Epesus 1 - Nobonob Baibel

Kayaknu ooppa genab doyak diig

¹ Da Pol, da Kristus Jesusnu totol danab daakkulnu Kayak Nug da tituaniɗom amu, da Epesus danab ah ag Kayaknu danab ah oppiaawak ele, ag Jesus Kristusnu daaglagnu oo metta ii uuak kobol dim lamidtteb ele, da ahilagnu iikku yaattem.

² Am ig Mamenig Kayak, amu Naɗi Jesus Kristus ele, ahilah ehanittak okkai hamu mettak, amu ahilah maɗoɗ ele ahilagppa daaglahnu ool daatte.

³ Ig Kristusnu daattem amunu, Kayak Nug ig hab aabppanu itittak ena oh mekkom. Anam amunu, ig Nug, Nug am ihinig Naɗi Jesus Kristus Mameg amu, ig Nug binag metu!

⁴ Kayak Nug wan ii beum haenppa Nug ihinignu oo mauhe, Nug ig Kristusnu uɗat okkaippa ig nuhikkud danab ah oppiaawak ele daagnignu, ig danab ah oonigppa kaliak laa iitta ele daagnignu tituanikkom.

⁵ Nug anukka dabmaknab awom, oo ele niiom bia amu, Nug Jesus Kristusnu uɗatppa ig tainig mawa, Nug bekkod daagnignu meikkom daattem.

⁶ Kayak Nug anam heum, diig amunu nuhig ehanittak okkai hamu mettak, amuam binag amahlak oppiaawak ele amu, ehanittak okkai hamu mettak amu binag aotte. Nug Kristusnu oo mauhtte, amu Nug Kristusnu uɗat okkai ihinignu heum ele amu dabmaama, ehanittak okkai hamu mettak amu oo qak iitta ig mekkom.

^7-8 Kayak Nug nuhig doyak dabmak ena ele oh, nuhig diignu doyak tutukku oh eleppa Nug dabmekka, Nug nuhig ehanittak okkai hamu mettak naɗinab megakka, Nug Jesus Kristus tiigppa Nug ig hipuninnu qagaiettakppanu eɗua uhuqak ha mekka, ⌊amuppanu laih amu⌋ ig hipuninnu uhuqak aomut.

⁹ Anukka Kayak Nug nukka nuhig dabmaknab awakppa Kristusnu uɗatppa ehanigkkunu oo ha dabmeum amu, Nug dabmak amuib dim lamitta he, ihinigppa miag atiom.

¹⁰ Nug oo niitte am inam. Nug ulum aɗebeb, Nug haen epeɗiom ele amu uɗieb, keeke hab attannu, wanppanu ele amu Nug oh qagmaatteb, Kristus waappaib daappeg, Kristus Nug keeke amu oh ikkilag daakku.

¹¹ Ig Kristusnu uɗat okkaippa Kayak bekkod daattem. Kayak Nug keeke oh attem bekkunu dabmette amu, anamib bette amunu, Nug ig nuhikkudnab daagnignu dabmaama meikkom daatta, ig Nug bekkod daattem.

¹² Nug ig Kristusnu anuqta, nuhignu oonigppa genab doot Nug dim lamidttem amu, ig Kayak onig okkai humagnignu, ig binag amahlak oppiaawak ele nug mettagnignu tituanikkom.

¹³ Ag Epesus daatteb amu, ag ele nai doyak diig genabibppanu, amuam Kayak Nug ag eɗua diikkunu ib babaittomnu Nai Ena, nai amu doonna, ag Kristusnu oolagppa genab dooppig amunu, ag Kristusnu daatteb, amu ag Kayak Nug nuhig Ouɗi, anukka Nug megakkunu nai qakka aum amu, ag genab nuhikkudnab daatteb miag atiak daakkunu, Nug nuhig Ouɗi ag mattom.

¹⁴ Kayak Nug ig nuhikkud daatteb, ig dimppa gog tak haenppa ig qagaiettakppanu eɗua uhuqak megakkunu aum amu, ig megakkunu genabnab doognignu Nug nuhig Ouɗi, keeke lonnu onig awa bia ha, ig mekkom. Ig Kayak binag metu!

Ena heme anak, amu unuqittak ele

¹⁵ Kayak Nug anam tituanikkom amunu, da ag Naɗi Jesusnu oolagppa genab dooppignu nai, ag Kayaknu danab ah oppiaawak ele oh dilagnu oolag mauhttenu nai ele doyoya,

¹⁶ da ahilagnu hanhan Kayak amegppa, “Ena heme,” awe attem. Da unuqittitti, ag haen oh daulppa doegeg,

¹⁷ ihinig Naɗi Jesus Kristusnu Kayak, Nug am ig Mamenig, Nug binag amahlak oppiaawak ele, Nug ag Ouɗi matteb, ag nuhig nainu diig, Kayak ele tutukku dooglagnu ool dayeye unuqidttem.

¹⁸ Da Nug heeb, ahilag dabmak amahleb, butti aɗi ag aɗi keekenu Nug ag onilagppa eum ele amu, ag amunu dabmak ɠagattag aona, ag maɗoɗppan gamag doon, itittak enanagnab oh Nug nuhikkud danab ah oppiaawak ele oh aoglagnu nai qakka tituanom ele amu, ag amu oh dooglagnu ele unuqidttem.

¹⁹ Amu ele, da ag nuhig ɠagattag okkainab, batak iitta ele, ɠagattag amu ig ooppa genab doyak ele, ihinigppa niitte, ɠagattag amu ihinigppa uɗat hette ele amu, ag ɠagattag amu ele dooglagnu unuqidttem. Ɠagattag amuam Kayak Nug nuhig ɠagattagppa he, Jesus eɗua hibaittom, amu aakkuib.

²⁰ Ɠagattag amuppa Kayak Nug he, Kristus Nug eɗua hibaitte, Kayak he, Nug hab aabppa Kayak eppeg naɗiap-ppa daatte.

²¹ Gemu Nug attannab, laa oh eɗattak daatte; Nug laa gumak uɗat anuqak hetteb, laa ag gumak uɗat ɠagattag ele hetteb, laa ag gumak uɗat okkainab hetteb, laa ag gumak uɗat okkai hetteb, aria laa ag onilkad ele, Nug amu oh eɗadtte. Gemu haen imuppa Nug anam daatte, wan haen malak dimppa ele anamib daakku.

²² Kayak Nug he, keeke oh Jesus waappa daatte, amu ele Nug Jesus Nug Kristen tamaniak keeke ohppa ehanadkkunu, Nug ahilag ikki daakkunu tituanittom.

²³ Tamaniak am Jesus beɗu. Jesus Nug am ikki daatte. Tamaniak am Nug beɗu laa oh, eppeg, baeg keeke, amubia. Nug aben ohppa keeke ohppa ambak daatte.