Esekiel 11 - Nobonob Baibel

Esekiel nug Juda dilag okkai Jerusalem daappig amelagppa, “Ag eheɗ hetteb,” aum

¹ Engel okkai-kerubim wil ele ag anam heeg, tuleglegppa Ouɗi Nug humiɗa, Yawe laugnu aɗnu od laa, od amu aam bedeppa daatte amu, Nug ukka, appa meiɗom. Meiɗe, da neekki ukke, danab 25 od amu oɗeppa daaegeg anadmi. Danab 25 amu oolagppa da Asur bekka Jasania, Benaia bekka Pelatia ele anatmi. Danab aɗit amu aa am Juda dilag danab okkai.

² Da danab oh anatti amu, Yawe Nug da amelppa aum. “Danab bekka, danab imu ag eheɗ hekkulagnu maittak aonna, ag danab ah aab okkai imuppa daatteb ele ulum nau madatteb.

³ Ag atteb. ‘Ig lag bau hekkunignu haen am miag. Danab doɗ teppu aab aɗuppa ewewe, ewa koɗohimanu ha, waappa battie, ii koɗohitte amubia ig aab imuppa ena daagnig; ii nauhmata. Ge, aab okkai imuam waa bia daatte, ig am doɗ teppu bia daattem amunu, ig ena daagnig,’ aon atteb.

⁴ Ag anam atteb amunu, danab bekka, na uug naunab ahilagppa beeb anidkkulagnu propet nai appe doyeg! Ao, na ag amelagppa propet nai a!” awa aum.

⁵ Yawe Nug anam a, nuhig Ouɗi Nug dahilppa uɗie, Yawe Nug da nuhig nai inam akkulnu aum. “Yawe Nug inam atte. Ag Israel danab ah ag anam hambuppun atteb, amge da ahilag dabmakppa aɗi daatte am da doottem.

⁶ Ag danab kuɗum aab okkai imuppa aqaeg mauheg, aab imuam mauhak gaɗalag ambak daatte,” awa atte.

⁷ Anam daatte amunu, Naɗi Yawe Nug inam atte. “Ag laa ag eheɗ henan daatteb, ag teppu waa ooppa ena daatte bia ii daamna. Aab okkai imuam ahilagnu waa bia ii daama. Iitta. Laa ag aqaeg mauhppig gaɗalag, ag beɗulag am teppu daatte, aab imuam ahilag waa bia daatte, amge ag eheɗ hetteb, ahilagnu da heppi, kekeɗ ag uɗin, ippanu lamadkkulag.

⁸ Ag Israel ag kekeɗ qep elab ele uɗin eɗadmananu baɗatteb amu, da heppi, kekeɗ ag anam hekkulag.” Naɗi Yawe, Nug anam atte.

⁹ Yawe Nug anam ana, Nug imu ele atte. “Da heppi, ag aab okkai imuppanu dimittim goppeg, wan laihnu danab ag ag aɗualadna, dahil bu mettak mattaglag.

¹⁰ Ag Israel amu, kekeɗ ag qep elabppa ag aqappeg mauhkkulag. Da heppi, kekeɗ ag, ag ahilag wan tomppa ag bu mattaglag. Ag amu heppeg, ag dooglag, da am Yawe.

¹¹ Ag aab okkai imu ooppa doɗ teppu waa ooppa ii nauhtte, ag amubia aab imuppa ena ii daamna. Da ami amubia da heppi, ahilag wan tomppa kekeɗ ag bu mattaglag.

¹² Da amu heppi, ag dooglag, da am Yawe. Ag dahil ɗo iɗu iɗu ii dabmettan, ii dim lamidppig daatteb, amge ag wan laala, ag Jerusalem talilidna daatteb, ag ahilag ɗo dim lamidppig, gemu ele hetteb,” awa aum.

¹³ Yawe Nug tuleglegppa da amelppa anam akkulnu aum, da propet nai amu mattiyi, Benaia bekka Pelatia nug mauhom. Nug mauhe, da laippun gatel qaun oin, gomelen, iɗul wanppa mein, da baal okkaippa emi. “O Naɗi Yawe, na heppe, Israel danab ah oɗo yaak daatteb oh mauhkkulagte?” awe emi.

¹⁴ Amu Yawe Nug nuhig nai laa da meɗom. Nai amuam inam.

¹⁵ “Danab bekka, na awanad amapad, ge, na awanad amapad, na ag ele tiilag laippu, amu Israel danab ah laa ele, ag oh Babilon wanppa diia ukka laih me dayak danab ah daatteb amu, Jerusalem danab ah ag ahilag ohnu inam atteb. ‘Yawe Nug he, ag umanab gona daatteb, ag Yawe guguittak ii daatteb. Yawe Nug wan imu ihinig daakkunu mekkom,’ aon atteb.

Yawe Nug heeb, Israel ag eɗun ag wanelagppa daaglag

¹⁶ Ag anam atteb amunu, na inam Jerusalem danab ah amelagppa appe doyeg! Naɗi Yawe Nug inam atte. ‘Am genab, da hei, ag umanab gona, wan laalappa daatteb. Ao, da hei, ag matatun gona, wan laalappa daatteb. Amge haen gamag imunu appa ag adeppa adeppa daatteb amu, danab mettid lag dahilppa ena daatte, amubia dahil ehanittakppa ag appa nakok ena daatteb,’ awa atte.

¹⁷ Jerusalem danab ah ag anam atteb amunu, na laa ag diia ukka laih me dayak danab ah daatteb, na ag amelagppa inam appe doyeg! Naɗi Yawe Nug inam atte. ‘Da heppi, ag wan laalappanu eɗun, ahilag wanppa uɗiglag. Ao, da heppi, ag wan laalappa da hei, ag appa matatun gona daatteb amu, da heppi, ag eɗun uɗin, ahilag wanppa daaglag. Da heppi, Israel wan anukka ahilagnu dayom amu, ag wan amuppa eɗun daaglag,’ awa atte.

¹⁸ Israel ag eɗun uɗin daanna, ag kayak hambuppuak dottolkad, dottolkad amuam uɗig wak ele, da dottolkad amunu oolppa uuaknab doottem amu, ag dottolkad amu oh heppeg, ii daamna.

¹⁹ Ag amu heppeg, da heppi, ag daib dim lamiɗkkulagnu oolag daakku. Da dabmak bau ag oolagppa mekkul. Da heppi, oo alag ahilagppa ii daama. Iitta! Da heppi, ag daib dim lamiɗkkulagnu oolag daakku.

²⁰ Ag dahil ɗo iɗu iɗu pehettak dabmettan dim lamidkkulag. Ag dahil danab ah daappeg, da ahilag Kayak daakkul.

²¹ Amge laa ag kayak hambuppuak dottolag, dottolkad amu ag uɗig wak ele, da dottolkad amunu uuaknab doottem amu, laa ag dottolkad amu dim lamidna, binag metteb ele amu, da heppi, ag uug nau dooglag. Ahilag hak attem daatte amu, da heppi, ag amunu bu elele aoglag. Naɗi Yawe Nug anam atte.”

Kayak binag amahlak oppiaawak ele am Jerusalemnu aha ukkom

²² Yawe Nug anam a, engel okkai-kerubim ag attan tekkulagnu haulkad humaeg, wil heqolagppa daappig. Amu Israel dilag Kayaknu binag amahlak oppiaawak ele, amuam engel okkai-kerubim attan boppala dayom

²³ Anam amu, Yawenu binag amahlak oppiaawak ele aha, Jerusalemnu qauko laih aam bedeppa daatte, qauko amu ikki attan ta dayom.

²⁴ Anam daye, Yawenu Ouɗi Nug humiɗa, Nug tulegleg da meɗom amu Nug tulegleg amuppa omaiɗa ukke, Israel danab ah ag Babilon wanppa diia ukka laih me dayak danab ah daappig, Kayak Ouɗi Nug da ag daappigppa, appa meiɗom. Nug anam he, tulegleg Nug da meɗom amu, tulegleg amu aakku batom.

²⁵ Nug appa meiɗe, da keeke oh Yawe Nug da tuleglegppa ippuniɗom ele, da amu oh Israel danab ah ag Babilon wanppa diia ukka laih me dayak danab ah daappig, da ag amelagppa amu oh mattimi.