Esekiel 10 - Nobonob Baibel

Kayaknu binag amahlak oppiaawak ele Yawenu mettid lag uua ukkom

¹ ⌊Amu tuleglegppa⌋ da Esekiel, da neekki ukke, da keeke tappiɗ naɗi okkai, danab nug eɗi noum bia, da matu anidmi amu, da keeke amu anidmi. Keeke amuam engel okkai-kerubim attan dayom, amu keeke amu attan keeke laa, sia king men sapaiappa hak bia aakku dayom.

² Da amu anitti, Yawe Nug danab linen lamen takkom ele amegppa aum. “Na wil engel okkai-kerubim waappa daatteb amu, na wil amu daattebppa oinna, aab ottag amuppanu eppen laih laihppa appun, tauɗppe, aab okkai imuppa laih laih ohppa ukkeg!” awa aum. Yawe Nug anam a, da neekki ukke daaiyi, danab nug amu hekkunu wil daappigppa ukkom.

³ Amu engel okkai-kerubim ag Kayaknu mettid lag, amuppanu mana mettak danab dilag haɗap-ppa, Kayaknu mettid lag heqo laih, yau uɗitteppanu daaegeg, danab amu nug ag daappigppa ukkom. Haen amuppa amu, bud haɗap amunu aɗ ooppa ambeum.

⁴ Bud aben amu ambe, Yawenu binag amahlak oppiaawak ele engel okkai-kerubim daye attan boppala dayom amu, am appanu aha, Kayaknu mettid lagnu od uguppa ukka daye, bud Kayaknu mettid lag ambe, Kayaknu binag amahlak oppiaawak elenu amahlak okkai amahalele, mana mettak danab dilag haɗap-ppa amahlak okkai dayom.

⁵ Amu engel okkai-kerubim haulkad oqotti am oqotti okkai. Danab ag Israel danab dilag haɗap-ppa daappig, ag oqotti amu dooglagnu elele. Oqotti amuam Kayak Nukka Ɠagattag Oh Ele nai maditte, oqotti okkai amubia.

⁶ Amu haen Yawe Nug danab linen lamen takkom ele haknunab amegppa, “Wil engel okkai-kerubim ele daatteb amu, aab ottag wil daattebppa daatte, amu na wana, aab amu laa awe!” a amu, danab amu nug wana ukka, wil laa daugppa dayom.

^7-8 Danab amu nug anam daye, engel okkai-kerubim haulkad waappa am keeke danab ebekuɗ bia aakku dayom, amu engel okkai-kerubim laa nug eppeg bahia, aab ottag ag daappigppa dayom amu, nug appanu aab ottag laala aɗa, danab linen lamen takkom ele eppegppa me, danab amu nug awa, dimittim ukkom.

⁹ Amu engel okkai-kerubim heqolkadppa wil waɗele daappig. Engel okkai-kerubim laippu heqoppa wil laippu dayom; engel okkai-kerubim laa heqoppa wil laa dayom; anam daappig. Wil amu ag men krisolait amemɗiag aotte, amubia ag amemɗiag aotteb.

¹⁰ Wil amu, anttak ahilag am ag waɗele oh am iɗu laippunab, piɗe piɗe iitta. Amu babaittak ahilag am inam. Wil laa tutukku daye, wil laa amu ooppa emaitak dayom.

¹¹ Engel okkai-kerubim waɗele amu ag iɗulag ele waɗele, iɗu atten noob aweb gokkulagnu daye, ag amuppa ukkakib goppig. Aɗinu? Wil anuqak daya, ukkaknu dayom amu, laa oh nug dim lamidna goppig; ag ii itoɗippig, tutukku ukkakib goppig.

¹² Amu ag beɗulag oh, gomelag eppelag, haulag ele, ag beɗulag oh am neekkaknu ameg kuɗum ele. Wil waɗele ele anamib.

¹³ Ag anam daaegeg, laa wilnu “Pahanab itoɗiaknu wil!” aum.

¹⁴ Amu engel okkai-kerubim anen anen oh ag iɗulag waɗele. Iɗu laa am engel okkai-kerubim iɗu, laa am danab iɗu, laa am laion iɗu, aria laa am ai igel iɗu.

¹⁵ Anam amu, engel okkai-kerubim ag aakku ahan, attan tekkulagnu teppig. Engel okkai-kerubim amuam ag engel okkai-kerubim waɗele, da le Kebar appa anadmi, ag amuib aakku.

¹⁶ Haen engel okkai-kerubim ag laih gokkulagnu ahappig amu, wil ag ele gokkulagnu ahappig. Engel okkai-kerubim ag hagagaɗna, laih gokkulagnu haulkad human ukkaegeg, wil ag heqolagppa daanna, ii laih goppig. Iitta.

¹⁷ Engel okkai-kerubim ag dayakib daaegeg, wil ele dayakib daappig. Haen engel okkai-kerubim ag attan tekkulagnu teeg, wil ele oh teppig. Aɗinu? Ouɗi ⌊ulum mattom ele⌋ nug wil waɗeleppa dayom.

¹⁸ Amu da ⌊tuleglegppa⌋ neekki ukke, Yawenu binag amahlak oppiaawak ele Kayaknu mettid lag od uguppanu aha ta, engel okkai-kerubim attan, boppala appa dayom.

¹⁹ Anam be, da neekki ukke, engel okkai-kerubim ag haulkad human, ahan teppig. Ag teegeg amu, wil ag ele oh goppig. Ag gona, Yawenu mettid lagnu aɗnu od laa, od amu aam bedeppa daatte amu, ag amu attan tena daappig. Ag anam daaegeg, Israel dilag Kayaknu binag amahlak oppiaawak ele, amuam engel okkai-kerubim attan boppala dayom.

²⁰ Engel okkai-kerubim amu, ag am engel okkai-kerubim waɗele, da le Kebar appa Israel dilag Kayak waappa daaegeg anadmi aakku. Amu da gemu antten, da doomi, ag am engel okkai-kerubim.

²¹ Ag anen anen oh ag am iɗulag waɗele, haulag ele waɗele. Ag haulag waappa amu keeke laa danab ebekuɗ bia ele.

²² Da le Kebar appa engel okkai-kerubim waɗele amu anadmi ele, agib iikku anadmi. Ag imu ele oh iɗulag laippu. Ag anen anen iɗulkad waɗele ele, amu iɗu atten neekkakka ukkaknu dayom amu, ag amunu tutukku ukkakib goppig.