Esekiel 12 - Nobonob Baibel

Esekiel nug Israel ag wan laappa diia ukka laih me dayak danab ah daaglagnu ippu hak heum

¹ Amu Yawe Nug nuhig nai laa da meɗom. Nai amuam inam.

² “Danab bekka, na nai tappe nak danab ah oolagppa daattem. Danab ah amu ag amelag ele, amge ag keeke ii anidtteb. Ag daulag ele, amge ag nai ii dootteb, Aɗinu? Ag am nai tappe nak danab ah daatteb.

³ Ag anam daatteb amunu, O danab bekka, danab ah amu ag uug naunab genab bekkunu daatte dooglagnu, na wan laappa gona, wan amuppa diia ukka laih me dayak danab dayaknu ⌊ippu hena⌋, na amunppa keeke na gona, appa daakkutnu aon gokkut ele battamppa inan, danab ah amu, ag na anidppeppeg, na daattemppanu ahan, na laih gokkut. Na anam heppe, ag dooglagtai, o iitta. Aɗinu? Ag am nai tappe nak danab ah daatteb.

⁴ Ag amunppa na anidppeppeg, na wan laappa diia ukka laih me dayak danab daakkutnu keeke battamppa inan aon, dimittim dona mekkut. Na hewona, na eɗun, na lautppa tena daakkut. Na anam daappe, uudoobob, Israel danab ah ag anidppeppeg, na laa ag wan laappa diia ukka laih me dayak danab ag daaglagnu gotteb bia na amubia gokkut.

⁵ Na ⌊ippu hak amu hena⌋ gokkutnu amu, na aɗppa giɗo buun, amuppa dimittim gona, na wan laappa diia ukka laih me dayak danab gona daakkutnu ⌊ippu hena,⌋ keeke maon gokkut. Israel danab ah ag na anidppeppeg, na amu hekkut.

⁶ Laa ag neekkidna daappeg, ⌊na ippu hak imu hena,⌋ na keeke aon gokkut ele amu, na amu gukkanppa maon, gatatu neebeb gokkut. Da hei, na uug naunab Israel danab ah dilagppa bekkun daattenu at daattem amunu, na gonana, na wan uuttem ele, na amu anidmananu na iɗun hautte!” Yawe Nug da amelppa anam aum.

⁷ Yawe Nug anam da amelppa anam haknunab aum amunu, da aakku amu hemi. Amunppa da keeke laib laib, danab nug wan laappa diia ukka laih me dayak danab daakkunu awa gokku amu, da keeke amu battamppa inen, dimittim awe doi, tueb me, da aɗ eppelppa buue, gatatu neene da keeke gukkalppa mein, laa ag aniɗegeg, da ⌊ippu hak hein⌋ gomi.

⁸ Da ⌊ippu hak amu hei⌋ ukke, wagɗe buttua Yawe Nug nuhig nai laa da meɗom. Nai amuam inam.

⁹ “Danab bekka, Israel danab ah, ag am nai tappe nak danab ah daatteb amu, ag na ⌊ippu hak⌋ heme, ag na amunu, ‘Na aɗi hettem?’ iite oɗ medappig.

¹⁰ Ag anam oɗ medappig amunu, na inam appe doyeg! Naɗi Yawe Nug inam atte. ‘Nai meunab ele imuam Israel danab dilag okkai Jerusalem daatte, amu Israel danab ah oh Israel wanppa daatteb ele, ag oh ahilag nai.’

¹¹ Na amu appe dooppeg, na imu ele appe doyeg! ‘Da Esekiel, da ⌊ippu hak⌋ hei anidppig amu, amuam ahilag at aakku, am anamnab ahilagppa bekku. Kekeɗ ag gona heppeg, ag wan laappa diia ukka laih me dayak danab ah daaglagnu, laa eppelagppa daan gokkulag.

¹² Amu Israel danab ah Israel wanppa daatteb dilag danab okkai, nug uudoobob nuhig keeke nug gugappa meeb, laa ag aabnu aɗppa giɗo buuppeg, nug giɗo amuppa doa, aab uua gokku. Nug wan uukkunu hette amu, nug wan amu anidmanu, nug iɗu hautkku.

¹³ Nug oolkkunu anam hekku, amge da uhui dahil meppi, nug amuppa tekku. Nug teeb, da Yawe, da heppi, kekeɗ ag omalna, Babilon wanppa, Kaldia danab daatteb, appa gokkulag. Ag omalna gona tekkulag, amge nug wan amu ii anidma. Nug appa mauhkku.

¹⁴ Da heppi, Israel dilag okkai amu, nuhikkud ehanittak, nuhikkud daup ele ag oolna, matatun gokkulag. Ag oolna gokkulag, amge da heppi, kekeɗ ag aqaglagnu lamadkkulag.

¹⁵ Da heppi, Israel danab ah ag wanppan wan laalappa daaglag. Ao, da heppi, ag atu digdigppa matatun gona daaglag. Ag anam daan, ag dooglag, da am Yawe.

¹⁶ Israel danab ah kuɗum mauhkkulag, amge da heppi, kekeɗ ag qep-ppa laib laib ii aqamna; da heppi, ag laib laib am enug aqeb ii mauhmana; da heppi, ag laib laib am oɗe nau danab kuɗum aqe mauhtteb aqeb, ii mauhmana. Da amu hekkulnu diig am, ag ii mauhkkulag ele ag wan laalappa gona daanna, ag kobol dubuttid nau ele digdig, da kobol amunu oolppa uuaknab doottem amu, ag kobol amu heppig amu, ag appan danab ah amelagppa ag kobol amu ii helobnu akkulagnu daan akkulag. Ag amu daan, ag dooglag, da am Yawe,’ ” awa aum.

¹⁷ Amu Yawe Nug nuhig nai laa da meɗom. Nai amuam inam.

¹⁸ “Danab bekka, na ee nahip lanana, na baɗan hahaɗe! Ao, na le oug lanan, na baɗak okkainab dooppe, beɗun huana hahaɗaɗ!

¹⁹ Na anam hena, na Israel danab ah Israel wanppa daatteb, na nai imu ag amelagppa inam appe doyeg! Naɗi Yawe, Nug danab ah Jerusalem appa, Israel wanppa ele daatteb amu, Nug ahilagnu inam atte. ‘Kekeɗ ag gona hebeppeg, ag baɗan, ee lakkulag. Ge, ag, “Uug imu iitta meeb, ig eɗut ena daagnig,” ag dabmak am ii aonna, le oug ahilag lakkulag. Aɗinu ag anam hekkulag? Danab amu oh Israel wanppa daatteb amu, ag laa guittak nau mauhnoak mettak kobol dim lamidtteb amunu, da heppi, kekeɗ ag gona, wan amunu keeke oh akkaglag; wan amu aakku nauha auta aokku.

²⁰ Kekeɗ ag heppeg, Israel dilag aab oh nauhaknab daaglag. Wan am hele-ettak daakku. Uug naunab amu beeb amu, ag Israel danab ah bau daatteb, ag dooglag, da am Yawe,’ ” awa aum.

Yawe Nug nai mattiom amu, nai amu genab meu okku

²¹ Amu Yawe Nug nai amu mattia mala, Nug da, Esekiel, Nug nuhig nai laa da meɗom. Nai amuam inam.

²² “Danab bekka, Israel wanppa danab ah ag oiyak ehanittaknu nai tutu bia laa anan, inam atteb. ‘Haen elab ugekke, propet nai laa meu ii otte,’ Ag anam atteb, amge ag eheɗ henan anam maditteb.

²³ Ag anam maditteb amunu, na inam ag amelagppa appe doyeg! Naɗi Yawe Nug inam atte. ‘Ag oiyak ehanittaknu nai tutu bia laa amu maditteb amu, da heppi, ag nai amu Israel wan ooppa baula iinab mattimna.’ Amunu, na ag amelagppa anam awona, na imu ele appe doyeg! ‘Haen elab iitta amu, aɗi keeke da tuleglegppa propet dahil ippunadmi amu, da heppi, ippunittak oh am meu okku.’

²⁴ Aɗinu? Da heppi, nai oh meu ob amu, Israel danab laa nug keeke hambuppuak, da tuleglegppa keeke amu ii ippunidmi amu, nug, ‘Da tuleglegppa amu anidmi,’ ii ama. O danab laa nug laa ag nuhignu oo eeɗaknu ittag nai madippig amunu, nug ‘Uuppe, da dahil eman kobolppa keeke oh enaib daakkunu doomi,’ Israel danab ah amelagppa ii ama.

²⁵ Haen amuppa laa nug anam ii hema, amge da, Yawe, da aɗi hekkulnu hettem amu, da anam appi, paha meu okku, diig amunu ag gemu Israel wanppa daatteb, ag nai tappe nak danab ah amu, ag wanppa bau dayak haen ahilagppa da aɗi attem amu, da heppi, meu okku. Da Naɗi Yawe, da anam attem,” awa aum.

²⁶ Yawe Nug anam awowa, Nug nuhig nai laa da meɗom. Nai amuam inam.

²⁷ “Danab bekka, Israel danab ah Israel wanppa daatteb amu, ag inam atteb. ‘Esekiel nug tuleglegppa keeke anidtte amu, keeke amu oh paha ii bema. Iitta. Maɗ kuɗum uueb meu okku. Ge, maɗ kuɗumnab ukkeb, dimppa aɗi bekkunu nai amu ana bekku,’ aon atteb.

²⁸ Ag amu atteb amunu, na ag amelagppa appe doyeg! Naɗi Yawe Nug inam atte. ‘Da heppi, aɗi nai da bekkunu mattimi am ana paha bekku. Haen elab ukkeb ii bema. Iitta. Paha bekku. Da aɗi heppi bekkunu ami amu, paha meu okku!’ ” Naɗi Yawe Nug anam atte.