Eksodas 34 - Nobonob Baibel

Men maha aɗit baula haataknu nai

¹ Amu Yawe Nug Moses amegppa inam aum. “Na men maha aɗit, na aoɗatme ele amu, na men maha aɗit amubia otaɗna bappaidna diiatppe, aria geha da nai anukka ye otaɗmi, amuib da eɗue ye otaɗkkul.

² Na men maha aɗit amu bappaidna, butti buttua na qaukoppa bekkutnu bappaidna, qauko Sinai be! Amu na qauko amu igippa da gumiɗna uɗie!

³ Danab laa nug na ele aib bepiɗ; danab laa nug qauko imuppa nakok laa ba daakkunu, am ele aib. Danab oh amu honapib daaglag. Am sipsip, makau keeke, amu ele ag uɗin, qauko guguittak gikkiɗah keeke, ii lamana,” awa aum.

⁴ Yawe Nug anam a, aria Moses nug men maha aɗit tatam daapiɗ bia otaɗowa, buttuanab aha, eppegppa mawata, Sinai qaukoppa teum; Yawe Nug amegppa haknunab aumbia, Nug heum.

⁵ Moses nug te, Yawe Nug bud ooppa qaukoppa ne, Moses ele daayya, Nug onig, Yawe, Nug onig amu Moses amegppa aum.

⁶ Nug anam ha, Nug Moses noobppa wanana, Nug inam anan mattiom. “Da am Yawe, Da am Yawe. Da Kayak, da am oo gai-iitta doya oo metta ehanittak diig, oo bodoette enanag maɗoɗ ele haknu diig ele. Da paha ool ii nauhtte. Dahil oo mauhaknab kobol, dahil oo metta ii uuak kobol ele am, ambeya, letaya nettep.

⁷ Da danab ah menuattak huu laippu bia tausen kuɗum bekkulagnu daatteb amu, da amu dilag oo mauhaknab kobol dahil dim lamidppi anidkkulag. Da nau hak, nai tappe nak, hipunin hak ele uhuqttem, amge da danab beɗulagppa aab ele amu, da ag bu madattem. Da ag bu aqatti ukke, ag buɗulkad menuattak huu laippu bia ewam, o waɗele batak amu, bu qak amunu uug ag ele aqadtte,” awa aum.

⁸ Yawe Nug nai amu mattia male, Moses nug pahanab gateg qaun o, gomela, iɗu wanppa ma, Yawe binag meum.

⁹ Moses anam ha, nug aum. “O Naɗi, genab danab ah imu ag am oɗe dim lamidmananu dabmak ɠagattag eppak danab ah amunu, na dahilnu ena doottem dayeb, na Naɗi, na ig ele gokkunignu oɗ medattem. Na geha ihinig nau hak, ihinig hipunin ele oh uhuqna mekkan, na ig am danab ah nahipadnab tutukku anam awigkkutnu oɗ medattem,” awa aum.

Yawe Israel ele ag baula tituanaknu nai qagappig

¹⁰ Moses nug anam a, aria Yawe Nug Moses amegppa aum. “Gemu amu, da heppi, da ag Israel ele ig gemu nug tituanta nai qakkagnig hettem. Nahipad danab ah noolagppa da geha uɗat ɠagattagnab, da anukka danab ah huu laa ohppa ii hemi ele amu, da ag noolagppa amu hekkul. Da amu hekkul amunu, danab ah laa, ag ag Israel, ag oolagppa daaglag ele amu, danab ah amu ag geha da, Yawe, ag da ag Israel, da ag ehanadkkulnu keeke okkai okkai digdig, danab amu antta, ebehi oh bodoetta le mette, da uɗat amu hekkul amu, ag geha amu anidkkulag.

¹¹ ⌊Nug tituana nai qakkak amuppa amu, da anam hekkul. Ag Israel amu, ag⌋ haknunab nai oh da gemu ag madakkulnu hettem amu, ag dimib lamitteg! Ag dim lamidppeg, da heppi, ag Israel ag Amo danab, Kanan danab, Hit danab, Peres danab, Hiwi danab, amu Jebus danab ele lamadkkulag.

¹² Amge ag tutukku dabmeig! Ag danab ah wan ag gemu gona aoglagnu hetteb, ag aguppa daatteb amu, ag Israel, ag danab ah amu ele aib nug tituanppig! Ag anam heppeg amu, danab ah amu ag oolagppa daan, ag ahilag kobol nau hekkulagnu ag eeɗadppeg, ag nena qena, nauhna autna aoglag.

¹³ Ag nug tituanak ag ele ii hemana. Iitta! Ag danab amu dilag kayak hambuppuak dilag qaɗab amu, ag heppeg nauhatteg! Ag men gappi ahilkad aoɗadna heppeg, iitta meig! Amu ag kayak hambuppuak Aserah dabmekkulagnu biidodnu amu, ag amu okkuladppeg neig!

¹⁴ Aɗinu? Da Yawe, da onil laa am Dahil Doya Laa Aomanu Doyak Aɗeɗe Daattem; da am Kayak, da dahilad dilagnu dahil doya laa aomanu doyak aɗe daattem amunu, ag kayak hambuppuak laa noobppa dup nona binag aib meppig.

¹⁵ Amge ag tutukku dabmeig! Ag danab ah wan ag gemu gona aoglagnu hetteb, ag aguppa daatteb amu, ag Israel, ag danab ah amu ele aib nug tituanppig! Danab ah amu ag kayak hambuppuak noolagppa dup nona binalag metteb amunu, ag danab amu ele nug tituankkulag dayeb, haen danab amu ag ahilkad kayak hambuppuak noolagppa dup nona binalag menana, ag doɗ ele main ag mattaglag, kobol amuam dahil neekkakppa gappai aɗa oiyak kobol bia daatte amu, ag amu henana, haen amuppa ag Israel, ag ag ele oh laippu qagmena, geha ag doɗ main, kayak hambuppuak mettaglag, amu ag oh teppu amu lakkulagnu appeg, ag gona, ag ele teppu amu lakkulag. ⌊Amu amuppa ag kayak hambuppuak noolagppa dup nona binalag mekkulag amunu, ag aibnab ag ele nug tituanak heppig.⌋

¹⁶ Am laa amu, ag Israel ag danab ah amu ele nug tituanak hekkulag dayeb amu, haen ag ahilkad nid bau dilag ah huu amuppanu diiglag, am geha ah amu ag kayak hambuppuak ahilkad noolagppa dup nona binalag menana, ag ag gamulkad eeɗadppeg, ag da uuiɗna, kayak hambuppuak amu noolagppa dup nona binalag mekkulag. Kobol amuam dahil neekkakppa gappai aɗa oiyak kobol bia daatte,” awa aum.

¹⁷ Yawe Nug nai amu ana, Nug nai tuɗitta aum. “Ag kayak hambuppuak dottolkad golppa, silwappa, o brasppa keeke, aib heppig.

¹⁸ Ag Bret Yis Iitta Lanaknu Hobul Nakok aib daulag atiom; ag gamag ahak ele heig! Ag henana, haknunab nai deɗ amunu oh da mattami amu, ag amu dim lamitteg! Ag kalam Abibppa Isip uuppig amunu, maɗ ohppa, kalam amuppa, da amibia, ag bret yis iitta deɗ eblaih aɗit ele laig!

¹⁹ Ag ah oolkadppanu nid ⌊danab⌋ tatamnu, doɗ ele oolkadppanu nalkad dawai tatamnu dotteb oh amu, ag da, Yawe, ag da meɗaglag. Ao, doɗ nalkad dawai tatamnu oh amu, ag da Yawe, dahil daaglag.

²⁰ Ag donki ⌊gaiɗ⌋ tatamnu qagaiettakppanu eɗua uhuqak dayaknu hekkulagnu, ag sipsip nag laa aon main, Kayak mettaglag, amge ag amu hekkulagnu uuglag dayeb amu, ag donki ⌊gaiɗ⌋ amu duug qiippeg mauhkku. Anam amge, ahilkad nid danab tatamnu amu, ag tituanakppanu eɗua uhuqak hekkulagoitte. ⌊Amu oh dahilad daatteb amunu,⌋ laa nug dahil mettid lakka, da noolppa eppeg hamu aib uɗiom.

²¹ Mettid ohppa ag deɗ eblaih laippu ele uɗat hekkulag, amge deɗ eblaih aɗitppa ag uɗat ii hemana, ag hik aweg! Datta wan obatak dayeb, o datta ee oɗuom, awa lakka mak haen daakku dayeb amu, ag amunu aib uug aqom, amunu ele dabmak aib aoppig. Ag deɗ ebqak eblaih aɗit ele amu, ag deɗ amuppa uɗat ii hemana; ag hik aweg!

²² Ag wit keeke, oɗue digmena aotteb haenppa, ag Ee Tatam Oɗue Digma Awaknu Hobul gamag ahak ele hekkulag. Laa amu, maɗ alag mauhtte haenppa, ag Pehppa Dayaknu Hobul ele gamag ahak ele heig!

²³ Maɗ anen anenppa haen ewam ag Israel danab oh ag da, Naɗi Yawe, ahilag Kayak, ag da noolppa dup nona, da binal mekkulagnu, ag da amelppa uɗieg!

²⁴ Amu geha da heppi, ag Israel, ag danab ah huu laala, ag gemu wan da ag Israel madattemppa daatteb, ag ag lamadppeg, da wan amunu tom okkai ag Israel madakkul. Amu ag maɗ ohppa haen ewam, ag da Yawe, ahilag Kayak, ag da noolppa uɗiglag amu, haen amuppa da heppi, danab laa ag ahilag wan aoglagnu ii dabmemana.

²⁵ Aria, haen ag doɗ laa main meɗanna amu, ag bret keeke, yis ele heppig amu, ag amu doɗ main meɗattebnu tiig ele, ag keeke aɗit amu mana mettak laippuppa aib main meɗappig. Aria, ag Pasowanu ee lappeg, sipsip amunu teppu big laa dayeb amu, big amu dayeb ukkeb, aib wagkkaɗom!

²⁶ Ag ee tatam oɗutte ele, ag ee amunu laih enanag aon, da Yawe, ahilag Kayak, ag ee amu aon, da laulppa uɗieg! Ag meeme nag, anignu huhppa aib badippig,” awa aum.

²⁷ Yawe Nug anam anana, Nug nai tuɗitta, Moses amegppa aum. “Da hei, da na, Israel danab ah ele nai imuppa nug tituanta nai qakkamut amunu, na nai imu oh uɗug laappa ye!” awa aum.

²⁸ Amu Moses nug Yawe ele qaukoppa deɗ 40 daayya, tuqan 40 ele daapiɗ. Moses nug appa anam dayaya, nug ee laa ii laum, le ele ii laum. Am Yawe Nug men maha aɗit, Moses awa teum ele, Nug amuppa nug tituana nai qakkak heppig, Nug amunu nai yom. Nai amuam Yawenu ɗo 10.

Moses nug Sinai attannu aha, honap neum

²⁹ Aria, haen Moses nug qauko Sinai uua, nug men maha aɗit ɗo nai yaak niitte mawa noa, nug Yawe ele nai madipiɗ, diig amunu nug iɗu huanak amahlom, nug amu ii doyom.

³⁰ Nug ii doyom, amge haen Aron nug Israel danab ah ele ag Moses iɗuppa amahlak amu anidna amu, ag baɗan, ag nug gumidna ii wappig.

³¹ Ag anam heppig, amge Moses nug ag onilagppa e, Aron nug Israel dilag ikki danab ele ag nug gumidna waeg, Moses nug ag amelagppa nai mattiom.

³² Nug ag amelagppa nai mattie, dimppa amu, Israel laa oh ag Moses gumidna ukkaeg, nug ag oh amelagppa haknunab nai oh Yawe Nug nug Sinai qaukoppa mettom amu, nug amu ag amelagppa mattiom.

³³ Moses nug amelagppa mattia malowa, nug lamen qatti awa, iɗu hautom,

³⁴ amge haen Moses nug Yawe ele nai mattiglahnu Nug gumitta gottom amu, nug lamen qatti amu awowa, daye ukke, nug eɗua dimittim uɗiowa amu, nug Yawe haknunab nai aɗi aɗi ippunittom amu, nug Israel danab ah amelagppa mattiom.

³⁵ Mattieye, danab ah ag Moses iɗuppa amahlak anidttappig amunu, nug ag amelagppa nai mattia malowa, nug eɗua haute dayeye ukke, nug eɗua Yawe ele nai mattiglahnu gumitta gokkunu ha, nug iɗuppa lamen qatti amu aottom.