Eksodas 36 - Nobonob Baibel

¹ Yawe Nug Besalel, Oholiap am danab laala ele ag mettid haknu peh lag, amu lag amunu keeke ele oh, Yawe Nug aumbianab hekkulagnu doyak ena, dabmak ena ele mattom amunu, Nug haknunab aumbianab, ag uɗat amu heig!” awa aum.

Danab ah ag keeke kuɗumnab aon uɗippig

² Moses nug danab ah amelagppa anam ana, amu dimppa nug Besalel Oholiap ele onilahppa ewa, nug danab laala ag uɗin, uɗat amu hekkulagnu oolag dayom, Yawe he, ag uɗat amu haknu doon autna aoppig ele amu, nug ag onilagppa ele eum.

³ Nug e, ag uɗieg, Moses nug danab ah keeke Yawe mettaglagnu, mettid haknu peh lag hekkulagnu aon uɗippig ele amu, nug keeke amu oh danab amu eppelagppa meum. Nug eppelagppa me, am Israel danab ah ag tuɗidna, deɗ oh buttua, ɗo hamu mettaknu ofa amu hena, akkan uɗin, Yawe medattappig.

⁴ Ag anam heegeg, danab uɗatnu doyak okkainab ele ag mettid haknu peh lag henana, keeke huanak anam anidna, ag uɗat ag heppig amu ag uun,

⁵ ag uɗin, Moses amegppa inam appig. “Danab ah ag keeke kuɗumnab akkan uɗitteb. Keeke laala Yawe Nug ig lag imu hekkunignu amenigppa haknunab aum amu, ag elelenab akkan uɗippig. Am geha keeke kuɗum laala hamu daakku,” aon appig.

⁶ Ag anam aeg amu, Moses nug nai me, Israel haen tutu dayaknu aab kalakppa daatteb ohppa ukke, nug inam aum. “Danab ah ag baula mettid haknu peh lag haknu keeke, ofa daakkunu, aib aon uɗippig,” awa aum. Am Israel danab ah ag nai amu a doona, ag keeke baula akkan ii uɗippig.

⁷ Keeke danab ah akkan uɗippig amu, amuam mettid haknu peh lagnu uɗat ohnu haknu elelenab. Am keeke gane awaknu melemel eɗitta, laala hamu dayom.

Ag mettid haknu peh lag heppignu nai

⁸ Amu keeke haknu doyak danab ag mettid haknu peh lag aakku heppig. Ag peh lag amu hekkulagnu, ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, ag muɗi amu oh aona, ag lamen eblaih laih ele oh amuppa agappig. Ag lamen eblaih laih ele amu akkona, ag lamen qaɗeppa bala koitaknu, ag danab amu haknu doyak okkainab ele mattaeg, ag engel okkai-kerubim dottog lamen amuppa koitadppig.

⁹ Ag lamen eblaih laih ele amu oh melemel laippuppa agappig. Elab ahilag am 12 mita, aria okkai ahilag am 2 mita.

¹⁰ Aria, ag lamen amu hena malona, ag lamen tanig ele aon, daug daugppa koitatteg ukka, emaitak okkai daye, ag lamen tanig ele laa ele aon, anamib koitadppig.

¹¹ Amu lamen otala okkai aɗit amu tuɗidkkulagnu, ag lamen qatti 50 edppa hak aon, ag lamen okkai laa, lamen amu daugppa, ag lamen qatti amu ring bia koitadppig. Ag amu hewona amu, ag lamen otala okkai laappa, lamen amu daugppa ele anamib heppig.

¹² Ag lamen qatti 50 amu aon, lamen otala okkai laappa koitattona, 50 laa amu ag lamen otala okkai laa amuppa koitadppig, amu lamen qatti lamen otala okkai laappa daatteb, lamen qatti 50 lamen otala okkai laappa daatteb ele amu, ag oh anen anen nug noob yaak daappig.

¹³ Ag amu hewona amu ag huk-ring 50 golppa hadappig. Ag hattana amu, ag lamen otala okkai aɗit amu amuppa qakkatna, ⌊ebehi attan daug daug ele⌋ duqateg, geha lamen aɗit amu, aa lamen okkai laippu mettid haknu peh lag daakkunu daapiɗ.

¹⁴ Aria dimppa ag lamen laa, mettid haknu peh lag tonakkunu henana, ag lamen 11 meeme uɗigppa heppig.

¹⁵ Ag lamen amu oh, ahilag ebqak am 11 amu, ag amu oh melemel laippuppa hadappig. Elab ahilag am 13 mita, okkai ahilag am 2 mita.

¹⁶ Ag amu hena, ag lamen tanig ele aon koitatteg, geha lamen okkai laippu daye, ag lamen eblaih laippu ele laa amu aon, oh laippu koitatteg, am geha, amu ele lamen okkai laippu dayom.

¹⁷ Aria, lamen ring 50 amu batakppan lamen okkai laa daugppa koitattona, ag lamen ring 50 laa amu, batakppan lamen okkai laa daugppa ele koitadppig.

¹⁸ Aria, ag bras huk-ring 50 hatteg, huk-ring ag lamen ringppa noeg, lamen okkai aɗit amu, amuppa oh qakkalateg, lamen laippu dayom.

¹⁹ Ag amu oh hewona amu, ag keeke aɗit laa ele mettid haknu peh lag tonakkunu heppig. Ag laa sipsip dawai gaɗappa, laa ag heeg, kokoɗ eppom daatte ele, amuppa ag peh lag laa hewona, aria ag peh lag laa kakai maoi gaɗappa heppig. Aɗit amu oh, aa am laa qaɗeppa nug tonak daapiɗ.

²⁰ Ag anam hena, ag mettid haknu peh lag amu qabappeg daakkunu, ag gililnu ukku kuɗum, mettid haknu peh lag amunu ebehi daaglagnu ad akasiappa heppig.

²¹ Gililnu ukku amu oh, ahilag elab am 4 mita, aria, ahilag emaitak am 66 sentimita.

²² Amu ag gililnu ukku anen anen henana, ag gililnu ukku diigppa baeg aɗit daaglahnu, ag akasia ad honap emaitak buuidkkulagnu nakok aɗaeg be, ag amuppa buuitteg, baeg aɗit aakku daapiɗ. Baeg aɗit amu, aa oh tutukku elele elele daapiɗ. Baeg aɗit amu, aa diilah aɗa daakkunu tatap oɗeppa noya, ɠagattag daapiɗ. Ag gililnu ukku oh anamib hadappig.

²³ Ag henana, ag gililnu ukku dahil mettid haknu peh lagnu gilil laa, laih ulah yau uɗitteppanu daatte amu, ag gilil amunu gililnu ukku 20 bappaidppig.

²⁴ Bappaidna amu, ag silwa aon, gilil amunu ukku baelkad amuppa galadkkulagnu, ukkunu diig ɠagattag daakkunu, ag tatap 40 silwa amuppa hadappig. Diig ɠagattag daakkunu tatap aɗit gililnu ukku anen anen waappa daaglahnu daapiɗ.

^25-26 Amu ag hena, ag gilil heqo laih yawalti uɗitteppanu daatte amu, ag amunu ele anamib heppig. Ag gililnu ukku 20 aon babaittona, ag gililnu ukku diig ɠagattag daakkunu tatap 40 silwappa ele heppig. Ag diig ɠagattag daakkunu tatap aɗit gililnu ukku laippu waappa mekkulagnu bappaidppig.

²⁷ Aria, ag gililnu ukku eblaih laippu ele, ag dahil mettid haknu peh lag bitobppanu, ulah qaban uɗitteppanu daatte amu, ag amunu hewona,

²⁸ ag gililnu ukku aɗit laa ele, mettid haknu peh lag bitobppanu uttug aɗitppa gililnu ukku daattep qaɗelahppa daaglahnu ele heppig.

²⁹ Gililnu ukku aɗit laih uttugppanu amu, aa anen anen gililnu ukku aɗit ouqak daaglahnu, gililnu ukku laa oh ad laippu daatte amu, gililnu ukku aɗit imuppa ad aɗit daapiɗ. Igippa amu ag ring laippu daakkunu, aben ele bappaidppig. Ag gililnu ukku aɗit amu, anamib heppig.

³⁰ Ag amu heppig amunu, mettid haknu peh lag bitobppanu, gililnu ukku eblaih ewam ele daaegeg, diig ɠagattag daakkunu tatap silwappa hak am 16 aakku daappig. Gililnu ukku laippu waappa amu, diig ɠagattag daakkunu tatap aɗit aakku daapiɗ.

³¹ Ag amu oh hena, ag ad akasia aon, ag ad emaitak dayaknu gililnu ukku gamagppa mekkulagnu heppig. Ag gilil laa, am laih ulah yau uɗitteppanu daatte amu, ag gilil amuppa emaitak maknu ad tanig ele hewona,

³² aria, gilil laa, am laih yawalti uɗitteppanu daatte amu, ag gilil amunu ele tanig ele hewona, ag gilil laa, am laih qaban uɗitteppanu daatte amu, ag gilil amunu ele emaitak maknu ad tanig ele, ag amu ele heppig!

³³ Ad emaitak maknu amu, ad amu ag gilil gamagppa meppeg, ag gililnu elabnu melemel eleleppa daaglagnu bappaidppig.

³⁴ Aria, ag gililnu ukku amu oh golppa tonattona, ad emaitak maknu ad ele golppa tonadppig. Tonadna amu, ag ring gol laala, ag ad emaitak maknu gililnu ukkuppa qata-aqadkkulagnu ele heppig.

³⁵ Aria, ag amu hena, ag lamen okkai laa Oo Gun Ele, Oo Gunnab Ele makkulaknu heppig. Ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, ag muɗi amu oh aon, ag lamen okkai amu agappig. Ag hewona amu, ag lamen qaɗeppa bala koitaknu, ag danab amu haknu doyak okkainab ele mattaeg, ag engel okkai-kerubim dottog lamen amuppa koitadppig.

³⁶ Ag anam babaittona amu, ag ad akasia aon, biidod waɗele hoin, ag gol aon, biidod tonattona, ag biidod diig ɠagattag daakkunu tatap silwappa hak waɗeleppa galadkkulagnu heppig. Aria, ag gol huk laala, ag lamen amuppa aihkkulagnu, ag huk amu hattana, ag huk amu biidodppa atuladppig.

³⁷ Ag amu hena, ag lamen okkai laa, lamen amuam mettid haknu peh lagnu od oɗe tonakkunu daatte amu, ag lamen amu ele heppig. Ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, ag muɗi amu oh aon, ag lamen okkai amu agappig. Ag akkona, ag keeke koitaknu doya autanab awak danab mattaeg, ag amuppa kobol kobol koitadppig

³⁸ Ag amu hena amu, ag ad akasia aon, ag biidod tanig ele anen anennu huk ele, lamen amu amuppa aihkkulagnu hoyadna, ag biidod amu, ikkilkadppan bala aɗaknu ring ele golppa tonappig. Anam hena, ag biidod anen anennu ɠagattag daaglagnu tatap tanig ele brasppa hadappig.