Eksodas 38 - Nobonob Baibel

Manaknu ofa haknu qaɗab heppignu nai

¹ Amu ag ad akasia aon, manaknu ofa haknu qaɗab, elab nuhig am 2 mita, 20 sentimita ele, emaitak nuhig am ele 2 mita, 20 sentimita ele, amu attan nuhig am 1 mita, 30 sentimita ele, ag qaɗab amu heppig. Elab nuhig am emaitak nuhigbiaib dayom.

² Ag henana amu, ag qaɗab ad akasiappa hetteb, ag ad amuppaib ag keeke makau qeqeɗi bia waɗele qaɗabnu daug waɗele ohppa hoippig. Ag ad piɗenu hoyadna, qaɗabppa ii atulppig. Iitta. Ag laippu heppig. Ag amu oh hewona, ag qaɗab amu oh brasppa tonappig.

³ Ag qaɗab amu hena, ag brasib aon, tappiɗ okkai laala hewona, sabol naunau, tiig amuppanu awa tauɗeb ukkaknu tappiɗ, huɗup ele hena, aria, tappiɗ nakok, aab ma mawa ukkaknu amu, ag amu oh ele heppig.

^4-5 Amu ag qaɗab hena, ag nuhig keeke laa, battam okkai bia, ag keeke amu brasppa giɗo giɗo ele heppig. Ag hewona, ag ring bras waɗele hattana, ag keeke battam okkai bia daug waɗele, amu ohppa qaɗab mawa ukkaknu ad aɗit amu oɗelagppa aɗualatppeg nokkulahnu maadna, keeke battam bia amu aɗan, qaɗab amu ooppa paɗaeg noum. Ag paɗaeg noono, keeke battam okkai bia bitob am qaɗab gamagppa, attan iitta, honap ele iitta, nug anam noa dayeye, keeke battam okkai bia oɗe am qaɗab agappan maha, otala nakok okkai ele amu, am amu waappa dayom.

⁶ Aria, ag ad akasia maha aɗit aon hoyatna, brasppa tonatppig.

⁷ Ag hena amu, ag qaɗab maoglagnu amu, ag tuqai aɗit amu aon, ring oɗeppa laih laih maatppig. Ag qaɗab amu plangppa kunup bia heppig, amge ag kunup ameg waappa, attan ele ii meppig. Ag uueg, hamu anam daapiɗ.

Tappiɗ brasppa heppignu nai

⁸ Ag amu hena, ag tappiɗ okkai, nug baeg ele brasppa heppig. Ag amu hekkulagnu bras aoppig ele amu, ag ah ag mettid haknu peh lag danab ah appa qagmetteb ele, ag lag amu odppa daanna, danab ah uɗitteb ele ehanadtteb amu, ag lettod brasppa hak ahilag mattaeg akkan, aon uɗieg, doyak danab ag amu aon, ag bras amuppa keeke amu heppig.

Yawenu mettid haknu peh lagnu aɗ heppignu nai

⁹ Aria laa amu, ag lamen laala, lamen amuam mettid haknu peh lag, amunu haɗapnu aɗ bia daakkunu linen muɗi hakkab eleppa agappig. Am lamen laa, am aben laih ulah yau uɗitteppanu daakku amu, lamen amu, elab nuhig am 44 mita dayom.

¹⁰ Ag amu hena, ag biidod 20 ele hattana, ag biidod amu aon, diig ɠagattag daakkunu tatap oɗelkadppa aɗualadppeg nona, ɠagattag daaglagnu tatap brasppa hak 20 ele hadappig. Ag silwa ele aon, ag huk, ring ele lamen aihaknu ele hattana, ag biidodppa qata-aqadppig!

¹¹ Amu lamen laa, am aben laih ulah yawalti uɗitteppanu daakkunu amu, lamen amu ele elab nuhig am 44 mita dayom. Amu amuppa ele biidod 20, diig ɠagattag daakkunu tatap 20 brasppa hak, amu biidodppa silwa huk, ring ele qata-aqaeg daappig.

¹² Aria, lamen laa, am laih qaban uɗitteppanu daakku amu, ag lamen amu, elab nuhig 22 mita heppig. Ag hena, ag biidod eblaih laih hoyadna, diig ɠagattag daakkunu tatap brasppa hak eblaih laih ele, ele heppig. Amu biidodppa silwa huk, ring ele qata-aqak daappig.

¹³ Amu laih kaɗag uɗitteppanu, aben od daatte ele amu, nuhig melemel, amu ele 22 mita dayom.

^14-15 Amu haɗapnu od heqo laih laih lamen aɗit aihatkkulagnu heppig amu, elab ahilah anen anen am 6 mita, 60 sentimita ele. Ag lamen laanu biidod ewam, diig ɠagattag daakkunu tatap ewam ele hatteg daaeg, aria lamen laanu am anamib hatteg daappig.

¹⁶ Ag lamen oh, mettid haknu peh lagnu haɗap talilidppig ele amu, ag lamen amu oh hekkulagnu, ag linen muɗi hakkab aon, agappig.

¹⁷ Amu biidod diilag ɠagattag daakkunu tatap amu, ag bras aon hena, huk, ring ele biidodppa qata-aqak daappig ele, amu oh am silwappa hattak. Biidod igippa ele ag silwa aon, tonadna, emaitak maknu ad ele amuppa tonappig.

¹⁸ Aria, haɗapnu od oɗe qehakkaknu amu, ag lamen laa, elab nuhig 9 mita amu, ag lamen amu agappig. Lamen amunu emaitak am 2 mita, 20 sentimita ele; amuam mettid haknu peh lagnu aɗnu lamen bia. Ag hekkulagnu amu, ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, ag muɗi amu oh aon, ag lamen amu agappig. Ag akkona amu, ag lamen koitaknu doya autanab awak danab mattaeg, ag amuppa kobol kobol ele koitadppig.

¹⁹ Amu lamen amu aihaknu am biidod waɗele, diig ɠagattag daakkunu tatap waɗele ele daappig. Amu huk, ring ele biidodppa qata-aqak daappig ele amu, am oh am silwappa hak. Biidod igippa ele am silwa tonak dayom.

²⁰ Aria, pin elab mettid haknu peh lag taietteb, ɠagattag qaadkkunu, amu aɗ lag amunu haɗap talilidtte elenu pin elab ele amu, amu oh am brasppa hak aakkuib.

Gol, silwa keeke ag aon, amuppa mettid haknu peh lag, lag amunu keeke ele heppignu nai

²¹ Imuam keeke oh ag Kayaknu mettid haknu peh lag, amuam mettid haknu peh lag men maha aɗit ɗo nai yaak niitte ele appa daattep, ag peh lag amu hekkulagnu keeke aon, uɗat medappignu ebqak. Moses nug Lewi buɗub amelagppa haknunab a, ag Aron, nug am mana mettak danab, ag nug bekka Itamar waappa daan, keeke amu oh ebqena yaappig.

²² Besalel, nug Uri bekka, Hur alag, nug Israel dilag huu okkai Juda danab amu, nug keeke oh Yawe Nug Moses amegppa haknunab aum amu, nug uɗat amu ohnu okkai dayom.

²³ Nuhig ehanittak am Oholiap, nug am Ahisamak bekka; nug am Israel dilag huu okkai Dannu danab. Oholiap nug danab uɗat laala haknu doyak okkai ele, amu nug keeke attem bekkunu ⌊pepappa⌋ dottog haknu doyak danab ele. Aria, nug linen muɗi hakkab, am linen muɗi kaala iɗu iɗu, am ed, perpel, kokoɗnab ele, nug muɗi amu awa, kobol kobol lamen laappa koitaknu doya autanab awak danab ele.

²⁴ Amu gol oh, danab ah ag mettid haknu peh lag haknu akkan uɗin, amuppa huma epponitta mettaknu ofa heppig amu, uug nuhig am 1,000 kilogram. Gol amunu uug am, mana mettak lagnu melemel bia dayom.

^25-26 Am silwa, nuhig uug am 3,400 kilogram. Silwa amunu uug am, mana mettak lagnu melemel bia dayom. Silwa amuam danab onilag bukppa yaappig, amu dilagppanu uɗiom. Danab amu, ag ag onilag bukppa yaappig ele amu, ag ahilag maɗ 20, amu 20 eɗittak ele, ag anen anen ag 6 gram silwa, amuam beka laippu, eppig. Beka amunu uug am, mana mettak lagnu melemel bia dayom. Danab amu oh, ahilag ebqak am 603,550.

²⁷ Ag diig ɠagattag daakkunu tatap 100, keeke amuam mettid haknu peh lagnu ukku, amu lamen Oo Gunnab Ele qehagkkunu aihak daakkunu biidod ele aɗaglagnu amu, ag keeke amu 100 hattaglagnu, ag silwa 3,400 kilogram aon heppig. Silwa maha diig ɠagattag daakkunu tatap laippunu am 34 kilogram.

²⁸ Silwa big dayom, nuhig uug am 20 kilogram amu, ag amu aon, ag biidodnu huk, ring ele hattana, ag biidod ikkilkad amuppa ele tonappig.

²⁹ Amu bras, danab ah ag aon uɗin, amuppa ag huma epponitta mettaknu ofa heppig ele amu, uug nuhig am 2,400 kilogram.

³⁰ Ag bras amu aon, ag mettid haknu peh lag danab ah appa qagmetteb ele, ag lag amu odnu biidod diig ɠagattag daakkunu tatap, amu doɗ main Yawe mettaglagnu qaɗab, nuhig keeke battam bia giɗo giɗo ele, amu nuhig keeke laala ele,

³¹ amu mettid haknu peh lagnu haɗap aɗnu biidod ohnu diilkad ɠagattag daakkunu tatap, amu haɗap aɗnu od oɗe lamennu biidod ohnu diilkad ɠagattag daakkunu tatap ele, amu mettid haknu peh lagnu pin elab, nuhig haɗap aɗnu pin oh ele bras amuppa heppig.