Esekiel 13 - Nobonob Baibel

Propet hambuppuak ag nai genab iitta madippig

¹ Amu Yawe Nug nuhig nai laa da meɗom. Nai amuam inam.

² “Danab bekka, na propet hambuppuak Israel wanppa daan, propet nai hambuppuak maditteb amu, na uug naunab ahilagppa beeb anidkkulagnu propet nai appe doyeg! Ao, na danab amu, ag ahilag dabmakppanuib propet nai maditteb amu, na ag amelagppa, ‘Ag Yawenu nai doyeg!’ a!

³ Naɗi Yawe Nug inam atte. ‘Ag propet hambuppuak, ag dabmak tutukku iitta ele, ag akka ahilag dabmak dim lamidtteb, ag keeke laa da ii ippunadminu mattinna, da ag ippunadmi bia maditteb amu, ahilagnu am gadonnab gadon.

⁴ Ag Israel danab ah, ag ahilag propet am doɗ jakal, aab nauhomppa oitteb, ag amubia daatteb.

⁵ Ag Israel dilag propet, ag ahilag uɗat pehettak ii hetteb. Ag ⌊am propet hambuppuak,⌋ ag danab nug aabnu aɗ bappaidkkunu tituanak daatte, amge nug ii he, ban miag do, ban haen amuppa aabnu aɗppa aben laala nauha daatte, ag amubia henan daatteb. Ag propet hambuppuak, ag Israel danab ah ag Yawenu deɗ naɗippa ban daakku, ag ban amuppa ɠagattag daaglagnu, ag Israel dilag propet, ag ahilag uɗat pehettak ii heegeg, gemu ele ii hetteb.

⁶ Israel danab ah, ahilag propet hambuppuak ag tulegleg anidna, “Yawe mekkom,” atteb, amge amuam genab iitta; am tulegleg hambuppuak. Ao, ag eman hak ahilagppanu, “Imuam Yawenu nai,” atteb, amge amuam genab iitta; am emannu hambuppuak nai. Ag, “Yawe Nug inam atte,” atteb, amge da ag amu akkulagnu ii ami. Ag amu hetteb, amge ag hambuppun, “Ihinig nai am meu okku,” atteb.

⁷ Da Yawe, da ag propet hambuppuak, da ag amelagppa aɗitai laa ii ami, amge ag, “Yawe Nug atte,” atteb amu, amuam tulegleg hambuppuak iittate? Am emannu hambuppuak nai iittate?’ ” awa atte.

⁸ Anam amunu, Naɗi Yawe, Nug inam atte. “Ag propet hambuppuak, ag nai hambuppuak maditteb, ag tulegleg hambuppuakppanu atteb amunu, da ahilag hak amunu eheɗ doyeye ool ii madattem.

⁹ Da propet hambuppuak ag tulegleg hambuppuakppanu maditteb, ag emannu hambuppuak nai ele atteb amu, da ahilag hak amunu eheɗ doyeye ool ii madattem. Ag amu hetteb amunu, da heppi, ag Israel dilag okkai oolagppa baula ii daamna. Da heppi, ag onilkad am buk laa, Israel onilkad amuppa yaak daatte, ag onilkad amuppa ii daamna. Da heppi, Israel danab ah ag gona, diia ukka laih me dayak danab ah wan laappa daappeg ukkeb, eɗua uɗiak haen doob, propet hambuppuak ag eɗun ii uɗimna. Da anam heppi, ag ⌊Israel, ag⌋ dooglag, da am Naɗi Yawe.

¹⁰ Propet hambuppak ag dahil danab ah ulum nau mattanna, ag, ‘Maɗoɗ haen uɗiom daatte,’ atteb, amge maɗoɗ ii daama. Propet hambuppuak amu, ag am danab men awa, lagnu gilil hamu, simen iitta gai-iittanab he, laa gau hakkab teppu iitta ele, neekkakppa gilil ena daatte dabmak awaknu gililppa laidtte amu, ag propet hambuppuak ag laa gau amu laidtte bia hetteb.

¹¹ Ag hetteb amunu, na propet hambuppuak amelagppa appe doyeg! Ag gilil gai-iitta gau hakkab amuppa laidtteb, amge na qekku. Gu huan neebeb, ais doɗo ele hab waappanu huana neebeb, ulah huana ele uɗiebeb, na qekku.

¹² Gilil laa amubia na qeeb, danab ah ag, ‘Ehe, gau adeppa daatte? Gau amu gilil nakok laa ehanittomte?’ akkulag. Amu haen da heppi, ahilagppa anam bekku amu, danab ah ag ahilagnu, ahilag haknu ele anam iite akkulag,” awa atte.

¹³ Anam amunu, Naɗi Yawe Nug inam atte. “Da oppoɗil huan beum daye, da heppi, ulah huana uɗiebeb, da oo nauhak doye heppi, ais doɗo hab waappanu neebeb, gu ele huanak neebeb, Israel dilag hak aakku nauha autanab aokku.

¹⁴ Danab nug men gilil gauppaib bappaitta laidtte amu, ag propet hambuppuak ag amubia hetteb, amu da gilil amu heppi nauha autanab aokku. Da heppi, gilil amunu ukku am miag daakku. Gilil amu na qeeb, ag propet hambuppuak, ag ele nauhkkulag. Amu beeb, ag dooglag, da am Yawe.

¹⁵ Da oppoɗil beeb, da amu hekkul amunu, amuppa da heppi, gilil amu, danab ag gauppaib bappaidna laidppig ele oh nauhna autna aoppeg, da oppoɗil bak oug mekku. Da anam hewoya, da ag ⌊Israel, da ag⌋ amelagppa, ‘Gilil aakku iitta me, danab ag gauppaib bappaidppig amu, ag ele padal meppig.

¹⁶ Laa ag gauppaib bappaidppig am Israel dilag propet hambuppuak. Ag tulegleg hambuppuakppa Jerusalem am maɗoɗib daakkun anidna, ag aɗi bekkunu propet nai hambuppuak anana, “Jerusalem ippa ig maɗoɗib daagnig,” atteb, amge amuam genab iitta.’ ” Naɗi Yawe Nug anam awa atte.

Propet ah hambuppuak, ag hettoɗiakppa daaglag

¹⁷ Yawe Nug anam awowa, Nug nai tuɗitta aum. “Danab bekka, gemu Israel, nahipad danab ah, ag aɗelkad laala ag ahilag dabmakppanu aakkuib dimppa aɗi bekkunu nai mattinna, ‘Ig Kayaknu nai madittem,’ atteb. Ag amu attebnu amu, na ag neekkadna, uug naunab ahilagppa beeb anidkkulagnu propet nai mattinna,

¹⁸ na inam appe doyeg! Naɗi Yawe Nug inam atte. ‘Ag ah ag amu hena, ag baɗ mak kobol digdigppa danab ah laa, danab nug kakai uhuippa aotte, ag amubia danab ah laa diiglagnu hetteb amu, ahilagnu gadonnab gadon. Ag amu hebeppeg, danab ah kuɗum mauhkkulag, amge ag ah eheɗ hetteb ele, ag kobol amuppa bau ena daaglagte? Iitta!

¹⁹ Ag ah ag uɗat nau ahilag hekkulagnu aeg, danab ag bali aeg nakokib mattan, bret huppu laib laib ele mattaeg hetteb. Ag ah eheɗ hetteb ele ag keeke nakok amuppaib ag heeg, da onil oppiaawak ele dahilad danab ah laa dilag neekkakppa hamu bia daatte. Dahilad danab ag nai hambuppuak dooglagnu uug ii doon aotteb amunu, ag ah eheɗ amu hetteb ele, ag nai hambuppuak anam aegeg, danab mauhkkulagnu ii daappig ele ag mauhtteb; laa ag mauhkkulagnu elele amu, ag ii mauhtteb,’ ” awa atte.

²⁰ Ag amu hetteb amunu, Naɗi Yawe Nug inam ele ag ah amu hetteb amelagppa atte. “Da ahilag baɗ maknu keekenu ena iinab doottem. Keeke ag amuppa danab ai uhuippa aotte bia danab ah diitteb amu, da baɗ mak keeke ahilag amu eppelagppanu ɠagattag aɗatte aokkul. Da heppi, danab ah ag ai uhuippa daatte bia daatteb, da danab ah amu uhuqadkkul.

²¹ Da ag ah ag eman kobol hekkulagnu iɗulag haut-tteb ele amu, da lamen ag iɗulagppanu ɠagattag aɗe aoppi, da dahilad danab ah, ag eppelagppanu eɗuen diiadkkul. Da anam heppi, dahilad danab ah ag ag ah eheɗ hetteb, ag ahilag ɠagattag waappa ii daamna. Da amu heppi, ag dooglag, da am Yawe.

²² Da genab tutukku hak danab ah uug dooglagnu ii hei, ag ah eheɗ hetteb ele ag nai hambuppuak mattiegeg, genab tutukku hak danab ah ag kobol ena dim lamidkkulagnu uug doon oitteb. Ag ah ag eheɗ hetteb, ag anam henana, ag nau hak danab ag mauhmananu, ag oolag eɗueb, eɗun ena daaglagnu dabmak ii madatteb. Iitta! Ag tuɗidna, eheɗ hekkulagnu atteb.

²³ Ag amu hetteb amunu, da heppi, ag baula tulegleg genab iitta ii anidmana. Da heppi, ag eman hak kobol ii hemana. Da danab ah dahilad ag eppelagppanu diippi, ag ena daaglag. Da amu heppi, ag dooglag, da am Yawe,” awa atte.