Eksodas 7 - Nobonob Baibel

¹ Moses nug oɗe uug elenu Yawe amegppa a amu, Yawe Nug Moses amegppa aum. “Doye, da geha heppi, na Paro amegppa kayak laa bia daakkut. Na anam daappe, na awan Aron nug am propet danab laa, nug danab ah amelagppa dahil nai maditte bia, nahip nai Paro medakku.

² Amu keeke oh da na amenppa haknunab akkul amu, na Aron appe doyaɗ! Na anam appe, Aron nug doya amu, nug geha Paro amegppa nug Israel paɗatteb, nuhig wan uun gokkulagnu akku.

³ Nug anam akku, amge da heppi, Paronu dabmak aakku ɠagattag eppeb daakku. Anam dayebeb, da geha dahilnu dabmettaknu kobol danab haknu elele iitta kuɗum, uɗat ɠagattagnab kuɗum laa ele Isip wanppa hekkul.

⁴ Da anam hekkul, amge Paro nug nahip nai amu ii dooma. Anam hekku amunu, da geha Isip bu eheɗ mattoya, geha da anuqe ukke, Israel dilag huu oh, ag dahilad danab ah amu, da ag omaladppi, ag Isip uun gokkulag.

⁵ Da Isip eheɗ matten, Israel omaladppi, Isip wan uun gokkulag, haen amuppa Isip ag da am Yawe dooglag,” awa aum.

⁶ Aria, Moses, Aron ele aa keeke oh Yawe haknunab aum, aa Nug aumbianab aakku hepiɗ.

⁷ Aa anam hepiɗ amu, haen amuppa Moses, nug nuhig maɗ am 80, amu Aron, nuhig maɗ am 83. Aa maɗ anam anam ele daayya, aa Paro noobppa nai madipiɗ.

Hokkat Aronnu, eɗua mat beum

⁸ Aria, Yawe Nug Moses, Aron ele amelahppa inam aum.

⁹ “Am haen aa Paro noobppa daayya, aa nug amegppa nai madipeɗ, Paro nug ⌊da aa maati gopiɗ dookkunu⌋ nug aa kobol danab haknu elele iitta laa hepeɗ anidkkunu aa amelahppa akku amunu, Moses na Aron amegppa appe, nug dudqak hokkat awa buɗieb, Paro noobppa wanppa noaɗ! Nob amu, geha dudqak hokkat amuam eɗua mat bekku.” Yawe Nug Moses, Aron ele amelahppa anam aum.

¹⁰ Nug anam a amunu, Moses, Aron ele aa Paro gumidya goya, Yawe Nug amelahppa haknunab aum bianab aa hepiɗ. Aron nug dudqak hokkat amu Paro, am nuhikkud ehanittak anuqak danab ele noolagppa buɗie, wanppa noa, dudqak hokkat amu eɗua mat beum.

¹¹ Paro nug amu antta amu, nug nuhikkud doyak danab, emaɗ hak danab, ele onilagppa e uɗippig. E uɗina, Isipnu baɗ mak danab amu, ag baɗ mak kobol ahilag hena, ag ele kobol amu heppig.

¹² Ag dudqak hokkat ahilag wanppa eeg nona, ag mat eɗun beppig, amge mat Aronnu dudqak hokkatppanu beum amu, nug aha, mat ag Isip dilag dudqak hokkatppanu beppig amu, nug ag aqa laattom.

¹³ Aqa laattom, amge Yawe Nug aum bianab, Paronu dabmak ɠagattag eppak dayom, nug Moses, Aron ele dilah nai amu ii doyom.

Moses nug Yawe aum bia he, le eɗua, tiig dayom

¹⁴ Paro nug anam he, aria Yawe Nug Moses amegppa inam aum. “Paro nug nuhig dabmak am ɠagattag eppak daatte; nug Israel paɗatteb gokkulagnu ii hette.

¹⁵ Butti buttua geha Paro nug le Nil amuppa gokku amunu, na dudqak hokkat, mat eɗuom ele amu, na amu aon, Paro uɗa tekkutnu na gona, le daugppa nug ameg mekkut.

¹⁶ Gona daappe, nug dob, na Paro amegppa inam akkut. ‘Yawe, Nug ig Hibru, ihinig Kayak, Nug da na amenppa appi, na nuhikkud danab ah paɗadppe, ag gona, atu taɗakppa Nug noobppa dup nona binag mekkulagnu, Nug da na amenppa amu appi dookkutnu meiɗe uɗimi. Na anam hekkutnu aum, amge na nai amu ii doon hee, uɗia gemu batom

¹⁷ amunu, gemu Yawe Nug atte. “Kobol laa bekku amu, kobol amuppa na, da genab Yawe daattem, na amu dookkut,” ’ ” awa atte. Amu kobol amuam, geha da dudqak hokkat imuppa Nil le oppi, le eɗua tiig daakku.

¹⁸ Amu kakai Nil leppa geha mauhppeg, le uɗig nau ob, am geha Isip danab ah ag le amu lakkulagnu elele iitta.

¹⁹ Amu geha Yawe Nug Moses amegppa inam aum. “Na ⌊Paro amegppa anam awona, na⌋ Aron amegppa appe, nug dudqak hokkat nuhig amu awa, Isip le okkai oh, le nag oh, le ameg oh ele, amu epponattaɗ! Nug anam heeb, le amu oh eɗun, tiig daaglag. Le amu tiig eɗuglag amu, haen amuppa Isip oh dilagppa le tappiɗ, adppa hoippigppa daatte, am nippud menppa heppigppa daatte ele, le amu oh ele eɗun, tiigib daaglag.” Yawe Nug Moses amegppa anam aum.

²⁰ Amu Moses, Aron ele aa Yawe Nug aa amelahppa haknunab aum bianab amu, aa anam hepiɗ. Aron nug Paro, amu nuhikkud ehanittak anuqak danab ele noolagppa, nug dudqak hokkat awa, le Nil makkuɗe, le Nil, le amu oh eɗua tiig ba dayom.

²¹ Le amu tiig daye, leppan kakai oh mauheg, le uɗig naunab o, Isip danab ah ag le amu lakkulagnu elele ii daappig. Isip wan ohppa amu, tiig dayom.

²² Le tiig anam beum, amge Isip dilag baɗ mak danab ag baɗ mak kobol ahilag hena, ag ele kobol amu heppig amunu, Paronu dabmak am ɠagattag eppakib dayom. Amu Yawe aumbia Paro nug Moses, Aron ele dilah nai amu ii doyom.

²³ Paro nug dab-ii-meum. Iitta. Nug eɗua nuhig lag enanagnab, appa ukkom. Nug keeke amunu dab-ii-ma, uug ii doya, oo ele ii baɗom.

²⁴ Isip ag le Nil amu lakkulagnu elele iitta amunu, ag le Nil daugppa, le aon lakkulagnu, moɗ aoppig.

Yawe he, og ag Isip wanppa ambeppig

²⁵ Aakku, Yawe he, Nil le amu nauhe, deɗ eblaih aɗit ele ukkom.