Esekiel 14 - Nobonob Baibel

Esekiel nug Israel danab ah ag eɗun, Kayak dim lamidkkulagnu amelagppa aum

¹ Amu deɗ laa Israel dilag ikki danab ag da, Esekiel, ag da gumiɗna uɗin, da noolppa heɗep nena daappig.

² Ag anam heɗep nena daaegeg, Yawe Nug nuhig nai da meɗom. Nai amuam inam.

³ “Danab bekka, danab imu ag kayak hambuppuak dim lamadkkulagnu dabmak ag oolag unuqagppa meppig daatte. Ag amu hena, ag kayak hambuppuak dottolkad, amuam keeke nau, danab he na qette amu, ag amu noolagppa dup nona binalag metteb. Ag anam hetteb amunu, da nai laa ag madakkulnu am enate?

⁴ Ag amu hetteb amunu, na dahil nai ag amelagppa inam appe doyeg! Naɗi Yawe Nug inam atte. ‘Israel danab laa nug kayak hambuppuak dim lamadkkunu dabmak nug ooppa meum daatte, nug kayak hambuppuak dottolkad, amuam keeke nau, danab he na qette amu, nug amu noolagppa dup noa binalag mette dayeb amu, nug amu haaha oiya, nug aha, dahil propet laa keeke laanu oɗ medakkunu gumitta gokku dayeb amu, da, Yawe, da dakka nuhig hipunin, amuam kayak hambuppuak dim lamadkkunu dabmak nug ooppa ma, amu noolagppa dup noa binag mak hette amu, da hipunin okkainab amu dabmein, da amunu nob elele medakkul.

⁵ Da Israel danab ah oh, ag da uuiɗna, kayak hambuppuak dim lamadtteb amu, ag dabmak amu uun, eɗun daib dim lamiɗkkulagnu, da anam hekkul,’ awa atte.

⁶ Anam amunu, Esekiel, na Israel danab ah oh amelagppa dahil nai inam appe doyeg! Naɗi Yawe Nug inam atte. ‘Ag oolag eɗueg! Ag kayak hambuppuak dottolkad binalag mak uuna, ag kobol digdig laa, da kobol amunu oolppa uuaknab doottem amu, ag kobol amu oh dimattan, daib dim lamiɗeg!

⁷ Aɗinu? Israel danab laa, o wan laihnu danab nug uɗia, Israel oolagppa daatte amu, amu laa nug nukka nug dahilnu nug awaitta dimeɗa, nug kayak hambuppuak dim lamadkkunu dabmak nug ooppa meum daatte, nug kayak hambuppuak dottolkad, amuam keeke nau, danab he na qette amu, nug amu noolagppa dup noa binalag mette dayeb, nug amu haaha oiya, nug aha, dahil propet laa keeke laanu oɗ medakkunu gumitta gokku dayeb amu, da, Yawe, da dakka nuhig hipunin dabmeinne, da amunu nob elele medakkul.

⁸ Da danab amu, da nuhig hak amunu eheɗ doyeye, ool ii metten ⌊heppi nauheb⌋, nuhigppa beum am laa dilag antte oo maittaknu keeke dayebeb, laa ag nug am nau bekkunu at daatte dabmekkulag. Da heppi, nug Israel oolagppanu geɗittak daakku. Da anam heppi amu, ag laa ag dooglag, da am Yawe.

⁹ Amu danab o ah laa nug anam propet laa gumitta ukka, ittag nai, oo eeɗaknu mattiebeb, propet amu nug dimppa aɗi bekkunu nai laa madikku dayeb amu, da Yawe, da nug amu hekkunu ib oo ii nepa. Da nuhig ib ii oo nepa amunu, nug anam eheɗ heeb, da heppi, nug nauha, nug dahil danab ah oolagppa baula ii daama.

¹⁰ Danab o ah laa anam propet toppa gotte, propet nug dahil nai tappe ne, danab o ah amu amegppa nai nob medatte ele, aa oh aakku beɗulahppa aab ele, amu da amunu nob elele elele madakkul.

¹¹ Da anam heppi, Israel danab ah ag baula da dimeɗan, kayak hambuppuak ii dim lamadmana. Da anam heppi, Israel danab ah baula hipunin digdig hena, da noolppa oolagppa dubuttid tak ele ii daamna. Ag dahilad danab ah daappeg, da ahilag Kayak daakkul.’ ” Naɗi Yawe Nug anam atte.

Israel ag eheɗ hak henana, ag ii uuppig amunu, ag bu aoglag

¹² Deɗ laa Yawe Nug nuhig nai da meɗom. Nai amuam inam.

¹³ “Danab bekka, wan laappan danab ah ag dahilnu oo metta ii uuak kobol ii dim lamidna, dahilppa hipunin hena, da uuiɗna, laa noobppa dup nona binag meppeg, da heppi, ag ee iitta daappeg, enug nau aqebeb, danab, ah, doɗ ele mauhkkulag dayeb amu,

¹⁴ danab ewam imu, Noa, Daniel, Job ele, danab ewam amu wan amuppa daaloblob, ag genab tutukku hak danab amunu, ag ii mauhmana, amge ag danab ah laa oh ehanadppeg, ag bau daaglagnu elele iitta.” Naɗi Yawe Nug anam awa atte.

¹⁵ Amu Naɗi Yawe, Nug atte. “Anamtai bekku, o wan amuppan danab ah eheɗ anam heppeg, da heppi, doɗ dakkuɗ nau ag wan amuppa oinna, danab, ah, nid ele aqappeg iitta meppeg, wan amu hele-ettak dayebeb, doɗ ag kuɗum daaglag amunu, danab laa nug wan amu tom laihnu ukka, tom laappa gokkunu elele iitta daakku dayeb amu,

¹⁶ da Naɗi Yawe, da genab bau daattem, genab amubia da inam attem. Genab tutukku hak danab ewam amu ag wan amuppa daaloblob, ag ag bekkalkad, aɗelkad ele ehanadppeg, bau daaglagnu elele iitta. Danab ewam amu ag akka bau ena daaglag, amge wan am hele-ettak daakku.

¹⁷ O iitta, wan amuppan danab ah ag eheɗ anam heppeg, da, ‘Kekeɗ ag uɗin, danab, ah, nid, doɗ ele qep elabppa aqappeg mauheg!’ appi, ag uɗin, da ib amuppa heppi, danab, ah, nid, doɗ ele aqappeg mauhkkulag dayeb amu,

¹⁸ da Naɗi Yawe, da genab bau daattem, genab amubia da inam attem. Genab tutukku hak danab ewam amu ag wan amuppa daaloblob, ag heppeg, ag bekkalkad aɗelkad ehanadppeg, bau daaglagnu elele iitta. Iitta. Danab ewam amu ag akka ag bau daaglag.

¹⁹ O da oppoɗil beeb heppi, oɗe nau danab kuɗum aqe mauhtteb ele wan amuppa danab ah aqeb, danab, ahilkad doɗ ele mauhkkulag dayeb amu,

²⁰ da Naɗi Yawe, da genab bau daattem, genab amubia da inam attem. Danab ewam amu, Noa, Daniel, Job ele, danab ewam amu ag wan amuppa daaloblob, ag ag bekkalkad aɗelkad ehanadppeg, bau daaglagnu elele iitta. Danab ewam amu ag genab tutukku hak danab amunu, ag ii mauhmana, amge ag laa amu ehanadppeg bau ii daamna.” Naɗi Yawe Nug anam atte.

²¹ Aɗinu? Naɗi Yawe Nug inam atte. “Bu mettak nau waɗele amu oolagppa laippu bekku dayeb am uug nau ele, amge da heppi, waɗele amu oh Israel danab ah aqadkku amu, amuam uug naunab nau. Bu mettak waɗele amuam ban, enug, doɗ nau, oɗe nau danab kuɗum aqe mauhtteb ele. Da heppi, bu mettak waɗele amu oh Israel danab ah, ahilkad doɗ ele ag mauhkkulagnu aqaglag.

²² Anam, amge da heppi, bekkalkad aɗelkad laib laib ag ii mauhmana. Ag ii mauhppeg, kekeɗ ag diin uɗieg, ag gemu ippa Babilon wanppa diia ukka laih me dayak danab ah daatteb amu, ag ahilagppa uɗiglag. Ag uɗippeg, ag ippa daatteb ag amu dilag hak anidppeg, ag uug naunab da hei, Jerusalem beumnu oolag mekku. Ge, ag uug naunab amu ohnu, ag oolag mekku.

²³ Ag amu dilag hak anidppeg, ag oolag mekku. Aɗinu? Ag dooglag, haen da aɗi keeke ahilagppa hemi amu, da amu oolagppa keeke laippu diig iittappa ii hemi.” Naɗi Yawe Nug anam awa atte.