Esekiel 1 - Nobonob Baibel

Yawe Nug he, Esekiel nug Yawenu binag amahlak oppiaawak ele anttom

^1-3 Jehoiakin nug Juda dilag king daya, eheɗ he, Babilon dilag king Nebukatnesar, nuhikkud daup ele ag gona, Juda eɗadna, Nebukatnesar nug Jehoiakin awa, nug awa ukka laih me dayak danab daakkunu Babilon uɗie dayeye, maɗ waɗele uue, maɗ tanig elenu kalam tanig eleppa Kayak Nug digma, tulegleg imu Esekiel ippunitte anttom. Esekiel nug am Busi bekka, Nug am mana mettak danab. Am nug Babilon wanppa le Kebar daugppa dayeye, Kayak Nug he, nug tulegleg antta, Yawenu nai doyom. Appa Yawe Nug Esekiel, uɗat nuhig hekkunu aɗom. Amunu nai imuam Propet Esekielnu nai. Da Esekiel, da maɗ 30 ele daye, maɗ amuppa kalam waɗele, deɗ tanig eleppa da kekeɗ heeg, Israel danab ah ag Babilon wanppa le Kebar daugppa diia ukka laih me dayak danab ah daappig, da ag oolagppa daaiyi, Kayak hab matule, da digmein, tulegleg laala Kayak ippuniɗeɗe anadmi.

⁴ Amu tulegleg digmak amu, da neekki ukke, da yawalti uɗitteppanu uug megakkun ulah naɗi uɗieye anidmi. Ulah amu he, lombig naɗi okkai ele, lombig amu uɗieye, lombig amuppa amemɗi awewe, lombig amu talilittak amahlak naɗi okkai ele dayom. Amu lombig gamagppa aab ewak laa dayom. Aab gamagppanu neekkak am aen eheɗ gakkaɗak, le ma, amahaltte bia dayom.

⁵ Amu aab amuppa engel okkai-kerubim waɗele daappig. Danab dilag neekkakppa amu, ag beɗulag am nakok danab beɗulag bia,

⁶ amge engel okkai-kerubim amu ag anen anen iɗulag waɗele, haulag ele waɗele.

⁷ Engel okkai-kerubim amu baelag tuɗippan ukka, baelag baag batak am tutukku; kaliak iitta. Baelag baag waappa am makau nag baeg bia; baelag amunu anttak am bras amahaltte bia.

⁸ Haulkad waɗele laih laih ohppa daappig amu, haulkad waappa am eppelkad, danab eppeg bia, daappig. Engel okkai-kerubim waɗele amu oh ag anen anen iɗulag waɗele, haulag ele waɗele.

⁹ Ag oh iɗulag, haulag anam ele, amu engel okkai-kerubim waɗele amu oh ag daanna, ag anen anen lailkad haulag noob yaappig. Ag laih gokkulagnu goppig am, ag oh goppig. Ag gonana, laih adeppa adeppa gokkulagnu heppig, ag beɗulag ii itoɗin goppig. Iitta. Ag anen anen iɗulkad waɗele ele, amu iɗu atten neekkakka ukkaknu dayom amu, ag anam tutukku ukkakib goppig.

¹⁰ Amu engel okkai-kerubim waɗele amu, ag anen anen iɗulag amu inam. Ag oh iɗulag laa am danab iɗu. Amu iɗu laih naɗiap-ppa dayom am laion iɗu, laa nanehppa dayom am makau okkai ebehi ele iɗu. Aria, iɗulag dimugppa daappig oh am ai igel iɗu daappig.

¹¹ Ag iɗulag anam daappig, amu ag haulagnu, ag anen anen haulag aɗit taiettak daaeheh, noolah am laikuɗ haulah aɗit noolah yaapiɗ. Aria, ag anen anen haulag aɗit laappa ag beɗulag tonappig.

¹² Engel okkai-kerubim waɗele amu ag adeppa adeppa gokkulagnu goppig amu, ag tutukku goppig. Ouɗi ⌊ulum mattom ele,⌋ nug adeppa adeppa ukkom amu, ag ele appaib goppig. Amu ag gonana, ag anen anen ag laih laih gokkulagnu gonana, ag beɗulag itoɗinna ii goppig. Iitta. Ag anen anen iɗulkad waɗele ele, amu iɗu atten neekkakka ukkaknu dayom amu, ag anam tutukku ukkakib goppig.

¹³ Danab nug engel okkai-kerubim waɗele amu antta, nug ag beɗulag am aab eotte, ottag bia, o hul eotte, amubia anidkku. Amu engel okkai-kerubim waɗele amu oolagppa keeke laa aab aɗu dittiak bia dayom. Am aab aɗu amu laa guguitta ukka, eɗua laa guguitta uɗia, anam haaha, ag oh oolagppa oiyom. Aab aɗu diditte amuam dittieye, amahlak okkainab amahlom. Amemɗi amu aab aɗu diditte, amuppanu ya ukkom.

¹⁴ Amemɗi anam ya ukkom amu, engel okkai-kerubim waɗele ag ele amemɗi pahanab ya gotte, ag amubia ele laih laih paha goppig.

¹⁵ Engel okkai-kerubim waɗele ag anen anen oh iɗulag waɗele amu, da neekki ukke, engel amu anattette, da engel anen anen heqolagppa wil wan qaɗe aɗom ele anadmi.

¹⁶ Danab nug wil amu andatta amu, nug inam anidkku. Ag men krisolait amemɗiag aotte, amubia ag amemɗiag aotteb. Wil waɗele oh am iɗu laippunab; piɗe piɗe iitta. Amu babaittak ahilag am inam. Wil anen anen am wil aɗit ele; wil laa tutukku daye, laa amu ooppa emaitak dayom.

¹⁷ Engel okkai-kerubim waɗele amu ag iɗulag ele waɗele, iɗu atten noob aweb gokkulagnu he, ag ukkakib goppig amu, ag appa ukkaegeg, wil amu ele itoɗia, laih ukkak iitta ele, ukkakib goppig.

¹⁸ Wil anen anen ohnu ring am okkai okkai, danab nug antta, nug ebehi oh bodoetta le mekku. Aɗinu? Wil waɗele amu ohnu ring anen anen taliliak ohppa neekkaknu ameg kuɗum daappig.

¹⁹ Haen engel okkai-kerubim waɗele amu ag laih goppig amu, wil engel okkai-kerubim anen anen heqolagppa amu oh ele laippu goppig. Haen engel okkai-kerubim waɗele amu ag wanppanu ahan teppig amu, wil ele oh laippu teppig.

²⁰ Ouɗi ⌊ulum mattom ele,⌋ nug adeppa adeppa ukkom amu, engel okkai-kerubim waɗele ag ele oh appa goppig. Amu ag ukkaegeg, wil ele ahaeg, oh goppig. Aɗinu? Ouɗi ⌊ulum mattom ele,⌋ nug wil waɗeleppa dayom.

²¹ Ouɗi engel okkai-kerubim waɗele amu ⌊ulum mattom ele⌋ wil waɗeleppa dayom amunu, engel okkai-kerubim waɗele amu ag ahan ukkaegeg, wil waɗele ag ele ahan goppig. Haen engel okkai-kerubim waɗele ag ii ukkaeg, wil waɗele ag ele ii goppig; ag daappig. Haen engel okkai-kerubim waɗele amu ag wanppanu ahan, attan teeg, wil ele wanppanu ahan, attan teppig.

²² Amu engel okkai-kerubim waɗele amu ikkilagppa attan keeke laa boppalatak dayom. Danab nug keeke amu andatta, nug tappiɗ naɗi okkai, danab nug eɗi no, bitob attan daatte bia anidkku. Neekkaknu, keeke amuam glas laa amahlak huanak amemɗiag aotte, anam bia dayom. Danab nug amu anidkku amu, nug ebehi oh bodoetta le mekku.

²³ Amu tappiɗ diig laa amu waappa engel okkai-kerubim waɗele amu ag daanna, ag anen anen ag haulag aɗit human taietteg ukka, laa haug noob am ukka laikuɗ haulah noob qal mettak dayom. Ag anen anen haulag aɗit laappa ag beɗulag tonadppig.

²⁴ Amu haen engel okkai-kerubim waɗele amu ag ahan, laih goppig amu, ag haulag heeg, da oqotti naɗi doomi. Oqotti amuam le ui naɗi, oqotti amubia, o Laa Nukka Ɠagattag Oh Ele ette, amubia, o ban daup huanak ag ban henana, muttub huana qetteb, amubia. Ag ukkaegeg, oqotti anam doomi, amge ag toettak daappig, haen amuppa ag haulag qena, honap meppig.

²⁵ Amu ag haulag qena, honap mena daaegeg, da baag laa doomi. Baag amuam tappiɗ diig laa attannu ne, da doomi.

²⁶ Amu da neekki te, tappiɗ daatte, amu attan amuppa da keeke laa sia king bia daye anidmi. Sia amuam men sapaia, anttak enanag ele, amuppa hak. Sia amuam tappiɗ diig laa miag guguittak iitta, attannab dayom, am da sia amuppa laa, Nug beɗu amu danab beɗu bia, da nug sia amuppa heɗep na dayeye anidmi.

²⁷ Da nug anidmi, am beɗu imuag batak ukka, igippa tak am aen gakkaɗaknab, amahaltte ele, beɗu laih amuam anam bia daye anidmi; am beɗu laih amu ooppa aab ewawa daatte bia dayom. Am imuag ukka baeg batak amu aab ewak bia dayeye anidmi. Amahlak okkai naɗinab laa nug talilitta dayom.

²⁸ Amahlak okkai naɗinab, amuam kaala iɗu iɗu, gu na male, di apinak bette, amubia. Amahlak okkai, kaala iɗu iɗu, amuam Yawenu binag amahlak oppiaawak elenu neekkak, am amubia. Haen da amu antten amu, da laippun gatel qaun oin, gomelen, iɗul wanppa mein, da laa nai mattie doomi.