Eksodas 39 - Nobonob Baibel

Mana mettak danab lamen heppignu nai

¹ Amu ag linen muɗi kaala iɗu iɗu, am ed, perpel, kokoɗnab ele amu, ag muɗi amuppa mana mettak danab ag Yawenu mettid haknu peh laugppa nuhig ɗo maɗoɗnu uɗat hekkulagnu agappig. Ag lamen Aron nug ma, uɗat amu hekkunu heppig. Lamen amuam Yawenu tituanak daatteb. Yawe Nug Moses amegppa haknunab aum, ag Nug aumbianab aakku heppig.

Lamen enanag-epod haknu nai

² Amu lamen haknu danab ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, am muɗi golppa hak ele, ag muɗi amu aona, ag lamen enanag-epod heppig.

³ Ag gol aon, ag hamappa qaattegeg, teppu iittanab daye, ag otaɗeg naunaunab, muɗi bia daye, ag muɗi gol amu aon, linen muɗi hakkab, am linen muɗi kaala iɗu iɗu, am ed, perpel, kokoɗnab ele amu, ag amu oh aon akkanna, ag gol amu ele agappig. Amu oh am, danab ag lamen akkaknu doyak okkainab ele, ahilagppan hak.

⁴ Lamen amunu amu, ⌊ag momo, gome ele tonaknu qatti aɗit haatona,⌋ ag honap qakkaglagnu ag gukka laih laih tonaknu qatti aɗit ele haatona, amu aria, ag amu lamen laippu daakkunu, ag lamen qatti aɗit laa daug daugppa ele anam koitatppig.

⁵ Ag amu hena, amu nuhig lamen nakok elab enanag, imuagppa matagiɗ bia qakkaknu, lamen amuam lamen enanag-epod ele laippu henana, ag laa heppig bia heppig. Ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, am muɗi golppa hak ele, ag muɗi amu oh aon, imuagppa qakkaknu lamen heppig. Yawe Nug Moses amegppa haknunab aum, ag Nug aumbianab aakku heppig.

⁶ Ag amu hewona, ag men oniks aɗit diiatna, Israel, ⌊onig laa Jakop, nug⌋ bekkod 12 onilag amuppa otaɗna, ag gol aon, aɗalataknu bala enanag nakok aɗit laa hena, ag men aɗit amu maateg daapiɗ.

⁷ Ag amu hewona amu, ag men aɗit amu lamen enanag-epodnu qatti aɗit gukka laih laih tonat-ttep amu, ag amuppa qakkalatppig; am geha Israel dilag huu okkai 12 dilag at aakku daapiɗ. Yawe Nug Moses amegppa haknunab aum, ag Nug aumbianab aakku heppig.

Momo tonaknu lamen heppignu nai

⁸ Ag amu hena, ag momo tonaknu lamen ele heppig. Danab lamen akkaknu doyak okkainab ele, ag amu heppig. Ag hekkulagnu amu, ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, am muɗi golppa hak ele aon, lamen amu, ag lamen enanag-epod heppig bianab, ag lamen imu ele anamib heppig.

⁹ Ag lamen imu henana amu, ag elab nuhig amu 44 sentimita hena, emaitak nuhig am 22 sentimita hena, ag lamen amu tutukku gamagppa qeeg, teppu ele, lamen aɗitnu teppu, teppu anam dayom. Laih laih oh am 22 sentimita dayom.

^10-13 Ag amu hewona amu, ag men digdig, daden nob okkainab ele, ag men amu huu waɗeleppa lamen amuppa qakkaladppig. Huu anuqakppa am men rubi, men topas men ganet ele daappig. Aria, huu aɗitppa amu, men emeral, men sapaia, men daimon ele daappig. Huu ewamppa amu, men tekois, men aget men ametis ele daappig. Am huu waɗeleppa amu, men beril, men oniks, amen jaspa ele daappig. Amu ag men laib laib bala gol enanag kobol kobol ele amuppa qakkalattona, dimppa ag amuppa men lamenppa qakkaladppig.

¹⁴ Aria, men 12 amu laib laib ohppa ag Israel bekkod onilag, laa onig am men laappa, laa onig am men laappa, ag anam otaɗatteg ukke, ag Jakop bekkod nid danab 12 amu onilag otaɗadna malaeg, ag anen anen Israel dilag huu okkai 12 dilag at daappig.

¹⁵ Aria, ag gol ena dubuttid iitta ele aona, sen aɗit muɗi agatteb bia momo tonaknu lamennu ele haatppig.

¹⁶ Ag sen amu hena, ag gol ring aɗit, bala kobol kobol ele hena, momo tonaknu lamen amu attan qaɗeppa, daug laih laihppa qakkalatppig.

¹⁷ Ag amuppa qakkalatona, aria ag gol sen aɗit amu, ag ring aɗit amuppa momo tonaknu lamen daug daugppa qakkalatppig.

¹⁸ Ag amu hewona, ag gol sen noob aɗit laih laih amuppa amu, gol bala aɗit lamen enanag-epodnu qatti aɗit gukka laih laih tonat-ttep amu, ag bala gukka laih laih amuppa qakkalateg, sen aɗit amu, aa aakku momoppa daapiɗ. Gomeppa ii daapiɗ.

¹⁹ Amu ag gol ring aɗit baula hena, ag momo tonaknu lamen daug laih honap nak daatte, amu waappa daug laih laih lamen enanag-epod qaɗeppa, amge momo tonaknu lamenppa qakkalatppig.

²⁰ Aria, ag gol ring aɗit baula ele hena, ag lamen enanag-epodnu qatti aɗit gukka laih laih tonat-ttep amu, ag amunu danab ooppa, gomeppa iitta, daug koitak ele laih laih honap nak daattep, nuhig lamen nakok elab imuagppa matagiɗ bia qakkaknu, amu guguittak, appa qakkalatppig.

²¹ Ag amu hewona amu, ag muɗi ed ele aon, ring aɗit momo tonaknu lamenppa qakkatak daattep, aria ring aɗit lamen enanag-epod, amuppa qakkak daattep ele, ag muɗi amu aon, ag ring aɗit aɗit amu, ag muɗi amuppa aɗit aɗit qakkalatppig. Aria, ag amu anam qakkaeg, amu geha momo tonaknu lamen am ɠagattag, lamen enanag-epod qaɗeppa qataqak lamen nakok elab imuagppa matagiɗ bia qakkaknu, amu qaɗeppa dayaya, ilul ii eum. Yawe Nug Moses amegppa haknunab aum, ag aumbianab aakku heppig.

Mana mettak danab dilag lamen laa heppignu nai

²² Ag amu hena amu, ag lamen elab lamen enanag-epod waappa mette ele, ag lamen amu oh muɗi edppa heppig. Danab nug muɗi awa agattenu doyak okkai ele, am nuhigppan hak.

²³ Amu ag oɗe ikki nokkunu gamagppanab hewona, ag muɗi laa aon, oɗe amu daugib koitegeg, oɗe daug amu pattiɗmanu nug teppu ele dayom.

^24-26 Ag hena amu, ag koitaknu muɗi ed, perpel, kokoɗnab ele aon, ag keeke ad pomigranet meu bia akkaladna, ag gol do naunau ele gol ena dubuttid iitta eleppa hattana, ag Aronnu lamen elab honap daugppa pomigranet laa qakkan malona, ag gol do qagappig. Ag anamib talilidna qakkaeg ukkom. Haen Aron nug Yawe noobppa nuhig ɗo maɗoɗnu uɗat hekkunu haaha, nug lamen amu tagakkunu dayom. Yawe Nug Moses amegppa haknunab aum, ag aumbianab aakku heppig.

²⁷ Amu ag Aron, nug bekkod dilagnu ele ag lamen nakok elab ele heppig. Ag linen hakkabppa heppig. Danab nug muɗi awa agattenu doyak okkai ele, am nuhigppan hak.

²⁸ Ag amu hena, ag igippan lamen, linen hakkabppa ikki itaknu lamen, amu lamen trausis tutu bia ele heppig.

²⁹ Aria, ag imuagppan lamen am linen muɗi hakkab, am linen muɗi kaala iɗu iɗu, am ed, perpel, kokoɗnab ele, ag amuppa lamen amu heppig. Danab ag koitak uɗat doon autna aoppig ele amu, ag heppig. Yawe Nug Moses amegppa haknunab aum, ag Nug aumbianab aakku heppig.

³⁰ Ag amu hewona, ag gol ena dubuttid iitta ele maha laa aon, ag tappiɗ otala nag bia, Yawenu tituanak daatte ele hena, amuppa ag, “Yawe Nug imunu, nuhignu tituanak daatte anidtte,” otaɗppig. Keeke amuam Aron, nug Yawenu uɗat danabnabnu at daatte.

³¹ Ag amu hewona, ag muɗi ed aon, tappiɗ otala nag amu igippan lamen, amuppa qagappig. Yawe Nug Moses amegppa haknunab aum, ag Nug aumbianab aakku heppig.

Mettid haknu peh lag, lag amunu keeke ele amu ag uɗat amu hena malappig

³² Mettid haknu peh lag amu, lag amunu uɗat oh anam heeg, uɗat amu aakku malom. Israel ag keeke oh Yawe Nug Moses amegppa haknunab aum, ag Nug aumbianab aakku heppig.

³³ Ag amu oh hena malona, ag keeke amu akkan, Moses toppa ⌊nug anidkkunu⌋ goppig. Keeke ag akkan goppig am inam: mettid haknu peh lag, nuhig keeke ele, nuhig huk-ring, nuhig gililnu ukku, nuhig emaitak maknu ad, nuhig biidod, amu nuhig diig ɠagattag daakkunu tatap ele;

³⁴ laa am, mettid haknu peh lag tonaknu keeke laa sipsip dawai gaɗa, laa ag heeg, kokoɗ eppom daatte, gaɗa amuppa hak, amu mettid haknu peh lag tonakkunu keeke laa kakai maoi gaɗappa hak, amu lamen Oo Gunnab Ele qehagkkunu aihak daakkunu.

³⁵ Aria, keeke laa ag aon uɗippig am, Tituanak Nainu Kunup kontrak inak ele, amunu ameg, ameg amuam eheɗ haknu nob nau tiigppa iitta me elele medatte ippunadtte, amu kunup amu mawaknu tuqai aɗit ele;

³⁶ laa am, balal ⌊epeɗiaknab⌋, balal amunu keeke laa oh ele, amu bret, bret amuam Yawe Nug ina daattenu ippuanattaknu bret;

³⁷ laa am, lam maattaknu balal, gol ena dubuttid iitta eleppa hak, nuhig lam oh, am lamnu keeke laala oh ele, amu lamnu goɗen ele.

³⁸ Aria, ag keeke amu oh aon uɗin, keeke laala ele oolagppan laa am, qaɗab golppa hak ele, laittaknu goɗen ele, kalu muttuɗig enanag ele, amu mettid haknu peh lag odnu lamen laa ele;

³⁹ laa am, qaɗab laa brasppa hak, nuhig keeke naunau, nuhig keeke laa, battam okkai bia brasppa giɗo giɗo ele hak, qaɗab amu mawaknu tuqai aɗit, amu le layaknu tappiɗ okkai, nug baeg ele;

⁴⁰ laa am, mettid haknu peh lagnu haɗap talilittaknu lamen, aɗ amunu biidod, biidodnu diig ɠagattag daakkunu tatap, amu lamen laa aɗ odppa daakkunu ele, amu aɗ amunu muɗi, pin elab ele. Aria, keeke oh mettid haknu peh lag danab ah appa qagmetteb ele, lag amunu ooppan keeke oh.

⁴¹ Aria, keeke laa ag aon uɗippig am, lamen akkakppa hak, lamen amuam Yawenu tituanak daatteb, mana mettak danab Aron, nug bekkod ele, haen ag Yawenu mettid haknu peh lagppa Yawenu ɗo maɗoɗnu uɗat henana, mekkulagnu daatteb.

⁴² Israel ag uɗat oh Yawe Nug Moses amegppa ag hekkulagnu haknunab aum amu, ag anamnab aakku heppig.

⁴³ Amu ag keeke amu oh akkan uɗieg, Moses nug ag keeke oh Yawe nug amegppa haknunab aumbianab heppig anttom. Nug anam antta, nug ag itattom.