Epesus 6 - Nobonob Baibel

Nid naunau anilkad mamelkad ele dilag nai

¹ Nid naunau, ag Naɗinu nai dabmenana, ag anilkad mamelkad oɗelag dim lamitteg! Kobol amuam tutukku.

² Kayak naippa amunu yaak laa daatte am inam. “Na mamen, anin ele binalah mate!” Kayak Nug ɗo 10 maattom amu, ɗo amu oolagppa tatam maattom amu, Nug danab ag dim lamidna, keeke ena aoglagnu nai qakka ii aum. Iitta. Ɗo imuppaib Kayak Nug tatam anam heum.

³ Kayak nai ɠagattag qetta aum am inam. “Nahip-ppa ena, elele ba daakkunu, na haen elab wanppa daakkutnu amu, na ɗo amu atte bia hekkut.” Kayak nai anam awa atte.

⁴ Am nid mamelkad ag bekkalkad aɗelkad oppoɗi bak doomnanu ag tolittak tutukkuib matteg! Tolittak nau aib madappig. Iitta. Ag Naɗi nuhig nai ippunadnana, ib tutukkuppa omalatteg!

Begbeg maɗi nid, ahilkad okkai ele dilag nai

⁵ Begbeg maɗi nid ag wan imuppan gumak danab ahilkad dilagnu ena elele doon, ag ⌊Kayaknu neekkakppa eheɗ hemanananu ag⌋ baɗan, oɗelag dim lamitteg! Ag oolag aɗitppa uɗat aib heppig. Ag Kristus oɗe dim lamidtteb, amubia ahilkad okkai dilag ele anam heig!

⁶ Ag ahilkad okkai amelagppaib, ag oolag ittag aqakkunuib aib heppig. Iitta. Kristusnu begbeg maɗi nid, nug oo oh Kristus metta Kayak oɗe dim lamidtte amubia heig!

⁷ Ag oolag ohppa uɗat henana, ag danabnu uɗat hetteb amubia aib heppig. Iitta. Ag Naɗinu uɗat hetteb amubia heig!

⁸ Aɗinu? Ag dootteb, aun nug uɗat ena hette amu, nug Naɗi toppa nob ena aokku. Naɗi Nug begbeg maɗi nid dilagppa amu begbeg maɗi nid iitta, amu dilagppa ele anamib hekku.

⁹ Gumak danab ag ele ahilag begbeg maɗi nid dilagppa anamib ena heig! Ag baɗaknu kobol ahilagppa aib heppig. Ag dootteb, Naɗi, hab aabppa daatte ele, Nug am begbeg maɗi nid dilag Naɗi, ag gumak danab, ahilag Naɗi ele. Nug laa, nug danab onig okkai ele, nuhignu ena doonna, laa onig iitta ele nuhignu eheɗ dootteb, amubia iinab hette.

Bagqak nai

¹⁰ Aria gog tak nai am inam. Ag Naɗi ele laippu daanna, nuhig ɠagattag okkai ele aon, ag ɠagattag dayeg!

¹¹ Ban haknu bala oh, Kayak nug ag Satan eɗidkkulagnu mattom ele amu, ag takkeg!

¹² Aɗinu? Ig danab ele ban ii hettem. Iitta. Ig wan imuppan gatatu kobolnu ikki danab oh, danab gumaknu ehah ele oh, aria ɠagattag oh ele, ag am ouɗi nau ig danab ig amenigppa ag anadkkunignu elele iitta, ig ag ele ban hettem

¹³ Anam amunu, ag Kristen ag deɗ nau uɗieb, ag ena daaglagnu ban elele hekkulagnu elele daabppeg, ban iitta meeb amu, ag hippaidna daaglagnu ag Kayaknu ban haknu bala ag mattom oh takkeg!

¹⁴ Ag ⌊Kristen anen anen, ag⌋ ɠagattag daaglagnu ag imu heig! Ag doyak diig genabib, matagiɗ imualagppa tagatteb, amubia takkeg! Ag genab tutukku hak kobol aona, qahaɗ palatteb bia ag momolag heppeg nauhmananu paleg!

¹⁵ Ag maɗoɗ, Nai Enanu dotte amu, ag amu baelag gaɗa bia aɗappeg noaɗ!

¹⁶ Ag amu hena, ag keeke laa imu ele hena, ag ahilag guppiɗ, amuam ooppa genab doyak ahilag amu, ag amuppa Satannu lat doɗo aab aɗu ele ag yaaladmananu ib oo nekkulagnu elele amu, ag amu aɗeg!

¹⁷ Kayaknu eɗua awikkak, ban danab ag ikkilagppa aen hat metteb, amubia ag aon mena, amu Kayak nai, nuhig Ouɗi madatte amu, ahilag qep elab daakkunu ele aon aɗeg!

¹⁸ Ag hanhan Kayak Ouɗippa Kayak Nug ag ehanadkkunu unuqittak digdigppa attem attem Nug ag ehanadkkunu unuqidkkulag. Ag keeke amu dabmenana ag aib bodoedappig. Amu ele ag Kayaknu danab ah oppiaawak ele laa oh dilagnu ele hanhan unuqidkkulag.

¹⁹ Ag da ehaniɗkkulagnu ele amu, ag Kayak Nug nai mattiak haenppa da oɗelppa nai meeb, da madikkulnu, amu Nug heeb, da baɗak iitta dayen, Kayaknu Nai Ena, tatam lokkumak dayom amu, da madikkulnu unuqitteg!

²⁰ Ao, da Nai Ena imu madittem amunu da maniguittakppa daattem. Ge, da amu madikkulnu uɗat ele amunu amu, ag Kayak Nug heeb, da helom bia da baɗak iitta dayen, nuhig nai madikkulnu unuqitteg!

²¹ Ag da attem daattem, da aɗi hettem ele amu, ag amu dooglagnu Tikikus, nug da ele, i oh Naɗinu oonihppa genab doottep, nug da layalnab, nug Kayaknu maɗi nid genab, nug geha amu oh mattieb dooglag.

²² Da nug ihinignu ag amelagppa ab, ag ig attem daattem dooglagnu, nug ag oolag ɠagattag qedakkunu ele, diig aɗit amunu amu da mei gotte.

²³ Mame Kayak, Naɗi Jesus Kristus ele aa maɗoɗ, oo mauhak, amu ooppa genab doyak ele Kristen tamaniak danab ah oh madapeɗ daaglagnu ool daatte.

²⁴ Amu Kayaknu ehanittak okkai Nug hamu megatte amu, amuam danab oh ag ihinig Naɗi Jesus Kristusnu ii daye daye oolag mauhtte ele, am ahilagppa dayaɗ!