Eksodas 40 - Nobonob Baibel

Mettid haknu peh lag qabappignu nai

¹ Ag amu oh hena malaeg, dimppa Yawe Nug Moses amegppa aum.

² “Doye, kalam digmaknu deɗ digmakppa, na dahil mettid haknu peh lag, amuam dahil mettid haknu peh lag danab ah appa qagmetteb ele, na lag amu aon qappe!” awa aum.

³ Yawe Nug nuhig mettid haknu peh lag qappaknu ana, Nug nai tuɗitta aum. “Na mettid haknu peh lag amu oh qappona, na Tituanak Nainu Kunup kontrak inak ele, na amu aon, dahil mettid haknu peh lag ooppa mewon, Na Oo Gun Ele, Oo Gunnab Ele makkulaknu lamen, nainu kunup amu qehagkkunu, na amu aihe!

⁴ Aihona, na balal ⌊epeɗiaknab⌋ aon, mettid haknu peh lag ooppa nona mewona, keeke balal ⌊epeɗiaknab⌋ amuppa daakkunu daatte amu, na amu ele akkan, balal ⌊epeɗiaknab,⌋ amuppa me! Na amu mewona, amu na lam maattaknu balal aon, mettid haknu peh lag ooppa dona, ⌊abenppa mewona,⌋ lam ebekkudppa maatte!

⁵ Aria, na amu hewona, na kalu muttuɗig enanag ileb baknu qaɗab golppa hak aon, Tituanak Nainu Kunup kontrak inak ele daatte, amu eleleppa, Oo Gun Ele, Oo Gunnab Ele makkulaknu lamen, amu heqo laih Oo Gun Eleppa mekkut. Mewon, aria lamen dahil mettid haknu peh lag od oɗeppa daakkunu daatte amu, na lamen amu aihe!

⁶ Amu dimppa amu, na manaknu ofa haknu qaɗab dahil mettid haknu peh lag, amuam dahil mettid haknu peh lag danab ah appa qagmetteb ele, na mettid haknu peh lag amunu od gukkuittak lag dimittim me!

⁷ Na amu hewona, na le layaknu tappiɗ okkai aon, dahil mettid haknu peh lag danab ah appa qagmetteb ele, peh lag amu, amu mana mettaknu qaɗab ele gamalahppa mena, le ele goɗappe dayaɗ!

⁸ Amu na amu hena malona, na dahil mettid haknu peh lagnu haɗap talilittaknu aɗ qappona, na haɗapnu aɗ od oɗeppan lamen ele aihe!

⁹ Aria, dimppa na laittaknu goɗen aon, dahil mettid haknu peh lag, amu ooppan keeke daatteb ele, na amu oh dahilnu tituanna meɗakkutnu, na goɗen gokkaɗakppa tituanadna, na dahilnu tituanna meɗe! Na anam heppe, dahil mettid haknu peh lag, nuhig keeke oh ele, am dahilnu tituana mettak daaglag.

¹⁰ Na amu hewona, na goɗen amu aon, manaknu ofa haknu qaɗab, nuhig keeke naunau oh ele, na goɗen gokkaɗakppa tituanak hena, dahilnu tituanna meɗe! Na anam heppe, qaɗab amuam dahilnu tituanaknab daakku.

¹¹ Anamib le layak tappiɗ okkai daatte, baeg ele amu, na goɗen gokkaɗakppa tituanak hekkut. Na amu hena, na keeke amu dahilnu tituanna meɗe!

¹² Aria, dimppa na Aron nug bekkod ele omaladna, dahil mettid haknu peh lag danab ah appa qagmetteb ele, na ag lag amu odppa gona heppe, ag beɗulag leppa iheg!

¹³ Na ag leppa ihadna malan, na Aron, nug mana mettak uɗat dahil hekkunu amu, na nug aon, na nug mana mettak danabnu lamen, dahilnu tituanak daatteb, nug lamen amu nug beɗuppa aɗuidppe noob, na laittaknu goɗen aon goɗen gokkaɗakppa tituanidna, nug dahilnu tituanna meɗe!

¹⁴ Amu dimppa amu, na Aron bekkod, na ag diippe, miag doppeg, na lamen nakok elab amu, na lamen amu ag beɗulagppa aɗualadppe noppeg,

¹⁵ amu na ag mamelagppa heme bia, na ag dahil mana mettak uɗat hekkulagnu, na goɗen gokkaɗakppa tituanadkkut. Goɗenppa tituanak amuam, buɗub buɗub doobob, ag buɗulkad dimppa bekkulag amu, ag hanhan dahil mana mettak danab daaglagnu goɗen gokkaɗakppa tituana awak daakku,” awa aum.

¹⁶ Yawe Nug anam aum, aria Moses nug nai amu doya, nug keeke oh Yawe haknunab aum, nug aumbianab aakku heum.

¹⁷ Israel ag Isipnu ahan goppig, dimppa maɗ laippu uue, maɗ aɗit digmakppanab, kalam anuqaknu deɗ anuqakppa, ag mettid haknu peh lag qabappig.

¹⁸ Amu haen Moses nug mettid haknu peh lag qappom ele amu, tatam nug gililnu ukku galaglagnu diig ɠagattag daakkunu tatap wanppa maattowa, nug gilil ukku baelkad yaalatte, ag diig ɠagattag daakkunu tatap-ppa noeg galattowa, nug emaitak maknu ad elab ebehi gamagppa ma, biidod aben adekkuppa daaglagnu daappig amu, nug amu ele qappalattom. ⌊Nug amu ha mala, nug mettid haknu peh lagnu lamen okkai taiettom.⌋

¹⁹ Nug amu oh hewowa, aria nug lamen okkai meeme uɗigppa hak awa, mettid haknu peh lag lamenppa hak qaɗeppa me tonom. Me tone, nug tonaknu keeke aɗit laa, doɗ gaɗappa hak ele amu, nug keeke aɗit amu tatam tatualata, aa keeke amu oh tonaglahnu, nug attan duqatom. Yawe Nug Moses amegppa haknunab aum, nug aumbianab aakku heum.

²⁰ Aria, amu dimppa Moses nug men maha aɗit, Yawe Nug amuppa ɗo nai yom amu, nug amu awa, Tituanak Nainu Kunup ooppa ina, nug tuqai aɗit awa, Tituanak Nainu Kunup, amunu ring aɗit heqo laih laih amuppa aɗate waeh, nug kunup ameg kunup attan meum. Ameg amuam eheɗ haknu nob nau tiigppa iitta me elele medatte ippunadtte.

²¹ Nug anam hewowa, nug Tituanak Nainu Kunup kontrak inak ele mettid haknu peh lag ooppa mewowa, nug Oo Gun Ele, Oo Gunnab Ele makkulaknu lamen, Tituanak Nainu Kunup amu miag atiak daamanu, qehakkak daakkunu ele aihom. Nug Yawe nug amegppa haknunab aum, nug aumbianab aakku heum.

²² Amu dimppa, amu Moses nug balal ⌊epeɗiaknab⌋ awa, mettid haknu peh lag danab ah appa qagmetteb ele, nug balal ⌊epeɗiaknab⌋ amu, mettid haknu peh lag ooppa Oo Gun Ele heqo laih, ulah yawalti uɗitteppanu, Oo Gun Ele, Oo Gunnab ele makkulaknu lamen guguittak, appa mewowa,

²³ nug bret, bret amuam Yawe Nug ina daattenu ippuanattaknu bret amu, nug bret amu balal ⌊epeɗiaknab,⌋ amuppa Yawe noobppa meum. Yawe Nug Moses amegppa haknunab aum, nug aumbianab aakku heum.

²⁴ Moses nug anam hewowa, nug lam maattaknu balal awa, mettid haknu peh lag danab ah appa qagmetteb ele, nug lam maattaknu balal amu mettid haknu peh lag ooppa, lag Oo Gun Ele heqo laih, ulah yau uɗitteppanu, laih amuppa balal amu meum. Balal ⌊epeɗiaknab⌋ am laih daye, lam maattaknu balal am laih dayom.

²⁵ Nug anam ha mala, nug lam diia, lam maattaknu balal ebekkudppa Yawe noobppa maattom. Yawe Nug Moses amegppa haknunab aum, nug aumbianab aakku heum.

²⁶ Amu dimppa amu, Moses nug qaɗab, golppa hak ele mettid haknu peh lag danab ah appa qagmetteb ele, nug lag amu ooppa, Oo Gun Eleppa, Oo Gun Ele, Oo Gunnab Ele makkulaknu lamen guguittak meum.

²⁷ Nug qaɗab amuppa ma, nug kalu danab ile muttuɗig enanag bette ele qaɗab amuppa manom. Yawe Nug Moses amegppa haknunab aum, nug aumbianab aakku heum.

²⁸ Moses nug anam hewowa, nug mettid haknu peh lag odppanu lamen, nug lamen amu aihom.

²⁹ Moses nug amu ha malowa, nug manaknu ofa haknu qaɗab, mettid haknu peh lag danab ah appa qagmetteb ele, nug qaɗab amu mettid haknu peh lag amunu od oɗe guguittak meum. Amu Moses nug qaɗab aguppa mewowa, nug manaknu ofa, amu ee aegnu ofa ele mana, Yawe mettom. Yawe Nug Moses amegppa haknunab aum, nug aumbianab aakku heum.

³⁰ Amu dimppa amu, Moses nug le layaknu tappiɗ okkai mettid haknu peh lag danab ah appa qagmetteb ele, nug tappiɗ amu lag amu odppa, mana mettaknu qaɗab ele gamalahppa meum. Nug ma amu, nug le ihaknu amuppa gokkaɗe noum.

³¹ Le aguppa gokkaɗe no amu, Moses Aron ele, amu Aron bekkod ele, ag le amuppa ag eppelag, baelag ele ihappig.

³² Haen ag mettid haknu peh lag danab ah appa qagmetteb ele, ag lag amu ooppa nokkulag heppig, o qaɗabppa wakkulagnu heppig amu, ag tatam eppelag, baelag ele ihan wadappig. Yawe Nug Moses amegppa haknunab aum, ag Nug aumbianab aakku heppig.

³³ Moses nug amu oh ha malowa, nug mettid haknu peh lagnu haɗapnu aɗ ⌊lamenppa hak⌋ mettid haknu peh lag amu, mana mettaknu qaɗab ele taliliat-tte ele amu, nug aɗ amu qappowa, nug haɗapnu od oɗenu lamen ele aihom. Moses nug amu oh ha male, qappak uɗat amu aakku iitta meum.

Lombig mettid haknu peh lag tonom

³⁴ Moses nug mettid haknu peh lag amu anam ha male amu, lombig na, mettid haknu peh lag tone, Yawenu binag amahlak oppiaawak ele mettid haknu peh lag amu ohppa amba dayom.

³⁵ Anam daye amu, Moses nug ukka, mettid haknu peh lag danab ah appa qagmetteb ele ooppa nokkunu elele iitta. Aɗinu? Lombig, Yawenu binag amahlak oppiaawak ele, amu ele lag amuppa daapiɗ.

³⁶ Aria, haen oh Israel ag oippig ele amu, Yawe Nug he, lombig nug mettid haknu peh lag ikkippanu aha ukke anidna amu, Israel ag ahan, keeke oh aon, lombig dim lamidna goppig,

³⁷ amge lombig nug mettid haknu peh lag ii uuittomppa amu, ag ahan, aben amu uun ii goppig. Ag lombig nug mettid haknu peh lag am uuitta aheb, aria ag ele ahan, lombig dim lamidna goppig.

³⁸ Anam amunu, Yawenu lombig am amunppa mettid haknu peh lag attan dayeye, tuqan amu aab ewak am lombigppa dayeye, Israel danab ah ag anam anidppig. Lombig anamib aakku dayeye, ag gona, wan Yawe Nug ag madakkunu aum, ag amuppa teppig batak.