Epesus 3 - Nobonob Baibel

Pol nug Kristusnu mehuqom

¹ Diig amunu amu da Pol, da iitta aɗi ag ehanadkkulnu Kristus Jesusnu maniguittak danab daattem.

² Ag imu doon malappig bia doottem. Kayak Nug da ehanittak okkai hamu meɗa he, da ag iitta aɗi ag amelagppa Kayak Nug nuhig ehanittak okkai hamu mettak ag ele madakkunu hette, da amu mehuqkkulnu daattem.

³ Kayak Nug anam hekkunu maittak awom, amge dabmak amuam anukka lokkumak dayom. Lokkumak dayom, me Kayak Nug dahilppa mehuqe doomi. Nai amunu amu, da matu ahilagnu nai tutu laa yen malami.

⁴ Aria, ag nai imu ebqenana amu, ag da Kristusnu dabmak lokkumak dayom, ag amunu dabmak da aottem ele, ag amu oh doona oolag maidkku.

⁵ Anukka Kayak Nug nai lokkumak amu miag ii atiom, amge gemu Nug nuhig Ouɗippa Kayak Nug nuhikkud totol danab, amu nuhikkud propet eleppa he, nai amu miag atiom.

⁶ Nai lokkumak dayom amu inam. Gemu Nai Enanu ɠagattagppa ameg laa, amuam iitta aɗi, ag Juda ele laippu ouqak daatteb. Ig oh laippu daattem. Ag anam daanna, keeke oh Kayak Nug Juda aoglagnu nai qakka aum amu, iitta aɗi ag Kristus Jesusnu daatteb ele, ag ele amu aoglag.

⁷ Kayak Nug nuhig ɠagattagppa nuhig ehanittak okkai hamu mettak meɗa, da Nai Ena imu mehuqkkulnu nuhig maɗi nid meiɗom daattem.

⁸ Da am Kayaknu danab ah oppiaawak ele laa oh noolagppa keeke hamunab daattem, amge Kayak Nug ehanittak okkai hamu meɗa, Nug da iitta aɗi noolagppa Kristusnu keeke ena ohnu, danab nug amu antta dookkunu elele iitta, nai amu mehuqkkulnu meiɗom.

⁹ Ao, Kayak Nug keeke oh hattom ele, Nug nuhig dabmak, iitta aɗi dilagnu, amu lokkume dayom. Dabmak amu nug lokkumak haen oh daattom, amge gemu Nug da nuhig dabmak amu miag mehuqkkulnu; Nug uɗat amuppa meiɗom.

¹⁰ Kayak Nug dabmak inam awom. Gemu Kristen tamaniak ooppan danab ah amu, ag nuhig doyak dabmak ena ele digdig kuɗum am miag atippeg, ikki danab, amu danab ag gumaknu ehah ele, ig danab ig ag ig amenigppa anidkkunignu elele iitta, ag ohnab dooglag.

¹¹ Amuam Kayaknu maittak hanhan daattom, amu Nug ihinig Naɗi Jesus Kristus, nuhig uɗat okkaippa anam hekkunu aum amu, Nug aakku heum.

¹² Ig Jesus Kristusnu uɗat okkai, diig amunu, amu nuhignu ooppa genab doyak, amuppa ele, ig Nug ele ouqeta daattem amunu, ig Kayak toppa gokkunignu ib matulak daatte. Ig gokkunignu ii baɗattem.

¹³ Amunu amu, da iikku ag amelagppa attem. Da uug mawadttem imu amu, da ag ehanadkkulnu mawadttem amunu, ag uug imu dabmenana, ag aib bodoedappig. Ag ii bodoettaglag amu, ag ele binag amahlak oppiaawak ele aoglag.

Pol nug Epesus tamaniaknu danab ah dilagnu unuqidtte

¹⁴ Da Kayaknu dabmak amu dabmein, da amunu Mame noobppa gatel qaun ottem.

¹⁵ Nug baekkudppa oh, laa hab aabppanu, laa ag wanppanu, ag oh nuhigppaib ag onilag aotteb.

¹⁶ Da gatel qaun oin unuqidttem amu, da Kayak Nug nuhig Ouɗippa ag ehanatta, Nug nuhig ehanittak enanagnab, Nug amuppa ag oolag ɠagattag aqakkunu,

¹⁷ ag ahilag ooppa genab doyakppa Kristus Nug ag oolagppa daakkunu, amu Kayaknu oo mauhak ag ɠagattag aqeb, ad diɗi nug wan aɗe ad ɠagattag daatte, amubia ag ɠagattag daaglagnu unuqidttem.

¹⁸ Da ag Kayaknu oo mauhakppa ɠagattag daaglagnu unuqidttemnu diig laa am, amuppa ag, amu Kayaknu danab ah oppiaawak ele laa oh ele, ag oh ag Kristusnu oo mauhak, amuam naɗinab genab ele, ag amu genab dooglagnu elele daaglag.

¹⁹ Aria, da ag Kayaknu oo mauhakppa ɠagattag daaglagnu unuqidttemnu diig laa am, keeke ena ena Kayak Nug nuhigppa ambak daatte amu, Nug keeke amu ahilagppa elele elele madakkunu, ag Kristusnu oo mauhak, danab dilag dabmak eɗidtte amu, ag oo mauhak amu ele dooglagnu elele daaglag.

²⁰ Kayak, Nug nuhig ɠagattag ig oonigppa uɗat hette ele, Nug amuppa keeke okkai okkai, ig amunu dabmekkunignu, o Nug oɗ mettagnignu elele iitta. Ao, Nug amu eɗittak okkainab hekkunu elele; amu binag amahlak oppiaawak ele nuhigppa dayaɗ!

²¹ Ge, ig Kristen tamaniakppa daat, Kristus Jesusnu daattem amu, amuppa binag amahlak oppiaawak ele Kayak, nuhigppa hanhan alet ele dayaɗ! Genab.