Eksodas 9 - Nobonob Baibel

Yawe he, Isip dilag doɗ oh ⌊bia⌋ mauhppig

¹ Paro anam he, dimppa Yawe Nug Moses amegppa aum. “Na gona, Paro amegppa inam appe dookku! ‘Yawe, Nug ig Hibru, ihinig Kayak amu, Nug na amenppa inam atte. “Na danab ah dahilad ag gona, da noolppa dup nona binal mekkulagnu, na ag paɗadppe ukkeg!” ’ ” awa aum.

² ⌊Moses nug Paro amegppa Yawenu nai amu mattie doye, nug tuɗitta aum.⌋ “Aɗinu ⌊na ag paɗadppe gokkulag⌋? Na ag aɗwaladnana, na ag ii paɗadppe gokkulag amu,

³ Yawe, Nug ag Isip, ahilkad doɗ amu oɗe eheɗ naunab madakku. Nug geha nahipad doɗ dad okkaippa daatteb, amuam hos, donki, kamel, makau, sipsip amu meeme ele, Nug amu oh dilagppa heeb, oɗe naɗi amu aoglag.

⁴ Amge Yawe Nug geha Israel dilag doɗ dabmadakku. Dabmadatta, Nug amubia Isip dilagppa iinab hema. Israel dilagppa laippu laa ii mauhma. Isip dilag aakkuib, ag mauhkkulag,” awa aum.

⁵ Amu Yawe Nug keeke amu hekkunu haen tituane, Moses nug Paro amegppa amunu inam aum. “Butti Yawe, Nug ag Isip, ahilag wanppa kobol amu hekku,” awa aum.

⁶ Aria, Yawe Nug keeke amu hekkunu aum amu, wagɗe deɗ amuppa Nug aakku heum. Nug he, Isip danab dilag doɗ oh ⌊bia⌋ mauhppig, amge Israel dilag doɗ oh amu, ag ena daappig; laippu laa ii mauhom.

⁷ Amu Paro nug Yawe aum am genab beum, o iitta amu, nug amu tutukku dookkunu, nug nuhikkud danab laa, ag gona, anidkkulagnu maatte gona, ag eɗun uɗin, Paro amegppa Israel dilag doɗnu laippu laa ii mauhom appig, amge Paro nug kobol beum amunu tutukku dab-ii-meum. Iitta. Nug nuhig dabmak ɠagattag eppak dayeye, nug Israel danab ah uuatte ii goppig.

Yawe he, Isip danab ah, ag mamattin aqom

⁸ Aria, amu dimppa amu, Yawe Nug Moses, Aron ele amelahppa inam aum. “Aa brik manak lag laappa goya, aab uhuɗ laa aoya, Paro gumidya ukkeɗ! Aa goya, Paro gumidya teya, amu Moses na aab uhuɗ amu Paro noobppa tauɗppe tekku!

⁹ Aa anam hepeɗ amu, aria aab uhuɗ amu geha gappud wan tonatte bia ba, Isip wan oh elele metteb, haen uhuɗ amu danab, doɗ ele beɗulagppa na qeeb amu, Isip wan ohppa ag beɗulkadppa mamattin ba, ihilag okkai mekku,” awa aum.

¹⁰ Nug anam aum amunu, Moses, Aron ele aa aab uhuɗ aoya goya, aa Paro noobppa hippaidya daayya, Moses Nug aab uhuɗ amu tauɗe, attan teum. Aria, aab uhuɗ amu he, danab ah, doɗ ele ag beɗulag ohppa mamattin ba, mamattin amu yu qa, toɗa, ihilag mettom.

¹¹ Am Isip dilag baɗ mak danab ag Moses gumidna uɗiglagnu elele iitta. Aɗinu? Ag beɗulag mamattin he nauhom; ihilag ele. Isip danab ah laa oh ihilag mettom, amubia ag ele ihilkad ele,

¹² amge Yawe Nug he, Paronu dabmak ɠagattag eppa dayeye, nug Moses, Aron ele dilah nai, Yawe aumbia, nug nai amunu dab-ii-meum.

Yawe Nug he, ais doɗo hab waappanu neum

¹³ Aria, amu dimppa Yawe Nug Moses amegppa inam aum. “Butti buttuanab na ahan gona, Paro anidna amu, na nug amegppa inam akkut! ‘Yawe, ig Hibru, ihinig Kayak, Nug atte. “Na dahilad danab ah ag gona, da noolppa dup nona binal mekkulagnu na paɗadppe ukkeg!

¹⁴ ⌊Aɗinu na paɗadppe gokkulag?⌋ Na ii paɗadppe gokkulag dayeb, na geha wan ohppa aun laa da bia ii daatte tutukku dookkutnu, da eheɗ naunab na metten, nahipad ehanittak anuqak danab ele matten, danab ah nahipad ele madakkul.

¹⁵ ⌊Genab, laa da bia ii daatte. Aɗinu?⌋ Da amu hekkulnu dabmelom amu, da matu na nahipad danab ah ele oɗe nau danab kuɗum aqe mauhtteb ele, amuppa eheɗ hadappi, ag oh iitta melob,

¹⁶ amge da geha dahil ɠagattag okkai na ippunidkkulnu, danab ah wan atu ohppa da onil dooglagnu amu, da na king meitti, na okkai aakku daattem ⌊amunu, da ag aqai ii mauhppig⌋.

¹⁷ Anam daatte, amge na dahilad danab ah paɗadppe gomananu ɠagattag daanna, na ae ii gotteb.

¹⁸ Amu butti haen inamppa, geha da heppi, ais doɗo uug okkainab ele Isip wanppa nekkulag. Isip wan imuppa haen nug digmak beebe, ais doɗo anam ii neppig, uɗia gemu batak.

¹⁹ Anam amunu, na danab amelagppa ag nahip makau, amu nahip keeke laala oh dimittim mauhnoak daatteb amu, ag akkan gona, lag laala ooppa maatteg! Ag amu ii hekkulag dayeb, ais doɗo okkai na, danab, doɗ ele ag dimittim daaglag amu, ag aqeb mauhkkulag,” ’ ” awa aum.

²⁰ Yawe Nug Moses oɗeppa Paro amegppa anam a, Paronu ehanittak anuqak danab laala ag Yawe Nug nai aum amu, ag nai amunu am Yawenu oolagppa genab doon baɗappig ele amu, ag ahilkad begbeg maɗi nid, ahilkad doɗ ele heeg, lag ooppa nona daappig,

²¹ amge Paronu danab laa ag Yawe Nug nai aum amunu ag ii baɗappig ele, ag ahilkad begbeg maɗi nid, ahilkad doɗ ele, ag uuatteg, hamu dimittim daappig.

²² Anam hena daaegeg amu, Yawe Nug Moses amegppa aum. “Ais doɗo geha laih Isip danab daatteb, aben amu ohppa, danab, doɗ, dattanu ee oh qaɗelkadppa nekkunu, na eppen attan human, hab attan eppone!” awa aum.

²³ Aakku Moses nug dudqak hokkat nuhig awa aɗa, hab eppone, amu Yawe Nug he, hakkaɗ qe, amemɗi awa, wanppa ne, ais doɗo ele neum. Yawe Nug he, ais doɗo Isip laih ohppa aakku neum.

²⁴ Ais doɗo eheɗ, huanaknab naana, amemɗi ele huanak aben ohppa neum. Isip wan digma uɗie uɗie, deɗ amu batak, haen amu ohppa Isip danab ah ag ais doɗo anam laa ne ii anidppig. Iitta!

²⁵ Ais doɗo amu na, laih Isip dilagppa, keeke oh he nauhom. Ge, danab, doɗ keeke, dimittim daappig amu, ais doɗo amu keeke oh eheɗ aqa, he nauheg, dattanu ee, ad oh ele aqa, he nauhppig.

²⁶ Amu laih Gosen, aben Israel daappig ele amu, aben laippu amuib amu, ais doɗo ii neum.

²⁷ Ais anam neene, Paro nug Moses, Aron ele, aa gumidya gokkulahnu nai me ukke, aa gumidya ukkaeh, Paro nug aa amelahppa inam aum. “Da nai tappai ne, hipunin hemi. Yawe Nug am kobol tutukku hette, amge da, dahilad danab ah ele amu, ig eheɗ hettem.

²⁸ Ais doɗo am hakkaɗ ele ig eheɗ iqatte amunu, na amu iitta mekkunu Yawe unuqidkkutnu oɗ medattem. Da geha heppi, ag gokkulag; ag baula ippa ii daamna,” awa aum.

²⁹ Paro nug anam a amu, Moses nug oɗeppa awa aum. “Da aab okkai ooppanu eɗue, dimittim goppi, haen amuppa na wan oh am Yawe, nuhigib daatte dookkutnu, da eppel attan hume, Yawe unuqidppi, geha hakkaɗ qak uueb, ais doɗo nette amu, amu ele iitta mekku.

³⁰ Amge da doottem, na, nahipad ehanittak anuqak danab ele, ag Yawe Kayaknu tutukku ebehilag oh bodoetta le ii mette,” awa aum.

³¹ Amu ais doɗo nakppa amu, keeke laa onig plaks, ⌊ag amu gaɗa aon, koitaknu tret hetteb ele amu,⌋ aria, bali ele nauhya autyanab aopiɗ. Aɗinu? Bali doɗo awaknu haen aakku dayeye, ais doɗo aqe, bali doɗo wanppa nena niippig. Aria, plaks haɗag mappata dayeye, ais haɗag amu oh he nauhom.

³² Wit, diig aɗit ele amu, amuppa qaɗu ii beum amunu, wit nukka ii nauhom.

³³ Aria, Moses nug Paro uuitta, aab okkai dimittim ukka, nug eppeg hume attan te, Yawe unuqittom. Unuqitte, hakkaɗ baula ii qe, ais doɗo baula ii ne, gu huana ele ii neum; mataɗom.

³⁴ Amu keeke amu oh iitta me, Paro nug hakkaɗ qak uue, ais doɗo ii ne, gu mataɗom ele antta, nug hipunin baula heum. Nug amu nuhikkud ehanittak anuqak danab ele ag baula heeg, ahilag dabmak am ɠagattag eppom.

³⁵ Genab, Paronu dabmak ɠagattag eppe dayeye, Israel paɗatte ii goppig; Yawe Nug Moses oɗeppa aum, nug amubia heum.