak ele, amu da keeke ena amu oh nahipnu hei, nahip iɗu tuqak qa oppiaawaknab ba daye, diig amunu danab ah wan atu ohppanu ag nahipnu nai dooppig.” Naɗi Yawe Nug anam awa atte.

¹⁵ Naɗi Yawe Nug anam awowa, Nug nai tuɗitta atte. “Da anam hei, na ah iɗun tuqaknab anam daame, amge na, ‘Da am ah iɗul tuqak ele,’ anana, na diig amunu uug laa ii anidmananu dabmena, na ele, ‘Da am ah okkai,’ anana, dabmak amuppanu na danab laala ele niiglagnu heehe, na ag ele anam heppig. Na aakku ib baag ah bena daame. Na danab aun laa nug oiyeye anidna hee, na nug ele niipiɗ. Na ah iɗun tuqak ele, na dahil daalom, amge na ah iɗun tuqak ele amunu, na anam hena, na laa dilag ah bia daame.

¹⁶ Lamen laala da mettami amu, na lamen amu aon, kayak hambuppuak mettid lag nakok amuppa bappaidna autna aona, appa na danab ele niippig. Kobol nau amu ii belo, amge na aakku heme. Kobol amuam danab ah oolagppa iinab daalo, amge na aakku heme.

¹⁷ Bala gol, silwa eleppa hak da na mettami amu, na bala amu aona, laa mettai, nug kayak hambuppuak dottolkad, danab beɗu bia, nug amu babaitta mette, na ag noolagppa dup nona binag mak hena,

¹⁸ na lamen kobol kobol koitak ele da na mettami, na lamen amu aon, kayak hambuppuak dottolkad amu takkaladme. Na goɗen da mettami aon, kayak hambuppuak mattanna, na kalu danab ile, muttuɗig enanag bette da mettami, na amu ele aon main, kayak hambuppuak amu mattame.

¹⁹ Da ee mettami, amu plaua enanag, olip goɗen, amu uppuh leppu ele, da ee amu na lakkutnu mettami, amge na aon, kalu danab ile muttuɗig enanag bette bia main, kayak hambuppuak amu mattame. Na anam aakku heme.” Naɗi Yawe Nug anam awa atte.

²⁰ Amu Naɗi Yawe, Nug tuɗitta atte. “Na nau amu aakku heme, amge na kobol nau amu eɗittak, amu laa ele heme. Na nahipad nid danab, nid ah ele, dahilnu menuadme amu, na nid amu diin main, kayak hambuppuak amu mattame.

²¹ Ge, na dahilad nid aqan main, kayak hambuppuak dottolkad amu mattame.

²² Na kobol digdig, da kobol amunu oolppa uuaknab doottem amu, na kobol amu oh henana, na ib baag ah ele daan, kobol nau amu ele henana, na yuɗ daanna, na bam iitta, beɗun miag dayeye, na tiin laanna niin, buɗibɗib oinna daame amu, na amunu nakok laa ii dabmeme. Iitta,” awa atte.

²³ Amu Naɗi Yawe, Nug tuɗitta atte. “Na hak nau amu oh henan daattem amunu, da nahipnu, gadonnab gadon, awe attem. Na nau hak amu oh henana amu,

²⁴ na eheɗ hak laa ele heme. Amuam na aabppanu haɗap ohppa na kobol nahip dim lamidkkutnu aben bappaidna, na appa kayak hambuppuak dilag mettid lag nakok ele bappaidme.

²⁵ Ge, aabnu ib oɗatle ohppa na kayak hambuppuak dilag mettid lag nakok buuadna, na iɗun tuqak daame amunu, na danab ippuanatte, ag na ele niiglagnu heegeg, na ag ele niippig. Na amu henan, amu tuɗid ele heehe, danab aun laa oiyeye, na nug ele niiglahnu amegppa ae, aa niipiɗ.

²⁶ Isip danab ag ahilag muɗippan laippu bia ag guguittak daatteb, ag hanhan ah ele niiglagnu dabmak aon oiyegeg amu, na ag ele niippig. Na amu henan, na nahip hak nau amu nakok laa ii uume. Iitta. Na nau hak nahip tuɗidna, okkai heme amunu, da oppoɗil beum.

²⁷ Na nau anam heme amunu, da bu mettai, laa ag uɗin, wan nahip laa aoppig. Da hei, Pilistia danab ag baubau awaknu hik qak danab daan oitteb amu, ag uɗieg, na ag waalagppa daame. Amu Pilistia danab ah ag gappai heeb baknu kobol nahipnu uɗa nak dooppig.

²⁸ Na anam daame, amge na danab ele niiglagnu dabmak am iinab uun, na hee, Asiria danab ele niippig. Na ag ele niippig, amge na elele ii doon,

²⁹ na hee, Babilon danab, ag am keeke laihnu awa dadennu mak danab amu, na ag ele niippig. Na amu heme, amge na elele ii doome. Iitta. Na kobol nau amu na tuɗidna hekkutnuib doome,” awa atte.

³⁰ Amu Naɗi Yawe Nug inam atte. “Na oot unuqagppa oɗe naɗi ele. Na hak nau hekkutnuib henana, na, ‘Aun laa da ib baag ah dayeye, dahil kobol dim lamidttem anidtte amu, amuam keeke hamu,’ dabmenan oinna, beɗun aɗi hekkunu hette amu, na hakib hettem.

³¹ Am laa amu, na aabppa ib oɗatle ohppa kobol nahip dim lamidkkutnu aben bappaidna, na aabppan haɗap ohppa ele kayak hambuppuak dilag mettid lag nakok ele heme, haen amuppa na danab ele niippig amu, na ib baag ah bia ag eppelagppanu men doɗo nakok laa ii aome. Iitta. Na ag ele hamu niippig. Na ib baag ah dilag nau hak amu aakku eɗidme!

³² Ah nug danab uuitta danab laa ele oittep amu, na ah anamnab! Na gamut ele niiglahnu uun, danab laa, na ii doyadttem ele niiglagnu oot hette.

³³ Ib baag ah ag ahilag hak amunu men doɗo aotteb, amge na laa laih ohppanu ag uɗin, na ele niiglagnu, na ag keeke ena, gol, silwa, keeke, na keeke amu ahilag daakkunu hamu madattem. Amuppa ag na ele niiglagnu na lokkumakppa eheɗ haknu ehanittak mattan, eeɗadttem.

³⁴ Nahip ib baag ah kobol am eɗuaknab aakku daatte. Danab ag na dim lamidna ii niitteb. Iitta. Na amu eɗuak hena, men doɗo ag mattae, ag uɗieg, na ele niitteb. Na ag ele niiglagnu men doɗo keeke ag madattem, amge ag na keeke ena laa ii medatteb,” awa atte.

³⁵ Anam amunu Jerusalem, na ib baag ah, na Yawenu nai doye!

³⁶ Naɗi Yawe, Nug inam atte. “Na en da mettami, na amuppa kobol eheɗ hekkutnu uɗat mettame. Na lamen uɗe, danab laala ele niippig. Na kayak hambuppuak dottolkad, da dottolkad amunu oolppa uuaknab doottem amu, na ag oh noolagppa dup nona binalag mattame. Na nahip nid aqan, kayak hambuppuak amu mattame.

³⁷ Na amu oh heme amunu da, Yawe, da danab oh na ag ele niippig, laa na ahilagnu oot mauhom, laa na ahilagnu nau ninig ele doome amu, da danab amu oh qagmaadppi, ag uɗin daappeg, da heppi, laa ag lamen nahip oh uɗappeg ukkeb, na ag noolagppa bam iitta, beɗun hamu daappe, ag na neekkidkkulag.

³⁸ Ah nug ewau pakkua gappai hak kobol hette amu, nug ɗo daatte bia bu aokkunu daatte; amu da ɗo atte bia nahip-ppa haknu akkul. Ao, ah nug laa qe mauhtte, nug ɗo daatte bia bu aokkun daatte; amu da ɗo atte bia nahip-ppa haknu akkul. Ɗo nug laa nug laa qe mauhtte, nug ele mauhkkun atte amunu, da nahip hak amunu da oppoɗil beeb dayeye, na eheɗ hemenu nob tutukku metten, da na mauhkkutnu akkul. Ao, ɗo nug ah nug ewau pakkua gappai hak kobol hette, nug mauhkkun atte amunu, da nahip hak amunu oo nauhak laa, oo nauhak amuam dahil dooi laa aomanuppa bette, oo nauhak amu beeb doyeye, da na mauhkkutnu akkul.

³⁹ Da anam hein, da heppi, na laa, na ag ele niippig amu, na ag eppelagppa daakkut. Na anam daappe, ag aben na nahip kobol amuppa hekkutnu bappaidme loppaɗadna, ag kayak hambuppuak dilag mettid lag nakok bappaidme ele, ag amu ele loppaɗadkkulag. Ag nahip lamen oh uɗappeg ukkeb, nahip bala ele aɗidna aoglag. Ag amu heppeg, na bam iitta, beɗun miag daan, bala laa ele iitta daakkut.

⁴⁰ Na anam daappe, laa ag na ele niippig ag heppeg, danab qagmen, hakib hetteb, danab amu ag uɗin, ag menppa oidppeg mauhppe, ag qep elabppa na beɗun otaɗppeg, naunau nekku.

⁴¹ Ag lag kuɗum, na appa eheɗ hekkutnu bappaidme amu, ag amu amotppeg eweb, ah laa kuɗumnab amelagppanab na bu mettaglag. Amu da heppi, na baula ib baag ah ii daamna. Na baula danab laa ag na ele niiglagnu men doɗo keeke ii mattamna.

⁴² Da amu oh hein malappi, oppoɗi bak dahil am bodoetteb, da nahipnu oo nauhak laa, oo nauhak amuam dahil dooi laa aomanuppa bette, oo nauhak amu be doomi, oo nauhak amu ele iitta mekku. Iitta meeb amu, da oolppa maɗoɗ dookkul, da oo nauhak baula ii doopa.

⁴³ Na yuɗ daame, ehanittak laa iitta ele daame, na nid ahin daanna, laa atognoidkkulagnu iitta ele amu, haen amuppa da na ehanidmi. Da anam hemi, amge na okkai mena, na dahil ehanittak amu ii dabmeme. Iitta. Na ii dabmenana, na kobol nau huanak hee, da oppoɗil beum. Na anam heme amu, da genab hak nau nahipnu bu elele medakkul. Amu na kobol digdig, da kobol amunu oolppa uuaknab doottem amu, na amu hena, na gappai heeb baknu kobol ele dim lamidme.” Naɗi Yawe, Nug anam awa atte.

⁴⁴ Amu Naɗi Yawe Nug atte. “Danab aun aɗi ag oiyak ehanittaknu nai tutu maditteb amu, ag oiyak ehanittaknu nai tutu imu nahipnu akkulag. ‘Aɗeg nug okkai ma, anig bia oitte,’ aon akkulag.

⁴⁵ Jerusalem, na amu, na anin bianab daattem. Na anin nug gamunu ena iinab doya, nid nuhikkud dilagnu ele anamib doyom. Nug anam he, na apan, makkep ele, aa ele aa gamultinu, nid ahilti dilagnu ele ena iinab doopiɗ, amu na aa hepiɗ, na anamnab aakku hettem. Na anin nug am Hit ah, na mamen nug Amo danab.

⁴⁶ Na apan am Samaria, nug nahipnu yawalti uɗitteppanu aɗekkud ele daappig. Na makkep am Sodom, nug nahipnu yau uɗitteppanu aɗekkud ele daappig.

⁴⁷ Amu na aa dim lamatna, kobol digdig, da kobol amunu oolppa uuaknab doottem amu, na oiyak, kobol ele amu aa hepiɗ bia aakkuib ii heme. Iitta. Na eheɗ hak nahip tuɗidna, kobol dubuttid naunab ele heme.

⁴⁸ Da genab bau daattem, genab amubia da na Jerusalem, da na amenppa attem. Na makkep Sodom, nug aɗekkud ele ag naunab nau, na, na aɗenad ele hetteb bia amu, ag anam ii heppig.” Naɗi Yawe Nug anam atte.

⁴⁹ Amu Naɗi Yawe Nug tuɗitta atte. “Jerusalem, na makkep Sodom, nug aɗekkud ele, ahilag hipunin am inam. Ag beɗuppa tak ah daan oinna, ag ee ge iitta lanan daanna, ag eheɗ heppignu uug laa ii doon, ag daɗek danab, amu laa ag keekenu tutu mak daappig ele ii ehanadppig.

⁵⁰ Ag dada ha laa eɗittaknu dabmak awak kobol hena, ag kobol digdig, da kobol amunu oolppa uuaknab doottem, ag kobol amu ele heppig amunu, da hei, ag padal meppig. Da hei, ag padal meeg, na amu anidna doottem.

⁵¹ Amu na apan Samaria, nug genab hipunin heum, amge nahip hipunin hak am nuhig eɗitta auta autanab aotte. Na apan, makkep ele aa kobol digdig, da kobol amunu oolppa uuaknab doottem, aa kobol amu hepiɗ, amge na kobol digdig, da kobol amunu oolppa uuaknab doottem, na kobol aa hepiɗ eɗitta auta autanab aotte ele, na kobol amu digdig heme. Aa nau hepiɗ; na naunab nau heme, gemu ele hettem amunu, danab laa, ag ahilag dabmakppa, ahilag neekkakppa amu, ag na makkep, na apan ele aa am ah ena bia, na am ah nau anidkkulag.

⁵² Danab ag na apan, makkep ele anatna, ‘Ah nau,’ alob, amge ag na anidna, ag ahilahnu, ‘Ah ena bia,’ appig amunu, na nahip hipunin uɗig wak naunu uɗa nak nau guittak ele doye! Nahip hipunin am naunab nau amunu, na apan, makkep ele aa am danab laa dilag neekkakppa nakok ah ena bia daattep, na am nauib daattem. Anam amunu, na hee, na apan, makkep ele aa ah ena bia danab dilag neekkakppa anat-tteb, diig amunu na uɗan naɗ! Na uɗa nak nau guittak ele doye!

⁵³ Anam, amge haen laa dimppa da heppi, Sodom, nug aɗekkud ele, Samaria, nug aɗekkud ele, ag eɗun, ena daaglag. Da anam hein, da nahipnu ele heppi, na eɗun ena daakkut.

⁵⁴ Amunu diig am, na eheɗ hak nahip-ppa aa oo mak nakok matame, na amunu uɗa nak nau guittak ele doon, na nahip hak nau oh elenu uɗa nak dookkut.

⁵⁵ Amu haen amuppa na, na aɗenad ele, na apan Samaria, nug aɗekkud ele, na makkep Sodom, nug aɗekkud ele amu, na ag ele oh ag anukka daappig bia eɗun ena daaglag.

⁵⁶ Jerusalem, na padal ii mak haenppa, haen na dada ah daan oinna, haen amuppa na ikki okkai hena, na makkep Sodom onig aon, danab laa amegppa akkutnu eheɗ doon, ii ame.

⁵⁷ Tatam danab ah ag nahip nau hak ii dooppig. Gemu ag dootteb. Gemu ag dootteb amunu, Edom danab ah, wan laalappan danab Edom guguittak daatteb, Pilistia danab ah, amu wan laalappan danab ah na Jerusalem, na talilidna daatteb amu, ag oh nahipnu ena iinab doon, aon aon nidatteb.

⁵⁸ Na gappai heeb baknu kobol dim lamidna, na kobol digdig, da kobol amunu oolppa uuaknab doottem amu, na kobol amu ele dim lamidme amunu, na amunu bu aokkut.” Yawe Nug anam atte.

⁵⁹ Amu Naɗi Yawe, Nug imu ele atte. “Jerusalem, da hei, da na ele i nug tituanɗa, nai qakkamuɗ. Na nahip nai amu ɠagattag qettan mattime, amge na nug tituana nai qakkak amu tippalme, amuppa na nai ɠagattag qettak nahipnu ena iinab doome. Anam amunu da bu elele medakkul.

⁶⁰ Na anam heme, amge haen na ah bau daame, haen amuppa da hei, i nug tituanɗa nai qakkamuɗ amu, da ihinih nug tituana nai qakkak amu daul ii atima. Da amu daul ii atieb, da heppi, i baula nug tituanɗa nai qakkanih, amu nai qakkak amuam hanhan daakku.

⁶¹ Da anam heppi, na nahip hak dabmena, na amunu uɗa nak dooppe, da heppi, na, na apan, makkep ele eɗun diiatkkut, amge aa haen amuppa, na apan, makkep ele aa ii daamya. Iitta. Aa na aɗenaɗ daaglah. Da amu hekkul, amge amu bekkunu nug tituana nai qakkak ihinihppa ii dayom. ⌊Iitta. Da dakka, da anam hekkul.⌋

⁶² Haen amuppa da heppi, i nug tituanɗa nai qakkagnih, amu haen amuppa da dahil nai ɠagattag qetten akkul amunu, na dookkut, da am Yawe.

⁶³ Amunu diig am, haen da nahip eheɗ hak ohnu nob nau dahil ehanittak okkaippa iitta mekkunu heppi elele metteb ⌊anidna⌋, na eheɗ huanak hemenu dabmenana, uɗanak nau doon, ⌊na oot eɗueb, da nahip hipunin uhuqen medappi, na uhuqak amu aon,⌋ na nahip hipuninnu baula madikkutnu oɗen ii oppatmana.” Naɗi Yawe Nug anam atte.