Epesus 4 - Nobonob Baibel

Kristus beɗu am Kristen danab ah

¹ Da Naɗinu uɗat hettem amunu, da maniguittakppa daattem. Da anam dayeye amu, da Kayak, Nug ag onilagppa eum, da amunu dabmein, da ag ahan, ewak baag amu attem oiglagnu ippuanadtte, ag amu dim lamidnana tutukku eleleppa oiglagnu iikku ahilkad dabmak maɗedattem.

² Ag onig qe nak kobol dim lamidna, oolag bodoettak ele daana, ag oolag maɗoɗ ele dayeg! Ag oo mauhak kobol dim lamidna, ag nug ehanidnana dayeg!

³ Maɗoɗ kobol ag tamaniadtte, amuppa Kayak Ouɗi Nug he, ag laippu daatteb amu, ag tuɗidna, anam daaglagnu wagai meig!

⁴ Ig Kristen oh, ig Kristus beɗu daattem, amu beɗu laippuib daatte. Kayak Ouɗi ele laippuib daatte. Amu keeke laa, Kayak Nug ig Kristen, ig keeke laa aognignu dabmak aɗat daagnignu oninigppa eum daatte, amuam bauklel amu, dabmak amu aɗa dayaknu am ele laippuib daatte.

⁵ Aria Naɗi laippuib daatte, oonigppa genab doyak laippuib daatte, amu layattak ele laippuib daatte,

⁶ Kayak ele laippuib daatte. Nug am ig oh Mamenig. Nug danab oh dilag Okkai daatte, Nug danab ohppa nuhig uɗat hette amu, Nug danab oh oolagppa daatte.

⁷ Ig oh laippu daattem, amge ig anen anen, uɗat iɗu iɗu tamaniak ooppa hekkunignu, Kristus dabmeum bia, ig nuhig ehanittak okkai hamu mettakppa ehah digdig aomut.

⁸ Diig amunu amu, Kayak naippa nai inam daatte. “Nug Sion qaukoppa teum. Nug taata, nug ban danab eɗatta, aɗualatta diia ukkom ele, nug ag noolag awa teum. Ao, Nug ta, Nug danab ah keeke kuɗum ahilag daakkunu matte, ag aoppig.”

⁹ Amge, “Nug attan teum,” amu diig attemun? Nug wan ooppa iite noum? Yo, Nug tatam wan ooppanab noum.

¹⁰ Nug tatam wan ooppa nowowa, Nug, laa iitta, Nugib eɗua attan ele teum. Nug keeke oh nuhigppa ambak daakkunu, Nug hab attan eɗatta attannab teum.

¹¹ Nugib ehah iɗu iɗu matta, danab laa ag totol danab dilag uɗat hekkulagnu mattom. Laa ag propet daaglagnu mattom. Laa ag nai mehuqak danab daaglagnu mattom. Laa ag pasto am laa ag ippuanittak uɗat hekkulagnu mattom.

¹² Kristus Nug beɗu ena, ɠagattag daakkunu amu, Nug Kayaknu danab ah oppiaawak ele ag uɗat ena hekkulagnu, uɗat anen anen danab amu anam mattom.

¹³ Uɗat amu ukkeb ukkeb, ig oh oonigppa genab doyaknu, ig oonig laippu meta, Kayak Bekkanu doyak laippu aota, danab kalunig ele beta, ig Kristus bia bekkunig.

¹⁴ Amu nai ittag, hambuppuak danab dilag, amu ele heeb, ig uub nug ulah kaɗag haenppa duban he, ukka qa, uɗia qa hette amubia ii hemata. Nid nakok ag amubia hetteb amu ig baula, ag bia ii daamta.

¹⁵ Iitta. Ig oo mauhak dootta, nai genab miag maditta, ig keeke ohppa ihinig ikki Kristus, Nug oitte amubia ig oignig.

¹⁶ Danab beɗunu laih kuɗum oh ag diɗippa tuɗittak daanna, ahilag uɗat anen anen pehettak heegeg, beɗu ena ɠagattag mette, amubia ig tamaniak ooppa daattem ele, ig ihinig ikki Kristus nuhigppa laippu daat, ig uɗat ihinig anen anen hetata, ig nug oo mauhakppa oitut, tamaniak ena, ɠagattag mette.

Amahlakppa oiyaknu nai

¹⁷ Amunu da imu ag amelagppa attem. Da Naɗi onigppa iikku ɠagattag madittem. Ag nai imu aotteb ele amu, ag iitta aɗi ag dabmak apiɗidna oitteb ele amu, ag kobol amubiappa baula aib oippig.

¹⁸ Iitta aɗi amu, ahilag dabmakppa am gatatuib. Ag dabmak ena iitta, ag oolag ɠagattag eppe, Kayak dimettanna, Nug dim lamidkkulagnu oolag ii daatte amunu, ag Kayaknu bau ena iinab aoppig.

¹⁹ Ag aɗi hipunin hetteb amu, ag uɗa nak ii doonna, ag baɗak ele iitta amunu, ag beɗun kobol dubuttid ele digdig oh henana, ag tuɗidna naunab ele hekkulagnu dabmetteb.

²⁰ Amge ag Kristusnu nai dooppig ele amu, ag amuppa kobol nau oh amubia hekkulagnu nai laa ii dooppig.

²¹ Iitta. Ag nai dooppig ele amu, ag Jesusnu aeg iite dooppig? Ag Kristen beeg, ag nuhig nai genab aeg iite dooppig? Yo, ag anam dooppig.

²² Anam amunu, ag nai aoppig bia, ag oolag alag, nug dabmak eheɗ awa, kobol nau digdig hekkunu dabmaama, mauhkkunu hette ele, nug he, ag matu nuhig dabmak dim lamidppig ele amu, ag oiyak amu uueg!

²³ Ag Kayak Ouɗi ib medappeg, Nug heeb, ag dabmak bau aweg!

²⁴ Laa amu, ag oolag bau, Kayak Nug, Nug bia, genab tutukku hak kobol dim lamitta, Kayaknu oppiaawak ele daakkunu babaittom amu, ag amu aon, danab bau oiyeg!

²⁵ Ag kobol hambuppuak uueg! Ag nai genabib laa amelagppa mattieg! Aɗinu? Ig am beɗu laippunu laih kuɗum daattem.

²⁶ Ag oolag nauhkku dayeb amu, ag hipunin hemananu dabmeig! Ag oolag nauhkku dayeb, oo nauhak amu nug dayebeb ukkeb, aam aib noum. Aam ii noak haenppa ag oolag laippu meig!

²⁷ Ag Satan aib ib ooɗna medappig.

²⁸ Yabhok danab nug baula yabhok hekkunu aib heum. Iitta. Nug uɗat haɗ! Nug amuppa nuhig keeke awa, nug danab aun laa ag keekenu daɗek ele amu, nug ag madakkunu, nug eppegppa uɗat ha, keeke ele dayaɗ!

²⁹ Nai uɗig wak laa ag oɗelagppa aib beum. Iitta. Nai ena danab ɠagattag madatte, danab ehanadtte, nai amuib ag oɗelagppa baɗ! Amuppa danab ag ahilag nai dootteb ele amu, ehanittak mattaglagnu elele.

³⁰ Ag Kayak Ouɗi oo uug aib medappig. Aɗinu? Ag Nug aoppig oitteb amunu, dimppa qagaiettakppanu eɗua uhuqak awaknu deɗppa Kayak Nug uhuqak amu madakkunu, nuhig Ouɗi, epponak keeke bia, ahilagppa daatte.

³¹ Ag laanu ninig doyak kobol, oppoɗi be ameg kokoɗ eppak kobol, oo nauhak kobol, muttub qak kobol, baeg qak kobol amu kobol laa oh ele oo aeg bak bia amu, ag amu ele uueg!

³² Ag lailkad dilagppa oo bodoettak kobol henana, ag oo bodoetta le mak kobol ahilagppa heig! Kayak Nug Kristusnu uɗatppa ahilag hipunin uhuqa mattom, amubia ag nug hipunin uhuqa mettak heig!