Esekiel 15 - Nobonob Baibel

Israel danab ah ag am muɗi, danab ah ag uɗat ii medatteb, ag am amubia

¹ Amu Yawe Nug nuhig nai laa da meɗom. Nai amu am inam

² “Danab bekka, muɗi laa eppegnu ad am atuppan ad ebekkud laa eɗidttete? Iitta.

³ Danab nug muɗi eppeg awa, kunup laa, keeke hekkunu elelete? Danab ag muɗi eppeg aon bappaidna, gililppa keeke, giɗo otulna, muɗi eppeg babaittak amu yaaeg daye, keeke amuppa aihttebte? Iitta.

⁴ Ele amu, danab nug aab eokkunu muɗi eppeg aab aɗuppa me, aab daug daug ewa mala, laih gamagppa daatte he, hin qette dayeb amu, nug muɗi eppeg amu uɗat aakku medakkunu elelete? Iitta.

⁵ Doyeg! Muɗi eppeg nauhak laa iitta ele daye, danab nug uɗat medakkunu iitta ele amunu, aab ewak dimppa, laa nug uɗat medakkunu elele iittanab iitta,” awa atte.

⁶ Anam amunu, Naɗi Yawe, Nug inam atte. “Da danab ah ag atuppan ad oolagppanu muɗi eppeg aab aɗuppa meppeg eokkunu ag mattami daatte, amubia da Israel danab ah Jerusalem daatteb eheɗ hadakkul.

⁷ Da ahilag hak amunu eheɗ doyeye, ool ii madapa. Ag aab aɗuppa guittak aoppig daatteb, amge ag aab aɗu laappa padal mekkulag. Da ahilag hak amunu eheɗ doyeye, ool ii madappi, ag laa ag dooglag, da am Yawe.

⁸ Israel danab ah ag da ippunadminu oo metta ii uuak kobol ii dim lamiɗtteb amunu, da heppi, Juda wan am hele-ettak daakku.” Naɗi Yawe Nug anam atte.