Epesus 5 - Nobonob Baibel

¹ Ag Kayak bekkod daatteb, ahilagnu Nug oo mauhtte amunu, Nug ippu hena dayeg!

² Ag nug oo mauhakppa, Kristus Nug ihinignu oo mauhe, Nug nukka Nug bau dayak nuhig ig ehanigkkunu uua, ihinignu mauhom bia oiyeg! Kristus Nug danab ag doɗ main Kayak muttuɗig ena dookkunu medatteb bia, nukka nuhigppa anam heum.

³ Amge gappai kobol, o iitta kobol dubuttid ele, o iitta baubau awaknu hik qak kobol, amuam ahilagppa nakoknab laa aib dayom. Aɗinu? Ag am Kayaknu danab oppiaawak ele amunu, ag kobol amu hekkulagnu am tutukku iitta.

⁴ Ag nai oppiaawak iitta, nai dabmak tutukku iittappanu, amu qiɗ hak nai nau ele amu, ag amu mattiglagnu elele iitta. Ag amu aib madippig. Iitta. Ag amu uuna, Kayak amegppa, “Ena heme,” anan dayeg!

⁵ Aɗinu? Ag dootteb, gappai danab, danab nug ooppa oppiaawak iitta, amu baubau awaknu hik qak danab, danab amu nug kayak hambuppuak dim lamidtte, danab amunu laa nug Kayak, Kristus ele dilah ɗo maɗoɗ ooppa ii daama.

⁶ Laa nug nai hamu mattiakppa ag eeɗatteb, kobol nau oh amuppa nomananu dabmeig! Aɗinu? Kayaknu oppoɗi bak uɗitte ele am danab oh ag Kayaknu ɗo tappaeg nette ele, ahilagppa daakku

⁷ amunu amu, ag danab amunu ele ouqena aib oippig.

^8-10 Anukka ag gatatuppa daadttappig, amge Naɗi Nug gemu ag amahlakppa maattom. Amahlaknu meu am kobol ena, genab tutukku hak kobol, amu doyak diig genabib ele amunu, ag kobol Kayak Nug amunu oo hette ele amu doon aonna, ag amahlaknu danab oitteb, amubia ag amahlakppa oiyeg!

¹¹ Gatatu uɗat, meu iitta ele, dimittim danab ag hetteb ele amu, ag anam aib heppig. Iitta. Ag gatatu uɗat am nau, ag amu miag atippeg, danab ah oh antteg!

¹² Kobol laala danab gatatuppa oinna kobol amu hetteb amu, kobol amunu mattiaknu am uɗa nak ele.

¹³ Amge keeke oh amahlakppa mak daatteb amu, keeke amu ag miag atieg, danab ag anidtteb.

¹⁴ Aɗinu? Amahlak am he, keeke oh miag atiak bena daatteb. Diig amunu nai imu Kayak naippa niitte. “Na niittem ele amu, na ahe! Na mauhakppanu eɗun hippaidppe, Kristus na amahlak medakku.”

¹⁵ Amunu ag oiyak ahilag dabmettan autna aona, danab oolagppa doyak dabmak ena ele daanna oiyeg! Ag danab oolagppa, ag danab doyak dabmak ena iitta ele aib daappig, amubia aib oippig.

¹⁶ Ag amu dabmenana, gemu am haen nau amunu, ag uɗat ena hekkulagnu laa dayeb anidna, ag aib uuppig. Ag haen aguppanab heig!

¹⁷ Gemu am haen nau amunu ag dabmak tutukku iitta aib aqom. Naɗi Nug oo attemun niitte amu dabmenana, anamib oiyeg!

¹⁸ Danab nug wain lawowa kaaka qette amu, nug hipaɗu ahak kobol hette amunu, ag diig amunu wain lana, kaaka aib aqom. Iitta. Ag amu uuppeg, Kayak Ouɗi Nug ahilagppa ambak daya, ahilag oiyak oh gumaɗ!

¹⁹ Ag qagmena daana amu, ag sam, mettidnu ahi, amu Naɗi binag maknu ahi ele etteg! Ag oolkadppa Naɗi humidkkulagnu, ag ahiettak, amu ahi baag ele heig!

²⁰ Ag haen oh ihinig Naɗi Jesus Kristus onigppa keeke ohnu Kayak Mamenig amegppa, “Ena heme,” aon aig!

²¹ Ag Kristusnu ebehilkad oh bodoetta le meeb, ag akka akka ag nug waappa dayeg!

Ewau dayaknu kobol tutukku

²² Ah ag Naɗi waappa daatteb, amubia ag gamulkad waalagppa dayeg!

²³ Aɗinu? Kristus Nug nuhig tamaniaknu ikki daatte, amubia danab nug ahnu ikki daatte. Tamaniak am Kristus beɗu bia daatte, amu Kristus Nug tamaniaknu eɗua awikkak danab daatte.

²⁴ Kristen tamaniak nug Kristus waappa daatte, amubia ah ag ele keeke ohnu gamulkad waalagppa dayeg!

²⁵ Kristus Nug nuhig tamaniaknu oo mauhe, Nug nukka nuhig bau dayak amu uua mauhom, amubia danab ag waalkad dilagnu oolag mauhaɗ!

²⁶ Ge, Kristus Nug tamaniak leppa amu Kayak naippa ele iheb, oppiaawak daakkunu,

²⁷ amu Kristen tamaniak Nug noobppa enanagnab, dubuttid, o keeke nau laa ele iitta, enanag, oppiaawak, ooppa kaliak laa iitta ele, ba dayebeb aokkunu, Kristus Nug bau dayak nuhig uua mauhom.

²⁸ Amubiaib danab ag akka beɗulagnu oolag mauhtte, amubia ag waalkad dilagnu oolag mauhaɗ! Danab nug waunu oo mauhtte amu nug nukka nuhignu oo mauhtte.

²⁹ Ig doottem, danab laippu laa nug nukka beɗunu nug ooppa nau ninig ele ii dootte. Iitta. Nug Kristus Nug nuhig tamaniaknu hette, amubia nug eeppa, begittakppa ele atognotte.

³⁰ Aɗinu Kristus Nug tamaniak atognotte? Tamaniak am Nug beɗu bia daatte, amu ig tamaniak ooppa daattem ele, ig Nug beɗunu laih naunau kuɗum bia daattem, amunu Nug tamaniak atognotte.

³¹ ⌊Danab nug ahnu anam dookku,⌋ “diig amunu ewau matulak haenppa danab nug anig mameg ele uuata, nug wau ele matulak daaya, aɗit amu aa ouqak laippu daaglah.”

³² Nai amuam diig unuqagnab ele, amge nai amuam Kristusnu, ⌊nuhig⌋ tamaniaknu ele,

³³ amge ag akka akka anen anen imu dooglagnu ele ippunigtte. Na nakka nahipnu oot mauhtte, amubia na waatnu oot mauhaɗ! Amu ah ele nug gamunu ena elele dookkuoitte.