Eksodas 37 - Nobonob Baibel

Tituanak Nainu Kunup heppignu nai

¹ Besalel nug ad akasia awa, Tituanak Nainu Kunup, elab nuhig am 110 sentimita, emaitak nuhig am 66 sentimita amu attan nuhig am ele 66 sentimita heum.

² Nug gol ena dubuttid iitta ele awa, Tituanak Nainu Kunup amu ooppa, dimittim ele gaɗa qaɗeppa ma tone, gol laa ele awa, bala kunup taliliak daakkunu ha, kunup-ppa qataqa, talilitte ukkom.

³ Nug amu hewowa, nug gol ring waɗele, kunup mawaknu ele ha, nug Tituanak Nainu Kunup baeg naunau waɗele amuppa qakkalattom. Nug aɗit heqo laih qakkowa, aɗit laa amu heqo laihppa qakkom.

⁴ Amu hewowa, nug ad akasia tuqai aɗit Tituanak Nainu Kunup maoglagnu hoyata, qaɗelah golppa tonatom.

⁵ Nug anam tonata, nug tuqai aɗit amu nug Tituanak Nainu Kunup mawa ukkaknu heqo laih laih ring amu oɗeppa aɗualate nopiɗ.

⁶ Amu nug Tituanak Nainu Kunup amu anam hewowa, nug Tituanak Nainu Kunup amu ameg gol ena dubuttid iitta eleppa heum. Tituanak Nainu Kunup amu ameg, amuam eheɗ haknu nob nau tiigppa iitta me elele medatte ippunadtte. Amu nug ameg amu inam heum. Elab nuhig am 110 sentimita, emaitak nuhig 66 sentimita.

⁷ Nug ameg amu haaha, nug gol amu laa awa, hamappa qaaqa, nug engel okkai-kerubim aɗit, aa dottolah, ameg noob laih laih ele haatom.

⁸ Nug anam haate, laa amu Tituanak Nainu Kunup ameg noob laih hibaitta dayeye, laa amu noob laih hibaitta dayom. Aria, nug Tituanak Nainu Kunup ameg, kerubim aɗit dottolah ele golppa hak amu, nug keeke ewam ii heum. Iitta. Keeke heum amu kunum, laippu aakkuib heum.

⁹ Kerubim aɗit dottolah amu, aa hippaidya, aa nug iɗu neekkidya daayya, aa haulah am otaleh, Tituanak Nainu Kunup ameg amu nakok attan daapiɗ.

Bret Yawe noobppa maknu balal epeɗiaknab heppignu nai

¹⁰ Aria, ag balal ⌊epeɗiaknab⌋ ad akasiappa ele heppig; elab nuhig am 88 sentimita, emaitak nuhig am 44 sentimita, amu attan nuhig am 66 sentimita.

¹¹ Ag balal ⌊epeɗiaknab⌋ amu adppa anam hewona, ag gol ena dubuttid iitta ele aona, balal ⌊epeɗiaknab⌋ amu qaɗeppa meeg tone, gol laa ele aon, bala balal amu taliliak daakkunu hena, balal ⌊epeɗiaknab⌋ daugppa qataqena, talilitteg ukkom.

¹² Aria, ag gol balal ⌊epeɗiaknab⌋ amu waappa amu, ag ⌊balal epeɗiaknab baeg ɠagattag daakkunu⌋ ukku, nuhig otala am 8 sentimita amu, ag ukku amu ⌊baeg waɗele oh⌋ talilidkkunu mena, ag gol aon, bala balal ⌊epeɗiaknab⌋ taliliak daakkunu hena, balal ⌊epeɗiaknab ukku qaɗeppa⌋ qataqena, talilitteg ukkom.

^13-14 Amu ag amu hewona, ag gol ring waɗele ad akasia tuqai aɗitppa balal ⌊epeɗiaknab⌋ maoglagnu hena, daugppa baeg waɗele amu heqoppa qata-aqappig! Ring waɗele amuam ag balal ⌊epeɗiaknab⌋ daugppa ukku guguittak, aguppa maadppig.

¹⁵ Amu ag balal ⌊epeɗiaknab⌋ amu maoglagnu, ag ad akasia maha aɗit hoyatna, ag qaɗelah golppa tonappig.

¹⁶ Amu ag wain gokkaɗaknu ofa haknu tappiɗ okkai, tappiɗ naunau, kap, amu nippud ele, keeke amu oh am balal ⌊epeɗiaknab⌋ amuppa daaglagnu amu, ag keeke amu oh hadappig. Ag keeke amu oh gol ena dubuttid iitta eleppaib hadappig.

Lam maknu balal heppignu nai

¹⁷ Aria, laa amu, ag lam maattaknu balal heppig. Ag gol ena dubuttid iitta ele aon, hamappa qaadnana, ag diig, imuag, ebekkud, amu bala haɗag mabatak bia nuhig ele gol amuppaib heppig. Ag keeke amu oh am laippu heppig. Ag anen anen hena, qata-ii-aqadppig.

¹⁸ Amu lam maattaknu balalppa amu, ag ebekkud eblaih laippu ele heppig; ewam laih daaeg, ewam laih daappig.

¹⁹ Ebekkud eblaih laippu ele ag anam daaeg, eppeg anen anen ohppa amu, almonnu bala haɗag mabatak bia ewam daappig.

²⁰ Bala ag anam ebekkudppa daaeg, imuagppa almonnu bala haɗag mabatak waɗele daappig.

²¹ Aria, ebekuɗ anen anen imuagppa tuɗittak waappa, almonnu bala haɗag mabatak bia ele daappig.

²² Keeke amu oh anamib dayom, amge ag hama aon, gol ena dubuttid iitta qenana, ag keeke amu hatteg, keeke laippuib dayom. Ag amu nukka nukka piɗe hewon, qata-ii-aqadppig.

²³ Ag amu oh hewona amu, ag lam eblaih aɗit ele aguppa maadkkulagnu hattana, ag lam wik eeɗaknu keeke amu, nuhig tappiɗ ele, ag gol ena dubuttid iitta eleppaib hadappig.

²⁴ Ag gol ena dubuttid iitta ele, uug nuhig 34 kilogram aon, lam maattaknu balal amu hena, nuhig keeke laala ele heppig.

Kalu muttuɗig enanag ileb baknu qaɗabnu nai

²⁵ Amu ag ad akasia aon, qaɗab laa, amuam kalu muttuɗig enanag ileb baknu qaɗab, ag amu ele heppig. Qaɗab amu elab nuhig am 45 sentimita, emaitak nuhig amu 45 sentimita, amu attan nuhig amu 90 sentimita. Elab nuhig, emaitak nuhig ele am laippu. Amu keeke makau qeqeɗi bia ⌊waɗele qaɗab agappa, daug waɗeleppa⌋ amu oh qaɗab ele laippuib daaglagnu ele hoippig.

²⁶ Ag amu hena, ag qaɗab amu qaɗeppa, daug daug ele, amu makau qeqeɗi waɗele amuppa ele gol ena dubuttid iitta ele aon tonan, gol laa ele aon, bala qaɗab taliliak daakkunu hena, qaɗabppa qataqena, talilitteg ukkom.

²⁷ Ag amu hena, ag qaɗab tuqaippa mawaknu amu, ag gol ring aɗit hena, tuqai aɗit ring oɗeppa yaalatppeg goya daapeɗ mawaknu amu, ag ring laa laihppa gol bala qataqak ele waappa qakkon, laa amu ag laihppa gol bala waappa qagappig.

²⁸ Ag maoglagnu tuqai hekkulagnu amu, ag akasia ad maha aɗit aon hoina, qaɗeppa gol aon tonatppig.

Danab beɗulag laittaknu goɗen, amu kalu danab ile muttuɗig enanag bette ele bappaidppignu nai

²⁹ Aria, ag amu hena, ag laittaknu goɗen Yawenu tituanak daatte ele, amu kalu muttuɗig enanagnab, dubuttid iitta ele, ag amu oh ele heppig. Amunu haknu doyak danab laa, nug amu heum.