Eksodas 33 - Nobonob Baibel

Yawe Nug Moses Israel danab ah omalatta, Kanan wanppa gokkunu amegppa aum

¹ Amu Yawe Nug Moses amegppa inam aum. “Na danab ah na Isipnu omalatte uɗippig ele amu, ag aben imu uun, wan laa, da Abraham, Aisak, Jakop ele wan amunu amelagppa, ‘Wan laih umu, geha da ag buɗulkad madakkul’ mattien, nai ɠagattag qettami amu, ag wan amuppa gokkulagnu omaladna ukke!

² Ag gobeppeg amu, da geha engel laa meppi, nug ag noolag awa, anuqa gokku. Amu nug geha heeb, ag Israel ag ⌊wan amuppan danab,⌋ ag am Kanan danab, Amo danab, Hit danab, Peres danab, Hiwi danab, amu Jebus danab ele, ag ag lamadkkulag.

³ Ag gobeppeg, da ag ele wan amuppa, wan amuam enanag, wan ittag ele, amuppa ee meu huana otte amu, da ag ele oh ouqeta, wan amuppa ii gomata. Aɗinu? Ag am oɗe dim lamidmananu dabmak ɠagattag eppak danab ah. Da ag ele oh ouqeta gota, ibppa ag eheɗ laa heppeg amu, da heppi, ag ibppa padal mekkulagtai,” awa aum.

⁴ Yawe Nug Moses amegppa anam a, ⌊dimppa⌋ Moses nug ⌊qaukoppanu noa dayaya, nug⌋ Yawenu nai ɠagattag amu danab ah matte, haen ag doon, oolag uug ele daye amu, ag bala ena golppa, o silwappa hak keeke, ag bala ii meppig.

⁵ Aɗinu? Yawe Nug matu Moses amegppa, nug Israel amelagppa akkunu ana, ahilagnu inam aum. “Ag am oɗe dim lamidmananu dabmak ɠagattag eppak danab ah amunu, da ag ele oh haen tutuib ouqeta golom, am da paha heppi, ag padal melobtai. Anam amunu, ag beɗulagppanu gol ring keeke, ag amu oh uhuqadppeg neeb, da geha ahilagppa aɗi hekkulnu dabmak awen hekkul,” awa aum.

⁶ Yawe Nug anam aum, haen amuppa ag Horep qaukoppa daappig amu, haen amuppa ag bala amu uhuqeg ne gonana, ag eɗun ii meppig.

Peh lag laa qappaknu nai

⁷ Amu Moses nug peh lag laa awa, haen tutu dayaknu aab kalak dimittim nakok piɗe bia buuttom. Nug peh lag amunu, “Yawe ele qagmaknu peh lag,” aum. Nug anam heehe, am aun laa nug Yawe keeke laanu oɗ medakkunu heum ele amu, nug peh lag amuppa gottom.

⁸ Amu haen Moses nug peh lagppa ukkom amu, danab oh ag ahan, ahilkad peh lag odppa hippaidna daanna, ag Moses nug ukka, peh lag amu ooppa noono anidppig.

⁹ Ag anttegeg, Moses nug lag ooppa no, aakku lombig teppu ele attan tak nug uɗia, peh lag amu od guguitta dayaya, od amu tone, Yawe Nug Moses amegppa nai mattiom.

¹⁰ Anam hanhan beum, amu haen danab ah ag lombig teppu ele attan tak amu, ag oh peh lag odppa dayeye anidna amu, ag peh lag ahilag odppa hippaidna daanna, ag dup nona, Yawe binag meppig.

¹¹ Ag anam heeg, Yawe Nug Moses amegppanab nai mattiom; danab layag amegppa nai maditte, anambia nug Moses amegppa nai mattiom. Yawe Nug nai amu mattia male, aria Moses nug eɗua, haen tutu dayaknu aab kalakppa gottom, amge Mosesnu maɗi nid, nid danab bau, Josua, Nan bekka, nug am lag ooppa daattom. Nug peh lag amu ii uuttom.

Yawe Nug nuhikkud danab ah ele daaglagnu nai

¹² ⌊Amge Moses nug qaukoppa dayeye, Yawe Nug Moses danab ah amu anuqa omalatta ukka, wan laappa tekkunu a⌋ amu, Moses nug Yawe amegppa aum. “Na da amelppa da danab ah imu anuqen omalatte, ahilag wanppa gokkulnu attem, amge na da aun nug da ehaniɗeb gokkunig amu, na amunu da amelppa ii ame. Na amunu ii ame, amge na, ‘Da na dooitte aute awe, am da nahipnu ena doottem,’ ame

¹³ amunu, na dahilnu ena doottem dayeb, aria, na nahip dabmakppa aɗi daatte am appe, da doye, geha da nahipnu tutukkunab dooppi, na heppe, da haen oh kobol na oot daatte aakkuib, da hekkulnu oɗ medattem. Am laa amu, danab ah imu amu, ag am nahipad danab ah, na amu ele dabmekkutnu oɗ medattem,” awa aum.

¹⁴ Moses nug anam a, aria Yawe Nug aum. “Da amu, da geha ag ele oh gokkunig, amu amuppa da na dahil oo maɗoɗ na medakkul,” awa aum.

¹⁵ Yawe Nug Moses amegppa a, nug eɗua Nug amegppa aum. “Na ig ele oh anam ⌊genab⌋ ii gokkunig dayeb amu, aria na heppe, ig imuppanu ahat ii gomatanu oɗ medattem.

¹⁶ Aɗinu? Na ig ele anam ii gopput amu, danab ah huu laa ag na dahilnu ena doottem, am nahipad danab ah dilagnu ele ena doottem amu, ag amu attem dooglagnu elele? Na ig ele, elele anam ii gopput amu, ib adekkuppa danab ah huu laappanu ag dahilnu, nahipad danab ah dilagnu ele, ig am danab ah huu laa dooglag?” awa aum.

¹⁷ Moses nug anam a, aria Yawe Nug Moses amegppa aum. “Da nahipnu ena doottem, da na dooitte aute aottem amunu, da am geha, na ame bianab, da anam hekkul,” awa aum.

¹⁸ Nug a amu, Moses nug Nug amegppa aum. “Da binag amahlak oppiaawak ele nahip da ippuniɗkkutnu unuqidttem,” awa aum.

¹⁹ Nug anam a amu, Yawe Nug Moses amegppa eɗua, nob ma inam aum. “Da geha dahil kobol ena oh na ippunittoya, geha da onil, Yawe, da amu na noomppa mehuqkkul. Doye! Da danab laanu oo gai-iitta doya oo metta ehanittak kobol dim lamidkkulnu ool daatte dayeb amu, da aakku hekkul, o da danab laanu oo bodoetta le maknu kobol dim lamittaknu ool daatte dayeb amu, da anam hekkul.

²⁰ Amge danab laa nug da iɗul anidkku dayeb amu, nug mauhkku amunu, na da iɗul anidkkutnu am elele iitta,” awa aum.

²¹ Yawe Nug anam anana, Nug tuɗitta aum. “Antte, men okkai laa aakku, da gukkuiɗak daatte, amu na men amuppa tena hippaidna daakkut.

²² Na tena daappe amu, haen binag amahlak oppiaawak ele dahil na guguitta uɗiebeb, geha da na men oɗe laappa inittoya, da eppel na tonittebeb, da qe-eɗitten gobippi,

²³ geha da eppel amu eɗue aoppi, na da gomel aakkuib anidkkut, amge na da iɗul ii anidkkutoitte,” awa aum. ⌊Amu dimppa, Moses nug qaukoppanu neum.⌋