Eksodas 6 - Nobonob Baibel

¹ Moses nug anam aum, amge Yawe Nug Moses amegppa aum. “Gemu amu, da Paro, nuhigppa keeke hekkul amu, na anidkkut. Da dahil ɠagattagppa ⌊eheɗ hedappi,⌋ diig amunu nug geha ag Israel uuatteb gokkulag. Ao, geha da dahil ɠagattagppa ⌊nug eheɗ naunab hedappi,⌋ diig amunu nug ag wan nuhigppanu lamatteb gokkulag,” awa aum.

Kayak Nug nai nuhigppa Moses ɠagattag qettom

² Amu Kayak Nug tuɗitta, Moses amegppa inam aum. “Da am Yawe.

³ Anukka da Abraham, Aisak, am Jakop ele gumatte nei, ag da onil, Kayak Nukka Ɠagattag Oh Ele, ag amuppa da dooiɗppig. Amge da onil Yawe, da onil amuppa, ag da dooiɗkkulagnu amu, da ii ippunadmi.

⁴ ⌊Ag da dooiɗkkulagnu amu, da onil Kayak Nukka Ɠagattag Oh Ele ippuanatten,⌋ da hei, da ag ele nug tituanta nai qakkamut. Nug tituana nai qakkak nai dahil amuppa amu, geha da Kanan wan ag madakkulnu ami. Haen ag appa daappig amu, ag wan amuppa aab aon daappig, amge wan amu ahilag iitta. Ag am wan laihnu danab ah.

⁵ ⌊Anam, amge⌋ gemu Israel ag Isip wanppa daaegeg, Isip ag heeg, ag maɗi nid maɗi ah ele daan gaaegeg, da Israel, ahilag gayak doomi, gemu ele doottem. Ag gaaegeg doyeye amu, da dahil nug tituana nai qakkak, da ag memetalkad anukkanu ele hemut amu, tituanak amu da daulppa doum daatte.

⁶ Anam amunu, na da oɗel imu aon, Israel amelagppa inam appe doyeg! ‘Da am Yawe. Da geha heppi, ag Isip dilag begbeg maɗi nid maɗi ah ele baula ii daamna. Ao, ag Isip waalagppa baula ii daamna. Da dahil ɠagattag naɗippa, dahil bu mettak okkai eleppa ag Isip dilag begbeg maɗi nidnu qagaiettakppanu eɗua uhuqak hein madakkul.

⁷ Da geha heppi, ag am dahilad danab ah daappeg, da ahilag Kayak daakkul. Haen amuppa amu, ag da am Yawe, da ag Isip appa maɗi nid maɗi ah ele daappig, da amuppanu uhuqatti, ag hamu, ena daatteb dooglag.

⁸ Da geha ag omalatte ukke, wan da Abraham, Aisak, am Jakop ele madakkulnu eppel humen, nai ain qakkami amu, da wan amu geha da ag madappi, geha wan amu ahilagnab daakku. Da am Yawe,’ ” awa aum.

⁹ Moses nug nai amu Israel amelagppa aum, amge ag nai nuhig amu, ag amunu nai genab ii dooppig. Aɗinu? Ag uɗat eheɗ nau, ɠagattag heppig, ahilag dabmak ele am qe nak dayom.

¹⁰ Dimppa Yawe Nug Moses amegppa inam aum.

¹¹ “Na gona, Isip dilag king Paro amegppa appe, nug Israel danab ah nuhig wanppanu paɗualatteb, ag ahan, nuhig wan uun gokkulagnu appe doyaɗ!” awa aum.

¹² Yawe Nug anam aum amge, Moses nug Yawe nai aum amu eɗua nob ma inam aum. “Israel ag da nai attem amu, ag ii doon dab-ii-metteb. Da oɗel uug ele; da Paro amegppa nai tutukku madikkulnu elele iitta amunu, da attem hein, Paro nug dahil nai dookkunu dabmekkul?” awa aum.

¹³ Amu ⌊Yawe Nug Moses, Aron ele anam haknunab aum, nuhig nai amuppa amu,⌋ Nug aa goya, Israel danab ah amelagppa, aa ag omaladya, Isip wan uuya gokkulahnu apeɗ dooglagnu, aa Isip dilag king Paro amegppa ele, nug Israel danab ah paɗatteb, aa omaladya, Isip wan uuya gokkulahnu, nug amegppa apeɗ dookkunu aa amelahppa aum.

Moses, Aron ele aa mamelti aɗi dilag nai

¹⁴ Amu Israel danab baelkadppa anen anen dilag ikki danab onilkad am iikku. Ruben, Jakopnu nid danab tatamnu, nug bekkod nid danab waɗele. Ag onilag am Hanok, Palu, Hesron, amu Karmi ele. Israel dilag huu okkai Ruben ooppa am, aab ikki waɗele daatteb, amu danab waɗele amu ag am aab ikki amu alalkad aakku.

¹⁵ Simeon, Jakop bekka Ruben dimugppanu, nug bekkod nid danab eblaih laippu ele. Ag onilag am Jemuel, Jamin, Ohat, Jakin, Sohar, amu Saul ele. Saul anig nug am Kanan ah. Israel dilag huu okkai Simeon ooppa am, aab ikki eblaih laippu ele daatteb, amu danab eblaih laippu ele amu, ag am aab ikki amu alalkad aakku.

¹⁶ Am Lewi, ⌊Nug Jakop bekka Simeon dimugppan amu,⌋ nug maɗ 137 daya, nug mauhom. Nug bekkod onilag bukppa yaak dayom am Gerson, Kohat, Merari ele. ⌊Ag buɗulkad onilkad am iikku.⌋

¹⁷ Gerson nug bekoɗ nid danab aɗit. Aa onilah am Lipni, Simei ele. Aa Lewi buɗub ooppan aab ikki aɗit amu, ag alalti aakku.

¹⁸ Kohat nug bekkod nid danab waɗele. Ag onilag am, Amram, Ishar, Hebron, amu Usiel ele. Kohat nug maɗ 133 daya, nug mauhom.

¹⁹ Merari nug bekoɗ nid danab aɗit. Aa onilah am Mali, Musi ele. Danab amu oh ag Israel dilag huu okkai Lewi ooppa am, ag aab ikki anen anen dilag ikki bukppa yaak dayom aakku.

²⁰ Amram nug wau amu Jokebet. Jokebet nug Amram mameg appinag, amu nug Aron, Moses ele menuatom. Amram nug maɗ 137 daya, nug mauhom.

²¹ ⌊Lewi buɗub laa⌋ Ishar, nug bekkod am, nid danab ewam. Ag onilag am Kora, Nepek, amu Sikri.

²² Usiel, nug bekkod am nid danab ewam. Ag onilag am Misael, Elsapan, amu Sitri.

²³ Aron, nug wau am Eliseba. Nug am Aminadap aɗeg, Nason appinag. Eliseba nug Nadap, Abihu, Eleasar, Itamar ele menuattom; ag am Aron, Eliseba ele bekkalti aakku.

²⁴ Kora, nug bekkod am nid danab ewam. Ag onilag am Asir, Elkana, am Abiasap. Kora buɗubppan aab ikki ewam daatteb amu, danab ewam amu ag am, aab ikki amu alalkad aakku.

²⁵ Eleasar, nug Aron bekka, nug Putiel aɗeg awe, nug Pinias menuom. Danab amu oh ag amu Israel dilag huu okkai Lewi ooppan aab ikki amu, ag ikkilkad danab aakku.

²⁶ Amu Moses, Aron ele onilah amu, danab buɗub imuppanu aguppa daattep. Danab aɗit laa iitta. Aa aakkuib. Yawe Nug danab aɗit amuib amelahppa aakku aum. “Aa Israel buɗub, Isip wanppa daatteb amu, aa huu anen anenppa omaladya ukkeɗ!” awa aum.

²⁷ Aaib Isip dilag king Paro, nug Israel paɗatteb omaladya gokkulahnu amegppa apiɗ. Danab aɗit amu, aaib kobol amu hepiɗ; laa iitta.

Yawe Nug Moses, Aron ele aa aɗi hekkulahnu amelahppa haknunab anak aum amu, imuam amunu nai

²⁸ Haen Yawe Nug Isip appa Moses amegppa nai mattiaya,

²⁹ Nug inam amegppa aum. “Da am Yawe. Nai oh da na medakkul amu, na Isip dilag king Paro appe doyaɗ!” awa aum.

³⁰ Yawe Nug Moses amegppa anam aum, amge Moses nug Yawe amegppa inam aum. “Antte! Da oɗel uug ele; da Paro amegppa nai tutukku madikkulnu elele iitta amunu, da attem hein, Paro nug dahil nai dookkunu dabmekkul?” awa aum.